!Kam Long “Fraetgud Long God” Distrik Asembli!
?Yu yu mekem plan finis blong kam long 1994 “Fraetgud Long God” Distrik Asembli blong ol Wetnes blong Jeova? !Tru ya, bambae i givhan long yu bigwan sipos yu stap long trifala dei ya! Wetem moa long 165 asembli we oli plan blong mekem long Yunaeted Stet nomo, ating bambae i gat wan asembli olsem i kamaot long wan ples kolosap long yu.
I gat wan kaen fasin fraet we i save spolem strong tingting mo hop, be stampa tok long program blong Fraede moning bambae i eksplenem fasin ya blong fraetgud long God mo i tokbaot ol blesing we oli save kamaot from fasin ya. Tru ya, fulwan program blong asembli ya bambae i soemaot ol blesing ya.
Long Fraede aftenun, bambae yu harem olsem wanem fasin fraetgud long God i save mekem wan mared mo famle laef i kam strong moa, mo tu olsem wanem fasin ya i save halpem ol yangfala blong holemstrong long fasin blong olgeta blong fasgud long God. Program blong aftenun bambae i finis wetem tok ya we i tajem hat se “Leftemap Tingting Blong Olgeta We Oli Harem Nogud From Wan Fren No Famle i Ded.” Bambae yu haremgud tumas long ol gudgudfala save long tok ya, we i rili wokgud blong halpem olgeta we wan fren no famle blong olgeta i ded.
Program blong Sarede bambae i soem olsem wanem fasin fraetgud long God i save mekem yumi kam strong moa blong letem Jeova i lidim yumi, long kongregesen mo long wok blong prij. Long tok ya “Ridim Tabu Baebol, We i Tok Blong God, Evri Dei,” ol man we oli lesin oli save kasem ol gudgudfala advaes blong givhan long olgeta blong ridim mo stadi Baebol. Program blong Sarede bambae i finis wetem tok ya we i pulum intres we stampa blong hem se “Bigfala Dei Blong Jeova We i Mekem Man i Fraet i Kolosap.”
Wan haf blong program blong Sande, hemia tok ya se “Bambae Ol Stret Man Oli Laef Bakegen Long Ded.” Tok ya we i kam biaen, “Laef Tru Long Bigfala Trabol,” bambae i eksplenem nambawan promes blong Jisas long saed blong olgeta we bambae oli no save ded samtaem.—Jon 11:26.
Program blong Sande moning bambae i finis wetem wan drama blong 40 menet, nem blong hem se Ol Disisen We Yu Yu Fesem. Bambae drama ya i pulum tingting blong ol man we oli lesin blong gobak long taem blong Josua mo blong luk strong tingting blong hem blong mekem wok blong Jeova. Bambae oli luk tu tes ya wetem faea long taem blong Elaeja, mo bambae oli lanem sam lesen long tufala taem ya, we bambae oli givhan long olgeta we oli stap long asembli ya blong soemaot fasin fraetgud long God tede. Long aftenun, pablik tok ya, “From Wanem Yumi Mas Fraetgud Long Trufala God Naoia,” bambae i wan bigfala tok blong asembli ya.
Mekem plan naoia blong kam long asembli ya. Blong faenem ples blong asembli we i kolosap moa long ples blong yu, go long Haos Kingdom blong ol Wetnes blong Jeova long ples blong yu no raet long ol man we oli prentem magasin ya.
[Foto Credit Line blong pija long pej 32]
T. Rosenthal/SUPERSTOCK