Japta 11
?Blong Wanem God i Letem Ol Fasin Nogud Oli Stap?
1. (a) ?Wanem i stap hapen long wol naoia? (b) ?Samfala man oli talem wanem?
LONG EVRI PLES long wol i gat man blong brekem loa, man we i no laekem narafala man, mo man blong mekem trabol. Plante taem ol gud man oli trabol tumas from. Samfala oli ripotem God. Maet oli talem se: ‘?Sipos God i stap, be blong wanem hem i letem ol nogud samting ya oli kamaot?’
2. (a) ?Hu i stap mekem ol fasin nogud? (b) ?Wanem i save blokem plante trabol olsem?
2 ?Hu i stap mekem ol rabis fasin ya blong spolem ol narafala man? Ol man nomo ya, i no God. God i no laekem ol fasin nogud. Sipos ol man oli harem God, bambae i no gat bigfala trabol olsem long wol. God i wantem we yumi soemaot lav long ol narafala man. Hem i no wantem hemia: man i kilim man i ded, man i stil, fasin nogud blong man wetem woman, mo fasin blong man we i wantem evri samting, fasin blong drong, mo enikaen rabis fasin blong mekem ol man oli harem nogud. (Rom 13:9; Efesas 5:3, 18) God i bin givim gudfala brim mo bodi long Adam mo Iv, mo i mekem we tufala i save glad tumas long laef blong tufala. Hem i no wantem we tufala ya, no ol pikinini blong tufala, oli kasem enikaen trabol.
3. (a) ?Hu i stampa blong ol fasin nogud? (b) ?Wanem i soemaot we Adam mo Iv tufala i naf blong blokem Setan?
3 Devel Setan i bin statem ol fasin nogud long wol. Be Adam mo Iv, tufala tu i stampa blong trabol ya. Tufala i naf blong blokem Setan taem hem i traem pulum tufala. Tufala i naf blong talem se “yu gowe” long Setan, olsem Jisas i mekem afta. (Matyu 4:10) Be tufala i no mekem. Risal blong samting ya hemia: tufala i kam nogud man. Olgeta pikinini blong tufala, mo yumi tu, evriwan oli nogud finis taem oli bon. Taswe i gat sik, krakrae, mo ded i stap long wol. (Rom 5:12) ?Be blong wanem God i letem ol fasin nogud ya oli stap?
4. ?Wanem eksampel ya blong soemaot gud blong wanem God i letem ol fasin nogud oli stap blong samfala yia nomo?
4 Maet samfala man oli ting se i no gat gud risen blong God i save letem ol man oli trabol tumas olsem blong plante handred yia. ?Be tingting olsem i stret? Tingbaot hemia: ?I tru we samfala papa mo mama, we tufala i lavem pikinini blong tufala, tufala i letem dokta i katem pikinini ya blong fiksemap wan trabol blong hem? Yes i tru ya. From we tufala i save se soa ya we pikinini i harem, from we oli katem, hemia i blong smoltaem nomo, be afta hem i gat gud laef bakegen blong longtaem. ?Be wanem gud samting ya we i kamaot from we God i letem ol fasin nogud oli stap?
WAN IMPOTEN BISNES BLONG STRETEM
5. (a) ?Olsem wanem Setan i agensem God? (b) ?Setan i promes wanem long Iv?
5 Bisnes ya blong agensem God long garen blong Iden, hem i impoten tumas. Blong savegud blong wanem God i letem ol fasin nogud oli stap, yumi mas luklukgud long bisnes ya. Jeova i talem long Adam, i se hem i no mas kakae long wan spesel tri long garen. ?Sipos hem i kakae, bambae olsem wanem? God i talem se: “[Bambae], yu mas ded.” (Jenesis 2:17) Be Setan i talem defren. I talem long Iv, waef blong Adam, blong kakae nomo long tabu tri ya. I se: “Yutufala i no save ded.” Mo i talem bakegen long Iv, i se: “From God i save we long sem dei ya we yutufala i kakae tri ya, bambae ae blong yutufala i open, mo yutufala i save talem wanem samting i stret mo wanem samting i no stret, olsem God ya.”—Jenesis 3:1-5.
6. (a) ?Blong wanem Iv i no harem God? (b) ?Taem tufala i kakae long tabu tri, hemia i rili minim wanem?
