?Ol Dedman Oli Stap Wea?

YORUBA long Wes Afrika i talem se “Wol ya i olsem ples blong maket; heven i hom blong yumi.” Tingting ya i stap long plante skul. I givim tingting se wol ya i olsem ples blong maket we yumi visitim blong smoltaem nomo mo biaen yumi livim. Folem bilif ya, taem yumi ded, yumi go long heven we i trufala hom blong yumi.

Baebol i tijim se i gat sam man we oli go long heven. Jisas Kraes i talem long ol trufala aposol blong hem se: “Long haos blong Papa blong mi, i gat plante rum i stap. . . . Naoia bambae mi go mekem ples i stap rere blong yufala. Mo from we mi go blong mekem ples i rere blong yufala, bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.”​—⁠Jon 14:​2, 3.

Tok ya blong Jisas i no minim se olgeta gudfala man oli go long heven mo se heven i hom blong ol man. Samfala oli go long heven blong joen blong rulum wol. Jeova God i save se ol gavman blong man bambae oli neva save rulumgud wol ya. Taswe, hem i mekem plan blong gat wan gavman long heven, no Kingdom, we bambae i kontrolem wol mo jenisim i kam Paradaes, olsem tingting blong hem fastaem. (Matyu 6:​9, 10) Jisas bambae i King long Kingdom blong God. (Daniel 7:​13, 14) Bambae hem i jusumaot ol narafala man long wol blong rul wetem hem. Baebol i talem se olgeta we oli go long heven bambae ‘oli kam wan kingdom mo ol pris blong God blong yumi’ mo bambae “oli king, oli rul long olgeta man long wol.”​—⁠Revelesen 5:⁠10.

?Hu i Go Long Heven?

Taem yumi tingbaot bigfala responsabiliti we bambae ol rula ya long heven oli gat, i no wan sapraes we bambae oli mas kasem ol hae mak we oli strong blong kasem. Olgeta we oli blong go long heven oli mas gat stret save blong Jeova mo oli mas obei long hem. (Jon 17:⁠3; Rom 6:​17, 18) Oli mas gat bilif long ransom sakrifaes blong Jisas Kraes. (Jon 3:16) Be, oli mas mekem moa. God i mas singaot mo jusum olgeta tru long Pikinini blong hem. (2 Timote 1:​9, 10; 1 Pita 2:⁠9) Antap moa, oli mas kam ol Kristin we oli baptaes we oli “bon bakegen,” tabu speret blong God i makemaot olgeta. (Jon 1:​12, 13; 3:​3-6) Mo tu oli mas stap tru long God gogo oli ded.​—⁠2 Timote 2:​11-13; Revelesen 2:⁠10.

Plante milyan man we oli bin laef mo ded oli no kasem ol mak ya. Plante oli gat smol jans nomo blong lanem ol samting long saed blong trufala God. Sam narafala oli neva ridim Baebol mo oli save smol nomo no oli no save nating long saed blong Jisas Kraes. Ol trufala Kristin we oli stap long wol tede tu, God i bin jusumaot sam nomo blong kasem laef long heven.

Tingbaot, namba blong olgeta ya we oli go long heven bambae i smol nomo. Jisas i tokbaot olgeta ya olsem ‘smol kampani blong sipsip.’ (Luk 12:32) Biaen, aposol Jon i kasem save se olgeta ya we “God i pemaot olgeta oli fri long wol” blong rul wetem Kraes long heven, bambae oli kasem 144,000 nomo. (Revelesen 14:​1, 3; 20:⁠6) Taem yumi skelem wetem plante bilyan man we oli bin laef long wol, namba ya i smol we i smol.

Olgeta Ya We Oli No Go Long Heven

?Olsem wanem long olgeta ya we oli no go long heven? ?Oli stap harem nogud long wan ples blong harem soa blong olwe, olsem we samfala skul i tijim? No gat, from we Jeova i God blong lav. Ol papa mama we oli laekem tumas ol pikinini blong olgeta oli no save sakem olgeta i go long faea, mo Jeova i no save panisim ol man long fasin olsem.​—⁠1 Jon 4:⁠8.

