?Yu Yu Stap Halpem Pikinini Blong Yu Blong Jusum Jeova?

WAN yangfala man i talem se, “Mi harem se stadi long Baebol i rili mekem mi mi les mo mi taed. Mi no talem long wan man, be mi mekem disisen long hat blong mi se bambae mi no kam wan Wetnes blong Jeova taem mi gruap.” Yumi hop se bighaf blong ol pikinini long Kristin famle bambae oli jusum blong wosip long Jeova, be sam yangfala olsem yangfala ya oli save fesem wan hadtaem blong jusum Jeova olsem God blong olgeta.

Samtaem ol papa mama oli no sua olsem wanem blong lidimgud ol pikinini blong olgeta. Oli stap skelem ol rod blong olgeta bakegen mo bakegen, olsem wan papa we i stap wari i bin talem se: “Blong talem stret, i gat sam taem we mi lukluk long fes blong ol pikinini blong mi we i luk olsem se oli wantem slip, mo wora blong ae blong olgeta we i kamaot from oli bin harem nogud, i stap yet long fes blong olgeta, mo mi stap tingting sipos mi bin mekem i strong tumas long olgeta.” Taem tufala boe ya blong hem oli kam bigfala, oli jusum blong mekem wok blong Jeova.

Be i gat sam yangfala we oli lego Jeova mo oli livim Kristin kongregesen mo oli biaenem wol blong Setan. ?Olsem wanem ol papa mama oli save givhangud long ol pikinini blong olgeta blong jusum Jeova? Blong ansarem kwestin ya, fastaem i gud yumi faenemaot from wanem sam yangfala oli lego Jeova, nating se papa mama blong olgeta oli wantem tumas blong oli stap wetem Jeova.

From Wanem Sam Yangfala Oli Lego Jeova

Wan long ol bigfala risen, hemia se sam yangfala oli no rili kasem save long Jeova mo ol rod blong hem. Nating se oli stap kam long ol Kristin miting stat long taem we oli pikinini nomo, oli no rili intres long ol miting, mo oli no rili lukaot Jeova. (Aesea 55:6; Ol Wok 17:27) Boe ya we yumi tokbaot antap i les blong kam long ol Kristin miting from we hem i no kasem save long ol samting we olgeta we oli givim tok long platfom oli talem.

Sam pikinini oli kasem trutok, be oli letem ol fasin blong laef olsem fasin blong no wantem karem responsabiliti mo fasin blong ronem ol sas samting, we oli luk long wol blong Setan, i pulum olgeta. Samfala oli no save winim ol strong filing blong joen wetem mo blong wantem kam olsem ol fren blong olgeta.​—⁠1 Kronikel 28:9; Luk 8:​12-14; 1 Korin 15:⁠33.

Be long olgeta ples long wol, plante pikinini long ol Kristin famle oli jusum blong stanap long saed blong Jeova. ?Yumi save lanem wan samting long ol gudfala rod we papa mama blong olgeta oli bin yusum?

Stat Taem Oli Smol Nomo

Wan impoten rod blong halpem ol pikinini blong yu blong jusum Jeova, hemia blong stat givhan long olgeta taem oli smol nomo. Long plante pikinini, ol gudfala tingting we oli kasem mo ol lesen we oli lanem taem hat i sofsof yet mo oli wantem lesin, bambae oli holem long ful laef blong olgeta. (Proveb 22:⁠6) Taswe, taem ol pikinini blong yu oli smol nomo, stat blong storeyan long olgeta long ol gudgudfala fasin blong Jeova, lav mo haenem blong Hem, mo traehad blong bildim fasin ya blong laekem tumas Jeova mo fasin tangkyu long hat blong olgeta from ol samting we Jeova i bin mekem long olgeta. Blong mekem samting ya, plante papa mama oli yusumgud plante poen we oli faenem long ol buk blong Watchtower Society we oli tokbaot ol samting we Jeova i wokem.

Wetem ol narafala fasin, ol papa mama oli mas tijim ol pikinini blong olgeta taem oli smol yet long fasin obei mo fasin respek long Jeova mo wosip blong hem. Yumi haremgud taem yumi luk ol pikinini we oli no go long skul yet, oli stap kam long ol Kristin miting mo oli stap traehad blong raetem ol isi not mo jekemap ol vas long prapa Baebol blong olgeta, no oli go wetem papa mama blong olgeta long rum blong swim blong wasem fes blong olgeta wetem kolwora taem oli wantem slip. !Ol samting ya oli smol nomo, be oli impoten tumas blong makem long maen blong wan yangfala se oli mas soem respek mo fasin obei long Jeova!

