Ol Wetnes Blong Jeova Long Olgeta Ples Long Wol—Taelan
NEM ya Taelan i minim “Kantri blong ol friman.” Bitim 57,000,000 man blong kantri ya, we oli gat kaen fasin mo oli stap wok strong, oli holem ol defren tingting long saed blong skul. Nating se Budis i bigfala skul long ples ya, ol skul blong Krisendom tu oli stap long kantri ya blong saot-is Esia. Olgeta man ya oli nidim blong harem gud nyus blong Kingdom blong God.—Matyu 24:14.a
Ol Man We Oli Ronwe Long Kantri Blong Olgeta From Trabol Oli Harem Gud Nyus Ya
Long ol kamp we oli stap olbaot long ol hil blong Taelan kolosap long mak blong graon we i seraotem Taelan mo Mianma, trutok blong Baebol i stap karem frut long medel blong bitim 10,000 man blong Karen we oli ronwe long kantri blong olgeta from trabol. Ol memba blong wan famle blong Karen we oli stap laef long ples ya oli ol Wetnes blong Jeova. Oli stap talemaot gud nyus long ol man ya we oli ronwe long kantri blong olgeta from trabol. ?Olsem wanem wok blong olgeta i stat?
Sam yia bifo wan yangfala man i kamaot long Jyos blong Anglikan mo i kam wan Wetnes blong Jeova. Pasta blong olgeta i pusum ol famle blong hem blong oli agensem hem. Be, hem i stanap strong wetem longfala tingting, mo fasin agens ya blong ol famle blong hem i godaon sloslou. Ol haeman blong Anglikan oli gohed wetem fasin jiki blong olgeta kam kasem tu yia we i jes pas, long taem ya oli sakemaot olgeta long wok blong olgeta from we oli mekem rabis fasin. Nao jyos i no moa gat man blong lukaotem sipsip, taswe stret famle mo ol narafala famle blong man ya we i wan Wetnes oli sek mo oli nidim help. Eleven long olgeta oli finis long jyos mo oli askem ol Wetnes blong stadi Baebol wetem olgeta.
Stadi ya i gohed gud, mo ol narafala man we oli ronwe long kantri blong olgeta from trabol oli stap joen long hem tu. Trutok i goaot kwiktaem, from samting ya i gat 17 nyufala Wetnes we oli baptaes long reva ya we i ron i gotru long kamp blong ol man ya we oli ronwe long kantri blong olgeta from trabol. !I wan gudfala samting tumas blong luk wan bubu woman we i gat 88 yia i baptaes wetem olgeta!
Video i Pulum Intres
I gat gudfala risen blong bilif se namba blong ol man we oli intres long medel blong ol man we oli ronwe long kantri blong olgeta from trabol i save gru bigwan. Long 1993, 57 man oli kam long Memoriol. Long visit blong seket elda long Mei long sem yia ya, i gat 67 oli hivap blong lesin long wan tok blong hem. Mo samting olsem 250 man oli kam wanples blong luk video blong Watchtower Society, Jehovah’s Witnesses—The Organization Behind the Name.
Waef blong wan pasta blong Baptis we i stap long kamp blong ol man we oli ronwe long kantri blong olgeta from trabol, hem i kam long wan pablik tok long saed blong Baebol we ol Wetnes oli mekem mo i raetemdaon ol vas blong Baebol we i kamaot long miting ya. Hem i talem long hasban blong hem se hem i no glad blong harem ol tok we oli stap harem long jyos blong olgeta we oli sem mak evritaem. Hasban blong hem i agensem hem, i talem se sipos hem i stap go long ol miting blong ol Wetnes blong Jeova, olgeta memba blong jyos we oli stap long eria ya tu bambae oli folem hem. Taem hem i go long ol miting bakegen, hasban blong hem i ronem hem wetem naef mo bonem ol buk we hem i tekem not long hem long miting mo ol buk blong hem we oli tokbaot Baebol. Trabol ya i no blokem hem, hem i gobak bakegen long miting taem oli soem video. Biaen woman ya i talem long man blong hem wanem we hem i bin luk. Wetem defren fasin, hasban blong hem i wantem blong luk video ya mo i sore we hem i bin bonem ol not mo ol buk blong waef blong hem we oli tokbaot Baebol.
Long fasin ya nao ol man oli stap harem gud nyus long Taelan. Olsem nao oli stap kasem fasin fri long saed blong speret long “kantri blong ol friman.”—Jon 8:32.
[Futnot]
a Blong kasem moa save, luk long 1994 Calendar of Jehovah’s Witnesses.
[Bokis blong pija long pej 24]
LUKLUK LONG OL NAMBA BLONG KANTRI YA 1993 Sevis Yia
BIGFALA NAMBA BLONG OLGETA WE OLI STAP PRIJ: 1,434
SKELEM: 1 Wetnes blong 40,299
NAMBA BLONG OL MAN WE OLI KAM LONG MEMORIOL: 3,342
MEDEL NAMBA BLONG OL PAENIA: 232
MEDEL NAMBA BLONG OL BAEBOL STADI: 1,489
NAMBA BLONG OL MAN WE OLI TEKEM BAPTAES: 92
NAMBA BLONG OL KONGREGESEN: 39
BRANJ OFIS: BANGKOK
[Tok blong pija long pej 25]
Ol man blong talemaot Kingdom oli wok strong blong talemaot gud nyus ya
[Tok blong pija long pej 25]
Faswan branj ofis, 1947
[Tok blong pija long pej 25]
Famle blong Betel long fored blong nyufala branj ofis long Bangkok, we oli dediketem long Febuwari 8, 1992