Wan Jif i Tingbaot Fyuja Blong Hem
WAN jif blong Wes Afrika, plante man oli laekem hem mo respektem hem olsem lida blong velej blong hem. Long dei we hem i gat 78 yia blong hem, ol fren blong hem, famle, mo sam narafala man, oli kam hivap long ples blong hem. Long tok we jif i givim long dei ya, hem i jusum blong tokbaot wan samting we i defren lelebet long wan taem olsem. Hem i tokbaot tingting blong hem long saed blong laef afta ded.
Hem i talem se, afta ded, “i gat wan nyufala wol we i no gat gyaman fasin, jelas mo griri fasin long hem.” Hem i tokbaot wol ya olsem wan wol we yumi “no save plante samting long saed blong hem,” be ol man blong mekem stret fasin nomo oli laef long hem, we oli save wok wetem God.
Ol bilif olsem oli stap long tingting blong plante man long Afrika. Folem kastom blong skul blong Afrika, ded i no minim en blong laef, be jes wan jenis, wan laef we i gohed long ples blong ol speret. Oli talem se, taem wan man i ded, hem i lego wol ya we yumi save luk ol samting blong hem, mo hem i go long wan narafala wol we yumi no save luk ol samting blong hem. Olsem wan speret, hem i go long ples we ol bubu blong hem oli stap long hem finis.
Plante man long Wes Afrika, oli bilif se ol bubu blong olgeta, no speret blong ol bubu ya, oli stap lukaotgud long ol famle blong olgeta long wol ya. Buk ya West African Traditional Religion i talem se: “Ol memba blong velej we oli go long narafala wol afta ded, oli gat paoa we i sem mak long olgeta we oli laef yet long wol ya. Taem [ol bubu] oli stap long wol, oli ol olfala blong famle blong olgeta. Naoia we yumi no moa save luk olgeta, oli gohed yet blong stap olsem ol olfala, long wol blong ol speret. Oli neva stop blong soemaot intres long laef blong ol famle blong olgeta.”
From samting ya, olfala jif ya, we yumi tokbaot fastaem, i stap wet blong bambae hem tu i go joenem ol bubu blong hem, mo wok wetem olgeta long speret wol ya. Hem i talem se: “Mi rili bilif strong se i gat wan laef afta ded, mo se bambae mi gohed blong mekem wok olsem jif—afta ded tu.”
Be, from tok we jif i talem biaen, wan nyuspepa Sunday Times, i talem se, “i luk olsem we hem i no rili bilif fulwan” long laef afta ded. Hem i talem long ol man we oli kam wanples blong lesin long toktok blong hem, se hem i harem nyus finis se i gat wan buk we i eksplenem laef afta ded. Jif ya i bin traem blong faenem buk ya blong faef yia finis. Hem i rili wantem blong ridim buk ya, taswe hem i rere blong givim raonabaot 150,000 vatu long eniman we i save karem buk ya i kam long hem.
Jif ya i no nidim blong traehad blong lukaotem buk ya, sipos hem i ridim wan buk we i no hadwok blong faenem. Hem i wan buk we i isi blong kasem. Wan man i no stampa blong hem, be Man ya we i Wokem olgeta man, hem i stampa blong hem. (1 Tesalonaeka 2:13) Buk ya hemia Baebol. ?Hem i talem wanem long saed blong laef afta ded?