Japta 18

Tekem Disisen Blong Mekem Wok Blong God Foreva

1, 2. ?Yumi mas mekem wanem samting antap long fasin blong kasem save ya blong God?

TRAEM tingbaot: Yu yu stap stanap fored long wan doa we oli lokem finis. Hemia doa blong wan rum we i gat ol sas samting i stap insaed long hem. Nao maet man blong haos i givim ki long yu. Mo hem i talem long yu blong tekem ol sas samting ya olsem yu wantem. Ki ya bambae i no givhan long yu sipos yu no yusum. Sem mak, yu mas yusum save sipos yu wantem se i givhan long yu.

² Samting ya i tru moa long saed blong save blong God. Yes, stret save long saed blong Jeova God mo Jisas Kraes i save givim laef we i no save finis. (Jon 17:⁠3) Be, yu no save kasem laef from save nomo. Yu mas mekem save ya blong God i wok long laef blong yu, olsem we yu yusum wan ki we i impoten tumas. Jisas i talem se olgeta we oli mekem ol samting we God i wantem, bambae oli save go ‘insaed long kingdom.’ !Ol man olsem, bambae oli kasem nambawan jans blong mekem wok blong God foreva!—Matyu 7:21; 1 Jon 2:17.

3. ?God i wantem se yumi mas mekem wanem?

³ Afta we yumi kasem save long ol samting we God i wantem, i impoten we yumi mekem olgeta. ?Yu ting se God i wantem we yu mekem wanem? Ansa i sot nomo: Folem Jisas. Fas Pita 2:21 i talem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” Taswe, blong mekem ol samting we God i wantem, yu mas folemgud eksampel blong Jisas. Hemia nao rod blong yusum save blong God.

?OLSEM WANEM JISAS I YUSUM SAVE BLONG GOD?

4. ?From wanem Jisas i gat plante save long saed blong Jeova, mo olsem wanem hem i yusum save ya?

⁴ Jisas Kraes i save God moa bitim ol narafala. Hem i bin stap mo wok wetem Jeova God long heven blong plante taosen yia, bifo we hem i kam long wol. (Kolosi 1:15, 16) ?Mo Jisas i mekem wanem wetem ol save ya? Hem i no jes kasem save nomo. Jisas i folem ol save ya long laef blong hem. Hemia nao from wanem hem i soem kaen fasin, longfala tingting, mo lav, long ol narafala man. Jisas i folem Papa blong hem long heven. Mo hem i mekem ol samting we oli laenap wetem save we hem i gat, long saed blong ol rod mo fasin blong Jeova.—Jon 8:23, 28, 29, 38; 1 Jon 4:8.

5. ?From wanem Jisas i tekem baptaes, mo olsem wanem hem i folem mining blong baptaes long laef blong hem?

⁵ Mo tu, save we Jisas i gat i pusum hem blong mekem wan impoten samting. Hem i aot long Galili i kam long Jodan Reva, mo long ples ya Jon i baptaesem hem. (Matyu 3:13-15) ?Wanem mining blong baptaes blong Jisas? From we hem i wan man Isrel, hem i bon long wan nesen we oli givim laef blong olgeta long God finis. Taswe, taem Jisas i bon, laef blong hem i blong God finis. (Eksodas 19:5, 6) Taem hem i tekem baptaes, i olsem we hem i putum hem wan long han blong Jeova, blong mekem ol samting we Jeova i wantem hem blong mekem long taem ya. (Hibrus 10:5, 7) Mo Jisas i folem mining blong baptaes ya long laef blong hem. Hem i wok strong long ol wok blong Jeova. Hem i serem save blong God wetem ol man long evri jans we hem i gat. Jisas i haremgud blong mekem ol samting we God i wantem. Hem i talem se samting ya i olsem kakae blong hem.—Jon 4:34.

6. ?Olsem wanem Jisas i fogetem hem wan?

⁶ Jisas i luksave fulwan se hem i mas lego plante samting blong mekem wanem we Jeova i wantem—hem i mas lego laef blong hem tu. Be, Jisas i fogetem hem wan. Hem i putum ol prapa nid blong hem long seken ples. Oltaem, hem i mekem ol samting we God i wantem fastaem. Long saed ya, ?olsem wanem yumi save folem eksampel blong Jisas we i stretgud olgeta?

OL SAMTING WE YU MAS MEKEM BLONG KASEM LAEF BLONG OLWE

7. ?Wanem sam mak we yu mas kasem blong kam naf blong tekem baptaes?

