FAKFUKEN RO ROMA INAI BABO
Payamyum Rosai Na Yasmai ro Wos Refo ya?—Bar 1: Mambir Wos Refo ya
”Yasewar kwar fa yawasya Wos Refo ya. Fama yamam ḇoi ikpor manggenem mura, rya yamyaren yawasya na ḇa!”—Briana, umur ḇyeja taun ri 15.
Au kako kwara rarirya ke? Rarirya ido, awawos ine isrow faro Au!
Yawasya Refo insama?
Kwara wawasya Refo nama nafrur papum monda ke? Imbude kwara Refo ima syap ḇekpor monda, fasfas ḇyena iba ḇa mgun, ma nya sonin oḇa. Inja woḇe ipyum syadi mam Televisi ma felem monda!
Mboi kwara roi ine ari: Wasrow kas ḇeser nana arasai sikram fyoro kwar ido, na wamarisen wafawi roi sikram ro dori na ke?
Refo ima imnis ra kas ḇeser nana arasai kukro naser permata ḇebor, isoine anun ḇepyum insama:
Kwinfir pyum
Kwain pyum kuker Awin Kamam su
Wasrow bati ḇepyum
Kakara Bena napyum
Rosai ḇefnai fa syap ḇekwar ine byuk payamyum kaker ḇe ko ro baboine? Kukro fasfas ḇero Refo nakam ndramuma ro Knam ḇebuk anun ḇepyum nakam, isoine Manseren Allah.—2 Timotius 3:16.
Refo ima imnis ra kas ḇeser nana arasai kukro naser permata ḇebor, isoine anun ḇepyum
Moḇsa yawasya randak rai?
Nyan ḇepon kaku iso wawasya Refo ya isof ibro. Wafrur roi ine kada insape na wafawi wos ḇero Refo ya ḇesiper. Nyan fa wawasya randak Refo ya nabore. Rupa ra:
Wawasya syap ri 66 ro Refo ya imnis syos ḇyena, isoine ro syap Kejadian isof ro Fasasna [Wahyu].
Wawasya Refo imnis fafisu sarisa ḇyena.
Angginem: Lampiran A7 ḇero Refo Terjemahan Dunia Baru naser syos ro Yesus marandan kankenem ḇyedi fafisu ikenem ro supswan.
Nyan ḇe suru iso kwinfir fawar ro snonggaku sfas ro Refo ḇesmai samswen raris Au. Rupa ra:
Wamarisen nwa bati ḇekyar Au ma wakyar i ke? Rarirya ido, wawasya fawar ḇekur Yonatan ma Daud su. (1 Samuel, fasal ḇe 18-20) Raimnai, mam ro ram fararur ”Cara Mendapatkan Sahabat yang Loyal” insama bisa wakfrur ra su.
Wamarisen syadi fa pampum farawrowes na ke? Rarirya ido, wawasya moḇsa Yusuf pyampum farawrowes na rai. (Kejadian, fasal ḇe 39) Raimnai, mam ro ram fararur ”Cara Menolak Godaan . . . Yusuf—Bar 1” ma ”Tuduhan Palsu! Yusuf—Bar 2” insama bisa wakfrur ra Yusuf i.
Wamarisen wakfawi payamyum ro nadi ya ke? Rarirya ido, wawasya Nehemia fawar ḇyena. (Nehemia, fasal ḇe 2) Raimnai, mam ro ram fararur ”Allah Menjawab Doanya” insama bisa wakfrur ra Nehemia i.
Angginem: Imbe wawasya Refo ido, swewar moḇ ḇeboyas ḇa insama kwara pyum rosai wawasya na.
Nyan ḇe kyor iso wawasya fawar oso ḇaido mazmur, mura kwarauser moḇsa waso na ro kenem Bena rai. Wawasya Refo kwar ido, kwara radine:
Rosai ḇefnai fa Yahwe imarisen sfas roi ine ro Refo yandi?
Rari ma rosai Yahwe ifrur ro fawar ine na?
Moḇsa na yakfrur roi ine ro kenem yena rai?
Angginem: Fasos ḇepon na! Fas tanggal risai na wawasya randak Refo ya kuker mam ro Jadwal Ḇaḇewasya Refo ḇero situs web jw.org kobani.