Ripot Long Wok Blong Kingdom
Oli Jenisim Fasin Blong Laef Blong Olgeta
YES maet yu luk olgeta taem oli stap toktok wetem ol man long rod, taem oli stap go long ol haos wanwan, no taem oli go long ol Kristin miting long Haos Kingdom blong olgeta. Mifala i stap tokbaot ol yangfala Wetnes blong Jeova we klos mo hea blong olgeta i stret, i no bitim mak. Maet yu save talem se oli kam Wetnes from we ol papa mama blong olgeta oli tijim olgeta blong oli kam olsem mo i tru plante long olgeta i olsem. Be, i gat sam long ol yangfala ya we bifo oli gruap long fasin we i defren mo fasin blong laef blong olgeta ya bifo i no sem mak nating long fasin blong laef blong olgeta naoia. Yes, ol yangfala ya we pija blong olgeta i stap long narafala pej, bifo oli stap joen wetem ol grup blong ol man we evri dei oli stap brekem loa mo yusum ol drag. ?Wanem samting i pulum olgeta blong oli jenisim fasin blong laef blong olgeta fulwan olsemia? I gud yumi lukluk long wan taon blong kantri ya Nowei mo mitim sam long ol yangfala ya we oli mekem ol jenis olsem long laef blong olgeta.
Stampa Blong Ol Jenis Ya
Taem tufala Wetnes blong Jeova oli toktok wetem Anet long wok blong prij long ol haos wanwan, long taem ya hem i gat 19 yia. Anet i talem se, “Ol man oli bin talem long mi se mi no mas toktok wetem ol Wetnes blong Jeova, be mi mi wantem faenemaot sam samting long saed blong olgeta mo mi askem olgeta blong kam insaed long haos.” Hem i woman blong yusum drag stat long taem ya we hem i gat 11 yia mo hem i stap joen long sam fasin blong stil long ol haos mo stilim ol trak.
Hem i laekem gud nyus blong Kingdom. Hem i haremgud moa long hop blong laef bakegen long ded, from we mama blong hem i ded taem hem i gat faef yia. Nao hem i akseptem wan fri Baebol stadi mo hem i stat blong kam long ol miting long Haos Kingdom. Hem i tokbaot ol samting we hem i lanem long boefren blong hem mo long ol narafala man. ?Wanem tingting blong olgeta? Oli no wantem joen nating long samting ya we hem i stap talem, mo oli talem se ol man oli spolem hed blong Anet. Be, biaen sam long olgeta we oli agensem hem oli stat blong stadi Baebol.
Espen i wan eksampel, hem i wan yangfala man we i gat 20 yia. Hem i harem gud nyus blong Kingdom long boefren blong Anet mo wantaem nomo hem i wantem stadi Baebol. Be, hem i stap wet blong go long kalabus long fo manis, from we hem i joen long bisnes blong stilim ol drag mo olsem Anet, hem i joen blong stil long sam haos. Hem i wan man blong smok tabak, mariuana, mo ol narafala drag olsem. ?Be wanem samting i save mekem wan man we i stap joen long ol samting ya i wantem stat blong stadi Baebol? Espen i luksave se laef blong hem i blong nating nomo mo hem i no gat plan long laef blong hem. Hem i talem se: “Mi mi laekem promes blong Baebol long saed blong fyuja we i givim wan plan long laef. Nao mi wantem stadi blong faenemaot sipos oli talem trutok long mi.”
Ol narafala Man Oli Wantem Stadi Baebol
Long semtaem, wan yangfala man long sem grup ya blong ol yangfala i harem gud nyus, mo hem tu i stat blong stadi mo i go long ol miting. Biaen, wan narafala long ol yangfala ya i stat stadi Baebol, mo hem i stat blong kam long ol miting. Smoltaem biaen, wan narafala yangfala i joen long ol fren blong hem blong stadi Baebol mo hem i gohedgud long saed blong speret. Nao i gat narafala yangfala blong sem grup ya i laekem ol jenis we ol fren blong hem oli stap mekem long laef blong olgeta, mo i no longtaem biaen, hem tu i wantem stadi Baebol.
Gilbet, wan yangfala long sem grup ya we hem i man blong plei myusek, i stat blong stadi Baebol. Papa mo mama blong hem tufala i ded from sik ya kansa, taswe hem i haremgud long hop ya blong laef bakegen we Baebol i tokbaot. (Jon 5:28, 29) Hem tu i stap yusum drag ya mariuana mo laef blong hem i olbaot nomo, mo hem i wantem kam wan sta blong plei rok myusek. Be, biaen, hem i gohedgud long saed blong speret mo kwiktaem hem i wantem kam wan Wetnes blong Jeova. Biaen yangfala brata blong Espen i stat blong stadi Baebol mo i joen wetem ol Wetnes.
Trutok Blong Baebol i Jenisim Laef
Bigfala jenis i stap long ol yangfala man ya we bifo klos mo hea blong olgeta i olbaot nomo, mo oli stap joen long fasin blong yusum ol drag, stil, mo ol narafala fasin blong brekem loa. Naoia Anet i stap talemaot Kingdom mo hem i wok olsem wan paenia kolosap wan yia finis. Espen mo Gilbet naoia oli stap wok olsem haftaem paenia, mo tu tufala i kam man blong givhan. Tufala i mared insaed long Kristin kongregesen. !Fo long olgeta we oli stap long grup ya bifo naoia olgeta tu oli strong man blong talemaot Kingdom!
?Olsem wanem long fo manis kalabus we Espen i mas go long hem? From jenis we hem i mekem long laef blong hem, fo manis we oli putum blong hem i go kalabus i jenis i kam long 80 haoa blong hem i mekem wok blong klinim ples. Ol polis mo ol narafala man oli agri blong Espen i save spenem ol haoa ya blong wok long Haos Kingdom blong ol Wetnes blong Jeova long ples blong hem. Ol polis oli glad long plan ya.
Yes, plante narafala yangfala man long olgeta ples long wol bifo oli gat fasin blong brekem loa fastaem. Be trutok long Tok blong God i givim ansa long ol impoten kwestin blong olgeta mo i givim wan trufala hop blong fyuja long olgeta. Taswe, naoia oli no moa man blong brekem loa no oli man blong yusum ol drag, mo oli no stap wokbaot wetem klos we i olbaot nomo. Taem oli jenisim fasin blong laef blong olgeta, oli kam olsem ol man we yumi tokbaot olgeta antap—ol yangfala, klos mo hea blong olgeta i stret i no bitim mak, mo oli wok olsem ol Wetnes blong Jeova. Oli wantem talemaot ol ansa blong Baebol long plante trabol we plante yangfala tede oli stap fesem.—Lukluk 1 Korin 6:9-11.
[Tok Blong Pija Long Pej 8]
Ol yangfala blong Nowei oli kam long trutok