Laekem Ol Brata—Fasin Ya i Gat Bigfala Paoa
Ol Stampa Poen Blong Faelimon
JISAS KRAES i givim wan “nyufala loa” long ol man blong hem. Hem i talem long olgeta se oli mas laeklaekem olgeta olsem we hem wan i laekem olgeta fastaem. (Jon 13:34, 35) From we olgeta oli gat lav olsem, bambae oli save givim laef blong olgeta blong sevem ol brata. Yes, fasin blong laekem ol brata i gat bigfala paoa.
Aposol Pol i gat strong tingting se Faelimon tu i laekem ol brata blong hem. Faelimon i wan Kristin we i joen wetem kongregesen blong Kolosi, wan taon long Esia Maena. From we hem i laekem tumas ol brata blong hem, Faelimon i letem finis haos blong hem blong oli mekem miting long hem. Be slef blong hem, Onesimas, i ronwe long hem, i go long Rom. Maet slef ya i stilim sam mane blong masta blong hem blong pem pasis blong hem. Samtaem biaen, Onesimas i mitim Pol mo hem i kam Kristin.
Raonabaot long yia 60-61 K.T.,a Pol i stap long kalabus long Rom ale hem i raetem wan leta i go long Faelimon fastaem. Pol i wantem we Faelimon i tekembak Onesimas, olsem se Onesimas i brata blong hem nomo. Sipos yu ridim leta ya, bambae yu luk we Pol i laekem ol brata tumas mo i mekem ol tok we oli kaengud. Gudfala fasin ya, ol man blong Jeova tede tu oli save folemgud long laef blong ol.
Fasin Blong Bilif Mo Blong Laekem Tumas Ol Man
Long leta we hem i sanem i go long Faelimon mo ol narafala Kristin, fastaem Pol i tokbaot bakegen gudfala wok we Kristin ya i mekem. (Ol vas 1-7) Pol i stap harem nyus blong fasin blong Faelimon, se hem i laekem tumas Kraes mo ol tabu man blong God, mo hem i gat strong bilif. Samting ya i pusum Pol blong talem tangkyu long Jeova. Hem i glad we hem i glad, mo ol nyus ya oli leftemap tingting blong hem bigwan. ?Olsem wanem long yumi? ?Yumi tu yumi talem sam gud tok long ol brata blong yumi we oli gat bilif mo oli laekem ol narafala? Yes, yumi mas mekem olsem.
Taem wan Kristin i wantem pulum wan brata blong mekem wan samting, oltaem nomo hem i mas mekem long fasin lav, olsem Pol. (Ol vas 8-14) Biaen long ol gudfala fas tok we hem i mekem, aposol Pol i talem se hem i gat raet blong givim oda long Faelimon long ‘wanem samting i stret blong hem i mekem.’ Be hem i no mekem olsem. Hem i askem nomo long Faelimon blong mekem wan samting. ?Pol i wantem we Faelimon i mekem wanem? Traem tingbaot: !Hem i wantem we Faelimon i tekembak Onesimas i kam long haos blong hem long kaengud fasin! Onesimas i stap mekem plante gudfala wok blong givhan long Pol. Taswe Pol i harem gud nomo sipos Onesimas i save stap wetem hem. Be Pol i no mekem olsem from we hem i no askem long Faelimon fastaem.
Nao Pol i soemaot se samtaem wan samting i mekem trabol nomo fastaem, be i save karem gudfala frut biaen. (Ol vas 15-21) Yes, gudfala frut i kamaot from we Onesimas i ronwe long masta blong hem. ?Olsem wanem samting ya i hapen? I olsem from we bifo Onesimas i wan slef we i stronghed mo i stil. Be naoia, Onesimas i kam olsem wan brata we i no save stil, mo i rere nomo blong mekem wok. Hemia nao man ya we Faelimon i gat jans blong tekembak long haos blong hem. Pol i wantem se Faelimon i mekem welkam long Onesimas long sem fasin we hem i stap mekem long Pol taem Pol i go long haos blong hem. Sipos Onesimas i mekem trabol long Faelimon long wan samting, bambae Pol nao i pembak olgeta samting ya. Blong winim Faelimon, Pol i talem long hem se hem tu i gat kaon long Pol from we Pol nao i givhan long hem taem hem i kam Kristin. Pol i save gud we Faelimon bambae i mekem moa long ol samting we hem i stap askem long hem blong mekem. !Yes, rili Pol i save toktok gud from we ol tok blong hem oli gat bigfala paoa, mo hem i kaengud oltaem! Rod ya nao, yumi mas folem gud taem yumi joen tugeta wetem ol narafala Kristin.
Long las tok blong hem, Pol i tokbaot wan hop blong hem, hem i talem halo, mo hem i wantem tumas we ol fren blong hem oli kasem plante gudfala samting. (Ol vas 22-25) Hem i hop se God bambae i harem ol prea we ol narafala oli mekem from hem, blong hem i kamaot long kalabus. (Olsem we seken leta blong Pol long Timote i soemaot, ol prea we ol Kristin ya oli mekem, God i ansa long olgeta biaen.) Pol i finisim leta blong hem wetem halo blong ol Kristin we i tingbaot Faelimon. Mo hem i prea strong long God se gladhat blong Kraes i stap oltaem wetem gudfala tingting we Faelimon mo ol narafala we oli wosip long Jeova oli soemaot.
[Futnot]
a K.T. i min se Kristin Taem.
[Bokis blong pija long pej 31]
Hem i No Wan Slef Nomo: Pol i wantem we Faelimon i tekembak slef blong hem, Onesimas, long haos blong hem, nao hem i talem long hem se: “Maet yu yu bin lusum Onesimas blong smol taem nomo, blong bambae yu save tekem hem bakegen blong hem i stap foreva. From we naoia, hem i no wan slef nomo, hem i moa long slef. !Hem i wan gudfala brata blong yumi! Mi mi laekem hem tumas, be ating yu bambae yu laekem hem moa, from we hem i slef blong yu, be antap moa, hem i brata blong yu, from we i joen finis long Masta blong yumi.” (Faelimon 15, 16) Aninit long rul blong ol man Rom, gavman i putum ol loa we ol slef oli mas obei long hem, mo Pol i gat respek long “ol haeman” ya. (Rom 13:1-7) Pol i neva pusum ol slef blong oli agensem gavman blong oli save kam fri. No gat. Be hem i wantem halpem olgeta blong oli kam Kristin, mekem se olgeta tu oli kam fri long saed blong speret. Pol i givim advaes finis long ol slef, se oli mas obei long ol masta blong olgeta. Taswe i stret we hem i sanem Onesimas i gobak long Faelimon bakegen. (Kolosi 3:22-24; Taetas 2:9, 10) Onesimas i no moa olsem wan slef olbaot. Hem i wan gudfala brata blong Faelimon, wan slef we i gud moa, i obei gud long hem, mo wan man we i folem gud ol stret loa blong God mo i laekem ol brata.