Wan Drae Ples Naoia i Kam Gudfala Graon

OLSEM ARTHUR MELIN I TALEM

Hemia wan dei we i no gat klaod nating long hem long spring taem long 1930, mo mi stap stanap long wan wof long Prins Rupet, Britis Kolombia. Mi stap lukluk i godaon long bot we i fas long sanbij kolosap long soa, mo mi stap tingting se, ‘?Man, weples olgeta solwora ya oli go long hem?’ Hemia faswan taem we mi luk Solwora blong Pasifik, long Wes Kos blong Kanada, we taed i save godaon 7 mita long sikis haoa nomo. ?Be olsem wanem wan boe we i gruap long wan plantesin long drae ples i kam kasem Solwora blong Pasifik?

BLONG mekem se mi gat moa jans blong wok fultaem long wok blong Jeova, oli askem mi blong joenem ol boskru blong sip ya Charmian. Wok blong mifala i blong prij long ol ples long wes kos we oli stap farawe, stat long Vankuva go kasem Alaska, ol ples ya we oli neva bin prij long olgeta bifo. Bigfala eria ya we i kavremap bighaf blong ol ples kolosap long solwora long Britis Kolombia, i no gat wan man we i strong blong presem Jeova. I gat wan smol grup nomo blong ol man blong talemaot Kingdom long taon blong Prins Rupet.

Mi mi wantem tumas blong statem wok blong prij, taswe taem mi kamaot long tren, kwiktaem nomo mi stat blong wokbaot i go long wof blong luk sip ya, Charmian mo blong mitim boskru blong hem, Arne mo Christina Barstad. Tufala i no stap long sip, taswe mi mi gobak. Long sem dei ya, taem mi kambak bakegen long sip, mi mi sapraes tumas. !I luk olsem se olgeta solwora oli stap kam drae!

?Be wanem i mekem se mi joen long wok ya we mi mi intres tumas long hem?

Kasem Wan Samting Long Saed Blong Speret

Fasin blong mi blong laekem ol samting long saed blong speret i stat insaed long famle, long ol flat ples blong Albeta, Kanada. Papa blong mi i bin faenem wan traket we Charles Taze Russell blong Zion’s Watch Tower Tract Society i raetem, mo traket ya i jenisim laef blong papa bigwan. Papa i stat blong prij long ol man we oli stap kolosap long hem, nating se wok blong plantesin long Kalma, Albeta, i tekem tumas taem blong hem. Hemia wan handred yia bifo, long stat blong ol yia biaen long 1890.

Mi mi bon long Febuwari 20, 1905, mi kam haf blong wan famle we i fraetgud long God, mi mi namba eit pikinini mo biaen, mifala i kam olsem ten brata mo sista. Papa mo ol narafala long eria ya we ol man Swiden oli stap long hem, oli joen wetem ol Intenasnal Baebol Studen. Afta, oli bildim wan ples blong miting, we biaen oli kolem Haos Kingdom. Hem i wan long ol faswan Haos Kingdom long Kanada.

Wok long plantesin i neva blokem mifala blong go long ol Kristin miting, mo sam long ol tok long ol miting ya, ol brata we Watch Tower Society i sanem olgeta oli kam, oli givim. Ol tok ya oli mekem se, long hat blong mifala, mifala i wantem tumas blong joen long wok blong prij. Frut we i kamaot se, kolosap se mifala evriwan long famle blong mifala, mifala i strong blong folem laet blong trutok blong Baebol.

Joen Long Wok Blong Prij

Jes biaen long 1920, oli talem faswan ples we mi mas go prij long hem. Oli askem mi blong go long ol haos wanwan long taon blong Edmonton, mo givimaot ol pepa blong askem ol man blong kam long pablik tok. Long dei ya, taem i no gat wan man i stap wetem mi, mi lanem wan nambawan lesen se: Trastem Jeova. (Proveb 3:​5, 6) !Mi mi glad tumas blong mekem faswan wok ya wetem help blong Jeova!