Bighaf blong ol man we oli ded oli save laef bakegen long wol ya we bambae i kam paradaes. Baebol i talem se Jeova i wokem wol “blong man i stap long hem.” (Aesea 45:18) Wan man blong raetem Ol Sam i talemaot se: “Heven i ples blong Hae God nomo, be hem i givim wol ya long man.” (Ol Sam 115:16) Bambae wol ya i hom blong ol man blong olwe, i no heven.

Jisas i talem se: “I gat taem i stap kam we ol dedman we oli stap long beregraon, bambae oli harem voes blong mi [Jisas, “Pikinini blong man”], nao bambae oli aot long beregraon.” (Jon 5:​27-29) Kristin aposol Pol i talemaot se: “Mi putum tingting blong mi long God . . . God bambae i mekem olgeta man oli laef bakegen long ded, ol man we oli stret, wetem ol man we oli no stret.” (Ol Wok 24:15) Taem Jisas i stap hang long pos, hem i promes long wan rabis man we i tanem tingting blong hem se bambae hem i laef bakegen long paradaes long wol.​—⁠Luk 23:⁠43.

?Be, ol dedman we bambae oli laef bakegen long wol oli stap olsem wanem naoia? Wan samting we i kamaot long minista wok blong Jisas i givhan blong ansa long kwestin ya. Fren blong hem Lasros i ded. Bifo we Jisas i go blong mekem hem i laef bakegen, Hem i talem long ol disaepol blong Hem se: “Gudfala fren ya blong yumi Lasros, hem i stap slip. Be bambae mi mi go blong wekemap hem.” (Jon 11:11) Long ples ya Jisas i stap talem se ded i olsem slip, olsem wan dip slip we i no gat ol drim.

Slip Long Ded

Ol narafala vas oli sapotem tingting ya se ded i olsem slip. Oli no tijim se taem ol man oli ded, sol we i no save ded i go long ples blong ol speret man. Be, Baebol i talem se: “Ol dedman . . . oli no save wan samting nating . . . Fasin ya blong olgeta blong laekem wan samting no blong no laekem wan samting, mo fasin jelas oli finis olgeta . . . I no gat wok no plan no save no waes long Seol [gref], ples ya we bambae yu yu go long hem.” (Eklesiastis 9:​5, 6, 10) Antap moa, wan man blong raetem Ol Sam i talemaot se man ‘i gobak long graon; long sem dei ya ol tingting blong hem i finis.’​—⁠Ol Sam 146:⁠4.

Ol vas ya oli mekem i klia se olgeta we oli stap slip long ded oli no save luk no harem yumi. Oli no save givim blesing no givim trabol. Oli no stap long heven, mo oli no stap laef long ples blong ol olfala we oli ded. Oli no gat laef, oli no moa stap.

Long stret taem blong God, olgeta ya we naoia oli slip long ded mo we oli stap long tingting blong hem, bambae oli laef bakegen long paradaes long wol. Wol ya bambae i klin i no moa gat doti long win wora mo graon, ol trabol, mo ol problem we ol man oli stap kasem naoia. !Bambae i wan taem blong bigfala glad! Long Paradaes ya bambae oli gat hop blong laef blong olwe, from we Ol Sam 37:29 i talem long yumi se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”

[Bokis blong pija long pej 6, 7]

MI LEGO WOSIP BLONG OL DEDMAN

“Taem mi wan smol boe, mi givhan long papa blong mi taem hem i mekem sakrifaes oltaem i go long papa blong hem we i ded. Wan taem, papa blong mi i kamgud bakegen long wan nogud sik, nao wan kleva i talem long hem se blong soem fasin tangkyu from we hem i no moa sik, hem i mas givim sakrifaes blong wan nani, ol yam, ol kola nat, mo dring we i gat alkol long hem blong givim long papa blong hem we i ded. Hem i talem long papa blong mi tu blong askem long ol olfala blong hem we oli ded blong blokem ol sik mo trabol we bambae oli save kamaot biaen.

“Mama blong mi i pem ol samting we oli nidim long sakrifaes ya, we bambae oli mekem long gref blong bubu blong mi. Folem lokol kastom, gref ya i stap kolosap nomo long haos blong mifala.

