Japta 19
Taem Wol i Fulap Long Save Blong God
1, 2. ?Wanem i spolem ol samting we Jeova i wokem?
WAN man we i gat gudhan blong dro i jes finisim wan naesfala pija. !Ale, hem i glad tumas long pija ya—wan nambawan wok! Be long sem naet, wan man we i jelas, i skrasem mo i putum ol mak long pija ya. I klia se man we i mekem pija ya i mas harem nogud. !Hem i wantem we oli sakem stronghed ya i go long kalabus! Mo hem i wantem tumas blong mekem pija blong hem i kam naes bakegen.
2 Olsem man ya blong dro, Jeova i mekem wan nambawan wok, taem hem i mekem wol ya mo putum man long hem. Afta we hem i wokem man mo woman, hem i talem se ol wok blong hem long wol oli ‘gud tumas.’ (Jenesis 1:31) Adam mo Iv, tufala i prapa pikinini blong God, mo hem i laekem tufala tumas. Hem i wantem we tufala i gat wan hapi, gudfala fyuja. Setan i lidim tufala blong agensem God. Be oli no spolem ol nambawan samting we God i wokem, kasem mak we hem i no moa save mekem i kamgud.—Jenesis 3:23, 24; 6:11, 12.
3. ?Wanem ya “laef we i prapa wan”?
3 God i gat tingting blong stretem ol trabol. Hem i wantem tumas we yumi laef long fasin we i laenap wetem stampa tingting blong hem fastaem. Laef blong yumi naoia we i sot mo fulap long trabol i no “prapa wan.” Hem i longwe long kaen laef we God i tingbaot fastaem. “Laef we i prapa wan” we God i wantem se yumi kasem, hemia ‘laef we i no save finis’ long wan wol we i stretgud olgeta.—1 Timote 6:12, 19.
4, 5. (a) ?Olsem wanem Paradaes bambae i kamtru? (b) ?From wanem yumi mas tingting dip long hop blong yumi long fyuja?
4 Save blong God i givim wan wok long yu blong mekem long fored blong Jeova. (Jemes 4:17) Be tingbaot ol blesing we bambae yu haremgud long olgeta, sipos yu folem save ya mo traehad blong kasem laef we i no save finis. Long Tok blong Jeova God, Baebol, hem i soem wan naes pija long saed blong laef long Paradaes long wol ya, we i kolosap nomo. I tru, yumi ol man blong Jeova, yumi no mekem wok blong God blong kasem presen nomo. Yumi mekem wok blong God from we yumi laekem hem tumas. (Mak 12:29, 30) Mo tu, yumi no kasem laef olsem pei blong wok we yumi mekem long Jeova. Laef blong olwe i wan presen we God i givim. (Rom 6:23) I gud blong tingting dip long laef long Paradaes. Hop ya i pulum yumi blong tingbaot prapa fasin blong Jeova God—we i gat lav mo “i stap mekem i gud long olgeta we oli stap traem faenem hem.” (Hibrus 11:6) Hop we i tru mo strong long tingting mo hat blong yumi, bambae i mekem se yumi save stanap strong tru long ol hadtaem long wol ya blong Setan.—Jeremaea 23:20.
5 Naoia, yumi tingting long hop we Baebol i givim, blong laef olwe long Paradaes long wol ya long fyuja. ?Bambae laef i olsem wanem taem wol i fulap long save blong God?
AFTA AMAGEDEN—PARADAES LONG WOL
6. ?Wanem ya Amageden, mo bambae i mekem wanem long ol man?
6 Olsem yumi luk finis, i no longtaem bambae Jeova God i spolem rabis fasin blong wol ya. Taem i stap spid i go, blong wol i kasem samting we Baebol i kolem Ha-Mageden, no Amageden. Wod ya i mekem plante man oli tingbaot wan nyuklia faet, we ol kantri we oli stap faet bambae oli statem. Be Amageden i no olsem nating. Revelesen 16:14-16 i talem se Amageden i “faet long bigfala Dei blong God ya we i gat olgeta paoa.” Hem i wan faet we “ol king blong evri ples long wol” no evri kantri, bambae oli joen long hem. I no longtaem, Pikinini blong Jeova God, King we hem i putumap, bambae i girap blong faet. Risal i suagud. Olgeta we oli agensem Kingdom blong God mo oli joen wetem rabis wol blong Setan, bambae oli ded. Olgeta nomo we oli holemstrong long Jeova, bambae oli laef.—Revelesen 7:9, 14; 19:11-21.
