Ol Disasta i No Longtaem Bambae Oli Finis
OL ETKWEK, ol wo, kakae i sot, ol sik—hemia sam long ol samting we Jisas i tokbaot se bambae oli makem “en blong fasin blong laef blong wol ya” we yumi stap long hem naoia. (Matiu 24:3, 7, 8, NW; Luk 21:7, 10, 11) I tru se i no God we i mekem ol samting ya. Jisas mo Papa blong hem, Jeova God, tufala i no stamba blong ol samting ya.
Be God bambae i stamba blong samting ya we ol saen ya oli soemaot, hemia se Kingdom blong God i kam—wan gavman long heven we i stap long han blong Jisas Kraes—mo God bambae i spolem olgeta man we oli sakemaot hae rul blong Hem. (Daniel 2:44; 7:13, 14) Biaen, wol ya bambae i kam wan ples we i sef mo i gat pis. Bambae man i no moa fraet long ol disasta. Promes blong God bambae i kamtru fulwan, hemia se: “Olgeta ya, bambae i no moa gat wan samting blong spolem tingting blong olgeta. Bambae olgeta oli no moa wari, oli save stap gud long ol haos blong olgeta, we i no gat samting i save spolem olgeta, laef blong olgeta bambae i stap gohed gud nomo.”—Aesea 32:18-19.
!Lesin Long God Mo Kasem Laef Blong Olwe!
Olsem faswan blong tufala haf long saed blong disasta i eksplenem, sipos yumi lesin long ol woning, samting ya i save sevem laef blong yumi. Rul ya i stret moa long ol woning blong God we yumi kasem long Baebol. God i promes se: “Man we i stap lesin long mi, bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.”—Ol Proveb 1:33.
Ol Witnes Blong Jeova oli traehad blong lesin long God. Oli mekem olsem taem oli ridim Tok blong Hem oltaem mo taem oli mekem ol tijing blong hem i wok long laef blong olgeta. Oli singaot yu tu blong mekem olsem. Yes, olgeta we oli lesin mo obei long Jeova, oli no nid blong fraet long fiuja mo long ol trabol we bambae i kasem ol nogud man. Defren olgeta, oli save glad from we bambae oli kasem laef we i no save finis long Paradaes long wol, we “bambae oli harem gud, from we oli stap gud, mo oli gat [“pis,” NW].”—Ol Sam 37:10, 11.
[Bokis blong pija long pej 24]
OLGETA WE OLI STAP KRAE OLI SAVE HAREMGUD
?Sam famle blong yu oli ded long wan disasta no sam narafala trabol bakegen? Klosap 2,000 yia bifo, gudfala fren blong Jisas, Lasaros, i sik bigwan nao biaen hem i ded. Taem Jisas i harem nius blong samting ya, hem i go long vilej blong Lasaros hemia long Betani, mo i mekem Lasaros ya we i stap “slip” long ded i laef bakegen.—Jon 11:1-44.
Jisas i no mekem merikel ya jes from we hem i lavem Lasaros mo famle blong hem, nogat. Merikel ya i blong mekem ol man oli trastem moa promes ya se bambae hem i mekem ‘ol dedman we oli stap long beregraon’ oli laef bakegen taem hem i rul long Kingdom. (Jon 5:28, 29) Yes, long niufala wol, Jisas bambae i finisim olgeta nogud samting we oli stap spolem man tede we oli bin stat taem Adam mo Iv tufala i rebel long garen blong Iden bifo.a—1 Jon 3:8.
[Futnot]
a Blong kasem advaes blong Baebol long saed blong olsem wanem blong winim tingting ya we i trabol taem yumi lusum wan famle long ded, mo ol promes long saed blong laef bakegen, plis lukluk buklet ya we ol Witnes blong Jeova oli wokem, hemia Taem Wan We Yu Laekem Hem Tumas i Ded.
[Bokis/Foto blong pija long pej 25]
WAN ETKWEK I JENISIM TINGTING BLONG MI LONG SAED BLONG LAEF
Long 1971, mi mi wan yangfala mama finis mo mi wantem tumas blong kam wan woman we i singsing wetem voes blong soprano long opera. Long 1957, mi muvaot long taon ya Winnipeg, Manitoba long Kanada, hemia ples we mi bon long hem, mo mi go stap long wan ples klosap long Hollywood, California long Yunaeted Stet blong Amerika. Mi gat tingting ya blong kamgud moa long samting we mi laekem tumas, hemia miusik.
Long hot taem evri yia, mama blong mi, we i wan Witnes blong Jeova, i aot long Kanada blong kam luk mi. Hem i mekem olsem blong naen yia. Taem hem i kam luk mi, hem i tekem janis blong tokbaot Baebol long mi, mo hem i bilif strong se Baebol i fulap long ol nambawan advaes we i save mekem man i hapi mo long saed blong famle tu. Mi laekem mama blong mi mo mi lesin long hem wetem respek. Be taem hem i gobak, mi sakemaot ol buk we hem i givim long mi. Long tingting blong mi, mi stap folem stret rod.
Ale, long eli moning long Tusde Februari 1971, wan etkwek we oli makem paoa blong hem se 6.6, i wekemap mi wantaem nomo, i mekem mi mi sek bigwan. Noes blong hem i bigwan mo i muv strong. Mi mi fraet tumas, mi resis i go long rum blong smol boe blong mi mo mi glad blong faenem we hem i stap sef yet long bed blong hem. Taem graon i no moa muv, ol glas we oli brobrok mo ol samting we oli bin stap insaed long ol kabod oli foldaon i stap long floa mo wota we i stap long swiming pul i kamaot mo i stap olbaot long yad blong haos. Famle blong mi i sef nomo be nating se i olsem, mi mi no moa save slip nating.
Mama i bin tokbaot “ol las dei” long mi mo hem i bin talem se wan long ol samting we bambae oli hapen long taem ya hemia se bambae “graon i seksek bigwan.” (2 Timoti 3:1, NW; Luk 21:7-11) Long hot taem afta long etkwek ya, mama i kambak blong visitim mi bakegen be hem i no karem ol magasin mo buk wetem hem. Hem i mekem olsem from we hem i ting se naen yia finis hem i stap traehad blong tokbaot trutok wetem mi be mi mi no intres. !Be, hem i mekem wan mastik! Stat long taem ya we hem i kamtru long haos, mi mi gohed nomo blong askem ol kwestin long hem. Kwiktaem nomo, tingting ya blong kam wan woman blong singsing mo blong gat gudnem long fored blong ol man i no moa wan impoten samting.
Long semfala wik nomo, mi joen long ol Kristin miting wetem mama long Haos Kingdom we i stap long ples blong mi mo biaen mi no moa mestem wan miting nating. Mama i mekem plan wetem wan Witnes blong i stadi Baebol wetem mi. Mi mi baptaes long 1973, mo naoia mi spenem 70 aoa evri manis blong talemaot gud nius blong Kingdom blong God long ol narafala. (Matiu 24:14) Yes, wan etkwek i bildimap bilif blong mi.—Colleen Esparza i talem stori ya.