Japta 14

?Hu Olgeta Ya We Oli Go Long Heven, Mo Blong Wanem?

1. ?Plante man oli ansa olsem wanem long kwestin ya, se hu olgeta ya we oli go long heven, mo blong wanem?

PLANTE MAN oli talem se: ‘Ol gudfala man bambae oli go long heven.’ Be taem yumi askem long olgeta ya, se ?blong wanem oli go long heven? Oli ansa, oli se: ‘Blong oli save stap wetem God,’ no ‘Hemia i olsem presen blong olgeta from we oli gud man.’ ?Baebol i tijim wanem long samting ya?

2, 3. (a) ?Blong wanem i tru we samfala man bambae oli go long heven? (b) ?Wanem kwestin we yumi mas faenem ansa blong olgeta?

² Baebol i soemaot i klia, we Jisas hem i stanap long ded mo hem i go long heven. Mo i talem se sam narafala oli blong go long heven tu. Long naet bifo we oli kilim hem, Jisas i talem long ol gudfala aposol blong hem, i se: “Long haos blong Papa blong mi, i gat plante rum i stap. Sipos tok ya i no tru, bambae mi mi talemaot long yufala, be tok ya i tru nomo. Naoia bambae mi go mekem ples i stap rere blong yufala. Mo from we mi go blong mekem ples i rere blong yufala, bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.”​—Jon 14:​1-3, NTB.

³ Tok ya blong Jisas i klia gud, se olgeta aposol ya blong hem bambae oli go long heven blong stap wetem hem. Plante taem, aposol Pol i bin talemaot gudfala hop ya long ol Kristin long taem blong hem. Wan eksampel hemia: “Be long yumi i narafala, yumi gat raet blong stap long heven, mo yumi stap wet long wan man we bambae i kamaot long ples ya blong sevem yumi, Jisas Kraes, Masta blong yumi.” (Filipae 3:20, 21; Rom 6:5; 2 Korin 5:​1, 2) From ol promes olsem, plante milyan man oli wantem go long heven ?be i tru we olgeta gud man bambae oli go long heven?

?OLGETA GUDFALA MAN OLI GO LONG HEVEN?

4, 5. ?Wanem i soemaot we Deved mo Jon tufala i no go long heven?

⁴ Smoltaem biaen long taem we Jisas i bin stanap long ded, aposol Pita i talem long plante man Jyu we oli stap raonabaot long hem, i se: “Papa ya blong famle blong yumi, Deved, hem i ded finis, mo beregraon blong hem i stap long ples blong yumi, i kam kasem tede. Deved ya, hem i no go antap long heven.” (Wok 2:​29, 34) Olsem ya nao, gudfala man ya, Deved hem i no go long heven. ?Be olsem wanem long stret man ya Job?

⁵ Taem hem i stap harem nogud olgeta, Job i prea long God, i se: “!Plis yu haedem mi long Seol [beregraon], plis yu livim mi mi stap haed gogo kasem taem we bambae kros blong yu i finis, plis yu makem dei we bambae yu yu save tingbaot mi bakegen!” Job hem i save se taem bambae hem i ded long beregraon, bambae tingting blong hem i finis, olsem man we i stap slip. Hem i save we bambae hem i no go long heven. Be hem i gat hop, olsem hem i talem: “?Sipos wan man i ded, bambae hem i save laef bakegen? Mi mas wet gogo bambae olgeta dei ya we oli stap holem mi [stret taem blong stap long beregraon] oli finis, nao bambae mi mi fri bakegen. Yu bambae yu singaot long mi, nao mi bambae mi ansa long yu.”​—Job 14:​13-15.

6, 7. (a) ?Wanem i soemaot we i no gat man blong go long heven bifo long ded blong Jisas? (b) ?Bambae olsem wanem long ol gudfala man ya we oli ded bifo long taem blong Kraes?

⁶ Jon, we i baptaesem Jisas, hem i gudfala man. Be Jisas i talem se: “Be long olgeta we oli stap long kingdom blong heven, man we i daon moa long olgeta ya, hem i hae moa long Jon.” (Matyu 11:11) Hemia i mas olsem, from we Jon Baptaes i no go long heven. Taem Jisas i stap long wol, olsem 4,000 yia biaen long taem blong Adam mo Iv, hem i talem se: “I no gat man we i go antap long heven samtaem, be hem ya nomo we i kamdaon long heven, Pikinini blong man.”​—Jon 3:13.

