?Ol Dedman Oli Save Luk Yumi?

WAN woman i kilim i ded hasban blong hem. Seven yia biaen hem i fraet tumas long wan drim blong hem, from we hem i bilif se drim ya i kamaot long hasban blong hem we i ded mo i kros tumas. Blong kwaetem “speret” blong hem, woman ya i sanem gel blong hem blong i go kafsaedem dring long gref blong hem olsem we i givim wan sakrifaes.

Gel ya i no save wanem blong talem long speret blong papa blong hem, from we mama blong hem we i kilim hem i ded, hem nao i givim samting ya we i olsem wan sakrifaes. Long ples haed, brata blong hem i stap lukluk. Hem i kamaot long ples we i haed long hem, nao hem mo sista blong hem tufala i mekem wan prea i go long papa blong tufala blong i halpem tufala blong givimbak panis from ded blong hem.

Samting ya i kamaot long The Libation Bearers, wan pleplei we wan man Gris i raetem bitim 2,400 yia bifo. Long taem blong yumi, long sam haf blong wol, speseli long Afrika, oli mekem yet ol sakrifaes olsem kolosap long ol gref.

Tingbaot, olsem wan eksampel, ekspiryens blong Ibe, we i stap long Naejeria. From we tri pikinini blong hem i ded finis, hem i go luk wan kleva, we i talem long Ibe se i gat risen from wanem ol pikinini blong hem oli ded​—⁠papa blong Ibe we i ded finis i kros from we oli no folem stret rod blong berem hem.

Folem advaes blong kleva ya, Ibe i mekem sakrifaes long wan nani mo i kafsaedem alkol mo waen long gref blong papa blong hem. Hem i singaotem speret blong papa blong hem, i stap askem blong i fogivim hem, i stap talemaot lav blong hem long hem, mo askem blesing blong hem.

Ibe i trastem se papa blong hem i save luk mo harem hem. Hem i bilif se papa blong hem i laef yet samples, mo se taem hem i ded, hem i “aot” long wol blong yumi i go long wan wol we ol speret man nomo oli stap long hem. Ibe i bilif se papa blong hem i livim wol we i gat mit mo blad long hem i go long wol blong ol speret man, stret ples blong ol olfala blong olgeta.

Ibe i talem olsem: ‘Nating se Papa i no moa stap long wol ya, hem i stap tingbaot mi yet mo hem i intres long laef blong mi. Mo from we naoia hem i wan speret wetem moa paoa, hem i save halpem mi moa bitim taem we hem i stap olsem wan man long wol. Antap moa, hem i save go stret long God from mi, from we God tu i wan speret. Maet papa i kros naoia be sipos mi soem stret respek long hem, hem bambae i fogivim mo blesem mi.’

Bilif ya se ol dedman oli save lukluk ol man long wol mo kontrolem laef blong olgeta, i kam bigwan long ol skul we oli stap longtaem finis long Afrika. Ol man we oli stap talem se oli Kristin tu oli talem samting ya. Eksampel, afta we woman i mared long jyos, kolosap oltaem hem i go long haos blong papa mo mama blong hem blong kasem kastom blesing. Long ples ya, oli askem help long ol olfala blong olgeta we oli ded finis, mo oli kafsaedem dring blong givim olsem wan sakrifaes i go long olgeta. Plante man oli bilif se man we i no mekem olsem, bambae i kasem trabol long mared blong hem.

Oli gat tingting ya se ol olfala we oli ded, no ol speret blong ol olfala, oli save sevem mo givim gudfala laef long ol famle blong olgeta long wol. Folem tingting ya, ol speret blong ol olfala ya oli gat bigfala paoa long laef blong olgeta, oli save givim plante kakae long garen, mekem i gud long ol man, mo blokem ol man blong no kasem trabol. Oli toktok from ol man. Be, sipos man i no wantem luksave olgeta no oli mekem i no stret long olgeta, bambae oli mekem trabol long olgeta olsem​—⁠sik, fasin pua, ded tu. From samting ya, ol man oli yusum ol sakrifaes mo kastom, blong traem blong stap frengud wetem ol dedman.

?Yu yu bilif se ol dedman oli save mekem plante samting i kamaot long laef blong ol man long wol? ?Yu yu bin stanap long gref blong wan famle blong yu mo yu faenem se yu stap talem sam toktok, from se maet hemia we i ded i save harem yu? Tingbaot, ansa blong kwestin ya se dedman i save luk no i save harem yumi no no gat, i dipen long wanem we i hapen long dedman. Yumi traem faenemaot wanem Baebol i talem long saed blong impoten poen ya.