Bigfala Trabol Long Saed Blong Ol Refuji—Plante Milian Man Oli Ronwe Long Yukren

Long 24 Februari 2022, ami blong Rasia i atakem Yukren. Trabol ya i putum laef blong plante milian man long denja, ale oli traem blong ronwe kwik long kantri ya.a

“Ol bom oli stap faerap olbaot. Mi mi fraet bitim mak, mi no save olsem wanem blong eksplenem. Taem mifala i harem se i gat ol spesel tren blong tekem ol man oli goaot long kantri, mifala i mekem desisen blong aot. Evri man i save tekem wan smol basket nomo. Mifala i tekem nomo ol impoten pepa, ol meresin, wota, mo smol kakae. Mifala i lego ol narafala samting i stap, mo mifala i go long stesen blong tren. Ol bom oli stap faerap raonabaot long mifala.”—Nataliia, blong Kharkiv, Yukren.

“Go kasem las minit, mifala i ting se bae i no gat wan wo. Mi harem ol bom oli faerap long sam ples long taon, mo ol windo oli seksek. Mi mekem desisen blong ronwe, mo mi tekem samting we mi nidim nomo. Long 8 klok long moning, mi aot long haos, mi tekem tren i go long Lviv, mo biaen wan bas blong go long Polan.”—Nadija, blong Kharkiv, Yukren.

Long atikol ya

• ?Wanem stamba blong bigfala trabol ya?

• ?Weples ol refuji oli save faenem hop?

• ?Baebol i save halpem ol refuji?

?Wanem stamba blong bigfala trabol ya?

Bigfala trabol long saed blong ol refuji i stat from we Rasia i atakem Yukren. Be Baebol i talemaot stamba blong trabol ya long ples ya mo long ol narafala ples tu.

• Ol gavman blong man long fulwol oli no naf blong givim ol samting we ol man oli nidim. Plante taem ol man blong gavman oli yusum paoa blong olgeta blong mekem i strong tumas long ol man.—Prija 4:1; 8:9.

• Devel Setan, “rula blong wol ya,” i gat paoa blong spolem ol man long wol, taswe Baebol i talem se: “Fulwol i stap long paoa blong man ya we i rabis.”—Jon 14:30; 1 Jon 5:19.

• Antap long ol trabol we i stap kasem ol man blong plante handred yia finis, naoia yumi stap laef long wan spesel taem we Baebol i talemaot, se: “Long ol las dei, laef bambae i strong tumas mo bambae i had blong winim ol trabol.” (2 Timoti 3:1) Mo tu, bambae i gat ol wo, ol disasta, kakae i sot, ol strong sik, hemia ol samting we i mekem ol man oli ronwe long ples blong olgeta.—Luk 21:10, 11.

?Weples ol refuji oli save faenem hop?

Baebol i talem se Jehovab God we i Krieta blong yumi, i gat lav mo sore long ol refuji mo ol narafala we oli mas ronwe long haos blong olgeta. (Dutronome 10:18) Hem i promes blong stretem olgeta trabol blong ol refuji, taem gavman blong hem long heven, hemia Kingdom blong God, bambae i tekem ples blong ol gavman blong man. (Daniel 2:44; Matiu 6:10) Jehova bambae i yusum Kingdom blong hem blong finisim Devel Setan. (Rom 16:20) Kingdom ya bambae i rulum fulwol, mo bambae i finisim ol boda we i seraotem ol kantri. Olgeta man long wol bambae oli joen olsem wan famle nomo. Bambae i no moa gat wan man we i mas ronwe long ples blong hem, from we Baebol i promes se: “Bambae olgeta wanwan oli sidaon aninit long figtri mo rop blong grep blong olgeta, mo bambae i no gat man i save mekem olgeta oli fraet, from we maot blong Jehova komanda blong ol ami i talem olsem.”—Maeka 4:4.

Kingdom blong God nomo i save stretem ol trabol ya long saed blong ol refuji. Jehova bambae i yusum Kingdom blong hem blong tekemaot ol trabol we i fosem ol man blong ronwe long ples blong olgeta. Tingbaot sam eksampol:

• Ol wo. “[Jehova] i stap finisim ol wo.” (Ol Sam 46:9) Blong faenemaot olsem wanem God bambae i finisim ol faet, ridim atikol ya: “Pis Long Wol—?Olsem Wanem Bambae i Kamtru?”

• Mekem i strong tumas long narafala mo raf fasin. “Bambae [Jehova] i tekemaot olgeta long han blong ol man we oli mekem i strong tumas long olgeta, mo long raf fasin.” (Ol Sam 72:14) Blong kasem save olsem wanem ol man oli save jenisim ol nogud fasin we oli gat longtaem finis, ridim Wajtaoa ya “Winim Fasin Blong No Laekem Narafala.”

• Fasin pua. “Bambae [Jehova] i sevem ol puaman we oli stap krae from help.” (Ol Sam 72:12) Blong luk olsem wanem God bambae i finisim ol trabol we i stamba blong fasin pua, ridim atikol ya “?Bambae i No Moa Gat Problem Blong Ekonomi Samtaem?”

• Kakae i sot. “Bambae i gat fulap garen blong sid long olgeta ples long wol.” (Ol Sam 72:16) Blong faenemaot olsem wanem God bambae i meksua se man i no moa hanggri, ridim atikol ya long Inglis mo Franis “A World Without Hunger?”

?Baebol i save halpem ol refuji?

Yes. Baebol i givim wan hop blong fiuja long ol refuji we oli save trastem, mo antap long hemia, hem i save halpem olgeta blong winim ol trabol we oli fesem naoia.

Rul blong Baebol: “Yufala i no mas wari tumas from eni samting, be yufala i mas askem olgeta samting we yufala i wantem long God. Yufala i mas prea long hem, yufala i mas krae i go long hem, mo yufala i mas talem tangkiu long hem, nao tru long Kraes Jisas, pis ya blong God we i bigwan tumas i bitim olgeta save blong yumi, bambae i lukaot gud long hat mo tingting blong yufala.”—Filipae 4:6, 7.

Mining: Nomata wanem situesen yu stap long hem, askem long God blong i putum pis long tingting mo hat blong yu. Yu luk atikol ya “Filipae 4:6, 7—‘Yufala i No Mas Wari Tumas From Eni Samting.’”