No Fraet Blong Toktok

KLOSAP olgeta man oli seksek taem oli go antap long stej blong mekem wan tok, speseli olgeta we oli no stap mekem plante tok. Sem mak long ol pablisa taem oli prij. Maet oli seksek long fas haos we oli go long hem. Taem Jehova i givim wok long Jeremaea blong i talemaot tok blong Hem, Jeremaea i talem se: “Mi mi no save toktok, from we mi mi yangfala nomo.” (Jer. 1:5, 6) Jehova i givhan long Jeremaea, mo bambae hem i givhan long yu tu. Sloslo, bambae yu no moa fraet blong toktok.

Man we i no fraet blong toktok, hem i gat kwaet tingting. Taem ol man oli luk hem nomo, bambae oli luksave samting ya. Hem i stanap mo i sidaon long fasin we i stret long ples we hem i stap long hem mo long samting we hem i stap mekem. Hem i no muvmuvum tufala han blong hem olbaot nomo, be hem i muvum blong givim mining long tok blong hem. Hem i jenjenisim voes blong hem blong eksplenem gud samting we hem i tokbaot mo i bos long voes blong hem.

Maet yu harem se yu yu no gat ol fasin ya. Be yu no mas harem nogud, yu save kam gud moa. ?Yu mas mekem wanem blong kam gud? Bambae yumi tokbaot from wanem man i seksek mo i fraet blong toktok. Maet hemia from samting we i stap hapen insaed long bodi blong hem.

Taem yu mekem wan samting we i no isi long yu, mo yu wantem mekem bes blong yu be yu no save sipos yu yu naf, tingting blong yu i no save stap kwaet. Ale, bren blong yu bambae i sanem signal i go long bodi, blong hem i wokem wan samting we oli kolem adrenaline. Taem samting ya i kam fulap long blad, hat blong yu bambae i pam kwik, yu pulum win kwik, yu swet, han mo leg i save seksek, mo voes tu i save seksek. Bodi blong yu i stap traem blong givhan long yu blong winim fraet ya. Taswe, hem i givim moa paoa long yu. Be samting we i hadwok se yu mas yusum paoa ya long stret rod, hemia blong tingting gud mo blong mekem tok blong yu i laef.

?Yu Mas Mekem Wanem Blong Tingting Blong Yu i Kam Kwaet? I stret nomo we yu wari smol. Be sipos yu wantem se fraet i no winim yu, yu mas mekem wari i godaon. Tingting we i kwaet i save givhan long yu blong yu winim fraet ya long wan rod we i pulum ol man blong oli respektem yu. ?Wanem i save givhan long yu?

Yu rere gud. Yu mas tekem plante taem lelebet blong mekemrere tok blong yu. Yu mas meksua se yu kasem save gud long samting we bambae yu tokbaot. Sipos yu nomo yu jusum ol poen blong tokbaot, yu mas tingbaot save we ol man oli gat finis, mo yu tingbaot wanem samting we yu yu wantem se tok blong yu i mekem long olgeta. Hemia bambae i givhan long yu blong yu jusum ol poen we oli stret. Sipos i had blong yu yu mekem samting ya, i gud yu tokbaot problem ya wetem wan brata we i givim tok longtaem finis. Hem bambae i givhan long yu blong yu skelem gud ol save long tok blong yu, mo blong yu tingbaot ol man we oli lesin. Taem yu yu gat strong tingting se ol save we yu jusum bambae i givhan gud long olgeta we oli lesin, mo ol save ya i klia long tingting blong yu, bambae yu wantem serem wetem ol man. Nao tingting ya blong wantem serem save ya bambae i mekem se yu no moa wari tumas long tok ya.

Yu mas tingting plante long fastok blong yu. Yu mas save gud ol fastok we bambae yu talem. Taem yu gohed long tok blong yu, ating bambae yu no moa seksek.

Yu mas mekem sem samting taem yu mekemrere blong go long wok blong prij. Yu tingbaot wanem we bambae yu tokbaot, be i no hemia nomo. Yu tingbaot wanem kaen man we bambae yu prij long hem tu. Yu tingting gud long fastok blong yu. Yu lesin gud long ol pablisa we oli prij longtaem finis, olgeta oli save tijim yu long sam samting.

Taem yu givim wan tok long fored blong plante man, maet yu ting se bambae yu no fraet sipos yu raetem evri wod long wan pepa mo yu ridim. Be tingting ya i no stret. Samting ya i save mekem se yu fraet moa taem yu givim wan tok. I tru se samfala oli raetemdaon plante toktok, mo samfala oli raetem smol nomo. Be i no ol wod long pepa we bambae oli givhan long yu blong yu putum tingting blong yu i stap long tok blong yu, mo i no ol wod we bambae oli mekem se yu no fraet blong toktok. Samting we bambae i givhan long yu, hemia strong tingting se ol save we yu rerem bambae i givhan gud long ol man we oli lesin.

Yu lanem tok blong yu long bigfala voes. Sipos yu lanem tok blong yu long bigfala voes, bambae yu harem se yu yu naf blong eksplenem gud ol tingting blong yu. Taem yu talem ol tok ya bakegen mo bakegen, yu no save fogetem. Taem yu stap lanem tok blong yu, yu mas mekem olsem we yu stap givim tok ya long Haos Kingdom, mo yu lukluk ol man we oli stap lesin. Yu mas sidaon klosap long tebol no yu stanap, sem mak olsem we bambae yu mekem long Haos Kingdom.

