Japta 13

Gavman Blong Pis Blong God

1. ?Ol gavman blong man oli no naf blong mekem wanem?

?YU YU luksave finis we ol gavman blong man oli no rili givim ol samting we ol man oli nidim? Maet fastaem oli wantem givim, be afta oli no mekem. I no gat wan gavman we i bin tekemaot ol fasin blong brekem loa, fasin blong no laekem ol man we kala blong olgeta i defren. Mo tu, i no gat wan we i bin mekem evriwan blong ol man oli gat naf kakae, mo oli gat haos. Oli no bin tekemaot olgeta sik long ol man. Oli no save blokem ol man oli kam olfala, mo oli no save blokem ded, oli no save mekem ol dedman oli laef bakegen. I no gat wan gavman we i bin mekem pis i kamaot, we pis ya i save stap longtaem. Mo oli no save mekem ol man oli sefgud oltaem nomo. Ol gavman blong man oli no naf blong winim olgeta trabol we ol man oli stap kasem.

2. ?Wanem stampa tok blong Baebol?

² Hem we i mekem yumi, hem i save we yumi nidim wan stret gavman we i naf blong mekem ol man oli kasem wan gudfala glad laef. Taswe Baebol i tokbaot wan gavman blong God. Gavman ya we God i promes long hem, hem i stampa tok blong Baebol.

3. ?Aesea 9:​6, 7 i tokbaot gavman blong God olsem wanem?

³ Be maet yu yu askem se: ‘?Weples long Baebol i tokbaot gavman blong God?’ Wan eksampel hemia Aesea 9:​6, 7. King James Version i talem se: “Wan pikinini i bon long mifala, mifala i kasem wan boe ya: mo gavman ya bambae i stap long solda blong hem: mo nem blong hem Gudfala, Man blong Soemaot Rod, Strong God, Papa we i no save finis, Prins blong Pis. Gavman mo pis blong hem bambae i no save finis.”

4. ?Hu ya pikinini ya we bambae i rul long gavman blong God?

⁴ Long vas ya Baebol i tokbaot wan pikinini we i bon, wan Prins ya. Jif no ‘pikinini blong king’ ya, hem bambae i kam bigfala rula, “Prins blong Pis” ya. Gavman blong hem i gud tumas. Mo gavman ya bambae i mekem pis i kamaot long olgeta wol, mo pis ya i blong foreva. Pikinini ya we Aesea 9:​6, 7 i tokbaot, hemia Jisas. Taem enjel Gabriel i talemaot long vajin Meri we hem bambae i bonem Jisas, i se: “Hem bambae i king, nao hem i rul . . . mo Kingdom blong hem bambae i no save finis.”​—Luk 1:​30-33.

KINGDOM HEM I IMPOTEN

5. (a) ?Kingdom ya we Baebol i tokbaot, hem i impoten olsem wanem? (b) ?Wanem kingdom blong God? ?Kingdom ya bambae i mekem wanem?

⁵ Taem oli stap long wol, Jisas mo ol man blong hem oli bin prij long kingdom blong God. Oli bin tijim ol man long kingdom ya we bambae i kam. Hemia i nambawan wok blong olgeta. (Luk 4:43; 8:1) Olgeta ya oli tokbaot Kingdom ya blong 140 taem long Baebol. Jisas i tijim ol man blong prea long God, olsem: “Letem Kingdom blong yu i kam. Letem ol samting we yu yu wantem oli kamaot long wol, olsem oli kamaot finis long heven.” (Matyu 6:​10, King James Version) ?Kingdom ya we ol Kristin oli stap prea from, hemia i rili wan gavman? Maet yu no bin ting se i olsem, be hemia i wan prapa gavman ya. Pikinini blong God, Jisas Kraes, hem nao i King blong Kingdom ya. Mo hem bambae i rulum olgeta wol. Ol man bambae oli no moa seraot blong mekem plante kantri we olgeta oli stap agensem olgeta. !Be olgeta man bambae oli wan nomo long pis, aninit long Kingdom gavman blong God!

6. ?Taem Jisas i stap long wol, blong wanem oli talem we Kingdom i “kolosap,” mo biaen “long medel blong yufala”?

