!Welkam Long Distrik Asembli Ya “Fraetgud Long God”!

YES, taem blong 1994 distrik asembli blong ol Wetnes blong Jeova i stap kam kolosap. Stat long Jun 1994 kasem Janewari 1995, fulap man bambae oli harem program blong tri dei asembli ya long plante handred taon long wol​—⁠fastaem long Not Amerika, afta long Is mo Wes Yurop, Esia, Sentrol mo Saot Amerika, Afrika, Ostrelya, mo ol aelan blong solwora.

!“Fraetgud Long God”​—⁠wan stampa tok we i pulum tingting! Fraet ya i no wan nogud fraet we man i kasem taem laef blong hem i stap long denja, be hem i fasin fraet long God, wan fraet we i givim glad mo pis long tingting. Baebol i talem long buk blong proveb se: “Man we tingting blong hem i stap daon mo i fraetgud long Jeova, bambae hem i kasem frut. Bambae hem i kam rij, bambae hem i kasem haenem mo laef.” (Proveb 22:⁠4) ?Olsem wanem fasin blong fraetgud long God i save mekem man i ‘rij, i kasem haenem mo laef’? Bambae ansa i kam klia taem oli eksplenem stampa tok ya long tri dei asembli we bambae i fulap long ol tok, ol storeyan, ol pleplei, mo wan drama.

Aposol Pol i raetem se yumi no mas ‘lego ol miting blong yumi.’ (Hibrus 10:25) Ol Wetnes blong Jeova oli tinghevi long fasin ya, oli joen wanples tri taem long wan wik blong mekem wosip mo stadi long kongregesen. Be, distrik asembli we i kam wan taem long wan yia, hem i spesel. Oli tingrere long taem ya wetem glad mo sam manis biaen, oli stap tokbaot asembli yet. Nating se yu blong wanem skul, mifala i glad blong singaot yu blong kam joenem olgeta long asembli blong olgeta, mo blong haremgud long gudfala Kristin fasin joengud mo ol impoten save long saed blong speret. Wan memba blong kongregesen blong ol Wetnes blong Jeova long ples blong yu bambae i glad blong talem long yu wetaem mo weples bambae oli mekem asembli ya long hem.