Lukaotgud Long Ol Gudfala Sipsip Blong Jeova Olsem Man Blong Lukaot Long Sipsip

OL ELDA oli stap lesingud. Oli bin wokbaot long 50 kilomita stat long Efesas i go long Maelitas blong kasem ol advaes long aposol Pol. Nao oli harem nogud blong harem se hemia bambae i lastaem we oli save luk hem bakegen. Taswe oli save se ol toktok we bambae oli kamaot oli impoten tumas: “Yufala i mas stap lukaotgud long yufala mo long ol man ya we Tabu Speret i putum olgeta oli stap finis long han blong yufala. Yufala i mas stap lukaot long ol man blong jyos blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem.”​—Ol Wok 20:​25, 28, 38.

Sot toktok blong Pol long ol man blong lukaot long sipsip i rili givim plante gudfala advaes long ol elda ya blong Efesas. Ol elda ya oli savegud wok blong lukaot long ol sipsip long ol ples raonabaot long olgeta. Mo tu oli save plante store insaed long Hibru haf blong Baebol, long saed blong ol man blong lukaot long sipsip. Mo oli save se Jeova i tokbaot hem wan olsem wan Man blong Lukaot sipsip we i stap lukaot long ol man blong hem.​—Aesea 40:​10, 11.

Pol i tokbaot olgeta olsem “ol man blong lukaot” long medel blong “ol sipsip,” mo oli olsem “ol man blong lukaot long sipsip” we oli stap lukaot long “kongregesen.” Olsem tok ya “ol man blong lukaot” i soem wanem nao i wok blong olgeta, tok ya “man blong lukaot long sipsip” i soem olsem wanem nao oli save mekem wok ya blong lukaot. Yes, ol man blong lukaot oli mas lukaot long evri memba blong kongregesen long sem fasin olsem wan man blong lukaot long sipsip i save lukaot long ol sipsip blong hem.

Tede, i no plante elda we oli gat ekspiryens blong lukaot long ol trufala sipsip. Be Baebol i tokbaot plante store long saed blong sipsip mo ol man blong lukaot long sipsip, antap moa olsem pijatok, mekem se ol tok blong Pol oli impoten yet. Mo yumi save lanem plante samting long ol store blong ol man blong lukaot long sipsip bifo, we God i stap laekem olgeta. Ol gudfala eksampel blong olgeta i save givhan long ol elda tede, blong oli luk se wanem nao ol fasin we oli nidim blong gat, blong oli save lukaot long kongregesen blong God olsem man blong lukaot long sipsip.

Deved Man Blong Lukaot Sipsip We i No Fraet Nating

Taem yumi tingbaot ol man blong lukaot long sipsip long taem blong Baebol, sua bambae yumi tingbaot Deved, from we fastaem hem i stap olsem wan man blong lukaot long sipsip. Wan long ol faswan samting we yumi lanem long laef blong Deved se, wok blong lukaot long sipsip i no wan wok we ol man oli stap tinghae long hem. I tru, taem profet Samuel i kam blong kafsaedem oel blong makemaot wan long ol pikinini boe blong Jese olsem fyuja king blong Isrel, fastaem oli fogetem gud yangfala Deved. Hem i afta nomo we Jeova i no wantem ol seven bigfala brata blong Deved blong oli kam king, nao oli talemaot Deved, we hem i stap afsaed long open ples “i stap lukaot ol sipsip we oli kakae.” (1 Samuel 16:​10, 11) Nating se i olsem, ol yia we Deved i spenem olsem wan man blong lukaot long sipsip i trenem hem i rere long bigfala wok blong lukaot long nesen ya blong Isrel olsem man blong lukaot long sipsip. Ol Sam 78:70, 71 i talem se, “[Jeova] i jusum man blong wok blong hem, Deved, mo i tekemaot hem long wok ya blong lukaot long sipsip. . . . i putumap hem i king blong yumi, blong i stap lukaot long yumi [ol man Isrel].” Olsemia nao, Deved i raetem gudfala Sam namba 23 we ol man oli savegud long hem, hem i stat wetem ol tok ya se: “Hae God i stap lukaot long mi olsem we mi mi sipsip blong hem.”

Olsem Deved, ol elda insaed long Kristin kongregesen oli mas wok olsem ol namba tu man blong lukaot long sipsip we tingting blong olgeta i stap daon mo oli no mas lukaot hae ples. Olsem aposol Pol i raet long Timote i se, olgeta ya we oli wantem wok ya olsem man blong lukaot long sipsip oli “wantem wan gudfala wok,” i no hae ples.​—1 Timote 3:1.