⁷ Olsem ya nao, Jisas i talem we i no gat man we i bin go antap long heven insaed long 4,000 yia long histri ya blong man, i kam kasem dei blong hem. Deved, Job mo Jon Baptaes, bambae oli save stanap oli laef bakegen long wol. Yes, olgeta gudfala man mo woman blong God, we oli ded bifo Jisas, oli gat hop blong bambae oli save laef bakegen long wol. Oli no blong heven. Bambae God i mekem olgeta ya oli stanap oli laef bakegen long wol, aninit long rul blong kingdom blong hem.​—Sam 72:​7, 8; Wok 17:31.

BLONG WANEM SAMFALA MAN BLONG GOD OLI GO LONG HEVEN

8. ?Ol ansa long wanem kwestin oli impoten? ?Blong wanem?

⁸ ?Blong wanem Jisas i go long heven? ?Wanem wok blong hem long heven? Ansa blong tufala kwestin ya hem i impoten. ?Blong wanem? From we olgeta ya we oli go long heven, bambae oli halpem Jisas long wok blong hem. Taswe oli blong go long heven ya.

9, 10. ?Daniel i talem we hu bambae i rul wetem Kraes long gavman blong God?

⁹ Bifo finis, yumi lanem we Jisas bambae i rul long paradaes, taem hem i king blong gavman blong God long heven. Longtaem bifo we Jisas i kam long wol, Baebol i talem finis long buk blong Daniel, se: “Pikinini blong man” bambae i kasem “paoa blong rul.” “Pikinini blong man” ya hemia Jisas Kraes. (Mak 14:​41, 62) Daniel i talem se: “Rul blong hem bambae i no save finis, mo i no gat man we bambae i save spolem kingdom blong hem.”​—Daniel 7:​13, 14.

¹⁰ Be i gat wan impoten samting long buk blong Daniel we i gud blong yumi luksave long hem; “Pikinini blong man” ya bambae hem i no stap rul long hem wan nomo, Baebol i talem se: “Mo kingdom ya, mo paoa blong rul . . . oli givim long olgeta ya we oli tabu man blong Hem ya we i Hae Moa. Kingdom ya blong olgeta bambae i stap foreva. (Daniel 7:27) Taem Daniel i talem se “olgeta ya” mo “kingdom ya blong olgeta,” hemia i soemaot long yumi we i gat sam narafala man we bambae oli rul wetem Kraes long gavman blong God.

11. ?Wanem i soemaot we ol man blong Kraes long taem blong hem, bambae oli rul wetem hem?

¹¹ Long las naet we Jisas i stap wetem olgeta 11 gudfala aposol blong hem, hem i soemaot we olgeta ya bambae oli rul wetem hem long kingdom blong God. Hem i talem long olgeta, i se: “Yufala ya, yufala i bin stap gud wetem mi long olgeta samting we oli kam blong traem mi; mo naoia mi mi mekem wan promes long yufala, olsem we Papa blong mi i bin mekem wan promes long mi, hemia promes blong wan kingdom.” (Luk 22:​28, 29) Afta, aposol Pol mo Timote, tufala tu i kam insaed long promes ya blong wan kingdom. Taswe Pol i raetem leta i go long Timote, i se: “Sipos yumi harem nogud be yumi stap stanap strong, bambae yumi rul tugeta, yumi king.” (2 Timote 2:12) Mo tu, aposol Jon i bin raet long olgeta ya we “bambae oli king, oli rul long wol” tugeta wetem Jisas Kraes.​—Revelesen 5:​9, 10; 20:6.

12. ?Baebol i talem wanem samting long “laen” blong Ebraham we i soemaot se i gat sam narafala man we bambae oli rul wetem Kraes?

¹² Olsem ya nao, olgeta ya we oli go antap long heven, oli go blong bambae oli save rul wetem Kraes long gavman blong heven; Jisas hem i stampa man ya we God i bin promes se bambae hem i kam long wan spesel “laen.” Be God i jusumaot sam narafala man long wol tu, we bambae oli rul wetem Jisas long kingdom. Olgeta ya oli olsem haf blong “laen” ya, olsem Baebol i talem: “Mo sipos yufala i blong Kraes, ale, yufala i rili laen ya blong Ebraham, nao bambae yufala i save kasem ol samting ya we God i promes finis blong givim long olgeta blong laen ya.”​—Galesia 3:​16, 29; Jemes 2:5.

?HAMAS MAN OLI GO LONG HEVEN?

13. (a) ?Blong wanem ol bebi oli no go long heven? (b) ?Jisas i soemaot we namba blong olgeta blong go long heven i olsem wanem?

