Ol Wetnes Blong Jeova Long Olgeta Ples Long Wol—Polan
KOLOSAP long koltaem long 1989, ol Komunis gavman stat long Baltik i go long Blak Si oli stat foldaon. Taem oli stap brekemdaon Aean Keten,a ol nesen long Is Yurop oli stat blong lukaot prapa rod blong olgeta. Wan long olgeta ya se Polan, kantri ya we i gat ol smol hil, ol flat ples, mo olgeta bigfala hil we oli raf.b
Ol man Polan oli ol man we oli wok strong, mo i gat sam bigfala man blong plei myusek mo sam bigfala sayentis we oli man Polan. Be samting we i bigfala moa se, naoia i gat wan bigfala hif blong ol man long ples ya we namba blong olgeta i stap gru, oli stap talemaot gud nyus blong Kingdom blong God.
No Fraet Blong Tok Agens Long Ol Gyaman Bilif
Long Polan i gat plante man we bambae oli laekem blong lanem trutok blong Baebol. Be ol man raonabaot no ol famle oli blokem sam long olgeta. Eksampel, raonabaot long Wrokłoa, wan woman we i intres i no moa stadi Baebol wetem ol Wetnes blong Jeova taem famle mo ol fren oli mekem i strong long hem. Be, yangfala gel blong hem i ridim ol haf blong Wajtaoa we oli tok agens long fasin blong ol gyaman skul. Ol haf ya oli pulum intres blong hem long trutok.
Afta long sikis manis we hem i stadi long Baebol, yangfala gel ya i wantem blong no moa joen nating wetem gyaman skul. Hem i visitim pris blong jyos blong hem blong talemaot disisen we hem i mekem. Pris i talem long hem blong raetem ol samting ya: “I, K—— P——, lego bilif blong Katolik.”
Long Sande, oli ridim tok ya long jyos. Ae blong bubu man blong gel ya i dak, mo bubu woman blong hem i krae. Be, ol narafala memba blong skul oli sapraes mo oli talem se: “I gud we naoia i gat wan we tingting blong hem i strong inaf blong talem se yumi gat plante gyaman tijing long skul blong yumi.” Naoia, yangfala ya we i no fraet, i baptaes olsem sista long saed blong speret mo i statem seven Baebol stadi long velej blong hem.
‘From Ol Frut Blong Olgeta’
Nyuspepa ya we i kamaot wan taem evri wik, Kujawy i Pomorze, i ripotem se “Bambae Yu Luksave Olgeta From Ol Frut Blong Olgeta.” Haf blong atikol ya i talem se ol man blong wosip long Krisendom “oli no tingting strong long ol tijing blong skul we oli agri long hem finis. Oli defren olgeta long ol Wetnes blong Jeova, ol Wetnes oli mekem wanem we oli talem mo oli talem wanem we i kamaot long Baebol.”
Afta we ripot ya i skelem lukluk blong ol Wetnes wetem olgeta ya we oli talem se oli Kristin, i gohed olsem: “Olgeta ya we oli talem se oli Kristin ating oli no save nating, ol stampa trutok mo ol tijing blong bilif blong olgeta mo plante taem oli no mekem olgeta i wok. . . . Ol Wetnes blong Jeova oli soemaot long ol fasin blong olgeta se ol toktok mo wok blong olgeta oli agri, samting ya i pruvum se oli no ‘ol gyaman profet,’ be, defren nao ol man oli save luksave olgeta from ol frut blong olgeta. ‘Neva ol man oli hivimap ol grep long ol tri we i gat nil long hem mo ol fig long ol gras we i gat nil long hem,’ ?i tru? (Matyu 7:15-20).”
Wan woman i raetem leta i go long nyuspepa ya we i kamaot wan taem evri wik Przyjaciółka, i talemaot se hem i sore from boe blong hem i lego Katolik Jyos mo i kam wan Wetnes blong Jeova. ?Wanem advaes blong man ya we i raetem nyuspepa? “Sipos boe blong yu i joen wetem ol Wetnes blong Jeova, i lanem mo akseptem bilif blong olgeta, hemia i prapa disisen blong hem wan, mo yu mas luksave samting ya mo respektem hem from. . . . Skul ya i gat plante naesfala mo ol nambawan fasin we i gud sipos ol man oli gat, olsem fasin ya we i no kamaot plante tede, hemia fasin blong gat wan tingting mo wok tugeta mo joengud olsem wan grup, fasin blong no gyaman we i bigwan mo oli folemgud ol rul blong laef blong komuniti, mo laswan, oli gat fasin ya blong laef folem trutok blong olgeta, oli rili mekem ol gudgudfala fasin we oli stap tokbaot. Hemia ol samting we oli gud tumas.”
[Ol futnot]
a Tingting blong politik we i seraotem ol kantri blong Yurop mo ol kantri we Rasia i kontrolem bifo.
b Blong save moa, lukluk 1994 Calendar of Jehovah’s Witnesses.
[Bokis blong pija long pej 9]
LUKLUK LONG OL NAMBA BLONG KANTRI YA
1993 Sevis Yia
BIGFALA NAMBA BLONG OLGETA WE OLI STAP PRIJ: 113,551
SKELEM: 1 Wetnes blong 339
NAMBA BLONG OL MAN WE OLI KAM LONG MEMORIOL: 235,642
MEDEL NAMBA BLONG OL PAENIA: 7,961
MEDEL NAMBA BLONG OL BAEBOL STADI: 79,131
NAMBA BLONG OL MAN WE OLI TEKEM BAPTAES: 8,164
NAMBA BLONG OL KONGREGESEN: 1,397
BRANJ OFIS: Nadasin
[Tok blong pija long pej 9]
Branj ofis blong Polan long Lods long 1948
[Tok blong pija long pej 9]
Wok blong wokbaot wetem ol posta long pablik ples, Jun 1948, long Is Prasia bifo
[Tok blong pija long pej 9]
Ol sevente tu memba blong Betel long Polan, Janewari 1993
[Tok blong pija long pej 9]
Nyu branj long Nadasin