Japta 10

Ol Rabis Speret oli Gat Paoa

1. ?Blong wanem plante man oli ting se oli save toktok wetem ol dedman?

PLANTE MAN oli talem we oli toktok wetem samfala dedman. Wan hae bisop blong Episkopalian jyos, James A. Pike, we naoia hem i ded finis, hem i talem we hem i bin toktok wetem ded pikinini blong hem, Jim. Bisop Pike i talem we san blong hem i talem se: “I gat plante tumas man raonabaot long mi, mo ol han oli stap leftemap mi . . . mi no glad nating gogo kasem taem ya we mi mi save talemaot ol samting ya long yu.”

2. (a) ?Blong wanem i no gat man we i save toktok wetem dedman? (b) ?Wanem ol kwestin ya we naoia oli kamaot?

² From we sem samting ya i hapen long plante man, taswe i klia se oli bin toktok wetem samfala we oli stap long ples blong ol speret man. Be i no tru we oli toktok wetem ol dedman. Baebol i klia long bisnes ya, i se: “Ol dedman oli no save long wan samting.” (Eklesiastis 9:5) From we i mas olsem Baebol i talem, ?hu nao olgeta ya we oli stap toktok long ples blong ol speret? ?Hu olgeta ya we oli stap tekem voes blong ol dedman?

3. (a) ?Hu olgeta ya we oli stap tekem voes blong ol dedman? ?Blong wanem? (b) ?Ol rabis speret ya oli givim mesej long hu?

³ Ol rabis speret man oli stap mekem olsem. Ol rabis speret ya, oli olgeta enjel ya we oli joen wetem Setan taem hem i agensem God. ?Be blong wanem oli wantem tekem voes blong ol dedman? Blong mekem ol man oli ting se ol dedman oli laef yet oli stap. Ol rabis speret ya oli mekem plante man oli ting se taem man i ded, hem i jenis i go long wan narafala laef. Blong mekem gyaman tingting ya i go kasem plante man olbaot, ol rabis speret ya oli stap yusum ol kleva, mo ol man blong soemaot ol samting we bambae oli save kamtru, mo ol man blong mekem posen. Nao ol rabis speret ya oli givim mesej long olgeta ya. From samting ya, ol man oli ting se ol dedman oli stap toktok. Be hemia i trik nomo.

RABIS SPERET I TEKEM FES BLONG SAMUEL

4. (a) ?Blong wanem King Sol i gat bigfala trabol? (b) ?Wanem loa blong God long ol kleva, mo long ol man ya we oli stap talemaot ol samting we bambae oli save kamtru?

⁴ Long Baebol i gat eksampel blong wan rabis speret we i tekem fes blong profet man blong God, Samuel, we hem i ded. Hemia i hapen long namba 40 yia blong rul blong King Sol. Wan strong ami blong man Filistaen i kam blong faetem ami blong Isrel, nao Sol i fraet tumas from. Sol i save long loa blong God we i talem se: “Yufala i no mas go luk ol kleva no ol man we oli stap soemaot ol samting we bambae oli save kamtru, from we olgeta ya bambae oli save mekem yufala i doti.” (Levitikas 19:31) Be afta, Sol i tanem baksaed long Jeova. Taswe Samuel, taem i laef yet, hem i no wantem luk Sol. (1 Samuel 15:35) Mo naoia, from trabol ya blong hem, King Sol i no save olsem wanem blong mekem, from we Jeova i no wantem lesin long krae blong hem.

5. (a) ?Sol i go wea blong askem givhan? (b) ?Kleva ya i gat paoa blong mekem wanem?

⁵ From we Sol i wantem tumas blong save wanem samting bambae i hapen, hem i go luk wan kleva long Endoa. Kleva ya i gat paoa blong mekem samting we i olsem bodi blong man i kamtru long ae blong hem. Taem kleva i stap talemaot man ya, Sol i ting se “Samuel” ya. Nao speret man ya we i tekem fes blong Samuel, i talem se: “Weswe yu mekem trabol long mi, yu singaot long mi olsem?” Sol i ansa, i se: “Mi mi stap long bigfala trabol, ol man Filistaen oli stap faetem mi.” Nao speret man ya i askem, i se: “?Blong wanem yu stap askem long mi? Jeova i livim yu finis, hem i enemi blong yu.” Nao rabis speret man ya, we i tekem fes blong Samuel we i ded, i talem tu we Sol bambae i mas ded long faet ya wetem ol man Filistaen.—1 Samuel 28:3-19.

