Mekem Hat Blong Yu i Laekem Fasin Luksave
“Jeova hem wan i givim waes. Save mo fasin luksave, oli kamaot long maot blong hem.”—PROVEB 2:6.
1. ?Olsem wanem yumi save mekem hat blong yumi i laekem fasin luksave?
JEOVA hem i Bigfala Tija blong yumi. (Aesea 30:20, 21) Be ?yumi mas mekem wanem blong kasem blesing from “save blong God” we i stap long Tok blong hem? Fastaem, yumi mas ‘mekem hat blong yumi i laekem fasin luksave’—minim se yumi wantem tumas, long hat blong yumi, blong kasem mo blong soemaot fasin luksave. Blong mekem olsem, yumi mas lukluk i go long God, from we waes man ya i talem se: “Jeova hem wan i givim waes. Save mo fasin luksave, oli kamaot long maot blong hem.” (Proveb 2:1-6) ?Wanem ya save, waes, mo fasin luksave?
2. (a) ?Wanem ya save? (b) ?Olsem wanem bambae yu eksplenem fasin waes? (c) ?Wanem ya fasin luksave?
2 Save, hemia ol trufala samting we man i lanem from ol samting we oli hapen long laef blong hem, ol samting we hem i luk, mo from ol stadi we hem i mekem. Waes, hemia fasin blong yusum ol save ya we hem i kasem, mo mekem i wok long laef blong hem. (Matyu 11:19) King Solomon i soemaot waes taem tu woman oli rao from wan pikinini. Blong stretem rao ya, hem i yusum save we hem i gat long saed blong fasin blong ol mama blong laekem tumas prapa pikinini blong olgeta. (1 King 3:16-28) Fasin luksave, hem i “fasin blong jajem wan bisnes we i no klia gud.” Hem i “paoa no wok we tingting i mekem blong makemaot wan samting se i defren long wan narafala samting.” (Webster’s Universal Dictionary) Sipos yumi mekem hat blong yumi i laekem fasin luksave, bambae Jeova i givim fasin ya long yumi tru long Pikinini blong hem. (2 Timote 2:1, 7) Be ?olsem wanem fasin luksave i gat paoa long ol defren haf blong laef blong yumi?
Fasin Luksave Mo Ol Toktok Blong Yumi
3. ?Olsem wanem bambae yu eksplenem Proveb 11:12, 13, mo i minim wanem se ‘hat blong man i wantem tumas wan samting’?
3 Fasin luksave i halpem yumi blong save se i gat “wan taem blong stap kwaet mo wan taem blong toktok.” (Eklesiastis 3:7) Gudfala fasin ya i mekem tu se, yumi lukaotgud long ol samting we yumi talem. Proveb 11:12, 13 i talem se: “Man we hat blong hem i wantem tumas wan samting, hem i daonem narafala man, be man we i gat bigfala fasin luksave hem i no toktok plante. Man we i go olbaot blong spolem nem blong narafala man, hem i stap talemaot ol tok we i blong stap haed nomo. Be man we speret blong hem i stap tru long fren blong hem, hem i kavremap bisnes ya.” Yes, wan man no woman we i daonem wan narafala man, i olsem we “hat blong hem i wantem tumas wan samting.” Wilhelm Gesenius, wan man blong raetem diksonari, hem i talem se man olsem i “no gat hed.” Hem i no naf blong jajem samting, mo tok ya “hat” i soemaot tu se man ya i sot long plante gudfala fasin long hat blong hem. Sipos wan man we i talem se hem i Kristin, hem i gogohed blong toktok tumas long saed blong narafala, kasem mak ya we hem i spolem gudnem blong narafala ya no i stap tok nogud long man ya, ol elda oli mas tekem aksin blong blokem nogud fasin ya insaed long kongregesen.—Levitikas 19:16; Ol Sam 101:5; 1 Korin 5:11.
4. ?Ol Kristin we oli strong long bilif mo we oli gat fasin luksave, bambae oli mekem wanem long saed blong ol bisnes we i tabu blong talemaot olbaot?