6 Iv i no lesin long God, nao hem i kakae. ?Blong wanem? Iv i bilivim Setan. Iv i ting se hem bambae i win moa sipos i no harem God. Hem i ting se hem mo Adam bambae tufala i no moa aninit long God. Bambae i no moa gat nid blong harem ol loa blong God. Bambae tufala nomo i naf blong talem wanem i “stret” mo wanem i “no stret.” Adam i folem rod blong Iv, nao hem tu i kakae. Futnot long The Jerusalem Bible i tokbaot fasin ya blong man, i se: “Hemia i paoa blong mekem disisin blong hem wan nomo long wanem i gud mo wanem i nogud, nao i mekem olsem wanem hem i wantem, olsem hem i wantem independen long olgeta fasin blong laef blong hem . . . Faswan sin hemia, blong agensem God we rul blong hem i hae moa.” Hemia i olsem wan faet blong tekemaot raet blong God blong rulum man.
7. (a) ?Wanem bisnes ya we i kamaot taem man i no moa wantem harem God? (b) ?Wanem ol kwestin ya we oli mas gat ansa from bisnes ya?
7 Taem tufala i kakae long tabu tri, Adam mo Iv tufala i aot long rul blong God. Tufala i independen nao. Tufala nomo i wantem mekem olgeta disisin long ol samting we oli “stret” mo “no stret.” Impoten bisnes ya we naoia i kamaot, hemia: ?God i gat raet blong hem nomo i rulum olgeta man? Olsem ya nao, ?Jeova hem i save talem wanem i gud mo wanem i nogud long ol man? ?Hem nao i save talem wanem fasin i stret mo wanem i no stret? ?No ol man oli naf blong rulum olgeta long fasin we i moa gud? ?Rul blong hu i moa gud? ?Sipos Setan i halpem ol man, olgeta oli save rulum gud olgeta, oli no nidim Jeova? ?No ol man oli nidim Jeova, blong hem i stanemap wan gavman we i save mekem pis long wol, foreva? Olgeta kwestin ya oli kamaot taem Setan wetem Adam mo Iv trifala i agensem God, trifala i no wantem we hem nomo i rulum olgeta man.
8. ?Blong wanem Jeova i no kilim i ded trifala ya we i agensem hem?
8 Sipos Jeova i wantem, hem i save kilim i ded trifala ya kwiktaem nomo. Evriwan i save se Jeova hem i strong moa long Setan mo Adam mo Iv. Be sipos hem i kilim trifala, fasin ya i no save stretem bisnes ya we i bin kamaot. Fasin ya i no givim ansa long kwestin ya: ?Ol man oli naf blong rulum olgeta nomo, oli no nidim God? Taswe Jeova i givim inaf taem long olgeta, blong soemaot klia ansa long impoten bisnes ya.
ANSA BLONG STRETEM BISNES YA
9, 10. ?Wanem risal ya, taem ol man oli traem rulum olgeta nomo, oli no wantem lesin long God?
9 Plante taem i pas finis. ?Wanem risal nao? ?Yu yu ting wanem? Blong 6,000 yia finis ol man oli stap rulum olgeta nomo, oli no wantem God. ?Be yu ting se rul blong olgeta i mekem wol i kam gud ples? ?Olgeta gavman blong man oli bin rul gud, oli givim blesing mo gladtaem long ol man? ?No yu ting se tok blong profet Jeremaea i tru: “Man we i stap wokbaot, hem i no naf blong soemaot rod long hem wan.”—Jeremaea 10:23.
10 Long histri, ol man oli bin traem plante kaen gavman. Be i no gat wan we rul blong hem i bin mekem ol man oli sefgud, no hapi. Maet samfala man oli talem we man i stap gohed. ?Be yu ting se man i stap gohed taem hem i wokem atomik bom, i tekem ples blong bonara? Naoia ol man long wol oli fraet tumas, oli ting se wan faet blong olgeta wol i kolosap. ?Yu ting se samting ya i soemaot we man i stap gohed naoia? Man i save wokbaot long mun, be oli no save mekem pis long wol. Oli save wokem ol gudfala haos wetem plante flas samting insaed long hem, be olgeta famle we oli stap long ol haos ya, oli seraot from trabol. I gat bigfala faet long rod blong man wetem polis, man i stap brekem ol samting olbaot, oli kilim man i ded, mo fasin blong brekem loa i olbaot nomo. ?Yu ting se olgeta samting ya oli blong gohed? !No gat ya! Be ol samting ya oli risal blong rul blong man, taem oli no wantem God.—Proveb 19:3.