6. ?Blong wanem i no Samuel we i toktok wetem Sol?

⁶ I no rili Samuel ya we kleva i singaot i kam. Samuel i ded finis. Ol dedman oli “gobak long graon blong hem; long sem dei ya ol tingting blong hem oli finis.” (Sam 146:4) Mo i gat sam narafala samting tu blong mekem i klia, se voes ya i no rili voes blong dedman ya Samuel. Samuel hem i profet man blong God. Taem hem i laef, hem i agens long olgeta kleva. Mo hem i no moa wantem toktok wetem Sol, from we man ya i tanem baksaed long God. Olsem ya nao, sipos Samuel i no ded, ?yu ting se i letem wan kleva i singaot long hem, blong hem i kam blong mit wetem Sol? Mo tingbaot hemia: Jeova i no wantem givim nyus long Sol, ?yu ting se wan kleva i save fosem Jeova blong i givim wan nyus long Sol, long maot blong dedman ya Samuel? Mo sipos i tru we man i save toktok wetem famle we i ded, ating God ya we i gat lav, bambae i no save talem se olgeta ya we oli stap go long kleva, oli “no klin.”

7. ?Wanem woning ya we God i givim long ol man blong hem, blong bambae oli sef long ol nogud wok blong ol rabis speret?

⁷ Ol rabis speret oli wantem spolem man, taswe Jeova i tok long ol man blong hem, blong wekemap olgeta. Ol rabis speret oli yusum plante kaen rod blong gyaman long ol man. Baebol i soemaot samting ya long woning we i givim long ol man Isrel, i se: “Long laen blong yufala bambae i no mas gat . . . man blong soemaot ol tok haed, no man blong mekem majik, no man blong lukaot ol saen, no man blong mekem posen, no man we i stap wokem nakaemas long narafala man, no man we i go luk kleva no i go luk man ya we i stap soemaot ol samting we bambae oli save kamtru, no man we i wantem toktok wetem ol dedman. From we Jeova i no laekem nating ol man we oli stap mekem ol samting ya.” (Dutronome 18:10-12) I gud blong yumi faenemaot ol nogud wok ya blong ol rabis speret, mo wanem yumi save mekem blong blokem olgeta ya, blong yumi stap gud. Be fastaem i gud blong yumi faenemaot long wanem taem mo olsem wanem, ol rabis speret ya oli bin stat.

OL ENJEL WE OLI KAM RABIS SPERET

8. (a) ?Hu olgeta ya we Setan i pulum blong olgeta tu oli agensem God? (b) ?Taem oli lego wok blong olgeta long heven, oli go wea?

⁸ From we hem i gyaman long Iv long garen blong Iden, wan enjel i bin mekem hem wan i kam rabis speret man ya, Devel Setan. Afta, hem i traem pulum ol narafala enjel, blong olgeta tu oli agensem God. Samfala oli mekem olsem, oli no moa mekem wok ya long heven we God i givim blong mekem. Oli kamdaon long wol, oli putum bodi olsem blong man. Kristin disaepol, Jud, i tokbaot olgeta ya long raeting blong hem, i se: “Mo ol enjel ya we bifo oli lego wok blong olgeta, nao oli livim prapa ples blong olgeta.” (Jud 6) ?Blong wanem oli kamdaon long wol? ?Wanem nogud tingting ya we Setan i putum long hat blong olgeta, blong pulum olgeta oli aot long gudfala wok ya long heven?

9. (a) ?Blong wanem ol enjel oli kamdaon long wol? (b) ?Baebol i talem wanem blong soemaot we fasin ya i rong?