7. ?Setan mo ol rabis enjel blong hem bambae oli stap wea long Wan Taosen Yia Rul blong Kraes, mo olsem wanem samting ya bambae i mekem i gud long ol man?
7 Nao tingbaot se yu yu laef tru long bigfala faet ya. ?Bambae laef i olsem wanem long nyufala wol we God i promes long hem? (2 Pita 3:13) Yu no nidim blong talem tingting blong yu nomo, from we Baebol i talem stret. Mo samting we hem i talem i gud tumas. Yumi lanem se Setan mo ol rabis enjel blong hem, bambae oli no moa save mekem wok blong olgeta. Bambae oli kalabus long wan hol, long Wan Taosen Yia Rul blong Jisas Kraes. Bambae oli no moa save wok long fasin haed. Oli no moa save wokem ol plan blong mekem trabol, mo traem pulum yumi blong mekem samting we i brekem loa blong God. !Hemia i gud tumas!—Revelesen 20:1-3.
8, 9. ?Long nyufala wol, wanem bambae i hapen long ol trabol, sik, mo fasin blong kam olfala?
8 Long taem ya, olgeta sik bambae oli finis. (Aesea 33:24) Ol man we leg blong olgeta i nogud, bambae oli stanap, wokbaot, ron, mo danis long ol leg we oli strong gud. Ol man we oli laef plante yia finis be oli neva harem wan samting from we sora blong olgeta i fas, bambae oli harem ol hapi voes raonabaot long olgeta. Ol blaen man, bambae oli singaot from glad, taem wol we i fulap long kala i kam klia, mo oli save lukluk olgeta samting. (Aesea 35:5, 6) !Yes, ating hemia fastaem we oli luk fes blong olgeta we oli laekem olgeta tumas! Maet blong smoltaem oli no save luk klia, taem ol wora i ron long ae blong olgeta from glad.
9 !Tingbaot! !I no moa gat ol glas blong ae, ol wud blong halpem man blong wokbaot, ol wokingstik, ol meresin, ol dokta blong tut, mo ol hospital! Neva bambae man i harem nogud bakegen from ol filing we oli trabol no tingting we i foldaon. Bambae i no moa gat wan pikinini we sik i spolem yangtaem blong hem. Ol trabol we i joen wetem fasin blong kam olfala bambae oli finis. (Job 33:25) Bambae helt blong yumi i kamgud, mo bodi i kam strong. Bambae yumi haremgud long slip blong yumi long naet, mo yumi wekap evri moning wetem nyufala paoa. Bambae yumi wantem wok, mo yumi rere long wan nyufala dei blong hapi laef, mo wok we yumi haremgud long hem.
10. ?Ol man we oli laef tru long Amageden bambae oli kasem wanem wok?
10 Bambae i gat plante gudfala wok, we ol man we oli laef tru long Amageden oli save haremgud long hem. Bambae oli mekem wol i kam wan paradaes. Bambae oli karemaot enikaen doti we i stap from olfala wol. Bambae oli mekem ol naesfala garen mo open ples blong spel, long graon we bifo i nogud, mo long graon we bifo ol haos oli fasfas long hem mo oli doti. Olgeta man bambae oli haremgud blong gat wan haos we i klin mo i gud. (Aesea 65:21) Taem ol yia oli stap pas, ol haf blong wol we oli mekem paradaes long hem, bambae oli kam bigwan, gogo oli joen tugeta. Nao ful wol i save kam naes olsem Man we i Wokem olgeta samting i wantem fastaem, taem hem i mekem garen blong Iden. !Bambae yumi glad tumas blong joen long wok ya blong mekem wol i kam naes bakegen!
11. ?Long fyuja, bambae ol man oli gat wanem kaen fasin fren wetem ol anamol mo ol samting raonabaot long olgeta?
11 God bambae i lidim ol wok ya. Olsem nao, yumi no save spolem ol samting raonabaot long yumi. Ol man bambae oli gat pis wetem ol anamol. Bambae oli no kilim ol anamol blong nating nomo. Olsem fastaem, bambae oli kam ol man we oli tinghevi long wok ya blong lukaot mo keagud long wol. Traem mekem pija long tingting blong yu long ol wael dog mo pikinini sipsip, ol laeon mo pikinini buluk, we oli stap kakae wanples—mo ol anamol blong velej oli no fraet nating. Ol smol pikinini tu oli no save fraet long ol wael anamol. Mo i no gat ol raf, stronghed man i stap, blong spolem pis blong nyufala wol ya. (Aesea 11:6-8) !Nyufala wol ya i kwaet we i kwaet!