Fasin tras blong mi long ogenaesesen blong Jeova long wol ya mo long grup ya blong hem, slef we i stret mo waes, i gohed blong gru taem mi stap kasem moa save long tru Tok blong Hem. Mi lego plante tijing mo kastom blong Krisendom, olsem fasin blong mekem lafet long Krismas mo ol betde. Fasin blong tingbaot rod blong sef blong mi wan i no moa stap olsem wan bigfala wari blong mi; be, mi stat blong tingbaot wok blong talemaot Kingdom olsem wan impoten samting. Olgeta samting ya oli gat bigfala paoa long laef blong mi. Taswe smoltaem afta we mi givim laef blong mi long Jeova long Epril 23, 1923, mi traehad blong kam wan Kristin fultaem minista.

Long koltaem, long ples ya we i no gat tri i gru long hem, tempreja i godaon bitim siro, ale mifala i ron long kat we hos i pulum, mifala i go prij long ol ples afsaed long taon. Wan taem mi spenem tu wik wetem wan grup blong man we oli stap pas long haos we i gat wil blong hem olsem trak. Ol spesel trak ya oli givhan bigwan long wok blong prij long bigfala flat eria ya blong Kanada we i no gat tri i gru long hem. Nating se i gat hadtaem long saed blong mane, nogud weta, mo longfala trep blong go, samwe long tri yia, mi traehad blong gohed wanwan taem long wok blong paenia long Albeta kasem dei ya long 1930, we mi no save fogetem, taem oli askem mi blong go prij kolosap long Solwora blong Pasifik, long Wes Kos blong Kanada. From we mi no save wan samting nating long saed blong solwora mo fasin blong wok long sip, mi no kasem save from wanem oli askem mi.

I tekem smoltaem nomo afta we mi kasem Prins Rupet, blong mi stap haremgud wetem ol nyufala fren we oli wok wetem mi long sip, mi harem olsem we hemia i stret ples blong mi. Brata Barstad i gat gudhan blong wok long sip, from we hem i bin joen plante yia long bisnes blong pulum fis. Long ol sikis yia we oli kam biaen, mifala i gohed strong long wok blong prij, mifala i stap ron long solwora kolosap long Britis Kolombia, stat long Vankuva kasem Alaska. Mi lanem wan narafala lesen se: Oltaem, akseptem wan wok we Jeova i givim, mo neva fraet blong akseptem.

Planem Ol Sid Kolosap Long Solwora

Faswan haba we mifala i visitim long spring taem blong 1930, hemia Kejikan, Alaska, we long ples ya mifala i karem 60 katon buk we oli tokbaot Baebol oli kam long sip. Long sam wik biaen, mifala i visitim olgeta haos blong ol man long Kejikan, Wrangel, Pitasbeg, Juneau, Skagwei, Haines, Sitka, mo sam narafala smol velej we oli stap longlongwe long olgeta. Biaen, mifala i prij long ol man we oli stap long olgeta ples long Britis Kolombia, kolosap long solwora, mifala i prij long olgeta ples ya bifo long en blong hot taem. Mifala i visitim ol velej blong ol man we oli stap katem timba long bus, ol faktri blong wokem tin fis, ol velej blong ol Indian blong Amerika, ol smosmol taon, mo tu ol man we oli stap long bus mo ol man blong kasem ol anamol long trap. Samtaem, i had blong gowe long ol man blong lukaot laet we i givim woning long ol sip, ol man ya oli stap olgeta nomo, mo oli wantem toktok wetem wan man.

Biaen, Sosaeti i givim sam fonograf long mifala wetem ol rikod blong ol pablik tok we oli kamaot long Baebol. Mifala i karem ol fonograf ya wetem mifala, wetem sam buk, sam Baebol, mo sam magasin. Plante taem, mifala i mas wokbaot antap long ol ston folem solwora taem mifala i stap karem ol samting ya. Taem solwora i godaon, samtaem mifala i mas karem ol samting ya, ale klaem long ol lada we oli no strong, blong go antap long wof we i hae. Mi glad tumas from trening long saed blong bodi we mi kasem long yangtaem blong mi taem mi stap wok long plantesin long bigfala flat ples ya we i no gat tri i gru long hem.

Laod spika we mifala i karem long sip blong mifala, i olsem wan strongfala tul blong talemaot nyus blong Kingdom. From we solwora i mekem se saon i kambak, ol man we oli stap plante kilomita longwe oli harem pablik tok we mifala i plei long fonograf. Wan dei, taem mifala i sakem angka long smol haba long Vankuva Aelan, mifala i putum wan long ol rikod blong ol tok ya we oli kamaot long Baebol. Long nekis dei, ol man we oli stap longwe lelebet long soa, oli kam we oli sapraes mo oli talem long mifala se: “!Yestede, mifala i harem wan bigfala toktok we i kamaot stret long heven!”