Mo tu, ol papa mama oli mas stat kwiktaem blong tijim ol pikinini blong olgeta long Baebol. Wan man mo woman blong hem, tufala i stat blong ridim buk ya Listening to the Great Teacher,a wetem tufala boe blong tufala, taem tufala i gat tu yia. Biaen, taem tufala boe ya oli stat blong go long skul, tufala i girap eli mo stadi evri moning wetem mama blong tufala long ol buk ya, My Book of Bible Stories mo Yu Save Laef Foreva Long Paradaes Long Wol.* Biaen long stadi ya, oli tokbaot vas blong dei we papa i lidim bifo we oli dring ti. Ol fasin traehad blong papa mama ya oli karem gudfala frut taem tufala boe blong tufala oli mekem disisen blong wosip long Jeova i no longtaem i pas, mo tufala i soemaot se tufala i givim laef blong tufala long God taem tufala i baptaes we wan i gat 10 yia mo narawan i gat 11 yia.

Wan nambawan yangfala man we i stap wok long branj ofis blong Watch Tower Society long Japan i rimemba se taem hem i smol nomo, mama blong hem i halpem hem blong frengud wetem Jeova taem hem i sidaon kolosap long hem long naet, mo i halpem hem blong prea. Yangfala ya i neva fogetem lesen we hem i lanem​—⁠nomata weples hem i go mo wanem samting hem i mekem, oltaem Jeova i stap kolosap mo i rere blong giv­han.

Ol papa mama we oli karem gudfala frut long wok blong olgeta blong trenem pikinini, oli lanem blong luksave ol rong tingting we oli kamaot from sin we pikinini i bon wetem, mo ol papa mama ya oli stat kwiktaem blong halpem ol pikinini blong olgeta blong stretem ol tingting ya. (Proveb 22:15) Ol tingting we oli stap pulum pikinini blong gat fasin blong tingbaot hem wan nomo, fasin stronghed, fasin flas, toktok long baksaed blong ol narafala, ol papa mama oli mas givhan long ol pikinini blong olgeta blong stretem ol fasin ya taem oli smol yet. Sipos no, biaen bambae ol sid ya oli karem fasin blong rebol agens long God mo ol rod blong hem. Eksampel, papa mo mama we tufala i ting se tufala i mekem i stret taem tufala i no stretem tumas ol pikinini blong tufala, oli save mekem se ol pikinini blong tufala i gat fasin blong tingbaot olgeta nomo. Ol pikinini ya oli faenem se i had blong respektem papa mama blong olgeta mo Jeova, mo oli kam olsem ‘ol man ya we oli no gat fasin tangkyu’ we Baebol i tokbaot. (Proveb 29:21) Be ol pikinini we papa mama blong olgeta i givim wok long olgeta blong mekem long haos mo oli tijim olgeta blong lukaotgud long ol nid blong ol narafala, oli gat moa fasin tangkyu long papa mama blong olgeta mo long Jeova tu.

Wan narafala impoten samting blong stat mekem taem pikinini i smol yet, hemia blong putumap ol tiokratik mak we pikinini ya i naf blong kasem. Sipos papa mama tufala i no mekem samting ya taem pikinini i smol mo oli no gohed oltaem blong mekem, ol narafala oli save fulumap maen mo hat blong pikinini wetem ol narafala mak. Fasin blong ridim fulwan Baebol, stadi hem wan long wan buk blong Watchtower Society, joen long Tiokratik Skul, kam wan man blong talemaot gud nyus, mo tekem baptaes, oli mas sam blong ol mak ya.

Takafumi i tingbaot we, blong tijim hem long fasin blong ridim olgeta Wajtaoa mo Wekap! magasin, mama blong hem i raetem sam isi kwestin mo i putum long tebel blong kijin, nao Takafumi i save faenem ansa blong olgeta taem hem i kambak long skul. Yuri i tingbaot se fasin blong stap sam dei wetem ol paeniab we oli stap wok long ples we i gat bigfala nid long saed blong ol Kristin minista, joen wetem olgeta long wok blong prij, wajem olgeta taem oli stap kukum nambawan kakae, mo lukluk glad mo fasin blong olgeta blong wok strong, i pusum hem bigwan blong wantem mekem wok blong Jeova long sem rod. Plante yangfala oli talem se plante taem, papa mama blong olgeta i bin tekem olgeta oli go long Betel, hemia ol hedkwota mo ol branj blong Watch Tower Society, mo long ples ya oli luk ol narafala yangfala man mo woman we oli glad blong mekem wok blong Jeova. Plante long olgeta we oli mekem visit olsem, taem oli pikinini, naoia oli stap wok long sam Betel raonabaot long wol.