Yu prea long Jehova blong i givhan long yu. ?Olsem wanem? ?Bambae Jehova i ansa long prea blong yu? “Yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi.” (1 Jon 5:14) Sipos yu wantem tumas blong ona long God mo blong givhan long ol man blong oli kasem ol gudfala samting long Tok blong hem, bambae hem i ansa long prea blong yu. Taem yu gat strong tingting se bambae hem i ansa long prea blong yu, hemia i save givim paoa long yu blong mekem tok blong yu. Mo tu, taem yu wokem ol fasin we oli frut blong tabu spirit, olsem lav, glad, pis, kwaet fasin, mo bos long tingting, sloslo bambae yu gat gudfala tingting we i givhan long yu blong yu no moa fraet blong toktok.—Gal. 5:22, 23.

Sipos yu mekem wan samting plante taem, bambae yu kam gud long hem. Moa we yu prij, moa we bambae yu winim fraet. Moa we yu ansa long miting, moa we bambae i isi blong toktok long fored blong ol man. Taem yu givim plante tok finis long kongregesen, bambae yu no moa harem se yu fraet tumas. ?Olsem wanem? ?Yu yu glad sipos yu gat janis blong mekem plante moa tok? Ale, yu mas rere oltaem blong tekem ples blong wan we i no save mekem tok blong hem long Tiokratik Skul.

Taem yu mekem evri samting we yumi tokbaot finis, i gud yu traem luksave ol saen we oli soemaot se yu no gat kwaet tingting. Sipos yu luksave ol samting ya mo yu winim olgeta, hemia bambae i givhan long yu blong yu no moa fraet blong toktok. Maet yu soemaot ol saen ya long bodi no long voes blong yu.

Ol Saen We Yu Soemaot Long Bodi Blong Yu. Bodi blong yu mo fasin blong yu blong muvmuvum tufala han blong yu, oli save soemaot se yu fraet. Yu traem tingbaot tufala han blong yu. Maet yu taetem tufala han biaen long baksaed blong yu, no yu mekem tufala i fas long tufala saed blong bodi blong yu, no yu holem smol tebol we i stap klosap long yu. Maet oltaem yu stap putum han blong yu long poket mo tekemaot bakegen, yu pleplei wetem ol baten long sot no kot. Ating yu tajem fes, nus, no glas blong ae blong yu. Yu pleplei wetem hanwaj blong yu, wan pensel, wan ring long fingga blong yu no ol pepa blong tok blong yu. Yu sakem tufala han blong yu long fasin we i kwik mo i sot. Olgeta samting ya oli soemaot se yu fraet blong toktok.

Sam narafala samting we oli soemaot se yu fraet, hemia: yu stap skrasem floa wetem sus blong yu, bodi blong yu i lei i go long wan saed mo afta long narasaed, yu stanap stret we yu taetem bodi blong yu tumas, yu benem tufala solda blong yu, yu pusum tang blong yu oltaem blong mekem maot i wetwet, yu solemdaon spet blong yu oltaem, yu pulum win kwik tumas be yu no pulum gud.

Sipos yu traehad, yu save blokem ol samting ya we oli soemaot se yu fraet. I gud yu traem wok long wan nomo fastaem, biaen yu go long narawan. Yu mas luksave problem blong yu, mo yu traem tingbaot wanem we yu mas mekem blong blokem. Sipos yu traehad olsem, bambae yu soemaot long bodi blong yu se yu no fraet.

Ol Saen Long Voes Blong Yu. Voes blong yu tu i save soemaot se yu fraet. Maet voes i go antap tumas no i seksek. Maet yu stap kliarem trot blong yu oltaem, no yu toktok hareap tumas. Sipos yu traehad blong bos long voes blong yu, yu save winim ol problem ya, nating we oli kam olsem wan fasin blong yu finis.

Sipos yu stap seksek bifo we yu go antap long stej, i gud yu tekem smoltaem blong pulum gud win. Yu traem slakem bodi blong yu fulwan. Yu no mas tingbaot tumas se yu fraet, be yu tingbaot from wanem yu wantem serem ol save ya we yu rerem finis. Bifo we yu stat blong toktok, i gud yu tekem smoltaem blong lukluk ol man, yu jusum wan we fes blong hem i kaen, nao yu smael long hem. Yu toktok slo long fastok blong yu, mo biaen yu putum olgeta tingting blong yu i go long tok blong yu.

Stret Tingting. Yu no mas ting se fraet bambae i lus olgeta. Plante brata we oli givim tok blong plante yia finis oli seksek smol yet, taem oli go stanap long fored blong ol man blong mekem wan tok. Be olgeta ya oli lan finis, nao oli no seksek tumas.

Sipos yu traehad bigwan blong winim ol samting we oli soemaot se yu fraet, ol man we oli lesin bambae oli luk se tingting blong yu i kwaet. Maet yu harem yet se yu fraet, be bambae oli no luksave.

Yu mas tingbaot se adrenaline we i mekem yu yu seksek taem yu fraet, i givim paoa long yu tu. I gud yu yusum paoa ya blong soemaot ol defren fasin long voes blong yu.

Yu no nid blong wet kasem we yu go antap long stej blong yu folem advaes ya. Long laef blong yu evri dei, yu save lanem blong gat kwaet tingting, mo blong no fraet blong toktok, mo blong soemaot ol defren fasin long voes blong yu. Sipos yu mekem olsem, bambae yu no moa fraet tumas blong toktok taem yu stap antap long stej mo long wok blong prij.