LAEF BLONG OL MAN I JENIS
12. ?Olsem wanem Aesea 11:9 i stap kamtru naoia, mo olsem wanem bambae i kamtru long Paradaes?
12 Aesea 11:9 i talem long yumi from wanem i no gat wan nogud samting long nyufala wol ya. Hem i se: ‘Bambae wol i fulap long save blong Jeova olsem we solwora i go kasem en blong mak blong hem olgeta.’ Vas ya i stap tokbaot ol man. Ol anamol oli no save kasem “save blong Jeova” mo jenisim fasin blong laef, from we oli folem wan program we oli bon wetem. Be save blong Man ya we i Wokem yumi i stap jenisim laef blong ol man. Ating yu yu jenisim plante fasin blong yu finis, taem yu folem save ya blong God long laef blong yu. Plante milyan man oli mekem olsemia. Taswe, profet tok ya i stat blong kamtru finis long ol man blong Jeova. Be tu, hem i tokbaot wan taem we olgeta man long wol bambae oli sakem ol raf fasin, no ol fasin we oli olsem fasin blong anamol, mo bambae oli kam kwaet man blong olwe.
13. ?Wanem program blong tijim ol man we bambae i kamaot long wol?
13 !Bambae i nambawan, taem wol i fulap long save blong God! King Jisas Kraes mo ol 144,000 man we oli rul wetem hem, bambae oli lidim wan bigfala program blong tijim ol man. Bambae i gat sam nyufala “buk” blong yusum. I klia se hemia ol tijing blong God we oli raetemdaon, blong yusum olsem stampa samting blong tijim olgeta man long wol. (Revelesen 20:12) Bambae ol man oli lanem blong mekem pis, i no faet. Olgeta tul blong faet bambae oli lus blong olwe. (Ol Sam 46:9) Olgeta man we oli stap long nyufala wol ya, bambae oli lanem blong soem lav, respek, mo ona long ol narafala man.
14. ?Olsem wanem wol bambae i defren taem ol man oli joen olsem wan famle nomo?
14 Ol man bambae oli kam olsem wan famle we i joengud. Bambae i no moa gat wan samting we i save spolem fasin blong joengud olsem ol brata. (Ol Sam 133:1-3) Bambae i no gat nid blong lokem haos blong blokem ol stilman. Hat blong olgeta man we oli stap long evri haos, long evri ples long wol, bambae i fulap long pis.—Maeka 4:4.
GLAD BLONG LUK OL MAN WE OLI LAEF BAKEGEN
15. ?Wanem tufala grup we bambae oli laef bakegen long wol?
15 Long Wan Taosen Yia Rul ya blong Kraes, ol dedman bambae oli laef bakegen. Be samfala oli no save laef bakegen. Hemia olgeta we oli bin mekem sin we oli save se i agensem tabu speret no paoa blong God. Oli bin go agensem wok blong tabu speret ya no rod we hem i soemaot, mo oli no bin tanem tingting blong olgeta from sin ya. (Matyu 23:15, 33; Hibrus 6:4-6) I tru, God nomo i save mekem disisen se hu nao i bin mekem sin ya. Be i klia se tu grup bambae oli laef bakegen—“ol man we oli stret wetem ol man we oli no stret.” (Ol Wok 24:15) Bambae ol samting i folem gudfala oda. Taswe i stret blong ting se ol man we oli stret, no olgeta we oli bin holemstrong long wok blong Jeova, bambae oli laef bakegen long wol fastaem.—Hibrus 11:35-39.
16. (a) ?Hu sam long “ol man we oli stret” we bambae oli laef bakegen long wol? (b) ?Weswan long ol man blong bilif bifo we yu yu rili wantem toktok wetem hem, mo from wanem?
16 Ol man blong Jeova bambae oli no moa harem nyus blong ol faet, trabol mo ded. Bambae oli harem ol nambawan ripot long saed blong laef bakegen. Bambae yumi glad tumas blong harem nyus se ol man mo woman blong bilif olsem Ebel, Inok, Noa, Ebraham, Sera, Job, Moses, Rehab, Rut, Deved, Elaeja, mo Esta, oli laef bakegen. !Bambae oli givim plante moa save long saed blong ol store blong Baebol, taem oli tokbaot ol nambawan samting we oli bin kamaot long taem blong olgeta! Mo olgeta, wetem ol stret man we oli ded long taem blong yumi, bambae oli wantem harem ol store long saed blong en blong wol blong Setan, mo olsem wanem Jeova i mekem nem blong hem i tabu mo pruvum se rul blong hem i stret.