Spenem Taem Wetem Ol Pikinini Blong Yu

Taem we yu spenem mo wanem samting we yu mekem wetem ol pikinini blong yu, bambae i pulum olgeta blong jusum blong mekem wok blong Jeova no no gat. Oli kwik blong luksave hamas taem we yu tekem mo fasin traehad blong yu blong mekemrere Baebol stadi mo mekem stadi wetem olgeta. Sipos yu no save tingbaot weples yufala i stop long hem long laswan stadi, no yu mestem stadi from sam risen we oli no impoten tumas, yu yu stap givim wan mesej se stadi i no rili impoten. Be, taem oli luk se papa mama tufala i lego sam narafala samting blong stadi, tufala i reregud long stadi mo mekem stadi oltaem nomata wanem samting i kamaot, tufala i stap givim wan mesej we i defren olgeta. Nating se i no gat rul long fasin blong putum gudfala klos, sam mama oli jenisgud blong mekem stadi blong ol pikinini blong olgeta, i sem mak olsem we oli jenis blong go long ol miting no blong mekem Baebol stadi long wan man we i stap kolosap long olgeta. Long fasin ya, oli soem se wosip blong Jeova i impoten tumas.

I nidim plante taem blong mekem ol pikinini blong yu oli haremgud long Baebol stadi, mo blong kasem hat blong olgeta. Oltaem, ol smol pikinini oli haremgud taem oli luk we man i mekem pleplei long wan store long Baebol. Eksampel, wan papa i halpem ol pikinini blong hem blong traem pijarem fasin blong laef bakegen taem hem i mekem plei long store blong Baebol long saed blong Lasros we i laef bakegen long ded. Hem i go insaed long kabod mo i kamaot bakegen olsem Lasros we i laef bakegen.​—⁠Jon 11:​17-44.

Taem ol pikinini oli kam bigfala, i tekem moa taem mo waes blong winim ol samting we oli save pulum no spolem filing blong olgeta, mekem tingting i no klia, mo ol wari we oli save fesem. Long taem ya, i impoten we papa mama we oli gat lav mo fasin luksave oli spenem plante taem wetem ol pikinini, sipos tufala i wantem se ol pikinini blong tufala oli gat fasin blong trastem Jeova. Wan papa we i trenemgud ol fo pikinini blong hem i talem se taem ol pikinini blong hem oli fesem ol defren problem, hem i lukaot sam poen long ol buk blong Watchtower Society olsem wanem blong winim trabol ya, mo evri dei hem i tokbaot poen ya wetem olgeta kasem we oli winim problem ya fulwan.

Wan mama we i paenia, mo i bisi tumas, we i gat tu pikinini, i makem se dota blong hem i no moa joengud wetem ol narafala mo i no moa glad blong mekem ol tiokratik wok. Ale mama ya i mekem disisen se hem i mas stap long haos taem pikinini ya i kambak long skul long evri aftenun, ale hem i storeyan wetem dota blong hem taem tufala i stap dring ti. Tru long ol gudfala storeyan olsem bitwin wan mama mo dota blong hem, gel ya i kasem help we hem i nidim. Naoia, gel ya i finis long hae skul, mo hem i joenem mama blong hem long wok blong paenia.​—⁠Proveb 20:⁠5.

Gudfala Fren Mo Eksampel

Antap long fasin blong givim taem blong olgeta, ol papa mama oli mas mekem rod blong ol pikinini blong olgeta blong joen wetem ol gudfala fren. Proveb 13:⁠20 i talem se: “Man we i wokbaot wetem ol waesman, bambae hem tu i kam waes. Be man we i kampani wetem ol krangke man, bambae hem i kasem trabol from.”

Ol gudfala papa mo mama oli luksave trutok blong proveb ya. Wan papa we i gat fo pikinini i talem se: “Taem mi tingtingbak long ol samting we oli pas, mi ting se fasin ya we ol pikinini blong mitufala oli joen wetem bigfala grup blong ol fren long trutok, hemia fasin we i givhan blong pusum olgeta blong mekem wok blong Jeova. Mi leftemap tingting blong olgeta blong mekem fren wetem samfala long ol narafala kongregesen mo sam long kongregesen blong mifala, mo blong mekem ol fasin fren olsem oli kam bigfala moa.” Wan Kristin elda we i bin wok plante yia finis long Betel i tingbaot se: “Taem mi mi yangfala, mifala i stap long wan haos we i smol nomo, be oltaem mifala i askem seket elda blong kam stap wetem mifala long haos ya. Antap long samting ya, oltaem ol spesel paenia long kongregesen blong mifala oli kam kakae wetem mifala. Oli swim long haos blong mifala mo oli joen wetem mifala. Ol ekspiryens blong olgeta we mi harem mo glad blong olgeta we mi luk, i givhan long mi blong gat fasin tangkyu long Kristin fultaem minista wok.”