⁶ Jon Baptaes hem nao i statem prij long gavman ya, i talem long ol man, i se: “Yufala i mas tanem tingting blong yufala from ol sin blong yufala, from we kingdom blong heven i kam kolosap nao.” (Matyu 3:​1, 2) ?Blong wanem Jon i save talem olsem? From we Jisas ya, we hem bambae i rul long gavman blong God long heven, kolosap hem bambae i mas kasem baptaes long han blong Jon Baptaes, mo tu hem i mas kasem tabu speret blong God, blong i kam tabu man. Taswe afta Jisas i talem long ol Farisi, i se: “!Luk! kingdom blong God i stap long medel blong yufala finis.” (Luk 17:21) I olsem from we Jisas ya, we God i bin putumap hem blong i king, i stap wetem olgeta ya. Long tri yia haf ya we Jisas i bin prij mo tij gogo i ded, hem i soemaot we hem i gat raet blong i king, from we neva hem i lego saed blong God.

7. ?Wanem i soemaot we Kingdom i wan impoten samting long taem blong Jisas?

⁷ Blong soemaot we kingdom blong God i impoten tumas long wok blong Jisas, yumi luk nao wanem i bin kamaot long las dei bifo ded blong hem. Baebol i talem we ol man oli stat talemaot ol poen blong Jisas, oli se: “Mifala i faenem man ya i stap spolem kantri blong mifala. Hem i stap blokem ol man oli no save pem takis long Sisa, mo i stap talemaot se hem nao i Kraes, wan king ya.” Taem hed gavman blong Rom, Ponjes Paelet i harem ol samting ya, i askem long Jisas, i se: “Yu yu king blong ol man Jyu?”​—Luk 23:​1-3.

8. (a) ?Taem Paelet i askem long Jisas sipos hem i wan king, Jisas i ansa olsem wanem? (b) ?Jisas i min wanem taem hem i talem we kingdom blong hem i “no blong wol ya”?

⁸ Jisas i ansa long Paelet, be i tanem lelebet, i se: “kingdom blong mi i no blong wol ya. Sipos kingdom blong mi i blong wol ya, bambae ol man blong mi oli save faet blong blokem olgeta ya we oli wantem putum mi long han blong ol Jyu. Be kingdom blong mi i no olsem.” Jisas i ansa olsem from we Kingdom blong hem bambae i no blong wol ya. Bambae hem i rul long heven, i no rul olsem wan man we i king samples long wol ya. Be from we oli no ting se Jisas i gat raet blong hem i rul olsem wan king, taswe Paelet i askem bakegen, i se: “?Oraet, be yu yu wan king?”

9. (a) ?Wanem gudfala trutok ya we Jisas i bin talemaot? (b) ?Wanem ol bigfala kwestin long tede?

⁹ I klia we ol man ya oli wantem jajem Jisas from we hem i bin prij mo tij long wan nyufala gavman. Oli wantem kilim hem i ded. Nao Jisas i ansa long Paelet, i se: “Yu ya yu talem we mi mi king. Mi mi bon, mo mi kam long wol ya blong wan samting nomo, blong mekem wetnes long trutok.” (Jon 18:​36, 37) Yes, Jisas i bin spenem taem blong hem long wol ya blong talemaot long ol man ol gudfala trutok blong Kingdom gavman blong God. Hemia i nambawan tok blong hem. Be i gat sam kwestin we oli stap yet, hemia se: “?Wanem gavman i impoten tumas long laef blong man? ?Hemia i wan gavman blong man, no hemia i kingdom blong God we Kraes i stap rul long hem?

REREM OL SAMTING FROM NYUFALA GAVMAN

10. (a) ?Long wanem taem God i luksave we i gat nid blong wan nyufala gavman? (b) ?Weples long Baebol i faswan vas blong tokbaot gavman ya? (c) ?Snek i pija blong hu?

¹⁰ Taem Setan i pulum Adam mo Iv blong tufala i joen wetem hem blong agensem God, Jeova i luksave we ol man oli nidim wan nyufala gavman. Wantaem nomo God i talemaot we bambae hem i stanemap wan gavman olsem. Hem i tokbaot gavman ya taem hem i jajem snek, nao i talem long Devel Setan, i se: “Bambae mi mekem we yu yu badfren wetem woman ya, mo laen blong yu bambae i badfren wetem laen blong hem. Hem bambae i spolem hed blong yu, mo yu bambae yu spolem leg blong hem.”​—Jenesis 3:​14, 15.