Long wan narafala taem, wan olfala man mo waef blong hem, tufala i talem se tufala i harem myusek i stap pas i kamdaon folem jimne long haos blong tufala, be taem tufala i go afsaed, tufala i no harem wan samting. Taem tufala i gobak insaed long haos, tufala i harem wan voes. ?From wanem samting ya i kamaot? Long taem ya we tufala i go afsaed, mifala i jenisim rikod. Mifala i plei myusek fastaem blong pulum ol man blong lesin, biaen mifala i plei long wan pablik tok we i kamaot long Baebol.

Long wan narafala taem bakegen, mifala i sakem angka kolosap long wan aelan we i gat wan velej blong ol Indian blong Amerika long hem, ale tu yangfala boe long ples ya, tufala i pul i kam long solwora blong luk se ol voes ya oli stap kamaot weples. !Sam man long aelan ya, oli ting se hemia ol voes blong ol dedman blong olgeta we oli laef bakegen!

Plante taem, mifala i seremaot wan handred buk long wan dei long ol man we oli stap wok long ol kampani blong wokem tin fis long ol ples we oli stap farawe. From we i no gat tumas samting i blokem olgeta, oli gat taem blong tingting long ol samting long saed blong speret. Biaen, plante long olgeta we oli stap long ol ples ya, oli kam Wetnes. Long ol narafala trep biaen, mifala i wantem visitim olgeta blong ‘bambae bilif blong olgeta i save givhan long mifala, olsem we bilif blong mifala tu i save givhan long olgeta.’​—⁠Rom 1:⁠12.

Gohed Long Wok Blong Prij Wetem Wan Waef

Long 1931, mi maredem Anna, sista blong Chris­tina Barstad. Ale, mitufala i stap long sip mo gohed blong mekem wok blong paenia tugeta, mo mitufala i kasem plante gudfala ekspiryens long ol yia we oli kam biaen. Ol wel fis, ol laeon blong solwora, ol sil, ol dolfin, ol dia, ol bea, mo ol igel, oli ol fren blong mitufala taem mitufala i stap long ol hil we oli naes tumas, ol ples long solwora we oli farawe, insaed long haba we solwora i kwaetgud, bus we i fulap long ol tri olsem sidatri, paentri, mo ol bigbigfala tri ya we oli kolem Duglas Fer. Samtaem, mitufala i halpem ol dia wetem ol pikinini blong olgeta we oli kam taed tumas, taem oli stap traem blong swim kros long ol reva we oli ron strong blong ronwe long ol anamol we oli wantem kakae olgeta.

Wan aftenun, mitufala i luk wan igel we ol feta blong hem long hed mo tel oli waet, i stap flae daon nomo blong krosem reva, mo long ol fingga blong hem, hem i holemtaet wan bigfala jinuk salmon. Fis ya i bigfala tumas, mekem se igel ya i no save karemaot fulwan long wora, taswe hem i stap pulum salmon ya i gotru long solwora taem i stap flae i go from drae ples. Frank Franske, wan long ol boskru, i luk se fis ya i save kam wan gudfala kakae mo i ron folem saed blong solwora, go kasem igel ya we i stap kam taed mo i mekem se igel ya i lego fis we hem i kasem. Long aftenun ya, mifala ol paenia long sip i mekem wan nambawan kakae wetem salmon ya, mo igel i lanem blong serem samting we hem i kasem, nating se hem i no glad blong mekem.

Long wan smol aelan long not blong Vankuva Aelan, wan man mo waef blong hem we nem blong tufala Thuot, tufala i akseptem trutok blong Baebol. Hasban ya i no save rid, hem i gat strong fasin, i no save dipen long narafala, hem i gat 95 yia, mo waef blong hem i gat 85 yia. Be hem i intres tumas long trutok, nao i mekem tingting blong hem i stap daon mo i letem waef blong hem blong tijim hem blong rid. Smoltaem biaen, hem wan i save stadi long Baebol mo ol buk blong Sosaeti. !I no kasem tri yia biaen, mi glad tumas blong baptaesem tufala long aelan blong tufala we i stap farawe, mo mi yusum bot blong mifala olsem ples blong baptaes!

