FARKARKOR 44
Manseren Allah Imarisen faro Ras Ḇeba Nakam Ke?
Yahwe imarisen fa kosmai marasrisen ro kenem koḇena ma ro fafisu kofrur munara ya kako. Imbape, imarisen faro ras ḇeba nakam ke? Fafisu kokinfir imbe kofrur ras ḇeba oso ke roḇa, moḇsa na kosewar insama kofrur fa Yahwe imarisen?
1. Rosai ḇefrur fa ras ḇeba ono Yahwe imarisen na ḇa?
Imbude na kwandor kukro wafawi ras ḇeba ono naisya neknam ro Refo ya ḇa ḇaido ndramuma ro farkarkor ḇekaku ḇa na. Ras ḇeba ḇeradine nefasfes kuker agama ḇekaku ḇa na. Ras ḇeba ono wer, nya fasfes kuker rur ḇeḇarḇor sya ḇaido neknam ro farkarkor kenem ḇepok ḇemar ḇa. Sia wer, sifrur munara ono insama roi ḇeḇye ḇa myun si ḇa. (Yesaya 65:11) Yahwe byuk swarapepen ḇe kawasa Ḇyesi bo doḇe, ”Mkoḇinkwanbur si. Mkopampam awer beri kuker roi ḇeyarwarem.”—2 Korintus 6:17.a
2. Moḇsa Yahwe myam ras ḇeba sifrur fa sbukisyom snonggaku sya rai?
Yahwe byuk swarapepen ḇe ko insama kosapi awer ro roi ḇedenem ko, isoine, ’kokyar faro snonggaku sya’. (Kowasya Yeremia 17:5.) Ras ḇeba ono sifrur na fa sbukisandik snonggaku ḇena nasan sya ḇaido sordade ḇemar ro mamamun na. Ḇesesya wer sifrur ras ḇeba fa sbukisyom kakop ro er sedi ḇaido sbukiswarepen ras er sedi sismai makakei ya. (1 Yohanes 5:21) Snonggaku ḇesesya wer sifrur ras ḇeba faro organisasi polotik ḇaido sosial. Kwara ido, moḇsa Yahwe myam ko fafisu kobuk samsyom koḇena faro snonggaku oso ḇaido organisasi oso, ḇefrur roi ḇemnis kuker marisen Ḇyena ḇa?
3. Ras ḇeba rosai na ḇefrur fa Yahwe imarisen ḇa?
Refo ya doḇe Yahwe imewer kaku ’masaser, munara ḇefnak pipi, ma farandinem’ na. (1 Petrus 4:3) Ro ras ḇeba ḇeḇeso, snonggaku sya sfasnai simku manggunsi ḇa mura sifrur roi ḇeḇye ḇa kaku. Imbe koḇebati pdef kuker Yahwe ido, fandun fa komam kenem koḇena fa nasren pdef.
SWEWAR KAKU WER
Nari kawosḇair nyan insama wafrur fa Yahwe imarisen fafisu imbe kwinfir fa wafrur ras ḇeba oso ke roḇa.
4. Pampum ras ḇeba Yahwe imewer na
Kowasya Efesus 5:10, raimnai kawos fakfuken ri kyor skoine:
Kokara fa imbe kofrur ras ḇeba oso ido, rosai fandun fa komam ḇepon na?
Ras ḇeba risai kawasa sya sifrur ro moḇ Bedi?
Kwara ido, Yahwe imarisen faro ras ḇeba ḇeradirya na ke?
Rupa ra, sifrur munara ras ulang taun. Kwara ido, moḇsa Yahwe myam munara ras ulang taun ine rai? Refo ya dakfas ḇa Yahwe manfamyan Ḇyesi sakfrur ras ulang taun ya. Ḇape, Refo isya dapḇair ras ulang taun ri suru. Ḇefrur munara ine iso snonggaku ḇeyaksyom Yahwe I ḇa. Kowasya Kejadian 40:20-22 ma Matius 14:6-10. Raimnai kawos fakfuken suine:
Roi ḇeḇye ḇa rosai mam ro munara ras ulang taun ri suru suine?
Raris farfyar ḇero Refo ya, kwara ido moḇsa Yahwe myam munara ras ulang taun ya rai?
Ḇape, imbude na wafuken kaker radine, ’Yahwe imewer kaku yaso ro munara ras ulang taun ḇaido ras ḇeba ḇeknam ro Refo ya ḇa ke?’ Kowasya Keluaran 32:1-8. Insape, komam VIDIO raimnai kawos fakfuken suine.
Rosai ḇefnai kaku fa komam pyum roi Yahwe imewer na?
Moḇsa kofrur na rai?