⁷ Yumi no stretgud olgeta olsem Jisas. Taswe, yumi mas mekem sam impoten samting blong kasem mak we yumi naf blong tekem baptaes. Faswan samting, yumi mas kasem stret save long saed blong Jeova God mo Jisas Kraes long hat blong yumi. Samting ya bambae i mekem se yumi gat bilif mo dip lav long God. (Matyu 22:37-40; Rom 10:17; Hibrus 11:6) Taem yumi folem ol loa, rul mo fasin blong God long laef blong yumi, samting ya i mas pusum yumi blong tanem tingting blong yumi, mo harem nogud long fored blong God from ol sin we yumi bin mekem. Samting ya i save lidim yumi blong jenisim laef blong yumi. Hemia i min se tanraon mo lego enikaen nogud wok mo fasin we yumi bin folem, bifo we yumi kasem save ya blong God. (Ol Wok 3:19) Sipos yumi stap mekem nogud yet long fasin haed, mo yumi no stap mekem samting we i stret, yumi no tanraon yet. Be yumi no save trikim God. Jeova i save luksave ol fasin tu fes.—Luk 12:2, 3.

8. ?Yu mas mekem wanem taem yu wantem joen long wok blong talemaot Kingdom?

⁸ Naoia, we yu stap kasem save blong God longtaem lelebet, ?yu ting se i gud we yu wan yu mekem wan samting wetem save ya long saed blong speret? Ating yu wantem tumas blong storeyan long ol famle, ol fren, mo ol narafala, long ol samting we yu stap lanem. Maet yu mekem samting ya finis, olsem we Jisas i bin tekem evri jans blong talemaot gud nyus long ol narafala. (Luk 10:38, 39; Jon 4:6-15) Maet naoia yu wantem mekem moa. Ol Kristin elda oli glad blong toktok wetem yu, blong luksave sipos yu yu kasem ol mak mo yu naf blong joen oltaem long wok we ol Wetnes blong Jeova oli mekem blong talemaot Kingdom. Sipos yes, ol elda bambae oli mekem plan blong yu joen wetem wan Wetnes blong prij. Ol disaepol blong Jisas oli folem ol advaes blong hem, olsem nao oli mekem wok blong prij long fasin we i gat oda. (Mak 6:7, 30; Luk 10:1) Advaes ya bambae i givhan long yu taem yu joen long wok blong talemaot mesej blong Kingdom long olgeta haos wanwan, mo long ol narafala ples tu.—Ol Wok 20:20, 21.

9. ?Olsem wanem wan man i save givim laef blong hem i go long God, mo olsem wanem samting ya i gat paoa long laef blong hem?

⁹ Wok blong talemaot gud nyus long ol defren kaen man long eria we kongregesen i wok long hem, i wan rod blong faenem olgeta we oli laekem stret fasin. Mo tu, wok ya i wan long ol gudfala wok we oli pruvum se yu gat bilif. (Ol Wok 10:34, 35; Jemes 2:17, 18, 26) Fasin blong go long ol Kristin miting oltaem mo joen plante long wok blong prij, hemia ol rod blong soem tu se yu tanem tingting blong yu from ol sin, yu tanraon, mo naoia yu gat strong tingting blong folem ol save blong God long laef blong yu. ?Wanem nekiswan samting we i stret blong mekem? Givim laef blong yu i go long Jeova God. Hemia i min se, long prea we i kamaot long hat, yu talem long God se yu glad mo yu wantem wetem fulhat blong yu, blong givim laef blong yu long hem blong mekem ol samting we hem i wantem. Hemia nao rod blong givim yu wan i go long Jeova, mo blong tekem yok blong Jisas Kraes we wok blong hem i no had tumas.—Matyu 11:29, 30.

BAPTAES BLONG YU—MINING BLONG HEM

10. ?From wanem yu mas tekem baptaes afta we yu givim laef blong yu long Jeova?

¹⁰ Jisas i talem se olgeta we oli kam disaepol blong hem oli mas tekem baptaes. (Matyu 28:19, 20) ?From wanem yu nidim blong mekem samting ya afta we yu givim laef blong yu i go long God? Yu givim yu wan long Jeova finis. Hem i save se yu laekem hem tumas. Be bambae yu wantem mekem moa, blong soem long ol narafala se yu laekem God tumas. Baptaes nao i jans blong yu blong soem long ol man se yu givim laef blong yu finis long Jeova God.—Rom 10:9, 10.

