Saksi-Saksi Yahwe Sima Sifnai fa Kina Koḇesya Sḇesisye Ke Skain Pyum?

Saksi-Saksi Yahwe nggoma nggosewar kaku fa kina nggoḇesya ma snonggaku ḇesesya kina sesya kako skain pyum. Nggoḇesyowi Manseren Allah Ḇefrur randak kina ine. (Kejadian 2:​21-​24; Efesus 3:​14, 15) Sinan byuk wos farkin ro Refo ya insama snonggaku ḇero supswan ine ḇesiper siso na ido, na sismai payamyum ro farḇakḇuk sena bo sna marasrisen ma skain pyum.

Saksi-Saksi Yahwe Sima Sifrur fa Kina Koḇesya Skain Pyum

Nggosewar kaku fa nggoso pyum anun ro Wos Refo ya insama nggokenem ḇe snonswa, binswa, ma sinan ḇepyum syadi. (Amsal 31:10-​31; Efesus 5:⁠22–​6:4; 1 Timotius 5:8) Wos anun ḇero Refo ya isaramper kako bin ma snon ḇena agama ḇesisye insama farḇakḇuk suḇena napyum. (1 Petrus 3:​1, 2) Wakkarapan sia sfawar siswasi ḇeyakro Saksi Yahwe, sikofen radine:

• ”Nufarḇuk ro swaf taun ri wonem kwar, fama nurakrok ker ma nufafayaf. Imboi, rofyor Ivete dakḇe Saksi Yahwe kwar, isawarwar syadi ma imsor fasawsaw ḇa. Yamam fyadwer kenem ḇyeja ḇeri, nane nafrur fa farḇakḇuk nuḇena namuk ḇa.”​—Clauir, ḇeraker sup Brasil.

• ”Rofyor snon yabuk ya, Chansa i, isya fyarkor Refo kuker Saksi Yahwe sya, yamarisen ḇa kukro yakara nari sifnai fa kina ayesi nggoḇesisye. Fama, yamam mboi Refo ya isaramper farḇakḇuk nuḇena fa napyum.”​—Agness, ḇeraker sup Zambia.

Fafisu nggora nggobaryas, na nggokofenḇair yoḇ kawasa sya snar wos ḇero Refo nasaramper si fa

• Skinfir pyum mansei imbe sna ḇe swa ḇepyum

• Simbran pyum marandan farḇakḇuk sena ro taun ḇerandak ya

• Skain pyum kuker mambanyo ma imbanyo sesya

• Sfasos pyum kumpan sena

• Srakrok ker ḇa

• Sikram masasor ḇa

• Sfarkor pyum romawa sesya

Kosun ro agama ḇese nari nafnai fa farḇakḇuk koḇena nyapnap ke?

Imbo, roi ine na ryarirya ḇae. Rupa ra, ro kafkofen ḇesasyar ro taun 1998 ḇeraker lembaga riset Sofres, doḇe farḇakḇuk ri 1 ro 20 sna samswen rofyor snon ḇaido bin ya derer monda iso ḇe Saksi.

Yesus ikofen ḇepon kwar bo doḇe snonggaku ḇeso farkarkor ḇyena swaf ono nari saksmai samswen ro kina sesi. (Matius 10:32-​36) Snon sejarawan oso ḇenir ḇe Will Durant, ḇekenem ro awar Papoik Romawi, ikofen radine, ”Snonggaku Kristen sifrur fa kina sya snapnap”.a Baboine, Saksi-Saksi Yahwe saksmai wos ḇeradine. Inja snon ḇaido bin oso ḇye Saksi ido, iso ḇefnai fa kina suḇesya snapnap ke?

Mahkamah Eropa faro Hak Asasi Manusia sisasyar wos snemuk sena faro snonggaku ḇeyoḇe Saksi-Saksi Yahwe sima sifnai fa kina sya snapnap. Sikofen bo soḇe snonggaku ḇefnai fa kina sya snapnap iso eḇe Saksi ḇa sya, kukro simewer smam ma sesyowi karyer sesya sfasnai ma sifrur ari sena. Mahkamah ani ikofen wer radine, ”Roi ḇeradine na komam na ker ro mambeswa imbeswa ḇena agama ḇesisye, Saksi-Saksi Yahwe sya kako saksmai roi ḇeradine.”b Ḇepyum syadi wer, fafisu sifrur pyum Saksi Yahwe sya ḇa, Saksi sine sisewar kaku fa siso monda anun ro Wos Refo ḇeyoḇe, ”Rofyor ono sifrur sasar faro naek srar mkoido, mkomunsu awer na kuker ḇarḇor. . . . Ro ḇar mkoḇedi, mkosewar fa mkokenem kuker aski faro snonkakusya kam.”​​—Roma 12:17, 18.

Roi eḇedari Saksi-Saksi Yahwe skinfir fa sfarḇuk monda kuker snonggaku ḇe Saksi kako

Saksi sya siso parenta ro Refo ḇeyoḇe sfarḇuk monda kuker ḇekyar faro Kristus, oroḇaido sfarḇuk kuker ḇena agama oser. (1 Korintus 7:​39) Parenta ine ryamuma ro Refo monda ḇa, mboi koso na ido na kosmai payamyum. Rupa ra, fawar ḇero taun 2010 ro Journal of Marriage and Family (Syap Farḇakḇuk ma Kina) doḇe komam kada ”snon ma bin ḇena agama ma kayaryar oser” wis farḇakḇuk sena na napyum syadi wer.c

Fama, Saksi sima sor si fa simuk awer farḇakḇuk sena kuker swa sesya ḇe Saksi ḇa. Refo ya doḇe, ”Rofyor snon Kristen oso fyakawin kuker bin ḇekyar faro Kristus ḇa, ma bin ani imarisen ikenem fnoḇek snon ani, inja snon ani fyaspar aweri. Ma rofyor bin Kristen oso fyakawin kuker snon ḇekyar faro Kristus ḇa, ma snon ani imarisen ikenem fnoḇek bin ani, inja bin ani fyaspar aweri.” (1 Korintus 7:​12, 13) Saksi-Saksi Yahwe sufepen nako parenta ine.