Jeova Trufala God We i Laef
FERO blong Ijip i toktok wetem fasin stronghed mo kros, taem hem i askem se: ‘?Hu ya Jeova?’ (Eksodas 5:2) Olsem faswan haf i soem, se fasin ya i mekem se ol panis mo ded i kamaot long ol man Ijip, mo tu wora we i berem Fero wetem ol ami blong hem.
Long Ijip bifo, Jeova i soem se hem i hae moa long ol gyaman god. Be i gat plante moa samting blong lanem long saed blong Jeova. ?Wanem sam long ol fasin blong hem? ?Hem i wantem se yumi mas mekem wanem?
Nem Mo Paoa Blong Hem
Taem hem i askem sam samting long Fero blong Ijip, Moses i no talem se: ‘Masta i talem olsem olsem.’ No gat. Fero mo ol narafala man Ijip oli stap tingbaot plante god blong olgeta olsem ol masta. Moses i yusum nem blong God, Jeova. Hem wan i harem nem ya taem hem i stap kolosap long faea we i laet olbaot long wan smol tri, long ples ya Midian. Baebol i talem se:
“Nao God i talem long Moses, se ‘Mi mi [Jeova, NW]. . . . Naoia mi stap harem krae blong olgeta ya we oli kamaot biaen long trifala, we ol man Ijip oli stap fosem olgeta blong oli wok slef long ples blong olgeta, mo mi stap tingbaot promes ya blong mi yet. Naoia yu go talemaot long olgeta ya we oli kamaot biaen long olfala Isrel bifo we mi talem se “Mi mi [Jeova]. Bambae mi mi sevem yufala, mi tekemaot yufala long han blong ol man Ijip ya we oli stap mekem yufala i wok slef, mi mekem yufala i fri. Bambae mi leftemap han blong mi blong panisim olgeta long ol panis we i nogud we i nogud, nao bambae mi sevem yufala, mi mekem yufala i fri. Long fasin ya bambae mi mekem yufala i kam man blong mi nomo, we mi nomo bambae mi God blong yufala. Mo taem mi tekemaot yufala long han olgeta, mi mekem yufala i fri, bambae yufala evriwan i save we mi [Jeova], mi God blong yufala. Nao bambae mi tekem yufala i go long graon ya [Kenan] we mi mekem strong promes finis wetem trifala bubu ya wanwan blong yufala [Ebraham, Aesak, Jekob] bifo se bambae mi givim long trifala. Mi bambae mi givim graon ya i go long yufala, nao bambae yufala i holem i blong yufala olwe. Mi [Jeova], bambae mi mekem samting ya.” ’ ”—Eksodas 6:1-8.
Hemia nao wanem Jeova i mekem. Hem i mekem ol man Isrel oli kam fri long slef long ol man Ijip mo i mekem se oli save stap long Kenan. Olsem we God i promes, hem i mekem olgeta samting ya oli kamtru. !Samting ya i stret nomo! Nem ya blong hem, Jeova, i minim “Hem i Mekem i Kamaot.” Baebol i tokbaot Jeova long ol taetel olsem, “God,” “Hae Masta,” “Man we i Wokem ol Samting,” “Papa,” “Hae God,” mo “God ya we i Hae Olgeta.” Be nem blong Jeova i makemaot hem olsem trufala God yet we i stap gohed blong mekem ol bigfala plan blong hem oli kamaot.—Aesea 42:8.
Sipos yumi bin ridim Baebol long lanwis we oli raetem fastaem, bambae yumi faenem nem blong God plante taosen taem. Long Hibru lanwis, oli raetem nem ya long fo leta ‘Yod He Waw He’ (יהוה), oli kolem ‘Tetragrammaton’, oli ridim stat long raet saed i go long lef saed. Ol man we oli toktok lanwis Hibru olgeta nomo oli ademap saon i go long hem, be tede ol man oli no sua se ol saon ya oli olsem wanem. Nating se sam man oli laekem blong raetem nem ya olsem ‘Yahweh’, be plante man oli save nem ya Jeova mo i makemaot gud Man we i Wokem yumi.
Fasin blong yusum nem blong Jeova i makemaot Jeova se hem i defren long hemia we oli kolem “Masta blong mi” long Ol Sam 110:1, wan Baebol i tanem vas ya se: “MASTA [Hibru, יהוה] i talem long Masta blong mi, Sidaon long raet saed blong mi, gogo kasem we mi putum ol enemi blong yu oli stap daon, olsem smol kes blong putum leg blong yu long hem.” (King James Version) From we long Hibru Baebol nem blong God i stap long vas ya, taswe New World Translation i rid olsem, se: “Jeova i talem long Masta blong mi, i se: ‘Yu kam sidaon long raetsaed blong mi, gogo kasem we mi putum ol enemi blong yu oli stap daon, olsem wan smol kes aninit long fut blong yu.’ ” Ol toktok ya blong Jeova oli profet tok we oli stap poen i go long Jisas Kraes, nao man ya we i raetem, hem i singaotem hem se “Masta blong mi.”