11. ?Wanem mining blong baptaes?

¹¹ I gat plante pijatok we oli eksplenem mining blong baptaes. Taem oli draonem yu fulwan, no “berem” yu long wora, i olsem we yu yu ded long saed blong laef blong yu bifo. Taem yu kamaot long wora, i olsem we yu statem wan nyufala laef, wan laef we yu mekem ol samting we God i wantem, i no ol samting we yu yu wantem. Samting ya i no minim se bambae yu neva mekem wan mastik bakegen. Yumi evriwan i sinman. From samting ya, yumi mestem evri dei. Be, taem yu kam wan man blong wok blong Jeova we yu givim laef blong yu long hem mo yu tekem baptaes, yu yu fren wetem hem long wan spesel fasin. From we yu tanem tingting blong yu from ol sin mo yu baptaes wetem tingting daon, Jeova i rere blong fogivim ol sin blong yu from ransom sakrifaes blong Jisas. Taswe, baptaes i mekem se yu save gat wan klia tingting we i no jajem yu long fored blong God.—1 Pita 3:21.

12. ?I minim wanem blong baptaes (a) ‘long nem blong Papa’? (b) ‘long nem blong Pikinini’? (c) ‘long nem blong tabu speret’?

¹² Jisas i talem long ol man blong hem blong baptaesem ol nyufala disaepol ‘long nem blong Papa, mo long nem blong Pikinini, mo long nem blong tabu speret.’ (Matyu 28:19) ?Jisas i minim wanem? Baptaes ‘long nem blong Papa’ i minim se hemia we i tekem baptaes i agri wetem ful hat blong hem se Jeova God i Man we i Wokem olgeta samting, mo Hem i gat raet blong Rul antap long heven mo wol. (Ol Sam 36:9; 83:18; Eklesiastis 12:1) Baptaes ‘long nem blong Pikinini’ i minim se hem i agri se Jisas Kraes—antap moa, ransom sakrifaes blong Hem—hemia nomo i rod we God i stanemap blong sevem ol man. (Ol Wok 4:12) Baptaes ‘long nem blong tabu speret’ i minim se hemia we i tekem baptaes i agri se tabu speret no paoa blong Jeova, i olsem tul we God i yusum blong mekem ol stampa tingting blong Hem i kamtru. Mo tu, hem i yusum tabu speret blong givim paoa long ol man blong Hem blong mekem ol stret samting we Hem i wantem, long kampani blong ogenaesesen blong Hem we tabu speret i stap lidim.—Jenesis 1:2; Ol Sam 104:30; Jon 14:26; 2 Pita 1:21.

?YU YU RERE BLONG BAPTAES?

13, 14. ?From wanem yumi no mas fraet blong tekem disisen blong mekem wok blong Jeova God?

¹³ From we baptaes i gat bigfala mining mo i impoten moa bitim ol narafala samting long laef, ?hem i wan samting we yu mas fraet blong mekem? !No gat! I tru se yu mas rili tinghevi long disisen we yu mekem blong baptaes. Be disisen ya i moa waes bitim ol narafala disisen we yu save mekem.

¹⁴ Baptaes i soem pruf se yu jusum blong mekem wok blong Jeova God. Tingbaot ol man we yu save olgeta. Evriwan long olgeta, oli stap wok blong wan masta, long wan rod no narafala rod. Samfala oli wok had blong kam rij. (Matyu 6:24) Samfala oli yusum ful laef blong olgeta long wok blong olgeta. Sam narafala oli tingbaot olgeta nomo, bigfala samting long laef blong olgeta i blong mekem wanem we oli wantem. Sam narafala bakegen, oli mekem wok blong ol gyaman god. Be yu yu jusum blong mekem wok blong trufala God, Jeova. I no gat wan narafala man we i soem kaen fasin, fasin sore, mo lav olsem Hem. God i leftemap ol man wetem ol wok we i gat mining, mo i lidim olgeta blong kasem laef. Hem i givim laef we i no save finis olsem wan presen long ol man blong hem. Tru ya, yu no nidim blong fraet blong folem eksampel blong Jisas mo givim laef blong yu i go long Jeova. Blong talem stret, rod ya nomo i save mekem God i glad, mo i waes tumas blong folem.—1 King 18:21.

15. ?Wanem sam problem we oli mekem se plante man oli slou blong tekem baptaes?