17. ?Olsem wanem ol man blong bilif bambae oli halpem ol narafala we oli laef bakegen long ded?
17 !Biaen, ol man blong bilif ya bambae oli givhan bigwan, taem ol narafala man oli laef bakegen! !Hemia taem we plante bilyan “man we oli no stret” oli fri long ded! Bighaf blong ol man oli neva bin gat jans blong save Jeova. Setan i “satem tingting blong olgeta.” (2 Korin 4:4) Be bambae i olsem we Setan i neva bin mekem wok ya. Ol man we oli no stret, bambae oli laef bakegen long wan naes wol we i gat pis long hem. Ol man we oli rere finis blong tijim olgeta long saed blong Jeova mo Pikinini blong hem, Jisas Kraes, we i stap rul, bambae oli mekem welkam long olgeta. Taem ol bilyan man we oli laef bakegen, oli save mo oli laekem Man we i Wokem olgeta, wol ya bambae i kam fulap long save blong Jeova bitim olgeta taem bifo.
18. ?Yu ting se bambae yu harem olsem wanem taem yu mekem welkam long olgeta we yu laekem tumas we oli laef bakegen?
18 !Taem ol man ya oli laef bakegen long ded, bambae hat blong yumi i fulap long glad! ?Hu i no bin harem nogud from samting we enemi ya blong yumi, ded, i mekem? Yes, ?hu i no bin krae bigwan taem lav mo fasin fren we hem i bin haremgud long hem i finis, from we wan we hem i laekem tumas i ded from sik, olfala, akseden, no wan man i kilim hem? Ale, traem tingbaot glad we bambae i kamaot taem ol man ya oli mit bakegen long Paradaes. Ol mama mo papa, ol pikinini boe mo pikinini gel, ol fren mo famle, bambae oli resis blong holholem olgeta. Bambae oli laf mo krae from glad.
!STRETGUD OLGETA!
19. ?Wanem merikel we bambae i kamaot long Wan Taosen Yia?
19 Tru long Wan Taosen Yia Rul blong Kraes, wan nambawan merikel bambae i kamaot. Ating samting ya bambae i moa gud long ol man bitim ol narafala samting we i kamaot long Wan Taosen Yia ya. Bambae Jeova i lidim Pikinini blong hem blong yusum ransom sakrifaes blong hem, blong givhan long evri man mo woman we oli holemstrong mo obei long hem. From samting ya, sin bambae i finis fulwan. Mo ol man bambae oli kam stretgud olgeta.—1 Jon 2:2; Revelesen 21:1-4.
20. (a) ?Wanem mining blong stretgud olgeta? (b) ?Wetaem bambae olgeta we oli laef tru long Amageden mo olgeta we oli laef bakegen oli stat blong laef fulwan?
20 !Stretgud olgeta! ?Wanem mining blong samting ya? Bambae laef i kam olsem laef blong Adam mo Iv, bifo we tufala i mekem sin agensem Jeova God. Long evri fasin we yumi save tingbaot—long bodi, tingting, filing, ol fasin blong laef, mo long saed blong speret—ol man we oli stretgud olgeta bambae oli kasem fulwan mak olsem God i wantem. ?Be bambae ol man oli sem mak evriwan? !No gat! Ol samting we Jeova i wokem, olsem ol tri, flaoa, mo anamol, oli soem long yumi se hem i laekem ol samting we oli defdefren. Prapa fasin mo save blong ol man ya we oli stretgud olgeta, bambae i no sem mak evriwan. Olgeta man wanwan bambae oli haremgud long laef ya olsem God i wantem fastaem. Revelesen 20:5 i talem se: “Ol narafala dedman, God i no mekem olgeta oli laef bakegen long ded, gogo wan taosen yia ya i pas.” Bigfala hif blong man we oli laef tru long Amageden, wetem ol man we oli laef bakegen long ded, bambae oli laef fulwan taem oli kam stretgud olgeta we oli no moa gat sin.
21. (a) ?Wanem bambae i hapen long en blong Wan Taosen Yia Rul blong Kraes? (b) ?Biaen, wanem bambae i hapen long Setan mo olgeta we oli joen wetem hem?
