Fandun fa Yanadi Yor faro Santo Sya Ke?

Kankarem ro Refo

Oroḇa. Refo ya doḇe konadi kor faro Manseren Allah derer monda, kuker snonsnon Yesus. Yesus manggundi ikofenḇair faro manfamyan ḇyesi radine, ”Inja mkoḇenadi radine: Kma nkobedi ro boiyaswa, Nkofasren Snomḇri kada.” (Matius 6:9, Wos Ḇyak ro Rasras) Iwan manfamyan ḇyesi fa senadi faro santo sya ḇa, malaikat, ḇaido manseirya kako, mboi senadi sor faro Manseren Allah derer monda.

Yesus ikofenḇair faro manfamyan ḇyesi radine kako, ”Aya ine kada nyanya ma napnapes ma kankenem. Snonkaku oso ḇaḇeri ḇerama faro Mami, rofyor imbranuk ro ayaḇa.” (Yohanes 14:6, WḆR) Manseren Allah kyur Yesus derer fa ḇye nyan faro snonggaku ma Allah manggundi.​—Ibrani 7:25.

Yanadi faro Allah ma yanadi faro santo kako ido na rariso?

Fafisu Manseren Allah byuk Parenta ri Samfur anya, doḇe, ”Aya, MANSEREN, Allah bedi, iso Allah ḇemambayayir.” (Keluaran 20:5, TB) Wos Allah ”ḇemambayayir” ine ido rosairirya kaku? Fasfas kasun ro Refo Katolik New American Bible ikofen ḇo doḇe Allah ”dor samsyom ḇekur faro oser monda”. Manseren Allah dor kaku insama samsyom koḇena ḇaido rosai monda kofrur ro kenem koḇena faro fararur ḇesren—nadi kako—fandun fa kobuk na faro I monda.​—Yesaya 48:11.

Konadi faro roi ḇese, ma santo ḇaido malaikat kako ido, na kofrur fa Manseren Allah sneri iduf. Fafisu manwawan Yohanes imbe kyunem faro malaikat oso, malaikat ani imewer ḇo doḇe, ”Bansuba awer! Bansuba faro aya awer, mboi bansuba faro Allah! Snar aya kako manfamyan imnis aw ma imnis naek srar besi ḇeyufepen wos ḇekaku ro Yesus ḇyaryasna!”​—Fasasna (Wahyu) 19:10, WḆR.