Jeova i mekem nem blong hem i hae long taem blong Fero. God i yusum Moses, blong talem long stronghed rula ya se: “I stat naoia, sipos yu no letem olgeta i go, bambae mi no moa panisim tumas ol haeman blong yu wetem ol narafala man blong yu, bambae mi panisim yu moa, blong mekem yu yu save we i no gat narafala man nating long wol ya we i olsem mi. Sipos mi mi leftemap han blong mi blong panisim yu wetem ol man blong yu long wan sik, bambae yufala i finis olgeta, be mi no mekem olsem. Be blong soemaot long yu we mi mi gat paoa, mi letem yu yu stap laef kam kasem naoia, blong soem paoa blong mi long yu mo blong mekem nyus blong nem blong mi i kavremap olgeta ples long wol.”—Eksodas 9:14-16.
Long saed blong wokbaot blong ol man Isrel, stat long Ijip mo go kasem we oli winim sam king blong Kenan long faet, woman ya Rehab blong Jeriko i talem long tufala Hibru spae se: “Mi save se Jeova bambae i givim ples ya long yufala [ol man Isrel], mo mifala i fraet tumas long yufala, mo tingting blong olgeta manples i foldaon bigwan from yufala. From we mifala i harem olsem wanem Jeova i mekem wora blong Red Si i kam drae fored long yufala taem yufala i kamaot long Ijip, mo mifala i harem samting we yufala i mekem long tufala king ya blong ol man Amoraet we oli stap long narasaed blong Jodan, hemia, Sihon mo Og, yufala i spolem gud olgeta. Taem mifala i harem nyus ya, mifala i fraet bigwan, mo i no gat wan we tingting blong hem i kam strong finis, from we Jeova God blong yufala, hem i God blong skae antap mo graon aninit.” (Josua 2:9-11) Yes, nyus blong paoa blong Jeova i kasem ol narafala ples.
Jeova Mo Ol Fasin Blong Hem
Man blong raetem Sam i talem samting ya wetem ful hat blong hem, se: “Plis yu mekem olgeta oli save we yu nomo yu [Jeova], yu nao yu hae king blong olgeta ples long wol.” (Ol Sam 83:18) From we Jeova i hae rula blong skae mo wol, ol man blong Jisas we ol narafala man oli stap ronem olgeta, oli save prea se: “Hae God, yu yu mekem skae mo graon mo solwora, mo evri samting we i stap long wol ya.” (Ol Wok 4:24) !Mo i gud tumas blong save se Jeova i stap “harem prea”!—Ol Sam 65:2, NW.
Stampa fasin blong Jeova hem i lav. Yes, “God i stampa blong fasin ya blong laekem tumas ol man”—ol samting long saed blong fasin ya lav oli stap long hem. (1 Jon 4:8) Mo tu, ‘hem i gat waes mo bigfala paoa.’ Jeova i gat olgeta waes mo paoa, be neva hem i yusum paoa blong hem long fasin we i no stret. (Job 12:13; 37:23) Yumi sua tu se oltaem Jeova bambae i mekem i stret nomo long yumi, from we “hem i stap rul long stret fasin, i stap jajem ol man long fasin we i stret gud olgeta.” (Ol Sam 97:2) Sipos yumi mekem mastik yumi sin biaen yumi tanem tingting blong yumi from sin ya, yumi save haremgud long save ya se Jeova hem i ‘gat sore long man, mo hem i stap givhan long man long gladhat blong hem. Hem i no save kros kwik. Oltaem hem i stap laekem man tumas, mo oltaem hem i stap holemstrong promes blong hem.’ (Eksodas 34:6) !Taswe yumi save glad taem yumi mekem wok blong hem!—Ol Sam 100:1-5.
King Ya Blong Heven We i No Gat Wan We i Olsem Hem
Jisas Kraes, Pikinini blong Jeova, i talem se: “God, hem i Speret.” (Jon 4:24) Taswe, ol man oli no save lukluk Jeova long prapa ae blong olgeta. Yes, Jeova i talem long Moses se: “Be bambae mi no save letem yu yu luk fes blong mi, from we sipos wan man i luk fes blong mi, man ya bambae i ded from.” (Eksodas 33:20) King ya blong heven i hae tumas mekem se ol man oli no naf blong lukluk hem.