4 Ol man we oli gat “bigfala fasin luksave,” oli defren olgeta long ol man ya we ‘hat blong olgeta i wantem tumas wan samting.’ Oli no toktok taem oli luk se i no stret blong toktok. Oli no gyaman long wan man we i trastem olgeta. (Proveb 20:19) Man we i gat fasin luksave, hem i save se sipos hem i no lukaotgud long toktok blong hem, bambae hem i mekem narafala i soa. Taswe, i olsem we “speret blong hem i stap tru” oltaem. Hem i stap tru long ol narafala man blong bilif, mo hem i no tokbaot ol bisnes blong narafala man we i tabu blong tokbaot, from we hem i no wantem mekem se brata no sista ya blong hem i kasem trabol from. Sipos wan Kristin i gat fasin luksave, taem hem i kasem enikaen nyus long saed blong kongregesen, we i no stret taem yet blong talemaot, bambae hem i no tokbaot nyus ya gogo kasem taem we ogenaesesen blong Jeova i luk se i stret blong talemaot tru long prapa rod blong hem.
Fasin Luksave Mo Ol Fasin Blong Yumi
5. ?Wanem tingting blong ol ‘krangke man’ long saed blong rabis fasin, mo from wanem?
5 Ol proveb blong Baebol oli halpem yumi blong yusumgud fasin luksave mo blong stap longwe long ol fasin we oli no stret. Eksampel, Proveb 10:23 i talem se: “Long tingting blong wan man we i krangke, rabis fasin i olsem wan pleplei nomo. Be man we i gat fasin luksave hem i waes.” Olgeta ya we oli ting se rabis fasin i “olsem wan pleplei nomo,” ae blong olgeta i sat mo oli no save luk se oli folem rod we i nogud. Mo tu, oli no tingbaot se olgeta man oli mas talemaot long fes blong God ol fasin we oli stap mekem. (Rom 14:12) Ol ‘krangke man’ olsem, oli no moa gat stret tingting, gogo oli kasem mak we oli ting se God i no stap luk ol rong blong olgeta. Long ol fasin blong olgeta, i olsem we oli stap talem se: “I no gat Jeova.” (Ol Sam 14:1-3, NW; Aesea 29:15, 16) From we ol rul blong God oli no stap lidim olgeta ya, oli no gat fasin luksave mo oli no naf blong jajem wan bisnes long stret fasin.—Proveb 28:5.
6. ?From wanem rabis fasin i krangke, mo sipos yumi gat fasin luksave, bambae yumi tingting olsem wanem long saed blong rabis fasin?
6 “Man we i gat fasin luksave” hem i save se rabis fasin i no olsem wan “pleplei,” no wan samting blong haremgud long hem. Hem i save se fasin ya bambae i mekem God i harem nogud mo i save spolem fasin fren blong hem wetem God. Olkaen fasin olsemia oli krangke from we oli mekem man i no moa gat respek long hem wan bakegen, oli spolem mared, oli mekem trabol long tingting mo bodi, mo oli mekem man i foldaon long saed blong speret. Taswe, i gud yumi mekem hat blong yumi i laekem fasin luksave, mo i stap longwe long olkaen rabis fasin, mo ol nogud fasin long saed blong seks.—Proveb 5:1-23.
Fasin Luksave Mo Tingting We i Pusum Yumi
7. ?Fasin kros i save mekem wanem long bodi blong man?
7 Taem yumi mekem hat blong yumi i laekem fasin luksave, samting ya i halpem yumi blong bos long tingting blong yumi tu. Proveb 14:29 i talem se: “Man we i slou blong kam kros, hem i fulap long fasin blong luksave. Be man we i no gat longfala tingting, hem i leftemap krangke fasin.” Wan risen from wanem man we i gat fasin luksave i stap traehad blong no faerap long kros, hemia from we fasin ya i save mekem trabol long bodi blong hem. Fasin ya i save mekem blad presa i go antap, mo tu, trabol ya we i hadwok blong pulum win. Ol dokta oli talem se fasin blong kros bigwan mo faerap long kros, i save givim ol sik olsem sotwin, skras, bel i no wokgud, ol soa insaed long bel, mo i save mekem ol sik ya oli kam bigwan moa tu.
8. ?Fasin blong no gat longfala tingting i save lidim man blong mekem wanem, be olsem wanem fasin luksave bambae i halpem yumi long saed ya?