¹⁵ Be, baptaes i no wan samting we yu mekem from we samfala oli fosem yu. Hem i wan disisen blong yu nomo wetem Jeova. (Galesia 6:4) From we yu stap gohedgud long saed blong speret, maet yu bin tingbaot se: “?I gat samting i stap blokem mi yet, se mi no save baptaes?” (Ol Wok 8:35, 36) Yu save askem long yu wan se, ‘?Fasin blong famle blong agensem mi i stap blokem mi? ?Laef blong mi i no stret yet wetem ol loa blong Baebol, mo mi stap mekem wan nogud fasin yet? ?Maet mi stap fraet se ol man raonabaot bambae oli no moa laekem mi?’ Hemia nao sam samting blong tingbaot. Be yu mas yusum stret tingting blong skelem olgeta.

16. ?Olsem wanem bambae yu kasem gudfala frut taem yu mekem wok blong Jeova?

¹⁶ Taem yu stap skelem, i no stret blong tingbaot ol trabol we yu save kasem nomo. Yu mas tingbaot ol blesing tu we yu save kasem, taem yu mekem wok blong Jeova. Wan eksampel, hemia fasin blong famle blong agensem yu. Jisas i promes long ol disaepol blong hem se, sipos ol famle blong olgeta oli tanem baksaed long olgeta from we oli folem hem, bambae oli kasem wan famle long saed blong speret we i bigwan moa. (Mak 10:29, 30) Ol brata mo sista ya long saed blong bilif, bambae oli soem lav long yu olsem we yu stret famle blong olgeta. Bambae oli halpem yu blong stanap strong taem ol man oli agensem yu. Mo bambae oli sapotem yu long rod we i go kasem laef. (1 Pita 5:9) Antap moa, ol elda long kongregesen oli save halpem yu blong winim ol problem mo blong stanap strong agensem ol narafala traem we yu kasem. (Jemes 5:14-16) Long saed blong fasin blong ol man blong wol blong no moa laekem yu, yu save tingbaot se, ‘?Wanem i moa gud bitim we Man ya we i Wokem heven mo wol i glad long mi, mo i haremgud long fasin blong laef we mi mi jusum?’—Proveb 27:11.

FOLEM DISISEN BLONG GIVIM LAEF LONG JEOVA MO BAPTAES

17. ?From wanem yu mas tingbaot baptaes olsem stat blong rod, i no en blong hem?

¹⁷ I impoten blong rimemba se baptaes i no en blong fasin blong gru long saed blong speret. Hem i makem stat blong rod blong mekem wok blong God long ful laef blong yu, olsem wan minista blong God mo wan Wetnes blong Jeova. Baptaes i impoten tumas, be i no wan promes se bambae yu kasem laef. Jisas i no talem se: ‘Evriwan we i tekem baptaes bambae God i sevem hem.’ No gat. Hem i talem se: “Man we i stanap strong gogo olgeta samting ya i finis, bambae God i sevem hem.” (Matyu 24:13) Taswe, i impoten we yu mas lukaot Kingdom blong God fastaem. Hemia i min se, yu mas mekem i kam faswan samting long laef blong yu.—Matyu 6:25-34.

18. ?Afta baptaes, wanem sam mak we yu save traehad blong kasem?

¹⁸ Blong stanap strong longtaem long wok blong Jeova, yu mas putum ol mak long saed blong speret we yu save wok from. Wan gudfala mak i blong kasem moa save long God tru long prapa stadi long Tok blong Hem oltaem. Mekem plan blong ridim Baebol evri dei. (Ol Sam 1:1, 2) Go long ol Kristin miting oltaem. Kampani we yu faenem long ples ya bambae i halpem yu blong kam strong long saed blong speret. I gud we yu putum mak blong ansa long ol miting blong kongregesen. Samting ya bambae i presem Jeova mo i givhan blong mekem bilif blong ol narafala i kam strong. (Rom 1:11, 12) Wan narafala mak we yu save kasem, i blong mekem ol prea blong yu oli kam dip moa.—Luk 11:2-4.

19. ?Wanem ol fasin we tabu speret i save halpem yu blong soemaot?