Nating wok blong Deved olsem prapa man blong lukaot long sipsip i daon nomo, samtaem hem i nidim tingting we i strong. Eksampel, long wan dei wan laeon i ronwe wetem wan long ol sipsip blong papa blong hem mo long wan narafala taem wan bea i mekem, be long tufala taem ya Deved i no fraet, hem i fesem olgeta mo i kilim ol anamol ya we oli stap kakae ol sipsip. (1 Samuel 17:​34-36) Fasin ya i soem tingting we i strong, sipos man i tingbaot se wan laeon nomo i save kilim ol anamol we oli bigwan moa bitim hem. Mo bea blong Siria we bifo oli stap laef long Palestaen, oli hevi olsem 140 kilo, oli save kilim wan dia wetem wan han nomo blong olgeta.

Strong tingting blong Deved blong lukaot long ol sipsip blong papa blong hem, hemia wan gudfala eksampel long ol man blong lukaot long sipsip insaed long Kristin kongregesen. Aposol Pol i givim woning long ol elda long Efesas from ‘ol man we oli olsem wael dog’ we bambae ‘oli ronem ol man blong Jisas, olsem we oli sipsip nomo.’ (Ol Wok 20:29) Tede tu, samtaem ol Kristin man blong lukaot long sipsip, bambae oli mas gat strong tingting blong oli save lukaot long ol sipsip blong God, long saed blong speret.

I tru we ol sipsip ya oli mas stap sefgud, be tu oli mas lukaot olgeta long fasin we i kaen, olsem Deved, man ya blong lukaot long sipsip we i laekem olgeta mo Gudfala Man ya blong Lukaot long sipsip, Jisas Kraes. (Jon 10:11) Ol elda oli save se ol sipsip ya oli blong Jeova, from samting ya oli neva mas strong tumas long ol sipsip ya, ‘no kam olsem bigfala masta blong olgeta ya we God i putum olgeta long han blong olgeta.’​—1 Pita 5:​2, 3; Matyu 11:​28-30; 20:​25-27.

Oli Mas Talemaot Long God

Olfala Jekob i wan narafala man blong lukaot long sipsip we yumi savegud. Hem i tingbaot se hemia responsabiliti blong hem wan blong lukaotgud long ol sipsip ya wanwan we oli givim long hem. Taswe hem i lukaotgud long ol sipsip blong palika blong hem, Laban, nao afta 20 yia long wok ya blong hem, Jekob i save talem se: “Mo oltaem, ol sipsip blong yufala mo ol nani blong yufala oli stap karem plante pikinini, be mifala i no tekem wan man sipsip no wan man nani nating blong yufala, blong mekem kakae long hem. Oltaem, taem wael anamol i spolem wan anamol blong yufala, mifala nomo i stap givim jenis blong hem. Mifala i no karem bodi blong hem i kam long yufala, blong yufala i luk, no gat. Fasin blong yufala, sipos anamol blong yufala i lus, long dei no long naet, be mifala i mas givim jenis blong hem.”​—Jenesis 31:​38, 39.

Ol Kristin man blong lukaot oli soem bigfala wari moa long ol sipsip ya we Jeova God, Man blong lukaot long laef blong yumi olsem man we i lukaot long sipsip, “i pemaot ol man ya finis long blad blong Pikinini blong hem.” (Ol Wok 20:28; 1 Pita 2:25; 5:4) Pol i makem impoten responsabiliti ya taem hem i talem bakegen long ol man Isrel we oli Kristin se, ol man ya we oli stap lidim ol narafala insaed long kongregesen “olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem.”​—Hibrus 13:17.

Eksampel blong Jekob i soem tu se wok ya blong lukaot long sipsip i no gat mak long hem. Hem i wan wok we i no gat spel long hem, mo plante taem i nidim sakrifaes. Jekob i talem long Laban se: “Plante taem mifala i stap harem nogud long bodi blong mifala. Long dei, bigsan i stap bonem mifala, mo long naet, kolkol i stap kasem mifala, nao mifala i no save slip.”​—Jenesis 31:40.

Samting ya i tru tumas long plante gudfala Kristin elda tede, olsem wan ekspiryens i soem. Wan brata we i kasem wan soa long bren blong hem i go long hospital blong oli katem, biaen hem i sik bigwan. Ol famle blong hem oli mekem plan blong oli stap kolosap long hem long hospital long dei mo long naet. Blong givhan long hem long saed blong speret mo leftemap tingting blong hem, wan long ol elda i jenisim bisi program blong hem blong hem i save visitim sik man ya mo famle blong hem long evri dei. Be, from ol man blong hospital oli stap jekem hem oltaem, mekem se oltaem i no isi long elda ya blong hem i visitim hem long dei. Samting ya i minim se plante taem elda ya i mas stap long hospital let long naet. Be hem i glad blong go long hospital evri naet. Elda ya i talem se, “Mi save se mi mas go long wan taem we i stret long sik man, i no long taem we i stret long mi.” Taem brata ya i kamgud i naf blong oli putum hem long narafala haf blong hospital ya, elda ya i gohed blong mekem visit evri dei we i leftemap tingting blong hem.