8 Be, risen from wanem yumi yusum fasin luksave mo yumi “no kros kwik,” i no jes from we yumi no wantem kasem trabol long bodi blong yumi. No gat. Taem wan man i no gat longfala tingting, samting ya i save lidim hem blong mekem sam fasin we biaen bambae hem i sore from. Fasin luksave i mekem yumi tingbaot wanem i save kamaot biaen, sipos yumi no lukaotgud long ol toktok mo fasin blong yumi. Long rod ya, fasin luksave i blokem yumi blong “leftemap krangke fasin,” from we i blokem yumi blong mekem samting we i no waes. Antap moa, fasin luksave i halpem yumi blong luk se fasin blong kros bigwan i save mekem se yumi no moa save tingtinggud. From samting ya, yumi no save jajem wan bisnes long waes fasin. Samting ya bambae i mekem se, i hadwok long yumi blong mekem wok blong God mo blong mekem laef blong yumi i laenap wetem ol stret rul blong God. Yes, fasin blong no blokem bigfala kros i save spolem yumi long saed blong speret. Fasin blong “stap kros” hem i “fasin blong ol man we oli stap mekem ol rabis samting we tingting blong olgeta i wantem.” Fasin ya bambae i blokem yumi blong kasem Kingdom blong God. (Galesia 5:19-21) Taswe, yumi mas ol Kristin we oli gat fasin luksave, olsem nao, yumi ‘rere oltaem blong lesin, yumi no hareap blong tok, mo no hareap blong kros.’—Jemes 1:19.
9. ?Olsem wanem fasin luksave mo lav long ol brata bambae i halpem yumi blong stretem problem we i kamaot bitwin yumi mo narafala?
9 Sipos yumi kam kros, maet fasin luksave i pusum yumi blong stap kwaet, mekem se i no gat wan bigfala rao i kamaot. Proveb 17:27 i talem se: “Man we i blokem ol tok blong hem, hem i gat save, mo man we i gat fasin luksave, speret blong hem i kwaet.” Fasin luksave mo lav blong ol brata bambae i halpem yumi blong luk se yumi nidim blong blokem tok we yumi wantem talemaot we i save mekem narafala i soa. Sipos yumi faerap long kros finis, lav mo tingting daon bambae oli pusum yumi blong talem sore mo blong traem stretem bisnes ya. Be ?olsem wanem sipos narafala i mekem yumi kros? Ale, i gud yumi toktok wetem hem, hem wan, long fasin we i kaen mo we yumi no mekem flas, mo wetem tingting ya we yumi wantem mekem pis.—Matyu 5:23, 24; 18:15-17.
Fasin Luksave Mo Famle Blong Yumi
10. ?Olsem wanem waes mo fasin luksave oli save givhan insaed long famle?
10 Ol memba blong famle oli nidim blong soem waes mo fasin luksave, from we ol fasin ya bambae oli mekem famle i joengud moa. Proveb 24:3, 4 i talem se: “From fasin waes, wan famle i save kam strong moa, mo from fasin luksave hem i save stanap strong. Mo from save, ol rum insaed long haos bambae oli fulap long ol sas mo gudfala samting we oli gat bigfala praes.” Fasin waes mo fasin luksave oli olsem ol gudfala brikis blong bildim wan famle we i stanap strong. Fasin luksave bambae i halpem ol Kristin papa mama blong pulum ol pikinini blong olgeta blong talemaot ol filing mo wari blong olgeta. Wan man no woman we i gat fasin luksave hem i toktok oltaem wetem hasban no waef blong hem, mo hem i lesin mo kasem save long ol filing mo tingting blong hasban no waef blong hem.—Proveb 20:5.
11. ?Olsem wanem wan waef we i gat fasin luksave bambae i ‘bildimap famle blong hem’?
11 I klia se, fasin waes mo fasin luksave oli impoten tumas blong mekem famle i hapi. Eksampel, Proveb 14:1 i talem se: “Woman we i waes i stap bildimap famle blong hem. Be wan krangke woman hem i stap brebrekem daon famle blong hem wetem han blong hem nomo.” Sipos waef we i gat waes mo fasin luksave i stap onagud long hasban blong hem, bambae hem i wokhad blong mekem i gud long famle blong hem. Long rod ya, bambae hem i givhan blong bildimap famle blong hem. Wan samting we i save ‘bildimap famle blong hem’ hemia se, oltaem hem i toktokgud long saed blong hasban blong hem. Samting ya bambae i mekem se ol narafala man tu oli gat moa respek long hasban blong hem. Mo tu, sipos wan waef i save mekem plante samting, i gat fasin luksave, mo i ona mo fraetgud long Jeova, ol narafala bambae oli presem hem.—Proveb 12:4; 31:28, 30.