⁹ Baebol i talemaot long yumi, i se: “Ol san blong tru God oli stat blong lukluk ol dota blong ol man, nao oli luk we oli naes; nao oli go oli jusumaot ol gel ya we oli wantem, oli jes tekem nomo blong oli waef blong olgeta.” (Jenesis 6:2) Yes, ol enjel ya oli putum bodi olsem blong man. Oli kamdaon long wol ya blong slip wetem olgeta woman ya we oli luk oli naes. Be fasin ya i no stret blong ol enjel oli mekem. Oli brekem loa ya. Baebol i soemaot we fasin ya blong olgeta i nogud nating, i sem mak wetem fasin blong ol man blong Sodom mo Gomora, we oli bin mekem krangke wetem man nomo. (Jud 6, 7) ?Wanem frut blong ol nogud samting ya?

10, 11. (a) ?Ol enjel ya oli kasem wanem kaen pikinini? (b) ?Wanem i hapen long ol bigbig man ya long taem blong Noa? (c) ?Wanem i hapen long ol enjel ya long taem blong Noa?

¹⁰ Ol waef blong ol enjel ya oli karem pikinini. Be ol pikinini ya oli defren. Oli gru we oli gru, oli kam bigbigfala man. Be oli nogud. Baebol i kolem olgeta ya “ol strong man ya blong bifo longtaem, ol man we oli gat nem.” Ol bigbig man ya oli traem fosem ol man blong olgeta tu oli kam nogud. Baebol i talemaot frut blong ol samting ya, i se: “Ol rabis fasin blong man i fulap long wol, mo oltaem hat blong olgeta i stap tingbaot blong mekem ol rabis fasin nomo.” (Jenesis 6:4, 5) Taswe, long taem blong Noa, Jeova i mekem wora i ron bigfala long wol. Ol bigbig man ya, no ol “Nefilim,” wetem olgeta nogud man, oli draon. ?Be wanem i hapen long ol enjel ya we oli bin kamdaon long wol?

¹¹ Oli no draon. Oli sakem bodi blong man ya we oli putum, oli gobak long heven, oli speret man bakegen. Be God i no letem olgeta ya oli joen bakegen long kampani blong ol tabu enjel blong hem. Baebol i talem se: “God i no letem ol enjel ya, we bifo oli mekem sin, oli go fri nomo. Be hem i sakem olgeta oli go long Tartarus, hem i putum olgeta oli stap long ol hol we oli tudak we i tudak olgeta, oli stap wet long dei blong jajem olgeta.”—2 Pita 2:4.

12. (a) ?Wanem i hapen long ol rabis enjel taem oli gobak long heven? (b) ?Blong wanem oli no save putum bodi olsem blong man bakegen? (c) ?Naoia oli stap mekem wanem?

¹² God i no sakem ol rabis enjel ya oli godaon long wan prapa ples we oli kolem Tartarus. Samfala Baebol oli tanem rong tok ya, nao oli raetem “hel.” Be Tartarus i minim se ol enjel ya oli daon olgeta, oli nating nomo. Oli no moa save stap long laet blong speret blong kampani blong God. Oli stap wet nomo blong bambae oli mas lus olgeta. (Jemes 2:19; Jud 6) Stat long taem blong Noa, taem wora i ron bigfala, gogo kasem naoia, God i no letem ol rabis enjel ya oli putum bodi olsem blong man bakegen. Olsem ya nao, oli no save kamdaon blong mekem ol nogud fasin long saed blong seks bakegen. Be oli gat naf paoa yet blong pulum man mo woman. Ol rabis enjel ya oli stap halpem Setan blong “gyaman long olgeta man long wol.” (Revelesen 12:9) Tede, ol fasin blong brekem loa long saed blong seks, mo blong kilim man, mo blong plante narafala fasin we oli nogud, oli stap kam moa. Taswe yumi mas lukaot gud, blong ol samting ya bambae oli no pulum yumi.

FASIN BLONG OL RABIS SPERET

13. (a) ?Ol rabis speret oli gyaman long ol man olsem wanem? (b) ?Wanem wok ya we sam man oli mekem wetem ol rabis speret? ?Baebol i talem wanem long samting ya?