11. ?Hu ya olgeta ya we bambae oli badfren?

¹¹ Be maet yu yu askem se: ‘?Weples oli tokbaot gavman long vas ya?’ Yumi luklukgud long wanem samting vas ya i talem. I talem we bambae Setan i badfren wetem “woman ya.” Mo we “laen” blong Setan, olsem ol pikinini blong hem, bambae i badfren wetem “laen” blong “woman ya,” olsem ol pikinini blong hem. Fastaem yumi mas faenemaot hu woman ya.

12. ?Revelesen japta 12 i tokbaot “woman ya” olsem wanem?

¹² Woman ya i no olsem wan woman blong wol. Setan i no bin mekem spesel badfren wetem eni woman long wol ya. Be woman ya i olsem wan pija nomo. Hem i pija blong narafala samting. Laswan buk long Baebol, Revelesen, i soemaot samting ya. Revelesen i talem we “woman” ya “i werem san olsem klos blong hem, i stanap long mun, mo i gat twelef sta long hed blong hem.” Blong halpem yumi faenemaot hu nao “woman” ya i pija blong hem, Revelesen i talem se: “Nao woman ya i bonem wan pikinini boe i kam long wol, hemia nao pikinini ya we hem bambae i rulum olgeta kantri wetem wan wokingstik we oli wokem long aean, nao wantaem nomo oli tekem hem oli karem i go long God, we hem i stap sidaon long bigfala jea blong hem.”​—Revelesen 12:​1-5, The Jerusalem Bible.

13. ?“Pikinini boe” ya mo “woman ya” tufala i pija blong wanem?

¹³ Sipos yumi lanem hu “pikinini boe” ya, hemia nao i save halpem yumi blong faenemaot “woman ya” i minim olsem wanem. Pikinini ya i no wan prapa pikinini blong man, olsem we woman ya tu i no wan prapa woman blong wol. Vas ya i soemaot we “pikinini boe” ya hem “bambae i rulum olgeta kantri.” Olsem ya nao, “pikinini” ya i pija blong gavman blong God, we King ya Jisas Kraes i stap rul long hem. Oraet, “woman ya” i pija blong kampani blong God, olsem olgeta gudfala speret man long heven. “Pikinini boe” ya i kamaot long “woman ya,” nao long sem fasin, King ya Jisas Kraes, i kamaot long kampani blong heven ya, olgeta gudfala speret man long heven we oli stap wok tugeta blong mekem ol samting we God i wantem. Galesia 4:26 i kolem kampani ya olsem “Jerusalem blong antap.” Olsem ya nao, taem Adam mo Iv tufala i agensem rul blong God, Jeova i stat blong rerem wan Kingdom gavman we bambae i save givim hop long olgeta we oli lavem olgeta stret fasin.

JEOVA I RIMEMBA LONG PROMES BLONG HEM

14. (a) ?Olsem wanem Jeova i soemaot we hem i no foget long promes ya blong hem, se bambae i gat wan man i kam long wan spesel “laen” we hem bambae i spolem Setan? (b) ?Hu man blong “laen” ya?

¹⁴ Jeova i no foget long promes ya blong hem se hem bambae i sanem wan man i kam long wan spesel “laen” we hem bambae i rul long gavman blong God. Man blong rul ya bambae i brekem hed blong Setan, blong i ded. (Rom 16:20; Hibrus 2:14) Afta, Jeova i talem we man ya bambae i kam long laen blong gudfala man ya Ebraham. Jeova i bin talem long Ebraham, i se: “Mo long wan man long laen blong yu, ol man blong olgeta kantri bambae oli mas kasem blesing.” (Jenesis 22:18) ?Hu man ya we promes blong God i talem se bambae i mas kam long “laen” blong Ebraham? Baebol i givim ansa, i se: “Nao God i mekem promes blong hem long Ebraham, mo long laen blong hem. Tok ya i no talem se ‘mo long ol man blong laen blong hem,’ we i min olsem plante man. Hem i talem se ‘mo long wan man blong laen blong hem,’ we i min se wan man nomo, we i Kraes.” (Galesia 3:​16, NTB.) Mo tu, Jeova i bin talem long pikinini blong Ebraham, Aesak, mo long smol pikinini blong Ebraham, Jekob we “laen” blong “woman” blong God bambae i mas kam long laen blong olgeta.​—Jenesis 26:​1-5; 28:​10-14.

