Yumi Stanap Strong Long Bilif
Ol Stampa Poen Blong Taetas
OL KRISTIN kongregesen we oli stap long aelan blong Krit—wan aelan we i stap long Mediterenian Si—oli nidim ol gudfala advaes long saed blong speret. ?Hu bambae i go givhan long olgeta? !Taetas nao, man ya we i wok wetem Pol, hem nao i nafgud blong mekem wok ya! ?From wanem Taetas, be i no wan narafala? Taetas i no wan man blong fraet, hem i naf blong tij, hem i strong blong mekem ol gudfala wok blong God, mo tu, hem i stanap strong long bilif.
Pol i visitim aelan blong Krit bitwin faswan mo seken taem we hem i go kalabus long Rom. Hem i livim Taetas i stap long aelan ya blong stretem samfala bisnes mo blong putumap sam elda long ol kongregesen. Be tu, Taetas i mas blokem ol krangke tok blong ol gyaman tija mo hem i mas soemaot gudfala rod long ol Kristin. Olgeta samting ya oli stap long leta we Pol i raetem long Taetas bitwin 61 mo 64 K.T.a Maet hem i sanem leta ya taem hem i stap long Masedonia. Sipos ol elda mo olgeta long kongregesen oli folem ol gudfala advaes we Pol i givim long Taetas, bambae olgeta tu oli no man blong fraet, bambae oli strong blong mekem ol gudfala wok blong God mo bambae oli save stanap strong long bilif.
Ol Mak We Man i Mas Kasem Blong Kam Elda
Long taem ya, i gat nid blong putumap sam elda mo blong stretem sam bigfala trabol. (1:1-16) Bifo we hem i kam elda, wan Kristin man i mas gat wan laef we i no gat poen long hem, hem i mas soemaot gudfala rod long ol narafala mo hem i mas lukaotgud long famle blong hem. Hem i mas gat fasin blong tekem ol strenja long haos blong hem, hem i mas skelem gud olgeta wok blong hem, mo hem i mas blokem ol samting we hem nomo i wantem. Hem i mas tijim ol man long trutok, be long semtaem hem i mas stretem olgeta we oli gat rong tingting mo pulum olgeta blong oli mekem i gud. Ol Kristin elda oli no mas fraet long ol man we oli mekem hed insaed long kongregesen, be oli mas satem maot blong olgeta. Sam long ol stronghed man ya oli gat strong tingting se ol Kristin oli mas sakomsaes blong kasem sef, mo oli mekem trabol long plante famle. Ol elda oli mas satemap ol man ya, blong ol kongregesen oli save stanap strong long saed blong speret. Tede tu, ol Kristin elda oli no mas fraet blong stretem ol man mo pulum tingting blong olgeta. Oli mas mekem olsem blong kongregesen i stap strong long saed blong speret.
Yumi Folem Tijing YaWe i Stret Nomo
Taetas i mas tij gud blong mekem se ol man oli stret long saed blong speret. (2:1-15) Ol olfala oli mas soemaot gudfala rod long ol narafala. Oli no mas dring bitim mak, fasin blong olgeta i mas stret. Oli mas gat gudfala tingting, bilif mo lav. Mo oli mas man blong holem wok gogo i finis. Ol olfala woman oli mas “mekem ol fasin we oli stret blong ol woman we oli tabu, oli blong God.” Mo tu “oli save tijim ol yangfala woman long stret rod” blong mekem ol wok blong ol mama mo ol waef. Tingting blong ol yang man i mas klin gud. Ol slef oli mas obei long ol masta blong olgeta blong mekem se long fes blong ol man, oli leftemap tijing we God i givim. Ol Kristin oli mas agensem ol rabis fasin. Nating se oli laef long fasin ya blong wol, be oli mas stap klin gud long tingting blong olgeta. Long semtaem, bambae oli stap wet nomo long dei ya we God mo Kraes tufala i kamtru long bigfala paoa blong tufala. Yes, ol Kristin oli mas wet long Jisas, man ya we “i givim laef blong hem blong sevem yumi. Hem i pem rod blong mekem yumi fri long ol fasin blong yumi we oli no stret. Mo hem i mekem yumi olsem wan kampani we laef blong yumi i klin, yumi man blong hem nomo, mo yumi strong blong mekem ol gudfala samting.” Taem yumi mekem nambawan advaes ya i wok long laef blong yumi, yumi tu yumi “flasem tijing blong God.” (NW)
Long laswan advaes we hem i givim long leta blong hem, Pol i tokbaot bakegen fasin blong stanap strong long saed blong speret. (3:1-15) Yumi mas givim stret ona long ol hae man we oli rul long kantri mo yumi mas wok strong blong skelem gud ol samting we yumi mekem. Ol Kristin oli hop se bambae oli kasem laef we i no save finis. Taswe, oli mas mekem ol advaes blong Pol oli wok long laef blong olgeta. Long fasin olsem, tingting blong olgeta i save strong blong mekem ol gudfala wok. Oli no mas joen wetem olgeta we oli tingting nogud mo olgeta we oli fosem ol narafala blong folem Loa blong Moses. Mo oli mas putumaot long kongregesen ol man we oli traem mekem ol brata oli seraot. Be bifo we oli putumaot olgeta, oli mas givim woning tu taem long olgeta. Sipos ol elda tede oli folemgud advaes ya, olgeta mo ol fren blong olgeta long bilif bambae oli stanap strong long saed blong speret.
[Futnot]
a K.T. i min se Kristin Taem.
[Bokis blong pija long pej 30]
Hem i No Mas Slef Blong Waen: Ol woman oli no gat raet blong tijim ol man long kongregesen. Be ol olfala sista oli save go luk ol yangfala woman blong tijim ol woman ya blong oli kam kwaet woman, we laef blong olgeta i klin gud. Sipos oli wantem kam gud long saed ya, ol olfala woman oli mas folem ol tok we Pol i givim. Hem i talem se: “Ol olfala woman tu oli mas mekem ol fasin we oli stret blong ol woman we oli tabu, oli blong God. Bambae oli no tok nogud long nem blong narafala man, mo oli no woman blong dring grog oltaem. Oli mas soemaot ol stret fasin.” (Taetas 2:1-5; 1 Timote 2:11-14) From we oli save gud long ol trabol blong alkol, ol elda, ol man blong givhan, mo ol olfala woman oli no mas bitim mak taem oli dring alkol. Oli no mas letem bodi blong olgeta i dring tumas waen. (1 Timote 3:2, 3, 8, 11) Olgeta Kristin oli mas agensem fasin blong drink alkol gogo man i lusum hed. Mo tu, oli no mas tekem ol dring we i gat alkol long hem bifo we oli go mekem “tabu wok” blong talemaot gud nyus.—Rom 15:16; Proveb 23:20, 21.