Nating se yumi no save luk Jeova wetem prapa ae blong yumi, i gat plante samting we oli stap blong soem se hem i stap olsem God we i gat olgeta paoa. Yes, “yumi no save luk ol fasin ya blong hem stret long ae blong yumi. Hem i God we i blong stap oltaem, mo paoa blong hem i no save finis. Be i stat long taem ya we God i mekem wol ya fastaem, i kam kasem naoia, hem i bin mekem ol fasin ya blong hem oli klia blong yumi luk. Yumi save faenemaot [ol fasin blong hem] long ol samting blong wol ya, we hem i bin mekem.” (Rom 1:20) Wol ya wetem ol gras, ol tri, ol frut, ol ligim, mo ol flaoa oli soem we Jeova i God. I no olsem ol god ya we ol man nomo oli wokem olgeta, Jeova i stap mekem ren i foldaon mo i stap mekem ol garen oli gat kakae long stret taem blong olgeta. (Ol Wok 14:16, 17) Traem lukluk ol sta long naet. !Hemia bigfala pruf se Jeova i God mo hem i naf blong putum ol samting long stret ples blong olgeta!
Jeova i mekem se ol tabu enjel blong hem long heven oli stap wok long stret ples blong olgeta. From we ogenaesesen ya i wokgud, ol enjel ya oli mekem wil blong God, olsem man blong raetem Sam i talem, i se: “Yufala ol enjel, yufala i strong, yufala i gat paoa. Yufala i stap obei long ol tok blong Hae God, yufala i stap lesin long ol samting we hem i talem. !Yufala i mas presem hem! Yufala olgeta long heven, yufala i gat paoa, yufala ol man blong wok blong Hae God, yufala i stap mekem ol samting we hem i wantem. !Yufala i mas presem hem!” (Ol Sam 103:20, 21) Jeova i ogenaesem ol man blong hem tu long wol ya. Nesen ya Isrel i no olbaot, mo ol man blong Pikinini blong God tu bifo i olsem. Sem mak tede, Jeova i gat wan ogenaesesen blong ol Wetnes long ful wol we oli stap wok strong, oli stap talemaot gud nyus se kolosap Kingdom ya blong hem i kamtru.—Matyu 24:14.
Jeova Hem i Trufala God Ya Mo i Laef
!Yumi save luk Jeova olsem God long plante defren rod! Hem i daonem ol gyaman god blong ol man Ijip mo i tekem ol man Isrel i go insaed long Promes Lan. Ol samting we hem i wokem oli soem bigfala pruf se Jeova hem i God. Mo yumi no save skelem hem wetem ol rabis god blong ol gyaman skul, we ol man nomo oli wokem olgeta.
Profet Jeremaea i soem samting we i defren tumas bitwin Jeova, God ya we i laef, mo ol aedol ya we ol man nomo oli wokem. Samting ya we i defren tumas i stap long Jeremaea japta 10. Wetem ol narafala samting, Jeremaea i raetem se: “I tru Jeova hem i God. Hem i God ya we i laef mo hem i King ya blong olwe.” (Jeremaea 10:10) Jeova, God ya we i laef mo i tru i wokem olgeta samting. Hem i tekemaot ol man Isrel we oli stap wok slef long Ijip. I no gat wan samting we i strong tumas long Jeova.
Jeova, “king we rul blong hem i no save finis,” bambae i ansa long prea ya se: “Papa blong mifala we yu stap long heven, nem blong yu i tabu. Mifala i wantem we olgeta man oli ona long yu, mo we yu yu kam king blong olgeta man, mo we olgeta man long wol oli mekem olsem we yu yu wantem, olsem we olgeta long heven oli stap mekem.” (1 Timote 1:17; Matyu 6:9, 10) Kingdom ya blong Mesaea long heven, we i stap finis long han blong Jisas Kraes, bambae i no longtaem hem i spolem ol rabis man mo finisim olgeta enemi blong Jeova. (Daniel 7:13, 14) Kingdom ya bambae hem i mekem wan nyufala wol we i gat ol blesing blong olwe long ol man we ol gat fasin obei.—2 Pita 3:13.
I gat plante moa samting blong lanem yet long saed blong Jeova mo ol plan blong hem. I gud yu traehad blong kasem save olsem mo mekem laef blong yu i laenap wetem. Sipos yu mekem samting ya, bambae yu gat jans blong haremgud long laef we i no save finis long wan paradaes long wol aninit long rul blong Kingdom. Bambae yu stap laef taem we fasin blong sore, sik, mo ded oli lus mo save ya blong Jeova i fulumap wol ya. (Aesea 11:9; Revelesen 21:1-4) Hemia nao bambae i fyuja blong yu sipos yu lukaotem, yu faenem, mo yu mekem laef blong yu i laenap wetem ol Baebol ansa blong kwestin ya, ‘?Hu ya Jeova?’
[Foto Credit Line blong pija long pej 7]
Pictorial Archive (Near Eastern History) Est.