¹⁹ Blong folem mining blong baptaes long laef blong yu, yu nidim blong lukaotgud oltaem long ol samting we yu mekem. Yu mas letem tabu speret blong God i wokem ol gudfala fasin insaed long yu, olsem lav, glad, pis, longfala tingting, kaen fasin, gud fasin, bilif, kwaet fasin, mo fasin blong bos long tingting. (Galesia 5:22, 23; 2 Pita 3:11) Rimemba, Jeova i stap givim tabu speret long olgeta we oli prea from, mo we oli obei long hem olsem ol trufala man blong wok blong hem. (Luk 11:13; Ol Wok 5:32) Taswe yu mas prea long God blong askem speret blong hem, mo askem hem blong halpem yu blong soemaot ol fasin we hem i glad long olgeta. Taem yu letem speret blong God i wok long laef blong yu, ol fasin ya bambae oli kamaot moa long ol toktok mo wok blong yu. I tru, evri man long Kristin kongregesen i stap traehad blong wokem “nyufala laef ya,” blong oli save kam moa olsem Kraes. (Kolosi 3:9-14) Evriwan long yumi i stap kasem ol defren traem long rod ya, from we evriwan i stap long wan defren mak long saed blong speret. From we yu yu wan sinman, yu mas traehad blong mekem prapa fasin blong yu i kam olsem Kraes. Yu neva mas lego long wok ya. Yu save mekem wetem help blong God.

20. ?Olsem wanem yu save folem eksampel blong Jisas long minista wok blong yu?

²⁰ Wan narafala mak long saed blong speret we yu save kasem, i blong traem folem moa eksampel blong Jisas long saed blong fasin glad. (Hibrus 12:1-3) Hem i laekem tumas wok blong prij. Sipos yu kasem jans ya finis blong joen long wok blong talemaot Kingdom, ale, yu no mas ting nating long hem. Traehad blong faenem glad long wok blong tijim ol narafala long saed blong Kingdom blong God, olsem Jisas i faenem. Folem ol tijing we kongregesen i givim blong halpem yu blong kamgud moa olsem wan tija. Mo yu save sua se Jeova bambae i givim paoa long yu blong mekem minista wok blong yu.—1 Korin 9:19-23.

21. (a) ?Olsem wanem yumi save se ol man we oli baptaes mo oli stap tru long Jeova, oli sas long ae blong hem? (b) ?Wanem i soem se yumi mas tekem baptaes blong laef tru long taem we God bambae i jajem rabis fasin blong wol ya?

²¹ Wan man we i givim laef blong hem long God, i tekem baptaes, mo i stap traehad blong folem Jisas, hem i spesel long ae blong God. Jeova i stap luklukgud long hat blong ol bilyan man, mo hem i save se i no gat plante man olsem. Hem i luk ol man ya olsem ol sas samting, “ol gudgudfala samting.” (Hagae 2:7) Ol profet tok blong Baebol oli soem se long ae blong God, ol man ya oli gat mak finis blong soem se oli save laef tru long taem blong jajem ol rabis fasin blong wol ya, we i kolosap nomo. (Esikel 9:1-6; Malakae 3:16, 18) ?Yu yu “stret blong kasem laef blong olwe”? (Ol Wok 13:48, NW) ?Yu yu wantem kasem mak ya we i soem se yu wan man blong wok blong God? Fasin blong givim laef blong yu long God mo tekem baptaes, i haf long mak ya. Mo hemia nao samting we yu mas mekem blong kasem laef.

22. ?“Bigfala hif blong man” oli save tingbaot wanem kaen fyuja?

²² Afta we Bigfala Wora i kavremap wol, Noa mo famle blong hem oli kamaot long sip, blong stap long wan wol we i klin. Sem mak tede, “wan bigfala hif blong man,” oli folem ol save blong God long laef blong olgeta mo Jeova i glad long olgeta. Oli gat hop blong laef tru long en blong rabis fasin blong wol ya, mo haremgud long laef we i no save finis, long wol ya we bambae i kam klin blong olwe. (Revelesen 7:9, 14) ?Bambae laef ya i olsem wanem?

JEKEM SAVE BLONG YU

?Jeova i wantem se yu yusum ol save long saed blong hem long wanem rod?

?Wanem sam samting we yu mas mekem blong kam naf blong tekem baptaes?

?From wanem baptaes i no en blong rod be stat blong hem nomo?

?Olsem wanem yumi save folem promes blong givim laef blong yumi long God mo baptaes?

[Tok Blong Pija Long Pej 172]

?Yu yu prea long God finis blong givim laef blong yu i go long hem?

[Tok Blong Pija Long Pej 174]

?I gat wan samting i stap blokem yu yet blong yu no save baptaes?