21 Ol man we oli stretgud olgeta, bambae oli kasem wan laswan traem. Long en blong Wan Taosen Yia Rul blong Kraes, bambae Setan mo ol rabis enjel blong hem oli kamaot long hol blong smoltaem. Bambae Jeova i letem olgeta oli traehad laswan blong mekem ol man oli seraot long hem. Samfala, bambae oli wantem ol samting we oli no stret, bitim we oli laekem God. Be Jeova bambae i katem taem blong ol fasin agens ya. Bambae Hem i kilim i ded olgeta ya we oli tingbaot olgeta fastaem, wetem Setan mo ol rabis enjel blong hem. Ol man we oli mekem i no stret, bambae oli lus blong olwe.—Revelesen 20:7-10.
?BAMBAE YU YU MEKEM WANEM?
22. ?Yu yu tingbaot blong mekem wanem long Paradaes?
22 Ol yia we oli no save finis, bambae oli stap fored long olgeta we oli laekem Jeova God tumas, mo we oli stap long Paradaes wol ya. Yumi no save tingbaot olsem wanem bambae oli glad. Yu tu yu save kasem glad ya. !Myusek, ol naes pija, ol nambawan samting we man i save mekem wetem han blong hem—yes, olgeta wok blong ol man we oli stretgud olgeta, bambae oli bitim ol beswan wok blong ol man we oli gat nambawan save long olfala wol ya! Hemia from we ol man bambae oli stretgud olgeta, mo ol yia we oli no save finis oli stap fored long olgeta. Tingbaot ol samting we yu yu save mekem olsem wan man we i stretgud olgeta. Tingbaot tu, ol samting we yu mo ol narafala man yufala i save lanem long saed blong ol samting we God i wokem—stat long bilyan galaksi long skae go kasem ol smosmol samting we yumi no save luk wetem prapa ae blong yumi. Evri wok blong man, bambae i givim moa glad long hat blong Papa blong yumi long heven, Jeova, we i laekem yumi tumas.—Ol Sam 150:1-6.
23. ?From wanem ol man bambae oli no save les long laef long Paradaes?
23 Long nyufala wol ya, bambae ol man oli no save les long laef. Taem ol yia oli stap pas, bambae i gat plante moa samting blong pulum intres blong olgeta. Tingbaot, neva yumi save kasem olgeta save blong God. (Rom 11:33) Gogo i no save finis, bambae i gat ol nyufala samting blong lanem mo nyufala wok blong mekem. (Eklesiastis 3:11) !Mo taem yu gohed blong lanem moa long saed blong Jeova God, bambae yu gohed blong laef—i no blong sam yia nomo be blong olwe!—Ol Sam 22:26.
24, 25. ?From wanem yu mas folem ol save blong God naoia long laef blong yu?
24 ?Yu ting se ol hadwok blong yu mo ol samting we yu livim blong mekem God i glad, oli smol nomo taem yu tingbaot nambawan fyuja ya we yu save kasem long paradaes long wol ya? !Yes! Oraet, Jeova i soem rod long yu blong kasem nambawan fyuja ya. Rod ya, hemia save blong God. ?Bambae yu folem?
25 Sipos yu yu laekem Jeova, bambae yu haremgud tumas blong mekem ol samting we hem i wantem. (1 Jon 5:3) !Taem yu gohed long rod ya, bambae yu kasem plante blesing! Sipos yu folem save blong God, yu save gat wan laef we i moa glad naoia, nating se wol ya i fulap long trabol. !Mo ol blesing we yu save kasem long fyuja oli bigfala tumas, from we save ya i blong lidim yu blong kasem laef blong olwe! Naoia i stret taem blong yu tekem aksin. Holem strong tingting blong folem ol save blong God long laef blong yu. Soemaot lav we yu yu gat long Jeova. Ona long tabu nem blong hem mo pruvum se Setan i wan man blong gyaman. Ale, Jeova God, we i Stampa blong trufala waes mo save, bambae i haremgud tumas long yu, long hat blong hem we i bigwan tumas mo i fulap long lav. (Jeremaea 31:3; Sefanaea 3:17) !Mo bambae hem i laekem yu gogo i no save finis!
JEKEM SAVE BLONG YU
?Wanem ya “laef we i prapa wan”?
Afta Amageden, ?wanem bambae i kamaot long wol ya?
?Hu bambae i laef bakegen long wol ya?
?Olsem wanem ol man bambae oli kam stretgud olgeta mo kasem laswan traem?
?Wanem hop blong yu long saed blong Paradaes?
[Tok Blong Pija Long Pej 188, 189]
?Yu yu wantem laef long Paradaes, taem wol i fulap long save blong God?