Fasin Luksave Mo Rod We Yumi Folem Long Laef
12. ?Olgeta ya we ‘hat blong olgeta i wantem tumas wan samting,’ oli gat wanem tingting long saed blong krangke fasin, mo from wanem?
12 Fasin luksave i halpem yumi blong folem wan rod we i stret long olgeta samting we yumi mekem. Proveb 15:21 i soemaot samting ya, i talem se: “Wan man we hat blong hem i wantem tumas wan samting, hem i glad blong mekem ol krangke fasin. Be, man we i gat fasin luksave hem i wokbaot i go stret nomo.” ?Wanem mining blong proveb ya? Wan rod we i krangke, no i olbaot, i mekem ol man, ol woman, mo ol yangfala, we oli no gat tingting, oli glad. Olgeta ya, ‘hat blong olgeta i wantem tumas wan samting,’ oli no gat wan gudfala tingting we i stap pusum olgeta blong wok, mo oli no waes nating mekem se oli glad long ol krangke fasin.
13. ?Solomon i luksave wanem samting long saed blong fasin blong laf oltaem mo no tinghevi long wan samting?
13 King Solomon blong Isrel we i gat fasin luksave i faenemaot se fasin blong no tinghevi long wan samting i no givim mining long laef blong man. Hem i talem stret se: “Mi talem, yes mi wan mi talem long hat blong mi se: ‘Yu kam, bambae mi traem yu wetem bigfala glad. Mo tu, lukluk ol gudfala samting.’ Mo, !luk! samting ya tu i blong nating nomo. Mi talem long fasin blong laf se: ‘!Krangke!’ mo long bigfala glad se: ‘?Yu stap mekem wanem?’ ” (Eklesiastis 2:1, 2) From we Solomon i gat fasin luksave, hem i luk se bigfala glad mo fasin blong laf, olgeta nomo oli no save mekem man i haremgud, from we oli no givim glad we i tru mo we i stap longtaem. Fasin blong laf i save halpem yumi blong fogetem ol problem blong yumi blong smoltaem, be biaen, maet ol problem ya oli kam bigwan moa i bitim fastaem. I stret nomo we Solomon i tokbaot fasin blong laf olsem we i “krangke.” ?From wanem? From we fasin blong laf krangke i mekem se man i no save lukluk klia wan bisnes mo skelem hem long waes fasin. Maet fasin ya i mekem se man i no tinghevi long sam bisnes we oli impoten tumas. Bigfala glad we i joen wetem ol tok mo fasin blong wan man we i mekem mangke blong narafala i laf long hem, yumi no save talem se hem i karem wan gudfala samting i kam long laef blong man ya. Sipos yumi luksave mining blong samting we Solomon i faenemaot long saed blong fasin blong laf mo glad, samting ya bambae i halpem yumi blong no kam wan man we i ‘laekem tumas ol pleplei i winim we hem i laekem God.’—2 Timote 3:1, 4.
14. ?Olsem wanem wan man we i gat fasin luksave i wokbaot i go “stret nomo”?
14 ?Olsem wanem wan man we i gat fasin luksave i wokbaot i go “stret nomo”? Fasin luksave long saed blong speret mo fasin blong folem ol rul blong God, i save lidim man blong folem stret rod. Baebol blong Byington i talem klia se: “Krangke fasin i gud tumas long tingting blong wan man we i no gat bren, be wan man we i gat hed bambae i wokbaot stret.” “Man we i gat fasin luksave” i jusum rod we i stret blong wokbaot long hem, mo hem i naf blong makemaot wanem i stret mo wanem i no stret, from we hem i folem Tok blong God long laef blong hem.—Hibrus 5:14; 12:12, 13.
Lukluk Oltaem i Go Long Jeova Blong Gat Fasin Luksave
15. ?Yumi lanem wanem samting long tok blong Proveb 2:6-9?