“Oli singaot ol fren, ol famle, mo ol man raonabaot blong kam luk sakrifaes ya. Papa blong mi i werem ol gudfala klos we i stret long taem ya, i sidaon long wan jea we i lukluk i go long gref, long ples ya i gat ol bun blong hed blong nani we oli bin yusum finis blong mekem sakrifaes, oli stap long laen. Wok blong mi i blong kafsaedem waen long botel i go long wan smol kap, ale mi givim long papa blong mi. Nao, hem i kafsaedem i go long graon blong mekem sakrifaes. Papa blong mi i talem nem blong papa blong hem tri taem mo i prea blong askem long hem blong sevem hem long ol trabol long fyuja.

“Hem i givim ol kola nat, mo i kilim wan man sipsip, i boelem, mo olgeta we oli stap long taem ya oli kakae. Mi joen blong kakae mo danis long ol singsing mo ol dram we oli kilim. Papa blong mi i danis gud mo strong tumas nating se hem i olfala. Samtaem hem i spel smol blong prea long ol olfala blong hem blong blesem evriwan we oli stap, nao mi wetem ol man we oli stap, mifala i ansa Ise, we i minim ‘I gud sipos i olsem.’ Mi stap luklukgud papa blong mi wetem bigfala intres mo respek long hem, mo mi wantem tumas we bambae mi kam olfala inaf blong mekem ol sakrifaes i go long ol olfala we oli ded.

“Nating se oli mekem plante sakrifaes, famle i no kasem pis. Mama blong mi i gat tri boe we oli stap laef, be tri gel blong hem oli laef smoltaem nomo; evriwan oli ded taem oli smol yet. Taem mama blong mi i gat bel bakegen, papa blong mi i mekem ol sas sakrifaes blong mekem se taem bebi ya i bon bambae i stapgud.

“Mama blong mi i bonem wan gel bakegen. Tu yia biaen, pikinini ya i sik mo i ded. Papa blong mi i askem advaes long kleva, we i talem long hem se wan enemi i stampa blong ded. Kleva ya i talem se blong ‘sol’ blong pikinini ya i faet agensem samting ya, hem i mas givim wan pis blong wud we faea i laet long hem, wan botel dring we i gat alkol long hem, mo wan pikinini dog olsem sakrifaes. Hem i mas putum wud ya we faea i laet long hem i stap long gref, dring we i gat alkol long hem i mas saksakem olbaot long gref ya, mo i mas berem pikinini dog we i laef yet kolosap long gref. Samting ya i blong wekemap sol blong gel ya we i ded blong hem i givimbak long man ya we i mekem hem i ded.

“Mi karem botel blong dring we i gat alkol long hem mo wud we faea i laet long hem i go long gref, mo papa blong mi i karem smol dog, i berem olsem we kleva i talem long hem. Mifala evriwan i bilif se long seven dei sol blong gel ya we i ded bambae i spolem man ya we i mekem hem i ded. Tu manis i pas, be i no gat wan man raonabaot long mifala we i ded. Mi no moa bilivim.

“Long taem ya mi gat 18 yia. Smoltaem biaen mi mitim ol Wetnes blong Jeova, mo oli soem long mi long Baebol se ol dedman oli no save mekem i gud no mekem i nogud long ol man we oli stap laef. Taem save blong Tok blong God i go dip long hat blong mi, mi talem long papa blong mi se mi no moa save joen wetem hem blong mekem ol sakrifaes i go long ol dedman. Fastaem hem i kros long mi from we hem i talem se mi lego hem. Be taem hem i luksave se mi no wantem stopem nyufala bilif ya we mi faenem, hem i no agensem wosip blong mi long Jeova.

“Long Epril 18, 1948, mi tekem baptaes blong soemaot se mi givim laef blong mi i go long God. Stat long taem ya, mi gohed blong wosip long Jeova wetem bigfala glad mo fasin blong haremgud, mo mi halpem ol narafala blong kamaot long wosip blong ol olfala we oli ded, we oli no save halpem yumi no spolem yumi.”​—⁠Store ya i kam long J. B. Omiegbe, Benin Siti, Naejeria.

[Tok blong pija long pej 6]

Bambae i gat bigfala glad taem ol dedman oli laef bakegen long paradaes long wol