15, 16. ?Wanem i soemaot we man blong “laen” ya bambae i king?

¹⁵ Jekob i wantem mekem i klia gud se man blong “laen” ya bambae i king we i stap rul, nao taswe hem i talem long pikinini blong hem Juda, i se: “Wokingstik blong king [olsem paoa blong rul] bambae i no save aot long Juda, mo wokingstik blong komanda i mas stap bitwin long leg blong hem, gogo kasem Silo i kam; nao olgeta man oli mas harem hem.” (Jenesis 49:10) Jisas Kraes i kam long laen blong Juda. Mo plante samting oli soemaot we hem nao i “Silo” ya we “olgeta man oli mas harem hem.“​—Hibrus 7:14.

¹⁶ Kolosap 700 yia biaen long promes ya long Juda, Jeova i tokbaot Deved blong laen blong Juda, i se: “Mi mi faenem Deved, man blong mi . . . Mo bambae i mas stanemap laen blong hem foreva, mo bigfala jea blong hem, olsem jea blong king, bambae i mas stap olsem ol dei blong heven.” (Sam 89:​20, 29) Taem God i talem se “laen” blong Deved bambae i blong “foreva,” mo we “bigfala jea blong hem, olsem jea blong king” bambae i stap “olsem ol dei blong heven,” ?hemia i minim wanem? God Jeova i min se Kingdom gavman, long han blong Jisas Kraes, bambae i stap foreva. ?Olsem wanem yumi save we i olsem?

17. ?Olsem wanem yumi save we Jisas Kraes hem i king blong promes ya?

¹⁷ Tingtingbak long tok ya we enjel blong Jeova, Gabriel, i talemaot long Meri. Hem i talem we bambae Meri i bonem wan pikinini, mo we hem i mas “putum nem blong hem, Jisas.” Be Jisas bambae i no wan pikinini, no wan man, blong stap long wol ya nomo. Gabriel i talem sam moa, i se: “Hemia bambae i wan haeman, mo bambae oli kolem hem Pikinini blong God ya we i Hae Moa; mo God Jeova bambae i putum hem long bigfala jea ya blong King Deved, papa blong hem, nao hem bambae i king, mo hem i rul long haos blong Jekob foreva, mo kingdom blong hem bambae i no save finis.” (Luk 1:​31-33) I gud tumas we Jeova i rerem ol samting blong stanemap foreva wan gudfala gavman, we i blong halpem olgeta ya we oli lavem mo trastem hem.

18. (a) ?Baebol i talem we ol gavman blong wol bambae oli finis olsem wanem? (b) ?Gavman blong God bambae i mekem wanem blong halpem ol man?

¹⁸ Naoia taem i kolosap we Kingdom gavman blong God bambae i finisim olgeta gavman blong wol. Hemia i taem blong Jisas Kraes i mekem faet blong hem, olsem wan King blong win. Baebol i tokbaot faet ya, i se: “Long taem blong ol king ya God blong heven bambae i stanemap wan kingdom we neva bambae oli save spolem. Kingdom ya bambae . . . i brebrekem mo finisim olgeta kingdom ya, mo hemia nao bambae i stanap foreva.” (Daniel 2:44; Revelesen 19:​11-16) Taem ol narafala gavman bambae oli no moa stap, gavman blong God i save givim ol samting we ol man oli nidim. Man blong Rul, Jisas Kraes, bambae hem i mekem we i no moa gat man we i sik, no man we i stap kam olfala, no man we i ded. Bambae i no moa gat fasin blong brekem loa, no ol haos we oli nogud, no man we i sot long kakae, no enikaen narafala trabol olsem. Bambae i gat prapa pis long wol, mo ol man bambae oli sefgud. (2 Pita 3:13; Revelesen 21:​3-5) Be yumi mas savegud moa long olgeta ya we bambae oli stap rul wetem Kraes, long Kingdom gavman ya blong God.

[Tok blong pija long pej 113]

Jisas i sanem ol man blong hem blong go mekem impoten wok ya blong prij long kingdom blong God

[Tok blong pija long pej 114]

Oli wantem kilim hem i ded, be taem Jisas i stap long kot hem i stap prij yet long kingdom blong God

[Tok blong pija long pej 119]

?Yu ting se Jisas i wan King blong win, no hem i wan bebi nomo?