Seken Buk Blong Kronikel

4 Biaen hem i wokem wan olta long kopa,+ we longfala blong hem i 20 kiubit, bigfala blong hem i 20 kiubit, mo hae blong hem i 10 kiubit.

2 Hem i wokem wan Si*+ long aean. Si ya i raon, mo maot blong hem i 10 kiubit, mo hae blong hem i 5 kiubit, mo hem i yusum wan teplaen blong 30 kiubit blong raonem Si ya.+ 3 Mo aninit long hem, i gat pija blong ol frut blong wael melen+ i goraon long hem, i gat ten frut long wan kiubit. Ol frut ya oli stap long tu laen mo hem i wokem olgeta wantaem wetem Si ya. 4 Si ya i sidaon antap long 12 bul,+ 3 i lukluk i go long not, 3 i lukluk i go long wes, 3 i lukluk i go long saot, mo 3 i lukluk i go long is. Mo as blong olgeta i go wanples long medel. 5 Si ya i tik olsem saes blong wan han.* Mo hem i wokem maot blong hem olsem maot blong wan kap, olsem wan lili we i open. Mo Si ya i save holem 3,000 bat* blong wota.

6 Mo tu, hem i wokem ten besin blong wasem ol samting, mo hem i putum faef long raetsaed mo faef long lefsaed.+ Hemia blong rinsim ol samting we oli yusum blong mekem ofring we i bon fulwan.+ Be Si ya i blong ol pris oli wasem olgeta long hem.+

7 Biaen hem i wokem ten ples blong putum laet long gol,+ folem plan we oli givim long hem,+ mo hem i putum olgeta insaed long tempol, faef long raetsaed mo faef long lefsaed.+

8 Mo tu hem i wokem ten tebol mo i putum olgeta insaed long tempol, faef long raetsaed mo faef long lefsaed.+ Mo hem i wokem 100 bol long gol.

9 Biaen hem i wokem yad+ blong ol pris+ mo bigfala yad+ wetem ol doa blong ol yad ya, mo i blokem ol doa ya long kopa. 10 Mo hem i putum Si long raetsaed, long saed i go long saot is.+

11 Mo Hiram i wokem ol baket tu, wetem ol savel, mo ol bol.+

Nao Hiram i finisim wok we King Solomon i askem hem blong mekem long haos blong tru God:+ 12 Hemia tu bigfala pos,+ tu hed we tufala i raon olsem bol we tufala i stap antap long tufala bigfala pos ya, mo tu net+ blong kavremap tufala hed ya we i stap antap long tufala bigfala pos ya, 13 mo 400 grenadin+ blong tufala net ya, wanwan long ol net ya i gat tu laen blong grenadin blong kavremap tufala hed ya we i raon olsem bol, we oli putum antap long tufala bigfala pos ya,+ 14 mo ten kat* mo ten besin blong ol kat ya,+ 15 mo Si wetem ol 12 bul we oli stap aninit long hem,+ 16 mo ol baket, ol savel, ol fok,+ mo olgeta samting blong yusum long haos blong God, blong King Solomon i putum olgeta long haos blong Jehova. Hiramabiv+ i wokem olgeta samting ya long kopa we i saengud. 17 King i wokem ol samting ya long eria blong Jodan Reva, long medel blong Sukot+ mo Jereda. Blong wokem ol samting ya, hem i kafsaedem kopa i go long ol klei we oli tik mo we oli gat ol sep blong ol samting ya. 18 Solomon i wokem olgeta samting ya we oli plante we plante. Oli no traem blong faenemaot stret wet blong kopa.+

19 Solomon i wokem evri samting blong yusum+ long haos blong tru God: Olta we i gol,+ ol tebol+ wetem ol sobred antap long olgeta,+ 20 ol ples blong putum laet wetem ol laet blong olgeta we oli wokem long gol we i klin gud,+ blong oli laet long fored blong rum ya we i insaed olgeta, olsem we oli sud mekem, 21 mo hem i yusum gol we i klin we i klin blong wokem ol flaoa we i open, ol laet, mo ol samting blong holem wik* blong laet. 22 Mo hem i yusum gol we i klin gud blong wokem ol sisis blong katem wik blong laet, ol bol, ol kap, mo ol faea holda. Mo doa blong haos ya, wetem ol doa blong Rum We i Tabu We i Tabu,+ mo ol doa blong haos tempol, hem i wokem long gol.+