Nyan fa kofawi ras ḇeba risai Yahwe imarisen ḇa na
Ḇyeknam ro Refo ḇa ke? Swewar fa wafawi ras ḇeba ani moḇ ryamuma ya.
Sifrur na fa siksandik snonggaku, organisasi, ḇaido kakop ro er oso ke? Kosandik Yahwe I ro roi ḇebor kam ma kokyar derer na ḇepyos samswen ro dunya ine.
Rari ma roi sifrur ro ras ḇeba ani iḇese ro Yahwe farkankin Ḇyena ke? Fandun fa komam fa kenem koḇena nasren pdef.
5. Wafnoḇek snonggaku ḇese fa sesyowi kakyar Bena
Snonggaku ḇese sidafdifer Au fa wakso ro ras ḇeba Yahwe imarisen ḇa na ido, na samswen fa wakofen wamewer. Imboi, wakofenḇair roi wakyar na kuker nyan ḇepyum ma wawos myaren na yoḇ si. Imbe wafawi nyan fa wafrur roi ine ido, komam VIDIO.
Kowasya Matius 7:12, raimnai kawos fakfuken suine:
Raris wos ḇero mnuk ine, mansei na ḇeyap faro kina Bansya fa mgofrur ras ḇeba oso ke roḇa?
Moḇsa na wakofenḇair ḇe kina Bansya snar Auma waswar ma besyowi kaku si, mboi na waksowarpu si ro ras ḇeba sena ḇa?
6. Yahwe imarisen insama kosmai marasrisen ro kenem koḇena
Yahwe imarisen insama kobuk swaf ḇepyum fa kokayamyam kuker kina ma bati koḇesya. Kowasya Pengkhotbah 8:15, raimnai kawos fakfuken ine:
Moḇsa mnuk ine fyasnai Yahwe imarisen fa kosmai marasrisen ro kenem koḇena?
Yahwe imarisen insama kawasa Ḇyesi sna swaf ḇepyum fa skain simarisen kayamyam. Komam VIDIO fa kokfawi rariso roi ine nasnaibos kaku ro munara sarawrow internasional koḇena.
Kowasya Galatia 6:10, raimnai kawos fakfuken nane:
Kofrur munara ras ḇeba monda insape bisa kofrur roi ḇepyum faro snonggaku ḇese ke?
Rosai na ḇefrur fa wamarisen syadi: Wawaf rawo sifrur ras ḇeba insape buk roi ḇepyum ḇe snonggaku oso ke, wamarisen buk yoḇ i ḇeri kukro waswar i?
Sinan eḇe Saksi Yahwe sya, ḇebor sya simarisen sfasos roi ḇepyum faro romawa sesi ma sbuk roi romawa sesi simarisen kaku na. Auma sinan ḇena romawa disau ido, roi ḇepyum rosai bisa wakfrur yoḇ romawa Bansi?
SIA SIFUKEN AU RADINE: ”Rosai ḇefnai fa Saksi-Saksi Yahwe sima sakfrur ras ulang taun ya ḇa?”
Moḇsa na kwarem si rai?
FARKARKOR ḆYENA
Yahwe imarisen insama kobuk swaf fa kokain kayamyam kuker kina ma bati koḇesya fa komarisen. Ḇape, imarisen kako insama kofrur awer ras ḇeba imewer na.
Waswarepen Kaḇer
Fakfuken rosai na kokara kaku insama kokfawi ras ḇeba risai Yahwe imewer na?
Rariso kofnoḇek kina ma bati koḇesya fa sifawi koma na kakso si ḇa ro ras ḇeba ono?
Rosai ḇefnai fa wafawi Yahwe ima imarisen insama kosmai marasrisen ro kenem koḇena?
SWEWAR NABOR WER
Wawasya ras ḇeba minsai snonggaku Kristen sya sipok sifrur awer na.
”Rosai Ḇefnai fa Ras Ḇeba Ono Saksi-Saksi Yahwe Sakfrur Na Ḇa?” (Fasfas ro situs jw.org)
Wawasya roi ri fyak ḇefrur fa kokyar Manseren Allah imarisen faro ras ulang taun ya ḇa.
”Rosai Ḇefnai fa Saksi-Saksi Yahwe Sakfrur Ras Ulang Taun ya Ḇa?” (Fasfas ro situs jw.org)
Mam rosai roma babo oso ifrur kaku fafisu ḇero rumfarkor ḇyesya skoryae i kukro dakfrur ras Natal ya ḇa.
Snonggaku Kristen ḇebor sya skinfir fa sifrur ras Natal ya ḇa. Inja moḇsa sḇaḇir rai?
a Mam Fasfas Ḇewarpu 5 fa wafawi rosai na wafrur kaku fafisu sia sor Au fa wakofen ḇaido wakfrur ras ḇeba na.