15 Blong folem wan rod blong laef we i stretgud, yumi evriwan i nidim blong rimemba se yumi sinman, mo se yumi mas lukluk i go long Jeova blong kasem fasin luksave long saed blong speret. Proveb 2:6-9 i talem se: “Jeova hem wan i givim waes. Save mo fasin luksave, oli kamaot long maot blong hem. Bambae hem i holemtaet waes we i wokgud blong givim long ol stret man. Hem i olsem wan sil we i haedem ol man we oli wokbaot long stret fasin, from we hem i save jajemgud ol samting. Bambae hem i lukaotgud long rod we ol man blong stap tru long hem, oli folem. From samting ya, bambae yu yu kasem save long stret fasin, fasin blong skelemgud ol samting, mo gudfala fasin, yes, fulwan rod blong ol samting we oli gud.”—Skelem wetem Jemes 4:6.
16. ?From wanem i no gat waes, fasin luksave, no advaes we i agensem Jeova?
16 Taem yumi agri se yumi dipen long Jeova nomo, yumi mas gat tingting daon mo stadi dip long Tok blong hem, blong traem luksave wanem samting we hem i wantem. Hem i gat waes we yumi save talem se i fulwan, mo ol advaes blong hem oli gud long yumi oltaem. (Aesea 40:13; Rom 11:34) Yes, eni advaes we i stanap agensem tok blong Hem, i olsem nating nomo. Proveb 21:30 i talem se: “I no gat fasin waes, fasin luksave, no enikaen advaes we i save agensem Jeova.” (Skelem wetem Proveb 19:21.) Fasin luksave long saed blong speret nomo, we yumi kasem tru long stadi blong Tok blong God wetem ol buk blong “slef we i stret mo waes,” bambae oli halpem yumi blong folem wan rod we i stret long laef. (Matyu 24:45-47) Taswe, i gud yumi folem rod blong laef we i laenap wetem ol advaes blong Jeova, from we yumi save se, nating sipos i luk olsem we ol narafala advaes i gud, be i no save wokgud olsem ol advaes long Tok blong God.
17. ?Wanem samting i save kamaot sipos wan man i givim advaes we i no stret?
17 Ol Kristin we oli gat fasin luksave oli save se taem oli givim advaes long narafala, ol advaes ya oli mas stanap strong long Tok blong God. Oli save tu se oli mas stadi long Baebol mo tingting dip long hem bifo we oli ansarem wan kwestin. (Proveb 15:28) Sipos wan man i givim ansa we i no stret long sam impoten kwestin, bigfala trabol i save kamaot from. Taswe, ol Kristin elda oli nidim fasin luksave long saed blong speret, mo oli mas prea long Jeova blong lidim olgeta taem oli traehad blong givhan long ol narafala man blong bilif, long saed blong speret.
Fulap Long Fasin Luksave Long Saed Blong Speret
18. ?Sipos wan problem i kamaot insaed long kongregesen, olsem wanem fasin luksave bambae i halpem yumi blong holemtaet stret tingting long saed blong speret?
18 Blong mekem Jeova i glad, yumi nidim ‘fasin luksave long olgeta samting.’ (2 Timote 2:7) Dip stadi blong Baebol mo fasin blong letem speret blong God mo ogenaesesen blong hem i lidim yumi, bambae oli halpem yumi blong luksave wanem samting blong mekem, taem yumi fesem sam samting long laef we oli save lidim yumi i go long rong rod. Eksampel, sipos insaed long kongregesen, oli no folem rod we i stret long tingting blong yumi long saed blong wan bisnes. Fasin luksave long saed blong speret bambae i halpem yumi blong tingbaot se, hemia i no wan stret risen blong no moa joen wetem ol man blong Jeova, mo blong no moa mekem wok blong God. Tingbaot nambawan jans we yumi gat blong mekem wok blong Jeova, fasin blong haremgud we yumi gat from we yumi fri long saed blong speret, mo glad we yumi gat from wok blong yumi olsem ol man blong talemaot Kingdom. Fasin luksave long saed blong speret i givhan long yumi blong gat stret tingting, mo blong luksave se yumi givim laef blong yumi long God mo yumi mas tinghae long fasin fren blong yumi wetem hem, nomata wanem samting ol narafala oli mekem. Sipos i no gat wan samting we yumi save mekem folem tiokratik rod blong winim wan problem, yumi mas wet long Jeova nomo wetem longfala tingting, blong hem i stretem problem ya. Yumi no mas lego trutok no letem tingting blong yumi i foldaon, be yumi mas ‘wet long God.’—Ol Sam 42:5, 11.
