Saenaot Olsem Laet Long Wol
LONG wan wol we i nogud from ol kruked fasin mo rabis fasin, ol tru Kristin raonabaot long wol oli mas kam olsem stampa blong laet. Oli mas saenaot olsem laet long wan wol we i tudak. (Filipae 2:15, NW) Plante taosen man oli rere blong mekem samting ya olsem paenia, no ol man blong prij fultaem. Wan bigfala namba blong olgeta oli mekem wok ya long plante yia finis mo oli kasem plante blesing taem oli luk plante defren kaen man oli jenisim laef blong olgeta blong kam ol gudfala disaepol blong Jisas Kraes.—Matyu 28:19.
Blong leftemap tingting blong olgeta paenia ya blong gohed long tabu wok ya mo blong kamgud moa long fasin blong tij blong olgeta, ol Wetnes blong Jeova oli mekem Skul Blong Ol Paenia. Hemia i wan skul we oli stadi Baebol long ten dei blong halpem ol paenia long tri samting: wokbaot wetem Jeova olsem ol man blong Jisas Kraes, gat lav blong ful kampani blong ol brata, blong saenaot olsem laet long wol.
Paenia Skul Long Ripablik Blong Sentrol Afrika
Long Ogis 1991 long Bankui, kapital blong Ripablik Blong Sentrol Afrika, i gat 48 studen mo 2 tija oli kam wanples. Ol studen ya oli kam blong lesin long ol tok mo advaes blong mekem wok blong olgeta. ?Wanem samting i pulum yumi long saed blong Bankui klas?
Wan samting, 21 blong ol studen ya oli stap go long skul yet. Taem oli stap long skul, oli traem mekemgud program blong olgeta blong mekem fultaem paenia. Ol holidei we oli gat, ol wiken we oli fri mo ol aftenun oli yusum blong prij mo tij.
Ol yangfala ya oli luksave se naoia i impoten blong mekem wok blong Man we i Wokem olgeta. (Eklesiastis 12:1; skelem 1 Korin 7:29.) I gud blong save se 12 long olgeta ya oli gat ol papa mama we oli no bilif long trutok. Long haos oli stap olgeta nomo long trutok. Tu yangfala boe we i brata long saed blong bodi, papa blong tufala i fosem tufala blong lego haos from we bilif blong tufala. Long kongregesen blong olgeta, wan yangfala man wetem woman blong hem tufala i tekem tufala boe ya i kam stap wetem tufala.
Fasin ya i defren long Maeka mo Sulamit Kaleb. Tufala i paenia mo tufala i stap go long skul yet, be papa mama blong tufala oli Wetnes blong Jeova. !Yes, papa blong tufala i wan studen blong sem klas!
Ol kongregesen blong Bankui oli stap go joen long skul tu, be long wan defren rod. Olgeta i stap lukaot long ol samting long saed blong bodi, olsem kakae. Oli givim mane mo tu ol faol, suga, raes, mo maniok blong ol studen oli save kakae.
Ol kongregesen we oli stap kolosap oli putum sam grup blong man blong wok long kijin blong rere ol gudfala kakae we oli isi blong mekem. Ol man oli savegud Ripablik Blong Sentrol Afrika from ngunza, wan kakae we evri man oli laekem. ?Wanem lis blong kakae? Lif blong maneok, oel blong palm tri, anyan, plante galik, plante pinat bata mo oli mas wet se samting ya i tangud. Wanwan long ol grup ya we oli wok long kijin oli gat prapa fasin blong olgeta blong rerem kakae ya. Evri man i laekem kakae ya from we tes blong hem i gud tumas.
Afsaed long Bankui i gat tu narafala klas we oli hivap, wan long Buar mo wan long Bambari, samting ya i mekem totol namba blong ol studen i kasem 68. Long tu yia nomo namba blong ol paenia i kam antap long Pipablik Blong Sentrol Afrika. Long Januwari 1992 i gat 149 fultaem paenia mo 17 spesel paenia wetem 78 haftaem paenia. Samting ya i mekem se wok i kam antap long ful kantri ya wetem nyu namba blong ol pablisa, ol haoa, ol visit, mo ol Baebol stadi. Taem i gat plante moa man blong wok, fasin blong hivimap kakae i kam antap.—Aesea 60:21, 22; Matyu 9:37, 38.
Yumi tangkyu long Jeova from ol samting ya mo long ogenaesesen blong hem long wol ya blong stanemap ol klas ya. Ol klas ya oli halpem ol studen mo ol tija blong olgeta tu blong saenaot olsem laet long wol ya we i tudak.
[Tok Blong Pija Long Pej 24]
Twante wan studen blong skul blong ol paenia we oli stap yet long hae skul
[Tok Blong Pija Long Pej 25]
Tu boe ya i mas lego haos from trutok