¹³ Yumi lanem finis we Setan i “god blong fasin ya blong naoia.” (2 Korin 4:4) Mo we hem i stap yusum gavman blong wol wetem ol gyaman skul, blong satem tingting blong ol man, blong oli no luksave ol trutok blong Baebol. Wan narafala rod we ol rabis speret oli yusum blong gyaman long ol man mo woman, hemia nao, olgeta fasin blong wok wetem ol rabis speret. ?Man we i mekem olsem, i mekem wanem? Hem i toktok wetem ol rabis speret. Samtaem hem nomo i mekem, be samtaem hem i askem long kleva blong hem i mekem. Fasin ya i mekem we paoa blong ol rabis speret i save holem man ya, blong pulum hem olsem wanem oli wantem nomo. Baebol i talem we yumi no mas yusum nating olgeta fasin ya blong wok wetem ol rabis speret.—Galesia 5:19-21; Revelesen 21:8.

14. (a) ?Wanem wan narafala wok long saed blong ol rabis speret? (b) ?Baebol i talem wanem long samting ya?

¹⁴ Wan narafala wok long saed blong ol rabis speret, hemia nao, fasin blong askem givhan long ol speret man, blong faenemaot ol tok haed, no ol samting we bambae i save kamtru long fyuja. Kristin disaepol, Luk, i soemaot samting ya long store blong hem, i se: “Wan gel blong wok i faenem mifala long rod. Gel ya i gat wan speret man i stap long hem, wan rabis enjel we i stap soemaot long hem ol samting we bambae i save kamtru. Gel ya i stap winim plante mane blong ol masta blong hem, taem hem i stap wokem bisnes ya blong talemaot ol samting we bambae i save kamtru.” Aposol Pol i mekem gel ya i fri long paoa blong rabis speret ya. Afta, gel ya i no moa save talemaot ol samting we bambae i save kamtru.—Wok 16:16-19.

15. (a) ?Wanem samfala wok ya long saed blong ol rabis speret? (b) ?Blong wanem i nogud blong yumi joen long ol wok ya?

¹⁵ Plante man oli intres tumas long ol fasin blong wok wetem olgeta speret man, from we samting ya i stap long fasin blong haed, i defren olgeta. Nao taswe oli stat blong mekem olgeta samting long saed blong posen, nakaemas, hypnotism,a majik, mo fasin blong talemaot fyuja long ol sta. Maet oli stat yusum Ouija boardb, no enikaen narafala samting we i wok long saed blong ol rabis speret. Maet oli ridim ol buk blong ol samting ya, no lukluk ol sinima no televisin blong hem. Maet oli go long miting we ol man oli kam blong lukluk wan kleva i toktok wetem ol speret man. Olgeta fasin olsem, i no waes blong man blong God i mekem. Ol samting ya i save mekem bigfala trabol long hem, naoia. Mo God bambae i jajem, mo bambae i sakemaot olgeta ya we oli stap mekem ol wok blong ol rabis speret.—Revelesen 22:15.

16. ?Olsem wanem Baebol i soemaot we ol Kristin oli gat faet agens long ol rabis speret?

¹⁶ Maet man i no wantem joen nating long ol wok ya blong ol rabis speret, be yet oli mekem trabol long hem. Tingbaot Jisas Kraes, taem hem i harem voes blong Setan we i traem pulum hem blong i brekem loa blong God. (Matyu 4:8, 9) Sam narafala man blong God oli bin kasem trabol olsem tu. Aposol Pol i talem se: “Faet blong yumi . . . i agens long ol rabis speret we oli stap antap.” Hemia i min se evri man blong God i mas “putum klos blong faet we God i givim long [hem] . . . blong bambae [hem] i naf blong stanap strong.”—Efesas 6:11-13.

STANAP STRONG LONG FES BLONG OL RABIS SPERET

17. ?Yu mas mekem wanem sipos wan “voes” we i kamaot long ples blong ol speret man i toktok long yu?

