Japta 15

Rod Blong Kam Sabjek Blong Gavman Blong God

1, 2. ?Yu mas mekem wanem blong bambae yu yu save kam sabjek blong gavman blong God?

?YU YU WANTEM kasem itenel laef long wol, aninit long gavman blong God? !Ol man we oli gat gudfala tingting, ating oli ansa yes! Olgeta we bambae oli laef aninit long gavman ya, bambae oli save kasem plante gudfala samting. Be blong kasem ol samting ya, i no naf blong talem: ‘Yes, mi mi wantem kam sabjek blong gavman ya blong God ya.’ I gat sam moa samting blong mekem fastaem.

² Sipos yu yu wantem we yu kam sabjek blong wan narafala kantri, fastaem yu mas laenap wetem ol mak we gavman blong kantri ya i putum. Be blong yu yu save mekem olsem, fastaem yu mas savegud se ol mak ya oli olsem wanem. Oraet, sipos yu yu wantem kam sabjek blong gavman ya blong God, fastaem yu mas savegud long ol mak we God i bin putum. Afta, yu mas mekem we laef blong yu i laenap gud wetem ol mak ya.

YUMI NIDIM SAVE

3. ?Blong bambae yu save kam sabjek blong gavman blong God, wanem samting ya we yu mas savegud long hem?

³ Wan impoten samting we yumi nidim blong bambae yumi save kam sabjek blong gavman blong God, hemia nao, we yumi savegud long “lanwis” blong hem. Hemia i stret nomo ya. Samfala gavman long wol oli putum mak, se olgeta nyufala sabjek, oli mas save long lanwis blong kantri blong olgeta. ?Oraet, olgeta ya we bambae oli kasem laef aninit long gavman blong God, oli mas lanem wanem “lanwis”?

4. ?Wanem “lanwis [ya] we i klingud,” we ol man blong God oli mas lanem?

⁴ Jeova i tokbaot samting ya long Tok blong hem, Baebol, i se: “Bambae mi mi givim wan lanwis long ol man, wan lanwis we i klingud nomo, blong bambae oli save singaot long nem blong Jeova, blong oli save mekem ol wok blong hem, evriwan tugeta.” (Sefenaea 3:9) “Lanwis [ya] we i klingud,” hemia nao, trutok blong God we i stap long Baebol. Mo trutok blong Kingdom gavman blong God i nambawan long ol samting ya. Olsem ya nao, blong bambae yu yu save kam sabjek blong gavman blong God, yu mas kasem save long Jeova mo long ol samting long saed blong Kingdom. Hemia nao i stret fasin blong lanem “lanwis” ya.​—Kolosi 1:​9, 10; Proveb 2:​1-5.

5. (a) ?Yumi mas save wanem long ol samting blong gavman blong God? (b) ?Wanem save ya we yumi nidim blong kasem itenel laef?

⁵ Samfala gavman oli putum mak, se olgeta we bambae oli wantem kam sabjek, oli mas savegud lelebet long histri blong ol gavman ya, mo oli mas save tu se oli wok olsem wanem. Sem mak bakegen, sipos yu yu wantem kam sabjek blong gavman blong God, yu tu yu mas save long ol samting olsem blong gavman ya. Save ya i save halpem yu blong kasem itenel laef. Jisas i bin prea long Papa blong hem, i se: “Mo hemia laef ya we i no save finis, we man i save yu we yu nomo yu God tru, mo we man i save Jisas Kraes, we yu yu sanem hem i kam.”​—Jon 17:3.

6. (a) ?Olgeta we oli kam sabjek blong gavman blong God, oli mas ansa long wanem kwestin? (b) ?Yu yu save ansarem?

⁶ Sipos yu yu stadi finis long japta 1 gogo kasem japta 14 blong buk ya, ating naoia yu yu kasem finis plante blong ol gudfala save ya we yu nidim. ?Yu yu kasem ya? Yu save soemaot we yu yu kasem plante save finis sipos yu save ansarem ol kwestin olsem hemia: ?Long wanem taem God i talemaot blong fastaem we hem bambae i stanemap wan Kingdom gavman? ?Hu samfala man ya blong God we oli bin hop se bambae oli sabjek blong gavman ya? ?Bambae i gat hamas man blong rul, no king, long gavman ya blong God? ?Ol king ya bambae oli stap wea? ?Hu olgeta ya we oli olsem faswan we God i jusumaot, blong bambae oli king long gavman blong hem? ?Olsem wanem Jisas i bin soemaot we hem bambae i gudfala king? Ol save ya i gud, mo yumi nidim. Be i no naf yet. Blong wan man bambae i save kam sabjek blong gavman blong God, hem i mas laenap wetem sam narafala mak we God i putum.

FASIN BLONG OLGETA I MAS STRET NOMO

7. ?Ol loa blong ol gavman long wol oli narakaen olsem wanem?

