Sam Nius Blong Wol

◼ “Long 100 gel long Yunaeted Stet, samwe long 33 oli gat bel bifo we oli kasem 20 yia.”—CENTERS FOR DISEASE CONTROL AND PREVENTION, U.S.A.

◼ Long Yunaeted Stet, oli mekem wan stadi long saed blong ‘raf fasin insaed long famle.’ Oli stadi long 420 man, nao oli faenemaot se “long 10 man, klosap tri oli kasem raf fasin, from we wan long famle blong olgeta i kilim olgeta no i mekem i nogud long olgeta long wan narafala fasin.”—AMERICAN JOURNAL OF PREVENTIVE MEDICINE.

?Toktok Plante Lanwis?

Plante papa mama oli fraet se sipos smol pikinini blong olgeta i stap harem wan narafala lanwis oltaem, bambae hem i no save lanem blong toktok gud long prapa lanwis blong hem. Be wan woman saentis we i stadi long ol nev long bodi, nem blong hem Laura-Ann Petitto, i faenemaot se tingting ya i no stret. Hem i lidim wan grup long Toronto, Kanada, blong oli stadi long bisnes ya. Misis Petitto i talem se: “Taem yumi bon, ol nev blong bodi mo bren . . . oli rere finis blong lanem wan lanwis. Mo oli naf blong lanem plante lanwis.” Long skul, ol pikinini we oli save toktok tu lanwis, plante taem oli kasem ol mak we oli hae moa long ol pikinini we oli toktok wan lanwis nomo. Be niuspepa ya, Toronto Star, i talem se: “Ol papa mama nao oli mas ol faswan blong tijim smol pikinini blong olgeta long wan narafala lanwis, sipos oli wantem se pikinini ya i kasem ol gudfala frut we i kamaot from fasin ya blong toktok tu lanwis.”

Ol Doti Pija Blong Seks Oli Spolem Pikinini

Ol pikinini we oli lukluk ol muvi long Intenet we oli soem ol doti pija blong seks mo ol raf fasin, oli yang moa naoia i bitim olgeta bifo. Man ya Heinz-Peter Meidinger, we i jeaman blong wan grup (German Association of Philologists) i talem se, plante boe we oli gat 12 yia mo antap long 12 yia, oli save olsem wanem mo weples long Intenet blong faenem ol raf fasin we oli raf bitim mak mo ol doti pija blong seks. Plante pikinini oli mekem olsem se oli strong mo oli no wari long ol samting ya we oli lukluk, be oli rili harem nogud mo oli sek nogud long ol pija ya. Masta Meidinger i talem long ol papa mama se oli mas intres long samting we pikinini i stap tingbaot mo samting we i stap lukluk long kompiuta blong hem.

Plan From Divos

Wan niuspepa long Sydney (Sunday Telegraph), i talem se plante moa man mo woman Ostrelia oli stap saenem wan kontrak bifo mared, se bambae tufala i mas folem sam rul long saed blong fasin blong laef blong tufala. Ol kontrak ya oli blong talem olsem wanem tufala bambae i seraotem olting blong tufala sipos tufala i divos. Be naoia, plante long ol kontrak ya oli go moa, oli talem wanem fasin blong laef we wanwan long tufala i mas folem, blong mared blong tufala i save gohed. Maet kontrak ya i talem weswan long tufala bambae i kuk, klinim haos, draevem trak. Mo tu, kontrak ya i save talem sipos bambae tufala i fidim wan puskat no dog, hamas kilo tufala i mas gat, hu bambae i wokbaot wetem dog blong i eksasaes smol, mo hu bambae i putum tin doti long rod. Wan loea, nem blong hem Christine Jeffress, i talem se ol man “oli no moa ting se mared blong olgeta bambae i stap olwe.”

I Had Long Ol Papa Mama Blong Soemaot Lav

Wan niuspepa blong Polan (Newsweek Polska), i talem se: “Plante moa papa mama oli nidim wan buk blong talem long olgeta olsem wanem blong mekem long ol smosmol pikinini blong olgeta. I luk olsem se oli no save olsem wanem blong soemaot filing blong lav long ol pikinini blong olgeta.” Ol papa mama oli no save olsem wanem blong mekem ol samting we oli isi nomo, olsem holem pikinini blong olgeta, pleplei wetem olgeta, mo singsing long olgeta. Ol samting ya oli impoten blong pikinini i gruap gud. Be ol man we oli stadi long bisnes ya, oli faenemaot se “long Polan, faswan samting we ol papa mama oli mekem blong spenem taem wetem ol pikinini blong olgeta, hemia lukluk televisen wetem olgeta mo tekem olgeta oli go long stoa.” Pleplei wetem pikinini, hemia namba sikis samting we oli mekem tugeta.