19. (a) ?Wanem mining blong prea we Pol i mekem long saed blong ol man Filipae? (b) ?Olsem wanem fasin luksave bambae i halpem yumi sipos yumi no kasem save fulwan long wan samting?
19 Fasin luksave long saed blong speret i givhan long yumi blong stap tru long God mo ol man blong hem. Pol i talem long ol Kristin long Filipae se: “Mi mi stap prea we oltaem bambae yufala i save kam we yufala i stap laeklaekem yufala moa. Mo mi prea we long fasin ya, oltaem bambae yufala i save kasem moa stret save, mo gat fasin luksave fulwan. Nao bambae yufala i save jusumaot wanem samting i impoten moa. Nao long fasin ya, go kasem dei blong Kraes, bambae laef blong yufala i klin gud, i no gat man nating i gat poen long yufala.” (Filipae 1:9, 10, NW) Blong tingtinggud long wan samting, yumi nidim ‘stret save mo fasin luksave fulwan.’ Grik tok we oli tanem i kam “fasin luksave” long ples ya, i minim “save kwiktaem wanem fasin i stret mo wanem fasin i no stret.” Taem yumi kasem sam nyufala save, yumi mas luksave olsem wanem save ya i joen wetem God mo Kraes, mo tingting dip long poen ya se, olsem wanem save ya i soemaot fasin blong Jeova mo ol samting we hem i givim long yumi. Long rod ya, bambae yumi kasem moa fasin luksave mo tangkyu long ol samting we Jeova God mo Jisas Kraes tufala i mekem long yumi. Sipos yumi no kasem save fulwan long wan samting, fasin luksave bambae i halpem yumi blong luk se yumi no mas lego bilif blong yumi long ol impoten samting we yumi lanem finis long saed blong God, Kraes, mo stampa tingting blong God.
20. ?Olsem wanem yumi save kam fulap long fasin luksave long saed blong speret?
20 Bambae yumi gat fulap fasin luksave long saed blong speret, sipos oltaem yumi mekem ol tingting mo fasin blong yumi oli laenap wetem Tok blong God. (2 Korin 13:5) Sipos yumi mekem olsemia wetem gudfala tingting, samting ya bambae i halpem yumi blong gat tingting daon, i bitim we yumi flas mo yumi daonem ol narafala. Fasin luksave bambae i halpem yumi blong haremgud long fasin stretem, mo bambae hem i givhan long yumi blong jusumaot ol samting we oli impoten moa. (Proveb 3:7) Ale, wetem strong tingting blong mekem Jeova i glad, yumi mas traehad blong kam fulap wetem stret save long Tok blong hem. Samting ya bambae i mekem se yumi naf blong luksave samting we i stret mo samting we i no stret, jusumaot wanem samting i rili impoten, mo holemtaet fasin fren blong yumi wetem Jeova, we i sas tumas. Yumi naf blong mekem olgeta samting ya sipos yumi mekem hat blong yumi i laekem fasin luksave. Be, yumi nidim wan narafala samting tu. Yumi mas letem fasin luksave i sevem yumi.
?Bambae Yu Yu Ansa Olsem Wanem?
◻ ?From wanem yumi mas mekem hat blong yumi i laekem fasin luksave?
◻ ?Olsem wanem fasin luksave bambae i gat paoa long toktok mo fasin blong yumi?
◻ ?Fasin luksave i save gat wanem paoa long tingting we i pusum yumi?
◻ ?From wanem yumi mas lukluk oltaem i go long Jeova blong kasem fasin luksave?
[Tok blong pija long pej 13]
Fasin luksave i givhan long yumi blong blokem fasin kros
[Tok blong pija long pej 15]
King Solomon we i gat fasin luksave i faenemaot se fasin blong no tinghevi long wan samting i no save givim trufala glad