⁷ Ol gavman tede, oli wantem we ol nyufala man we oli wantem kam sabjek long kantri blong olgeta, oli mas laenap wetem ol mak we gavman i putum. Maet oli talem se man i save tekem wan waef nomo, mo woman i save tekem wan hasban nomo. Be sam narafala gavman oli gat narakaen loa. Oli letem ol man oli mared long moa woman. ?Be olgeta we oli wantem kam sabjek blong gavman blong God, oli mas mekem wanem? ?God i talem wanem long mared?

8. (a) ?Wanem mak ya we God i putum long fasin blong mared? (b) ?Olgeta ya we oli brekem loa blong mared, oli mekem wanem? ?God i talem wanem long fasin olsem?

⁸ Long fastaem, Jeova i putum mak finis long saed blong mared. Hem i givim wan woman nomo long Adam. God i talem se: “Bambae man i aot long papa mo mama blong hem, i mas joen wetem woman blong hem, nao tufala bambae i kam olsem wan bodi nomo.” (Jenesis 2:​21-24) Jisas i eksplenem gud se hemia nao i stret mak blong ol Kristin. (Matyu 19:​4-6) From we hasban mo waef tufala i kam olsem “wan bodi nomo,” taswe sipos wan blong tufala i go slip wetem wan narafala, fasin olsem i mekem sem long mared ya blong tufala. God i talem we hem bambae i givim panis long olgeta ya we oli stap brekem loa blong mared, olsem we man i stap slip wetem woman we i no waef blong hem, mo we woman i stap slip wetem man we i no hasban blong hem.​—Hibrus 13:4; Malakae 3:5.

9. (a) ?God i tingting wanem long olgeta ya we oli stap tugeta, be oli no mared? (b) ?Wanem fasin ya blong mekem nogud wetem woman?

⁹ Naoia, plante man mo woman oli stap tugeta, mo oli slip tugeta, be oli no wantem mared. Be God i no wantem we man mo woman tufala i stap tugeta olsem, blong tufala i save traetraem tufala. Olsem ya nao, sipos tufala i stap tugeta be tufala i no mared, hemia nao wan sin agens long God, from we hem i statem fasin blong mared, mo i putum loa blong hem. Baebol i tokbaot fasin ya blong mekem nogud wetem woman, olsem we man mo woman tufala i slip tugeta, be tufala i no mared, i se: “God i wantem hemia, . . . we yufala i no mekem fasin ya blong man mo woman we tufala i slip wanples be tufala i no mared.” (1 Tesalonaeka 4:​3-5) Olsem ya nao, i tabu long olgeta we oli no mared, blong oli slip tugeta.

10. ?Wanem ol narafala fasin long saed blong seks we oli agensem loa blong God?

¹⁰ Tede, plante man oli stap slip wetem ol narafala man, mo plante woman oli stap slip wetem ol narafala woman.a Tok blong God i talem we ol rabis fasin ya “i blong sem nomo.” (Rom 1:​26, 27) Mo tu, i no stret blong man no woman i mekem krangke wetem wan anamol. Fasin olsem i brekem loa blong God. (Levitikas 18:23) Olgeta we oli wantem laef aninit long gavman blong God, oli mas longwe long ol rabis fasin olsem.

11. (a) ?God i tingting wanem long grog? (b) ?Olgeta we oli wantem kam sabjek blong gavman blong God, oli mas longwe long wanem samting blong spolem man?

¹¹ I no brekem loa blong God taem man i dring waen, bia, no sam narafala strong dring, be i no save dring tumas. Baebol i soemaot we smol waen i gud long man. (Sam 104:15; 1 Timote 5:23) Be fasin blong drong, no ol lafet we oli raf tumas, we ol man mo woman oli stap mekem ol fasin we i nogud, ol samting ya nao i brekem loa blong God. (Efesas 5:18; 1 Pita 4:​3, 4) Plante man oli stap yusum grog blong oli drong, be naoia tu plante man oli stap yusum ol defren kaen drag, blong oli “drong” long hem. Mo blong mekem oli harem gud, oli stap smok long marijuana no tabak, mo plante narafala man oli stap kakae long sid blong betel no long lif blong koka. Be ol samting ya i stap mekem we bodi blong olgeta i no moa klin, i spolem olgeta. Ale, sipos yu yu wantem kam sabjek blong gavman blong God, yu mas longwe long ol samting ya we oli blong spolem man.​—2 Korin 7:1.

12. (a) ?Wanem samfala fasin we oli no stret, oli brekem loa blong God? (b) ?Ol man we oli stap folem olgeta fasin olsem, oli mas mekem wanem blong God bambae i save glad long olgeta?

