Haf 6
Taem We Jisas i Bon, Go Kasem Taem We Hem i Ded
God i sanem enjel ya Gabriel i go luk gudfala yangfala woman ya Meri. Enjel i talem long Meri se bambae hem i gat wan pikinini, mo afta we pikinini ya i gruap, bambae hem i kam king blong olwe. Pikinini ya Jisas, i bon long wan haos we ol man oli kipim ol anamol long hem, mo ol man blong lukaot long sipsip oli kam long haos ya blong luk hem. Wan sta i lidim sam man blong Is tu, blong oli kam luk smol pikinini ya. Bambae yumi faenemaot hu nao i mekem sta ya i saen, mo olsem wanem God i sevem Jisas, blong ol man oli no kilim hem i ded.
Mo tu, yumi tokbaot taem we Jisas i gat 12 yia blong hem, mo i stap toktok wetem ol tija long haos blong God. Eitin yia biaen, Jisas i tekem baptaes, nao hem i statem wok we God i sanem hem blong mekem long wol ya, hemia blong prij mo blong tijim ol man long saed blong Kingdom. Jisas i jusum 12 man blong oli givhan long hem blong mekem wok ya, mo oli kam ol aposol blong hem.
Jisas i mekem plante merikel. Hem i givim kakae long plante taosen man, nating se hem i gat sam smosmol fis nomo wetem sam bred. Hem i mekem plante sikman oli gud bakegen, mo i mekem dedman i laef bakegen tu. Bambae yumi tokbaot plante samting we oli hapen long Jisas long ol laswan dei blong laef blong hem, mo olsem wanem ol man oli kilim hem i ded. Jisas i prij blong tri yia haf. Haf SIKIS i tokbaot 34 yia blong histri we ol samting ya oli hapen long hem.