Snonkbor oso dores myam kawasa sya simbran sisun ḇe Balai Kerajaan

FAKFUKEN RO ROMA INAI BABO

Rosai Ḇefnai fa Kora Kakso Ari ro Balai Kerajaan ya?

Saksi-Saksi Yahwe sya sifrur fananjur ari rarwan risuru ro usbu oser ro moḇ seari sor ḇe Balai Kerajaan. Rosai sifrur ro diwani? Rwama wakso ro sarawrow ani ido, payamyum rosai nari waksmai ya?

Rosai sifrur ro Balai Kerajaan?

Balai Kerajaan ima moḇ fa sfarkor Refo ya ma roi nane nbuk payamyum faro kankenem koḇena ro ras nakam. Fananjur oroḇaido sarawrow ine, isaramper Au fa:

wasmai fawawi ḇekaku ḇekur Manseren Allah
wafawi roi ḇebor ḇejadi ro dunya ine.
wakenem ḇe snonggaku ḇepyum syadi.
wasrow bati ḇefrur pyum.

Wafawi ke? Saksi-Saksi Yahwe sya rum ari sena sap na ḇe Balai Kerajaan kukro roi sawos ker ro diwa iso Allah Karajan Ḇyedi.—Matius 6:9, 10; 24:14; Lukas 4:43.

Rosai ḇefnai fa rwama wakso?

Roi rwower ro diwa nbuk payamyum ḇe Au. Farkarkor ro Refo sawos ro fananjur ine isaramper Au fa wasmai fawawinanem. (Amsal 4:5) Rarirya, fawawi wasmai ro Refo anya na isaramper Au fa wunwos snemuk ḇepyum ro kenem Bena. Refo ya iser kankarem faro fakfuken-fakfuken ḇefandun kaku, raris:

Ḇerama ine iso rakrok ro faya sawos ro fananjur ari usbu pupes ya:

Rosai Ḇefnai fa Wos Refo ya Fyarkin Ko?
Moḇ Risai Wasmai Fafnoḇek ro Fafisu Ḇesamswen?
Roi Karajan Allah Ifrur Kwar faro Ko ro Baboine.

”Bati ro rumfarkor ayeja ryama dakso fananjur ine. Kyainus kina ayesi, ma nggobas kayam syap-syap na. Nggomnai kwar mura, ikofen ḇo doḇe myanen kaku snonggaku ḇebuk kankarem ro farkarkor anya. Ikofen wer ḇo doḇe myam sakfrur farkarkor ḇeradirya ro gereja ḇyeja ḇa.”—Brenda.

Wafawi ke? Ro Balai Kerajaan, sor ḇaḇyak ḇa ma sor kolekte ḇa kako.

Ḇaḇebati ḇepyum ḇebuk kananon. Refo ya doḇe roi oser ḇefnai kaku fa snonggaku Kristen sya siryur kayamyam iso insama sisambraḇ si. (Ibrani 10:24, 25) Dunya ine ifo kuker snonggaku ḇefaḇri manggun si. Imbape fafisu korama koso fananjur ari ine, na koḇebati kuker snonggaku ḇemam Allah ma min sesi ḇe roi ḇefandun syadi. Inja, kokyar sarawrow ḇeradine nari nafrur sneprei kaku!

”Yafararur ro arwo rawo mandira kwar ido, ras ono yamor ma yaryaḇ ḇa. Mboi snonggaku yasrow ro Balai Kerajaan sifrur aya fa yaryaḇ kaḇer. Fafisu yabur ḇe rum, yamarisen ma yafasos kwar fa yafrur fararur ayena ro ras meser ya wer.”—Elisa.

Wafawi ke? Saksi-Saksi Yahwe sya sidang jemaat sedi ro supswan ine ḇesiper barbor ya nasyadi ro 120.000. Moḇ seari ro na nasyadi ro 60.000. Snar kawasa ḇeyakso sya sibor syadi wer,a inja ro taun ḇebabo wer sifrur rum ari ḇaido Balai Kerajaan ine barbor ya 1.500.

Bati Besi roi sikofen na

”Fafisu yaro SMA, bati ayeja ro rumfarkor dakso aya rarwan riḇeso kwar ḇe fananjur ari ine. Kyandor ḇo imarisen kukro myam eba kasun, sinan romawa, sfarkor Wos Refo ya kayamyam. Insape swaf riḇeso ḇarpur ine, bos ayeja ryama dakso, ma kyamanen kukro myam nggobas ker Refo ya. Yamam mboi rya ḇyesyowi ari nggoḇenane. Roi nane nafrur fa ayano yaḇesyowi syadi fananjur ari ine!”—Jessica.

”Yaso fananjur ine ido, na yafarander samswen ayena ro ras-ras na. Nggofarkor nyan insama kenem nggoḇena nefromo ḇa, nggokenem ḇe snonggaku ḇefrur pyum syadi, ma roi ḇesena. Yabur ḇe rum ido, yasmai sneprei ker ma yaryaḇ kaḇer.”—Timothy.

”Snon oso yor fa ryama dakso ro fananjur ine, ikofen ḇo doḇe, ’Randak ya, imbe yarama yakso insama yasewar sasar ro kakyar mgoḇena. Fama, yamam kaku kakyar ayena iso ḇesasar ya!’ Myanen Saksi-Saksi Yahwe sya kako kukro myam frur pyum sena. Doḇe, ’Insape kosrow ko ḇo mgofrur aya raris kosrow ko fyoro kwar!’”—Jacob.

”Fafisu ono yakara ḇo yoḇe, ’Ari ine imnai, yaḇe yabur ḇeri.’ Mboi ari ya imbran ido, kakara ḇeradirya naisya ḇa. Nggoḇeari raposa, yafarfyar kuker snonggaku ḇesesya, mura yafarander imbe yabur ḇeri anya. Yakso ro fananjur ari nane oḇa ido, na yapok yana bati ḇefrur pyum sya ḇa.”—Madison.

a Imbe wafawi moḇ nggoḇeari ro na ido, mam situs web jw.org ro ram ”Fananjur Ari ro Saksi-Saksi Yahwe Sya” panepen ro ”Swewar Moḇ Ḇefanam”.