¹² Ol gavman oli no wantem we ol rabis man oli kam sabjek blong kantri blong olgeta. Mo Jeova i go moa long samting ya. Hem i wantem we “oltaem [yumi] stap mekem i stret nomo.” (Hibrus 13:18) Ol man we oli no harem ol loa blong God, bambae oli no save laef aninit long kingdom blong hem. Plante man blong naoia oli mekem olsem we oli stret man, be oli gyaman nomo, oli stap brekem plante loa. Be God i save lukluk olgeta samting. I no gat man we i save trikim God. (Hibrus 4:13; Proveb 15:3; Galesia 6:​7, 8) Ol man we oli stap brekem ol loa blong Jeova, olsem we oli stap gyaman mo stil, bambae Jeova i no save letem olgeta ya oli kam sabjek blong gavman blong hem. (Efesas 4:​25, 28; Revelesen 21:8) Be tingting blong Jeova i longfala, i save wet, mo hem i save fogif. Taswe, sipos wan nogud man i lego long ol rabis fasin blong hem, nao i mekem we ol fasin blong hem oli gud nomo, God bambae i glad long hem.​—Aesea 55:7.

13. ?Ol man blong God oli mas tingbaot ol loa blong ol gavman blong man olsem wanem?

¹³ ?Be olsem wanem long ol loa blong ol gavman blong man? ?Yumi mas obei long olgeta? Ol gavman we oli stap, be God i wantem we ol man blong hem oli obei long ol “hae man ya we oli antap olgeta.” Nating sipos ol takis oli antap tumas, nating sipos yumi no agri long fasin ya we gavman i yusum blong spenem ol mane blong takis ya, be yumi mas pem takis long olgeta. Mo tu, yumi mas obei long ol loa blong gavman. (Rom 13:​1, 7; Taetas 3:1) Be wan samting nomo: wan man i no mas folem wan loa we i brekem loa blong God. Sipos i gat loa olsem, yumi mas mekem olsem we Pita mo ol narafala aposol oli talem: “Mifala i mas obei long God, mifala i no save obei long ol man nomo.”​—Wok 5:​29, NTB.

14. ?Olsem wanem yumi save soemaot we yumi gat respek long laef, olsem God i gat?

¹⁴ Long ae blong God, laef i nambawan. Olgeta we oli wantem kam sabjek blong gavman blong hem, oli mas savegud long samting ya. I klia se man we hem i kilim man i ded, i brekem loa blong God. Be from we plante man oli no laekem ol narafala man, taswe plante taem man i stap kilim man i ded. Be nating sipos wan man i no bin kilim wan narafala man i ded, sipos hem i no laekem nating sam narafala man, nao hem i stap gohed long fasin olsem, man ya bambae i no save kam sabjek blong gavman blong God. (1 Jon 3:15) Taswe i impoten tumas blong yumi folem tok ya we i stap long Baebol blong Aesea 2:4. Vas ya i talem we yumi no mas yusum enikaen samting blong faet blong go kilim i ded ol narafala man. Tok blong God i soemaot we laef blong pikinini ya we i stap yet long bel blong mama blong hem, hemia tu i nambawan long Jeova. (Eksodas 21:​22, 23; Sam 127:3) Be yet, long evri yia plante milyan gel mo woman oli stap spolem pikinini blong olgeta. Fasin olsem blong spolem laef, i brekem loa blong God, from we pikinini ya we i stap yet long bel blong mama blong hem, hem ya i wan laef man ya, mo i tabu blong spolem.

15. ?Olgeta we bambae oli wantem kam sabjek blong rul blong Kingdom, oli mas obei long wanem oda blong King ya blong God?

¹⁵ Olgeta we oli wantem kam sabjek blong gavman blong God, oli no mas mekem enikaen rabis fasin. Be samting ya i no naf yet. Oli mas traehad blong oli kaengud long ol narafala man, oli mas tingting long olgeta. Mo oli mas mekem fasin blong olgeta i laenap wetem rul ya blong God we King, Jisas Kraes, i bin talemaot, i se: “Yufala i mas mekem long narafala man, olsem we yufala i wantem blong ol narafala man oli mekem long yufala.” (Matyu 7:12) Kraes i olsem wan gudfala eksampel blong soemaot lav long ol narafala man. Hem i bin givim laef blong hem blong sevem olgeta man long wol, mo hem i givim oda long ol man blong hem, i se: “Yufala i mas lavlavem yufala; olsem we mi mi lavem yufala.” (Jon 13:34; 1 Jon 3:16) Fasin blong lav we i olsem, we ol man oli no stap tingbaot olgeta nomo, be oli kaengud long ol narafala man, hemia nao i mekem olgeta man oli hapi tumas taem bambae oli laef oli stap aninit long rul blong kingdom blong God.​—Jemes 2:8.