¹³ From we olgeta ya we oli go long heven bambae oli rulum wol, oli mas gudfala man blong Kraes we hem i traem olgeta finis. Hemia i min se olgeta bebi no smol pikinini, oli no save go long heven, from we Kraes i no traem olgeta yet long plante yia blong Kristin wok. (Matyu 16:24) Be olgeta ded pikinini olsem, oli gat hop blong bambae oli save stanap oli laef bakegen long wol. (Jon 5:​28, 29) Olsem ya nao, olgeta ya we oli blong go long heven oli smol nomo, be olgeta we bambae oli kasem laef long wol ya aninit long Kingdom rul oli plante. Jisas i talem long ol man blong hem, i se: “Yufala sipsip ya we yufala i smol kampani nomo, yufala i no fraet, from we Papa blong yufala i wantem we bambae i givim kingdom long yufala.”​—Luk 12:32.

14. ?‘Smol Kampani’ blong ol sipsip ya, oli hamas?

¹⁴ ?Namba blong olgeta ya we bambae oli rul long Kingdom, oli smol olsem wanem? ?Wok ya i blong olgeta aposol wetem olgeta man blong Jisas blong taem blong hem nomo? No, i no olsem ya. Baebol i soemaot we “smol kampani,” ya i gat sam moa man we oli blong olgeta ya. Long Revelesen 14:​1, 3 Baebol i talem se: “Nao mi luk smol Sipsip ya [Jisas Kraes] i stap stanap long hil ya [blong heven] Saeon, mo i gat wan handred fotefo taosen man oli stap wetem hem . . . we God i pemaot [no tekem] olgeta ya long wol.” Luklukgud we i talem se i gat 144,000 man nomo oli stanap wetem Smol Sipsip, Jisas Kraes, long hil ya blong heven, Saeon. (Hibrus 12:22) Olsem ya nao i no olsem we olgeta gud man oli go long heven, be Baebol i talem we 144,000 man nomo oli go blong rul wetem Kraes. Mo olgeta blong 144,000 ya oli mas man we Kraes i traem olgeta finis. Oli mas man we oltaem nomo oli bin mekem ol wok blong hem.

BLONG WANEM GOD I JUSUMAOT OLGETA YA LONG WOL

15. ?Blong wanem God i jusumaot long wol ol man ya we bambae oli rul long kingdom?

¹⁵ ?Be blong wanem God i jusumaot long wol olgeta man ya blong rul? ?Blong wanem God i no yusum ol enjel nomo blong rul wetem Kraes? From we wol ya nao i ples we ol man oli bin girap nogud oli agensem God, oli talem we God i no gat raet blong rul. Mo long wol ya ol man blong God oli save soemaot we oltaem nomo oli stap long saed blong Hem, nating sipos Setan i traem pulum olgeta, no i mekem bigfala trabol long olgeta. Mo long wol ya tu, Jisas i winim ol trabol, from we oltaem nomo hem i stap strong long saed blong God, mo hem i givim laef blong hem blong pemaot olgeta man. Taswe Jeova i rerem “smol kampani” ya, blong ol man ya bambae oli save rul wetem Pikinini blong hem long Kingdom blong heven. Oltaem olgeta ya oli bin wok gud long saed blong God, nao fasin ya i soemaot we Setan i man blong gyaman, from we hem i bin talem se ol man oli mekem wok blong God from we hem i stap givim plante samting long olgeta. I stret nomo we Jeova i yusum ol man ya blong leftemap nem blong hem.​—Efesas 1:​9-12.

16. ?Blong wanem yumi save glad we olgeta ya we oli blong rul long Kingdom, oli laef long wol bifo?

¹⁶ Mo i gud tumas we bambae yumi gat ol man blong rulum yumi, we bifo ol man ya oltaem oli wok gud long saed blong God, taem oli stap long wol ya. Plante blong olgeta ya oli bin givim laef blong olgeta, olsem wan sakrafaes, from Kingdom. (Revelesen 12:​10, 11; 20:4) Neva ol enjel oli kasem sam trabol ya we ol man oli stap kasem. Taswe ol enjel oli no save gud long ol man we oli gat sin, mo oli no save gud long ol trabol blong ol man. Be olgeta 144,000 ya, oli save ya, from we olgeta oli kasem ol trabol olsem bifo. Bifo, sam blong ol man ya oli mekem ol fasin we oli nogud, be oli traehad, nao oli winim ol fasin nogud ya, oli kam gud man. Be oli save we samting ya i no isi nating blong mekem. (1 Korin 6:​9-11) Taswe olgeta ya, bambae oli rulum ol man long wol long fasin we i kaen gud.​—Hibrus 2:​17, 18.

KONGREGESEN BLONG GOD

17. ?Wod ya “kongregesen” i minim wanem?

