LESEN 18
Luksave Ol Trufala Kristin
Plante milian man oli talem se oli Kristin. Be oli gat ol defdefren bilif mo oli folem ol defdefren rul long laef blong olgeta. So, ?olsem wanem yumi save luksave ol trufala Kristin?
1. ?Wan Kristin hem i wanem?
Wan Kristin hem i wan disaepol o wan man we i biaen long Jisas Kraes. (Ridim Ol Wok 11:26.) ?Wanem i pruvum se hem i disaepol blong Jisas? Jisas i talem se: “Sipos yufala i obei oltaem long ol tok blong mi, yufala i prapa disaepol blong mi.” (Jon 8:31) Hemia i min se ol trufala Kristin oli mas obei long ol tijing blong Jisas. Oltaem Jisas i tijim samting we Baebol i talem, mo olgeta we oli biaen long hem, oli mekem sem mak.—Ridim Luk 24:27.
2. ?Ol trufala Kristin oli soem lav olsem wanem?
Jisas i talem long ol man blong hem se: “Yufala i mas lavlavem yufala olsem we mi mi lavem yufala.” (Jon 15:12) ?Olsem wanem Jisas i soem se hem i lavem ol disaepol? Hem i spenem taem wetem olgeta, i enkarejem olgeta mo halpem olgeta. Mo tu, hem i ded from olgeta. (1 Jon 3:16) Sem mak, ol trufala Kristin oli no jes tokbaot lav, be oli pruvum lav ya, long ol toktok mo aksen blong olgeta.
3. ?Ol trufala Kristin oli mekem wanem wok?
Jisas i givim wok long ol man blong hem. “Hem i sanem olgeta blong oli go talemaot Kingdom blong God.” (Luk 9:2) Ol fas Kristin oli prij long ples blong wosip blong olgeta, mo tu, oli prij long ol pablik ples mo long haos blong ol man. (Ridim Ol Wok 5:42; 17:17.) Tede ol trufala Kristin tu oli talemaot trutok blong Baebol long ol ples we i gat man. Oli lavem ol neba, taswe oli yusum paoa mo taem blong olgeta, blong serem mesej blong Baebol we i givim hop mo i mekem man i haremgud.—Mak 12:31.
DIGIM MOA
Makem ol samting we i mekem se ol trufala Kristin oli defren long ol man we oli no folem ol tijing mo eksampol blong Jisas.
4. Oli lukaotem trutok blong Baebol
Ol fas Kristin oli tinghae long Tok blong God
Samfala oli talem se oli Kristin be oli no wantem faenemaot ol trutok blong Baebol. Plei VIDEO, mo tokbaot kwestin ya.
?Olsem wanem sam jos we oli talem se oli Kristin, oli blokem ol man blong save ol tijing blong Jisas?
Jisas i tijim trutok we i kamaot long Tok blong God. Ridim Jon 18:37, mo tokbaot kwestin ya:
Folem tok blong Jisas, ?ol Kristin we oli “glad long trutok” oli mekem wanem?
5. Oli talemaot trutok
Ol fas Kristin oli prij long ol narafala
Bifo we Jisas i go long heven, hem i givim wan wok long ol disaepol mo wok ya i gohed yet tede. Ridim Matiu 28:19, 20 mo Ol Wok 1:8, mo tokbaot kwestin ya:
?Wok ya bambae i bigwan olsem wanem?
6. Oli praktisim samting we oli stap tijim
?From wanem Tom i sua se hem i faenem trufala skul? Plei VIDEO, mo tokbaot ol kwestin ya.
Long video ya, ?wanem i mekem se Tom i no glad long ol relijen?
?From wanem hem i sua se hem i faenem trutok?
Aksen i impoten moa long ol toktok. Ridim Matiu 7:21, mo tokbaot kwestin ya:
?Long tingting blong Jisas, i impoten blong talemaot nomo se yumi bilif long hem, o yumi mas soemaot tu long ol aksen blong yumi?
7. Oli lavlavem olgeta
Ol fas Kristin oli lavlavem olgeta
?Yu ting se ol Kristin oli stap putum laef blong olgeta long denja blong sevem ol narafala Kristin? Plei VIDEO, mo tokbaot ol kwestin ya.
Long video ya, ?wanem i mekem se Lloyd i rere blong ded from Brata Johansson?
?Yu ting se aksen blong hem i soemaot se hem i wan trufala Kristin?
Ridim Jon 13:34, 35, mo tokbaot ol kwestin ya:
?Ol disaepol blong Jisas (trufala Kristin) oli mas tritim ol man blong narafala laen o nesen olsem wanem?
?Bambae oli mekem olsem wanem sipos i gat faet o wo?
SAM MAN OLI SE: “Ol Kristin oli mekem plante nogud samting, so ?olsem wanem oli save talem se oli trufala skul?”
?Yu save soem weswan vas blong man i luksave ol trufala Kristin?
SAMARI
Ol trufala Kristin oli obei long ol tijing blong Baebol, oli lavem narafala, mo oli talemaot trutok blong Baebol.
Tingtingbak
?Bilif mo tijing blong ol trufala Kristin i stanap long wanem?
?Wanem fasin i makemaot ol trufala Kristin?
?Wanem wok we ol trufala Kristin oli mas mekem?
FAENEMAOT
Luk olsem wanem wan grup i traem folem eksampol mo tijing blong Jisas Kraes.
Luk wanem i givhan long wan katolik sista blong i faenem “wan trufala famle long spirit.”
“They Used the Bible to Answer Every Question!” (Wajtaoa, 1 Eprel 2014)
Luk olsem wanem ol trufala Kristin oli soem lav long ol Kristin brata sista we oli nidim help.
Halpem Ol Brata Sista Taem i Gat Disasta—Wan Smol Haf (3:57)
Luk ol samting we ol tru Kristin tede mo ol fas Kristin oli stap mekem, we i makemaot olgeta se oli man blong Jisas.
“?Wanem Fasin Blong Ol Tru Kristin?” (Wajtaoa, 1 Eprel 2012)