Mitufala i glad tu blong luk we famle Sallis long Powel Reva i lesin long mesej blong Kingdom. Walter i ridim buklet ya, War or Peace​—⁠Which? mo kwiktaem nomo hem i luksave trutok we i stap long hem. Smoltaem biaen, fulwan famle i joenem Walter long wok blong paenia long Vankuva, ples ya we mifala i fasem Charmian long hem, from koltaem. Hem i strong long wok blong prij, mo long ol yia we oli kam biaen, hem i joengud fulwan long kampani blong ol brata long eria blong Vankuva. Laef blong hem long wol ya i finis long 1976, i livim biaen wan bigfala famle blong ol Wetnes.

Winim Fasin Agens

Plante taem, ol lida blong skul long ol velej blong ol Indian blong Amerika, oli kros long mifala from wok blong mifala, oli talem se mifala i stap stilim samting long ples we oli lukaot long hem long saed blong speret. Long Pot Simpson, lida blong skul long ples ya i askem jif blong velej blong blokem mifala blong no prij long ol man long haos. Mifala i toktok wetem jif mo askem long hem sipos hem i ting se i stret blong wan lida blong skul i mekem olsem we ol man blong hem oli no naf long tingting blong olgeta blong mekem prapa disisen blong olgeta. Mifala i talem se, i gud sipos ol man blong hem oli harem Tok blong God mo olgeta wanwan oli mekem disisen long samting we oli wantem bilif long hem. Frut we i kamaot se: Hem i letem mifala blong prij long velej.

Plante yia finis, narafala jif blong wan velej i sakemaot ol traehad blong ol memba blong kaonsel mo ol lida blong skul we oli stap askem strong long jif ya blong blokem ol Wetnes blong storeyan wetem ol man blong hem. Jif ya i talem se: “Oltaem we bambae mi mi stap olsem jif, bambae mi akseptem ol Wetnes blong Jeova long ples ya.” I tru, ol man oli no akseptem mifala long evri ples, be nating se i gat man i agensem mifala, neva oli fosem mifala blong aot long wan eria. Taswe mifala i save gohed long wok blong mifala long ol wanwan taem we sip i stop long ples ya.

Winim Ol Trabol Long Solwora

Long ol yia we mifala i mekem wok ya, mifala i fesem ol hadtaem long ol strong win, raf si, sip i rek long ol ston, mo samtaem enjin i nogud. Wan taem, mifala i drif i go kolosap tumas long Lasketi Aelan, samwe long 160 kilomita long not blong Vankuva. Mifala i fas long wan rif, from we solwora i stap godaon, mo laef blong mifala i dipen nomo long weta. Sipos weta i kam nogud, bambae sip ya i brobrok nogud long ol ston. Mifala evriwan i jyam daon long ol ston ya mo mekem olgeta samting we mifala i save mekem long nogud weta ya. Mifala i kakae, spenem taem blong mekem moa stadi, mo wet long taem we bambae solwora i kam soa bakegen.

Nating se mifala i fesem plante denja mo trabol, mifala i no sik mo mifala i hapi. Be, taem tufala boe blong mitufala i bon, samting ya i mekem wan bigfala jenis i kamaot. Mitufala i gohed blong stap long sip, be taem mifala i sel i go long not, kasem Una Reva, Anna mo tufala boe, trifala i stap long ples ya wetem papa mama blong Anna, be sam long mifala i gohed blong sel i go moa long not kasem Alaska. Ale, taem mifala i sel i kambak long saot, Anna mo tufala pikinini ya, trifala i joenem mifala bakegen.

Mi no tingbaot wan taem we mi harem tufala pikinini ya i komplen mo tufala i sik. Tufala i putum laef jaket oltaem, mo samtaem, mifala i fasem rop raon long tufala. Yes, i gat sam taem we solwora i raf tumas.

Sam Moa Jenis

Long 1936, mifala i mas livim Charmian, mo mi faenem wan wok blong kasem mane. Biaen, namba tri boe blong mitufala i bon. I no longtaem biaen, mi pem wan sip blong hukum fis, we mifala i yusum blong kasem mane, be tu blong gohed blong prij long ol ples kolosap long solwora.