¹⁷ Baebol i talem we Kraes i hed blong kongregesen blong God, mo ol memba oli aninit long Jisas. (Efesas 5:​23, 24) Olsem ya nao, wod ya “jyos” no “kongregesen blong God,” hemia i no minim wan jyos haos. Be i min se wan grup blong ol Kristin man. (1 Korin 15:9) Tede, yumi stap yusum wod ya “kongregesen” taem yumi tokbaot kongregesen blong ol Kristin ya we yumi stap skul wetem olgeta. Sem mak bakegen, Baebol i tokbaot “kongregesen blong Laodisia,” mo long leta we aposol Pol i raetem i go long Faelimon, hem i tokbaot “kongregesen” we i stap long haos blong [hem].​—Kolosi 4:​16; Faelimon 2.

18. (a) ?Hu olgeta ya we oli olsem “kongregesen blong God ya we i laef”? (b) ?Wanem ol narafala nem ya we Baebol i kolem kongregesen ya?

¹⁸ Taem Baebol i tokbaot “kongregesen blong God ya we i laef,” hem i minim wan spesel grup blong ol man ya we oli stap folem Kraes. (1 Timote 3:15) Mo tu, oli kolem ol man ya, se “kongregesen blong ol fasbon we nem blong olgeta i stap long heven finis.” (Hibrus 12:23) Olsem ya nao, olgeta Kristin long wol we oli blong kasem laef long heven, olgeta ya oli olsem “kongregesen blong God.” I gat 144,000 man nomo we oli blong “kongregesen [ya] blong God.” Tede, i gat smol haf nomo blong olgeta 144,000 ya, we oli stap yet long wol. Ol Kristin we oli hop blong kasem itenel laef long wol ya, oli wantem we ol memba blong “kongregesen blong God ya we i laef,” oli halpem olgeta blong savegud long ol samting long saed blong speret. Mo tu, Baebol i kolem kongregesen ya blong 144,000 memba, se “woman ya we i jes mared, waef blong Smol Sipsip ya,” “bodi blong Kraes,” “haos blong God,” “Isrel blong God,” mo “Nyufala Jerusalem.”​—Revelesen 21:9; Efesas 4:12; 1 Korin 3:17; Galesia 6:16; Revelesen 21:2.

OL NYUFALA SAMTING LONG PLAN BLONG GOD

19. ?Wanem nyufala samting ya we God i rerem blong bambae samting ya i save mekem plan blong hem i kamaot long wol?

¹⁹ Adam i givim sin mo ded long ol man, be samting ya i no mekem we God i mas jenisim plan ya blong hem we hem i gat long wol, mo long ol man. Sipos hem i bin jenisim plan blong hem, hemia i soemaot we hem i no naf blong mekem faswan plan blong hem i kamaot. Long fastaem, God i wantem we wol ya bambae i kam olsem wan paradaes, we i fulap wetem ol man we oli glad, mo we oli harem gud tumas. Plan ya blong hem i stap yet. Wan samting nomo we bifo i no gat long plan ya, hemia nao, nyufala gavman we God i rerem, blong hemia bambae i save mekem plan blong hem i wok. Yumi luksave finis we Pikinini blong God, Jisas Kraes, hem i nambawan man blong rul long gavman ya. Mo i gat 144,000 man we God i jusumaot olgeta long wol, blong bambae oli save rul wetem Kraes long heven.​—Revelesen 7:4.

20. (a) ?Hu olgeta ya blong “nyufala heven” mo blong “nyufala wol”? (b) ?Yu mas mekem wanem blong bambae yu tu yu blong nyufala wol ya?

²⁰ Olgeta man blong rul ya, oli olsem “nyufala heven” blong nyu fasin ya blong God. Sipos i gat ol stret man blong rulum wol, i mas gat man long wol we oli aninit long rul ya blong olgeta. Baebol i talem we ol man ya oli olsem “nyufala wol.” (2 Pita 3:13; Revelesen 21:​1-4) Job, Deved mo Jon Baptaes, mo olgeta gudfala man blong God we oli laef oli stap long wol bifo long taem blong Kraes, olgeta ya tu oli haf blong “nyufala wol” ya. Olgeta we bambae oli pastru long en blong rabis fasin ya blong naoia, mo plante narafala man bakegen, bambae oli blong “nyufala wol” ya tu. ?Be olsem wanem long yu? ?Yu bambae yu pastru yu laef wetem olgeta? ?Yu wantem we bambae yu yu aninit long gavman blong God? Sipos yu wantem, fastaem fasin blong yu i mas laenap wetem ol samting we Baebol i talem.

[Tok blong pija long pej 121]

?Olgeta gudfala man ya, oli go long heven?

King Deved

Job

Jon Baptaes

[Tok blong pija long pej 122]

Long las naet blong hem wetem ol aposol, Jisas i talem we olgeta ya bambae oli rul wetem hem long kingdom blong Papa blong hem.