Samting We Moses i Lanem Olsem Wan Man Blong Lukaot Long Sipsip

Baebol i tokbaot Moses se “hem i stap daon moa i winim ol narafala man long wol long taem blong hem.” (Namba 12:3) Be, store i soem se samting ya i no olsem bifo. Taem hem i wan yangfala man, hem i kilim ded wan man Ijip from man ya i kilim nogud wan man Isrel. (Eksodas 2:​11, 12) !Hemia i no fasin nating blong wan man we tingting blong hem i stap daon! Be, biaen God bambae i yusum Moses blong lidim wan nesen blong plante milyan man long drae ples blong oli go long Promes Lan. I klia se Moses i nidim moa trening.

Moses i bin kasem trening finis “long olgeta waes blong ol man Ijip,” be hem i nidim moa trening blong hem i lukaot long ol man blong God olsem man blong lukaot long sipsip. (Ol Wok 7:22) ?Wanem kaen trening nao hem i nidim? Yes, long 40 yia God i letem Moses i wok olsem wan man blong lukaot long sipsip nomo long ples ya Midian. Taem hem i stap lukaot long ol sipsip blong palika blong hem, Jetro, Moses i wokem ol fasin ya olsem, longfala tingting, tingting daon, fasin daon, longfala tingting, kwaet fasin, mo fasin blong bos long tingting. Hem i lanem tu blong i stap wet long Jeova. Yes, fasin blong lukaot ol trufala sipsip i mekem se Moses i kasem mak ya we hem i naf blong lukaot long nesen ya blong Isrel olsem man blong lukaot long sipsip.​—Eksodas 2:15 kasem 3:1; Ol Wok 7:​29, 30.

?Yu ting se hemia nao ol fasin we ol elda oli nidim blong oli lukaot long ol man blong God tede? Yes, from we Pol i talem bakegen long Timote se, “man blong wok blong Masta blong yumi . . . i mas wan man blong mekem i gud long olgeta man, wan gudfala man blong tij, we tingting blong hem i longfala. Hem i mas wan man we i save stretem ol man we oli agens long hem, long fasin we i kwaet nomo.”​—2 Timote 2:​24, 25.

Samtaem wan elda i save kros long hem wan from we i hadwok long hem blong hem i gat olgeta fasin ya. Nating se i olsem, hem i no mas stop. Olsem Moses, maet i save tekem longtaem blong gat olgeta fasin ya we man i nidim blong i kam wan gudfala man blong lukaot long sipsip. Be, sloslou biaen, bambae hem i karem frut long fasin traehad olsem.​—Lukluk 1 Pita 5:10.

Olsem wan elda, maet oli no yusum yu plante taem olsem ol narafala. ?Yu no ting se maet, i olsem wetem Moses, Jeova i stap letem yu blong kamgud moa long sam impoten fasin? Neva yufala i mas fogetem se Jeova “i stap tingbaot yufala.” Be, yumi mas tingbaot tu se yumi ‘mas mekem tingting blong yumi i stap daon. Nao long fasin ya, yumi save givhan gud long yumi. Baebol i talem se “God i agensem olgeta we oli flas, be i stap givhan long gladhat blong hem, long olgeta we tingting blong olgeta i stap daon.” ’ (1 Pita 5:​5-7) Sipos yu yusum mo yu akseptem trening ya we Jeova i letem, bambae hem i yusum yu moa, olsem Moses.

Olgeta Sipsip Blong Jeova Oli Gud Tumas Long Hem

Ol man blong lukaot long sipsip, we man i save trastem olgeta, long taem blong Baebol oli gat tingting blong responsabiliti long olgeta sipsip wanwan. Samting ya i mas sem mak long ol man blong lukaot long sipsip long saed blong speret. Samting ya i klia from tok blong Pol, se: “Yufala i mas stap lukaotgud long . . . [olgeta] sipsip.” (Ol Wok 20:28) ?Hu i stap insaed long “[olgeta] sipsip”?