Mifala i mekem wan haos long Digbi Aelan, narasaed long haba blong Prins Rupet, mo smoltaem biaen, mifala i stanemap wan smol kongregesen. Long Namba Tu Bigfala Faet blong Wol, taem oli putum tabu long wok blong prij blong ol Wetnes blong Jeova long Kanada, mifala i tekem wan sip i kam kros long Prins Rupet afta long medel naet mo mifala i go long teritori, mo livim ol buk long evri haos. !Taem ol man oli luk mifala i krosem haba long medel naet, i no gat wan long olgeta we oli tingbaot se mifala i go blong seremaot ol buk we oli putum tabu long hem!

Naoia Graon Ya i Kamgud

Sloslou, i gat moa man oli stat blong joen wetem ol Wetnes blong Jeova, mo long 1948, i klia se mifala i nidim wan Haos Kingdom long Prins Rupet. Ale mifala i pem wan haos blong ol ami we i stap narasaed long haba, mifala i tektekemaot, mifala i karem long bot i gokros long narasaed haba, mo karem long trak i go long ples blong bildim Haos Kingdom. Jeova i blesem hadwok blong mifala, mo mifala i gat prapa Haos Kingdom blong mifala.

Long 1956, mi mekem wok blong paenia bakegen, mo Anna i joenem mi long 1964. Bakegen mifala i yusum sip blong prij long ol man we oli stap kolosap long Solwora blong Pasifik. Mi mi mekem wok blong seket elda smoltaem, mo mitufala i visitim ol kongregesen stat long Kwin Jalot Aelan i go long is saed, krosem ol hil go kasem Bigfala Wora blong Fresa, mo biaen, mifala i go kasem Prins Joj mo Makensi. Long olgeta yia blong wok blong mifala, mifala i kavremap plante taosen kilomita long ol ples long Not Wes blong Kanada, kolosap long Pasifik, long trak, long sip, mo long plen.

Long Prins Rupet, mifala i gohed blong haremgud long ol nambawan ekspiryens long wok blong prij. Mi mo Anna, mitufala i mekem stadi wetem ol wanwan man we biaen oli go long Wajtaoa Baebol Skul Blong Gilead mo oli go blong wok olsem misinari long ol narafala kantri. !Mitufala i glad tumas blong luk we ol pikinini blong mitufala long saed blong speret, oli karem nambawan mesej blong Kingdom i go long ol narafala kantri farawe!

Naoia, mi mo Anna, mitufala wanwan i gat moa long 80 yia finis, mo mitufala i stap fesem ol trabol long saed blong helt blong mitufala we i kam nogud, be mitufala i stap haremgud yet long wok blong Jeova. Ol naesfala samting we mitufala i bin luk long Alaska mo long Britis Kolombia, mitufala i no save fogetem. Be mitufala i glad moa blong luk se wan bigfala drae ples long saed blong speret we bifo i no gat tri long hem, naoia, i fulap wetem plante kongregesen blong ol man blong presem Jeova.

Antap moa, mitufala i glad tumas blong luk we ol prapa pikinini blong mitufala, mo tu, ol pikinini blong mitufala long saed blong speret, oli gruap mo oli presem Jeova. Mitufala i glad tumas se mitufala i bin joen smol blong mekem wok long saed blong speret i gru long haf ya blong wol. Eksampel, naoia, Alaska i gat wan prapa branj ofis blong hem we i stap lukaot long ol wok long bitim 25 kongregesen.

Long ples ya, long Prins Rupet, mifala i glad tumas long 1988 blong dediketem wan nyufala naes Haos Kingdom, we i stap stret long medel blong taon. Yes, olsem Aesea, mitufala i glad tumas blong talem se: “Yu bin mekem nesen ya i gru; O Jeova, . . . yu yu bin leftemap yu wan. Yu bin seftem ol mak blong graon blong kantri ya blong mekem i kam bigwan moa.”​—⁠Aesea 26:⁠15.

[Tok blong pija long pej 21]

Mekem wok blong seket elda long 1964 kasem 1967

[Tok blong pija long pej 24]

Kaen bot we mifala i yusum blong prij long ol ples kolosap long solwora