11. ?Ol man oli nidim wanem?
11 Risal i mas klia gud. Taem ol man oli no wantem lesin long God, be oli wantem rulum olgeta nomo, hemia i fasin blong bigfala trabol. Plante man oli bin harem nogud nating from. “Man i kontrolem ol man, be fasin ya i wokem trabol nomo long olgeta.” (Eklesiastis 8:9) I klia se, ol man oli nidim God, blong hem i lidim olgeta. Taem God i mekem man, hem i mekem we man i nidim kakae mo wora. Sem mak bakegen, Hem i mekem we man i gat nid blong harem ol loa blong God. Sipos man i tanem baksaed long ol loa blong God, bambae hem i kasem trabol from. Olsem hem i mas kasem trabol sipos hem i tanem baksaed long ol kakae mo wora.—Proveb 3:5, 6.
?BLONG WANEM I LONGTAEM OLSEM?
12. ?Blong wanem God i letem longtaem olsem i pas bifo we hem i wantem stretem bisnes ya?
12 Be maet wan man i askem, se ‘?Blong wanem God i letem longtaem olsem i pas, samwe 6,000 yia nao, blong stretem bisnes ya? ?Hem i no save stretem gud longtaem bifo?’ No. From we sipos God i wantem stretem bisnes ya longtaem bifo, ating oli save talem we God i no givim naf taem long ol man blong oli save traem stretem ol rul blong olgeta. Be naoia, ol man oli yusum naf taem finis blong traem mekem wan gavman we i gud blong halpem ol man. Mo ol scientist tu, oli kasem naf taem finis blong traem wokem ol gudfala samting blong halpem ol man long wol. Blong plante handred yia finis ol man oli bin traem olgeta kaen gavman. Mo science i bin gohed tumas. Oli yusum atom olsem oli wantem nomo, oli go long mun finis. ?Be wanem risal nao? ?Ol samting ya oli mekem wan nyu fasin i kamaot blong blesem ol man?
13. (a) ?Ol man oli gohed tumas long fasin blong science, be olsem wanem nao tede? (b) ?Samting ya i soemaot wanem?
13 !No gat ya! Naoia trabol long wol i moa, mo plante man oli no hapi nating. Fasin blong brekem loa, mo ol samting blong spolem freswin mo wora long wol, ol wo, ol famle we oli stap rao, mo plante narafala kaen trabol tu, oli kam plante tumas finis, nao ol scientist oli ting se sipos olgeta man oli gohed olsem, bambae ol man oli finis ya. !Yes, blong samwe 6,000 yia ol man oli bin traem rulum olgeta nomo, mo science i bin “winim” plante samting, be naoia ol man oli luk we kolosap ol trabol oli naf blong finisim olgeta! !Naoia i klia gud we ol man oli no naf blong rulum olgeta, sipos God i no halpem olgeta! Naoia i no gat wan man we i save talem we God i no givim naf taem blong stretem bisnes ya.
14. ?Blong wanem yumi mas wantem luklukgud long narafala bisnes ya we Setan i bin mekem i kamaot?
14 God i gat gudfala risen blong i letem ol man oli aninit long rul blong Setan, blong mekem ol rabis fasin blong longtaem olsem. Taem Setan i girap nogud long fes blong God, hem i mekem wan narafala bisnes bakegen tu i kamaot. Nao i mas gat taem blong stretem hemia tu. Nao yumi luklukgud long bisnes ya, from we samting ya i save mekem yumi save gud blong wanem God i bin letem ol fasin nogud oli stap. Yu yu mas intres tumas long bisnes ya, from we bisnes ya i blong yu tu.
[Tok blong pija long pej 100]
From gudfala risen, papa mo mama i letem dokta i katem pikinini ya we tufala i lavem hem. God tu i gat gudfala risen blong i letem ol man oli kasem tumas trabol, be i no blong oltaem.
[Tok blong pija long pej 101]
From we tufala i kakae tabu frut, Adam mo Iv tufala i soemaot we tufala i no wantem rul blong God. Tufala i stat blong mekem olgeta disisin blong tufala nomo long wanem tufala i ting se i gud no i nogud.
[Tok blong pija long pej 103]
Taem God i mekem man, hem i mekem we man i nidim kakae mo wora. Sem mak bakegen, God i mekem we man i gat nid blong God i soemaot rod long hem.