Jisas i talem wan parabol blong wan man we i gat wan handred sipsip nao hem i go lukaotem wan we i lus blong hem i save tekem i kambak long yad. (Matyu 18:​12-14; Luk 15:​3-7) Long sem fasin wan man blong lukaot i mas tingbaot evri memba blong kongregesen olsem. Sipos i gat wan we i no moa prij no i kam long ol Kristin miting, samting ya i no min se sipsip ya i no moa haf blong ol sipsip. Hem i stap yet olsem haf blong “[olgeta] sipsip” we ol elda “oli mas talemaot long [Jeova], we oli holem wok ya blong olgeta olsem wanem.”

Wan bodi blong ol elda i wari lelebet se sam man we oli bin joen wetem kongregesen, naoia sloslou oli no moa prij. Oli mekem wan lis blong olgeta ya, mo oli traehad blong visitim olgeta mo givhan long olgeta blong oli kambak long yad blong ol sipsip blong Jeova. Ol elda ya oli tangkyu tumas long Jeova from we bitim tu mo haf yia i pas, oli save givhan long bitim 30 man blong oli gohed bakegen long wok blong Jeova. !Wan long olgeta ya we ol elda oli halpem hem, hem no moa prij kolosap 17 yia finis!

Ol man blong lukaot oli tingting hevi moa long responsabiliti ya from we “God i pemaot ol man ya finis long blad blong Pikinini blong hem.” (Ol Wok 20:28) I no gat wan praes we i sas moa long praes ya we hem i givim blong pem ol sipsip ya. !Mo tingbaot taem mo fasin traehad we yumi spenem long minista wok blong faenem mo givhan long ol wanwan man ya we oli olsem sipsip! ?Yu ting se long sem fasin yumi mas traehad blong holem olgeta oli stap insaed long yad blong ol sipsip blong God? Yes, evri sipsip insaed long kongregesen oli impoten tumas.

Mo tu taem wan memba blong ol sipsip ya i mekem bigfala sin, responsabiliti blong ol elda i no jenis. Oli gohed olsem man blong lukaot long sipsip we oli tingtinggud long ol sipsip ya, oli kaen mo traehad wetem kwaet fasin blong sevem hemia we i mekem sin sipos i gat rod. (Galesia 6:​1, 2) Sore tumas, samtaem i klia se wan memba blong kongregesen i no gat fasin sore from bigfala sin we hem i mekem. Nao ol gudfala man blong lukaot long sipsip oli gat wan responsabiliti we i stanap long Baebol blong oli protektem ol narafala sipsip long nogud fasin ya blong i no pulum olgeta.​—1 Korin 5:​3-7, 11-13.

Nating se i olsem, Jeova i givim eksampel we i stretgud olgeta long saed blong soem fasin sore long sipsip we i lusum rod. Man blong lukaot long yumi olsem sipsip blong hem, i talem wetem kaen fasin se: “Bambae mi mi lukaot hemia we i lus finis. Mo hemia we i ronwe, bambae mi mi karem hem i kambak. Mo hemia we i brekem wan bun blong hem, bambae mi fasem hem gud long kaliko. Mo hemia we i sik, bambae mi mi mekem hem i strong.” (Esikel 34:16; Jeremaea 31:10) Blong folem nambawan eksampel ya, i gat wan gudfala plan long ol man blong lukaot long sipsip long saed blong speret tede, blong oli visitim ol man ya we oli bin putumaot olgeta finis long kongregesen, we naoia maet oli save lesin long help blong ol man ya blong lukaot long sipsip. Ol fasin sore mo traehad ya blong tekembak ol sipsip ya we oli lus i karem gudfala frut. Wan sista we oli putum hem bakegen long kongregesen, i talem se: “Taem ol elda oli kam visitim mi, hem i tok blong leftemap tingting we mi nidim blong mi kambak.”

I tru we ol tok blong Pol long ol elda blong Efesas long Maelitas oli gat plante mining​—long olgeta mo long ol man blong lukaot tede. Tok blong hem long saed blong ol man blong lukaot long sipsip i blong mekem yumi tingbaot bakegen ol gudfala fasin we yumi save luk long laef blong ol man blong lukaot​—ol fasin olsem, tingting daon mo strong tingting, olsem eksampel blong Deved, king mo man blong lukaot long sipsip; wan tingting blong responsabiliti mo fasin blong lukaotgud long narafala, olsem Jekob we i wok long dei mo long naet; mo fasin blong rere blong akseptem moa trening wetem longfala tingting, olsem Moses i soem. Yes, ol eksampel ya blong Baebol bambae oli givhan long ol elda long kongregesen blong oli gat mo soem ol impoten fasin ya blong oli save “lukaot long ol man blong jyos blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem.”