Gudfala fasin fren i halpem olgeta we oli stap fesem ol hadtaem. Wan mama we boe blong hem i kasem hadtaem i tokbaot problem ya wetem wan elda we i stap goraon blong visitim ol kongregesen blong ol Wetnes blong Jeova. Hem i talem long mama ya blong tekem boe blong hem i go wetem hem long wok blong prij. Elda ya i talem se: “Sipos yu mekem olsem, bambae hem i kam moa gud long saed blong speret mo long ol narafala samting we hem i mekem.” Woman ya i talem se: “Long kongregesen blong mifala, mifala i gat plan blong prij long sapa, mo plante pikinini we oli stap skul yet, sam olfala fultaem paenia, mo wan no tu elda i stap joen long wok ya. Fastaem, i had blong pulum boe blong mi blong joen oltaem long wok ya blong prij, be i no longtaem, hem i jenis, mo evri taem hem i kambak long haos wetem fasin glad mo i haremgud from we ol gudfala fren oli leftemap tingting blong hem. Taem hem i stap skul long hae skul, hem i tekem baptaes mo evri manis, hem i mekem wok blong haftaem paenia, mo taem hem i finis long skul, hem i kam wan fultaem paenia.” Ol gudfala fren mo fasin blong mekem wil blong Jeova i karem ol gudfala frut.

Maet i no gat ol yangfala long kongregesen blong yu we gudfala fasin blong olgeta i save gat paoa long pikinini blong yu, be plante yangfala we oli jusum blong mekem wok blong Jeova, oli talem bakegen mo bakegen se eksampel blong papa mo mama blong olgeta i gat bigfala paoa long olgeta. Plante yangfala oli tinghae long papa mama blong olgeta mo oli wantem folem olgeta. Yuri i tingbaot fasin blong mama blong hem blong tekem ol strenja i kam long haos mo olsem wanem hem i soem lav long ol narafala, i telefon long olgeta mo i mekem kakae long ol sikman. Tatsuo, we hem i wan memba blong wan famle we i gat fo boe, we naoia evriwan oli gruap mo oli stap mekem wok blong Jeova, i talem se: “Mama i no save stadi wetem mifala oltaem from we Papa i no wan man blong bilif mo ol famle oli agensem mama bigwan. Be taem mi luk fasin blong hem blong stanap strong long trutok mo glad blong hem blong mekem wok blong Jeova, samting ya i gat paoa long mi bigwan. Hem i rere tu blong wekap bitim 12 klok long naet blong halpem mifala long ol problem blong mifala.” Ol waes tok blong ol papa mama oli gat paoa taem oli joen wetem ol gudfala wok. Yoichiro i tokbaot papa mama blong hem se: “Mi no save tingbaot wan taem we tufala i bin soem ol nogud filing long saed blong ol narafala long kongregesen; mo tufala i no letem mifala ol pikinini i toktok tumas from ol mastik blong ol narafala.”​—⁠Luk 6:​40-42.

Yumi Glad Blong Luk Ol Pikinini Oli Jusum Jeova

I no gat wan rod we i stretgud olgeta blong halpem ol pikinini blong yu blong jusum Jeova. Bambae i gat plante taem we papa mama tufala i wari tumas. Be papa we i wari we yumi tokbaot bifo, i talem se: “Olsem papa mo mama, oltaem mitufala i traem wetem fasin we i fulwan mo i tru, blong folem ol advaes blong ogenaesesen blong Jeova long wol ya. Hemia i bin stap olsem wan bigfala help blong winim ol problem.” Ol traehad blong olgeta oli karem gudfala frut.

Yes, taem yu traem bes blong yu blong folem ol samting we Baebol i talem, mo tijim pikinini blong yu long ol gudfala risen blong laekem Jeova, wetem gudfala eksampel mo trufala fasin traehad blong givhan, bambae yu tu yu save kasem gudfala frut from fasin traehad blong yu. Tingbaot boe ya we yumi tokbaot long stat, we fastaem hem i mekem disisen blong no kam wan Wetnes blong Jeova. Be afta we mama blong hem i givhangud long hem tru long ol yia we hem i fesem ol hadtaem, hem i talem se: “!Mi mi glad we Mama i neva slakem tingting blong hem!” Maet sem gudfala frut i save kamaot long ol pikinini blong yu.​—⁠Galesia 6:⁠9.

[Ol futnot]

[Tok blong pija long pej 30]

?Yu yu save tingtingbak wetem glad long taem ya we yu bin tijim ol pikinini blong yu?