¹⁷ ?Sipos wan “voes” long ples blong ol speret i tok long yu, bambae yu mas mekem wanem? ?Sipos “voes” ya i tekem voes blong wan famle we i ded, no i talem we hem i wan gudfala speret, olsem wanem nao? ?Oraet, Jisas i mekem wanem taem “jif blong ol rabis enjel” i toktok long hem? (Matyu 9:34) Hem i talem se: “!Setan yu gowe!” (Matyu 4:10) Yu tu yu save mekem olsem. Mo yu save singaotem Jeova, blong hem i halpem yu. Prea long voes blong yu, mo yusum nem blong God. Hem i gat moa paoa, i bitim paoa blong ol rabis speret. I gud yu folem waes fasin ya. Yu no mas lesin long ol voes we oli kamaot long ples blong ol speret man. (Proveb 18:10; Jemes 4:7) Hemia i no min se olgeta man we oli harem “voes,” oli stap harem “voes” blong ol rabis enjel. Samtaem, samfala man oli gat wan sik long bodi no long hed, nao taswe oli stap harem ol voes.

18. ?Sipos yu yu wantem aot long ol bisnes ya long saed blong ol rabis speret, i gud yu folem wanem eksampel blong ol Kristin long Efesas?

¹⁸ Maet yu tu yu bin mekem samfala wok long saed blong ol speret, mo naoia yu yu wantem aot long olgeta fasin ya. ?Yu save mekem wanem nao? Oraet, tingbaot eksampel blong olgeta Kristin long Efesas. Aposol Pol i prij long olgeta, nao oli bilif long ol “tok blong Jeova.” Baebol i talem se: “Mo plante man we bifo oli stap mekem ol bisnes blong posen mo kleva oli tekem ol buk blong olgeta, nao oli bonem long fes blong ol man.” !Nao praes blong ol buk ya i kasem 50,000 pis selva! (Wok 19:19, 20, NTB.) I gud yu folem fasin blong olgeta ya long Efesas, we oli kam man blong Kraes. Sipos long haos blong yu i gat samfala samting we oli blong wokem ol bisnes long saed blong rabis speret, i gud yu brekem no bonem olgeta, nating sipos oli kos tumas.

19. (a) ?Kolosap ol man we oli stap joen long ol bisnes ya blong ol rabis speret, oli no save wanem? (b) ?Sipos yumi wantem laef foreva long gladtaem long wol, yumi mas mekem wanem?

¹⁹ Tede, plante man oli intres tumas long ol samting long saed blong fasin haed, mo ol samting we i defren olgeta. Taswe naoia moa man oli stap joen long ol wok ya long saed blong ol rabis speret. Be kolosap ol man ya oli no save we oli stap meks wetem ol rabis speret. Ol samting ya i no blong plei nomo. Ol rabis speret oli gat paoa blong mekem bigfala trabol long yu, blong spolem yu. Oli olsem ol wael anamol nomo. Bifo we Kraes bambae i mekem olgeta ya oli lus foreva, oli stap traehad blong mekem ol man oli kam aninit long rabis paoa blong olgeta. (Matyu 8:28, 29) Sipos yu yu wantem laef foreva long gladtaem long wol, taem God bambae i tekemaot ol fasin nogud, yu no mas joen nating long enikaen bisnes blong ol rabis speret. Yu mas stap longwe long paoa blong ol rabis enjel.

[Ol Futnot]

[Tok blong pija long pej 91]

?Kleva blong Endoa i toktok long hu?

[Tok blong pija long pej 92]

Ol enjel blong God oli lukluk ol dota blong man

[Tok blong pija long pej 94]

Ol enjel we oli putum bodi olsem blong man oli no draon. Oli sakem bodi ya, nao oli gobak long heven

[Tok blong pija long pej 97]

Baebol i talem: ‘Yu no mas joen nating long enikaen bisnes blong ol rabis speret’

[Tok blong pija long pej 98]

Olgeta we oli kam Kristin long Efesas, oli bonem ol buk blong olgeta we oli blong mekem ol bisnes blong ol rabis speret—wan gudfala eksampel blong yumi tede