Distrik Asembli “Ol Hapi Man Blong Presem God”—?Bambae Yu Joen Long Hem?

!FASIN GLAD! ?Yumi sapraes blong harem tok ya, olsem se i no stret, long taem ya we i gat fulap trabol? I tru se ol nyuspepa oli no talem fulap samting blong mekem se yumi glad. Faet bitwin ol laen blong man, hanggri long plante defren ples, ol man we oli no gat wok, fasin blong spolem win wora mo graon we i denja tumas, ol trabol long saed blong politik, fasin blong brekem loa​—i klia se ol samting ya oli no mekem se hat blong man i glad

Tede, kolosap ol man oli tekem eni kaen samting blong oli save haremgud long laef. ?Be fasin glad? Oli bin tokbaot glad olsem wan “fasin we man i hapi, mo i glad tumas.” I no gat plante man we oli rili kasem fasin glad, mo taem oli kasem, oltaem hem i blong smol taem nomo.

Be long saed blong taem blong yumi, Baebol i talem se: “Hemia wanem Hae Masta Jeova i talem: ‘!Yu luk! Ol man blong wok blong mi bambae oli glad. !Yu luk! Ol man blong wok blong mi bambae oli singaot bigwan from we oli harem gud long hat blong olgeta.’ ” (Aesea 65:​13, 14, NW) ?Olsem wanem samting ya i save hapen?

Blong faenem ansa, mifala i singaotem yu blong joen long wan long ol distrik asembli blong ol Wetnes blong Jeova, we oli holem long 1995. Stampa tok blong asembli ya, hem i “Ol Hapi Man Blong Presem God,” mo i fri blong man i kam joen. Long program blong asembli ya blong tri dei, bambae i gat ol tok we oli stanap long Baebol, ol pleplei, ol toktok, mo moa samting bakegen. Long stat blong program kasem en blong hem bambae oli tokbaot fasin glad.

Long Yunaeted Stet, ol asembli oli stat long manis Jun, mo bambae oli gohed long ol taon raonabaot long wol go kasem stat blong 1996. Ating, bambae i gat wan asembli kolosap long ples blong yu. ?From wanem yu no askem long ol Wetnes blong Jeova we oli stap long eria blong yu? Mifala i glad tumas blong invaetem yu blong kam joen long asembli ya.