16, 17. (a) ?Blong wanem i impoten tumas blong yumi jenisim fasin blong yumi, blong bambae yumi laenap wetem ol mak we God i putum? (b) ?Olsem wanem yumi save se yumi naf blong jenisim fasin blong yumi?

¹⁶ Baebol i soemaot se ol man we oli wantem kam sabjek blong gavman blong God, oli mas jenisim fasin blong laef blong olgeta fastaem. Oli mas mekem olsem from we oli mas laenap wetem ol mak ya we God i putum finis. (Efesas 4:​20-24) ?Yu yu stap traehad blong jenisim fasin blong yu, blong bambae yu tu yu laenap wetem ol mak ya? !Maet i hadwok blong mekem olsem, be bambae presen blong hem i gudwan tumas! ?Blong wanem? Presen ya i no olsem wan gudfala laef aninit long wan gavman blong man, blong smol yia nomo. !No gat! Be presen ya i olsem itenel laef we neva i gat sik long hem. ?Long weples? !Long paradaes long wol, aninit long gavman blong God!

¹⁷ Sipos yu yu mekem we fasin blong yu i laenap wetem ol samting we God i wantem, samting ya i save mekem laef blong yu i hapi moa long naoia. Be maet i gat nid blong yu yu jenis fastaem. Plante tumas man we bifo oli no laekem nating ol narafala man, no oli griri tumas, oli bin jenis ya. Mo tu, plante man we bifo oli mekem nogud long gel, mo olgeta we oli bin brekem loa blong mared, mo ol man we oli bin mekem krangke wetem ol man nomo, ol man blong drong, man blong kilim man i ded, man blong stil, man blong yusum ol drag no tabak, olgeta ya tu oli bin jenisim fasin blong olgeta. Oli hadwok tumas blong mekem olsem, mo God tu i halpem olgeta. (1 Korin 6:​9-11; Kolosi 3:​5-9) Sipos i gat samfala fasin blong yu we oli no laenap wetem ol mak ya blong God, be oli hadwok blong jenisim, oraet, yu yu no mas lego ya. Be yu yu mas gohed nomo, yu yu mas traehad. !Yu yu naf blong win ya!

SAPOTEM GAVMAN BLONG GOD

18. ?God i wantem we yumi sapotem kingdom blong hem olsem wanem?

¹⁸ Yumi no sapraes we God Jeova i wantem we tingting blong ol sabjek blong hem i fasgud long fasin ya blong sapotem Kingdom gavman blong hem. Ol gavman blong wol oli wantem we ol man blong olgeta oli mekem sem mak. ?Be God i wantem we ol man blong hem oli sapotem gavman blong hem olsem wanem? ?Oli mas yusum masket no wanem samting blong faet blong sapotem kingdom ya blong hem? No, i no olsem ya. Be oli mas mekem olsem Jisas Kraes, mo ol man blong hem bifo, oli bin mekem. Oli man blong talemaot gud nyus blong kingdom blong God. (Matyu 4:17; 10:​5-7; 24:14) Jeova i wantem we olgeta man bambae oli save long kingdom blong hem. Mo we oli save olsem wanem kingdom ya bambae i stretem ol trabol blong olgeta man long wol. ?Ol samting we yu yu lanem finis long Baebol, yu yu bin talemaot long ol famle, no long ol fren, no long ol narafala man? God i wantem we yu yu mekem olsem.​—Rom 10:10; 1 Pita 3:15.

19. (a) ?Blong wanem yumi save se i gat man we bambae oli agens long yumi, taem yumi stap talemaot nyus blong kingdom blong God long ol narafala man? (b) ?Wanem ol kwestin ya we yu yu mas ansarem?

¹⁹ Kraes mo ol man blong hem bifo, oli nidim tingting we i stap strong oltaem. ?Blong wanem? From we taem oli stap talemaot ol nyus blong Kingdom, plante taem ol man oli agens long olgeta. (Wok 5:​41, 42) Mo naoia tu i olsem. Wol ya, we Setan i stap rul long hem, i no wantem we samfala man oli stap prij long gud nyus blong Kingdom. Oraet, naoia i gat sam kwestin, olsem hemia: ?Olsem wanem long yu? ?Tingting blong yu i fasgud long fasin ya blong sapotem kingdom blong God? God i wantem we ol man blong hem oli mekem bigfala wok blong wetnes long Kingdom, bifo we en i kam. ?Yu tu bambae yu givhan long wok ya?

[Futnot]

[Tok blong pija long pej 128]

Olgeta we oli kam sabjek blong gavman blong God, oli mas savegud long gavman ya

[Tok blong pija long pej 131]

Ol man we oli sabjek blong gavman blong God, oli mas longwe long olgeta fasin ya we God i no wantem

[Tok blong pija long pej 133]

Ol man we oli sabjek blong gavman blong God, oli mas talemaot nyus blong gavman ya long ol narafala man