Letem Fasin Luksave i Sevem Yu
“Fasin blong tingtinggud bambae i lukaot long yu, mo fasin luksave bambae i sevem yu.”—PROVEB 2:11.
1. ?Fasin luksave i save sevem yumi long wanem samting?
JEOVA i wantem se yu soemaot fasin luksave. ?From wanem? From we hem i save se bambae fasin ya i sevem yu yu aot long plante defren kaen denja. Proveb 2:10-19 i stat wetem ol tok ya se: “Taem fasin waes i kam insaed long hat blong yu, mo sol blong yu i haremgud long save, fasin blong tingtinggud bambae i lukaot long yu, mo fasin luksave bambae i sevem yu.” ?Sevem yu long wanem samting? Long ol samting olsem “rod we i nogud,” olgeta we oli lego stret rod, mo ol man we oli no folemgud rod we i stret.
2. ?Wanem ya fasin luksave, mo wanem kaen fasin luksave we ol Kristin oli wantem tumas blong kasem?
2 Ating yu yu rimemba se fasin luksave hem i wok we tingting i mekem blong makemaot se wan samting i defren long wan narafala samting. Wan man we i gat fasin luksave, hem i naf blong luk olsem wanem wan tingting no wan samting i defren long narafala samting, mo hem i naf blong skelemgud ol samting. Yumi ol Kristin, yumi wantem moa blong gat fasin luksave long saed blong speret, we i stanap long stret save long Tok blong God. Taem yumi stadi long Baebol, i olsem se yumi stap digim ol bigfala ston blong bildimap fasin luksave long saed blong speret. Ol save we yumi kasem i save halpem yumi blong mekem ol disisen we Jeova i glad long olgeta.
3. ?Olsem wanem yumi save kasem fasin luksave long saed blong speret?
3 Taem God i askem King Solomon blong Isrel wanem blesing we hem i wantem, yangfala king ya i talem se: “Yu mas givim long man blong yu, wan hat we i obei long yu, blong hem i save jajem ol man blong yu, mo blong hem i luksave samting we i gud mo samting we i nogud.” Solomon i askem fasin luksave, mo Jeova i givim samting ya long hem kasem mak we i bigwan olgeta. (1 King 3:9; 4:30) Blong kasem fasin luksave, yumi mas prea, mo yumi mas stadi long Tok blong God wetem ol buk we “slef we i stret mo waes” i givim, we oli fulap long save blong givhan long yumi. (Matyu 24:45-47, NW) Samting ya bambae i halpem yumi blong wokem fasin luksave long saed blong speret go kasem mak ya we ‘yumi kam olsem bigman long tingting blong yumi,’ mo yumi naf blong “jusumaot [luksave] wanem fasin i gud mo wanem fasin i nogud.”—1 Korin 14:20; Hibrus 5:14.
Spesel Nid Blong Fasin Luksave
4. ?I minim wanem se ae blong yumi i mas “klia gud,” mo olsem wanem samting ya i save karem blesing i kam long yumi?
4 Sipos yumi gat fasin luksave we i stret, yumi save wok folem tok ya blong Jisas Kraes se: “Fastaem yufala i mas [lukaot Kingdom blong God mo stret fasin]. Nao biaen, hem i save givim olgeta samting ya [long saed blong bodi] tu long yufala.” (Matyu 6:33) Jisas i talem tu se: “Ae blong yu i olsem laet blong bodi blong yu. Taem we ae blong yu i klia gud, i olsem we bodi blong yu i fulap olgeta long laet.” (Luk 11:34) Ae i olsem wan laet. Wan ae we i “klia gud,” i minim se hem i no gyaman, mo hem i stap strong long mak blong hem. Wetem wan ae olsemia, yumi save soemaot fasin luksave, mo yumi save wokbaot long fasin we yumi no save foldaon long saed blong speret.
5. Long saed blong ol bisnes blong winim mane, ?yumi mas tingbaot wanem long saed blong risen from wanem Kristin kongregesen i stap?
5 Samfala man oli no mekem ae blong olgeta i klia gud. Defren nao, oli mekem laef blong olgeta mo blong sam narafala i fasfas tumas, taem oli traem pulum olgeta blong joen long wan bisnes blong winim bigfala mane. Yumi mas rimemba se Kristin kongregesen hem i “holem trutok i stap gud, mo i stap blokem ol enemi blong hem.” (1 Timote 3:15) Olsem strongfala simen we i holem wan bigfala haos i stapgud, kongregesen i holemtaet trutok blong God. Hem i no stap blong sapotem enikaen bisnes blong winim mane. Ol kongregesen blong ol Wetnes blong Jeova oli no stanap olsem ol ples blong mekem bisnes, salem sam samting, no mekem wan wok blong kasem mane from. Yumi no mas tokbaot prapa bisnes blong yumi blong winim mane, long Haos Kingdom. Fasin luksave bambae i halpem yumi blong luk se ol Haos Kingdom, ol Buk Stadi blong kongregesen, mo ol asembli blong ol Wetnes blong Jeova, oli ol ples we ol Kristin oli joen tugeta blong tokbaot ol samting long saed blong speret. Sipos yumi yusum fasin fren blong yumi long saed blong speret blong mekem enikaen bisnes, hemia i soemaot se yumi no gat bigfala tangkyu long ol samting long saed blong speret. Yumi neva mas yusum eni samting we i joen wetem kongregesen, blong winim mane.
6. ?From wanem i no stret blong salem no tokbaot ol wok mo ol rod blong winim mane, long ol miting blong kongregesen?
6 Samfala oli yusum olgeta we oli save olgeta long ol kongregesen, blong salem ol meresin blong helt, ol samting blong mekem fes mo bodi i naes, ol vaetamin, ol telefon mo ol narafala rod blong toktok, ol samting blong wokem haos, ol trep blong turis i go long narafala kantri, ol program mo tul blong kompyuta, mo plante moa samting bakegen. Be, ol miting blong kongregesen oli no stret ples blong salem samting, no blong tokbaot ol samting blong salem mo wok blong winim mane. Yumi luksave wanem rul i stret long saed ya, sipos yumi tingbaot taem ya we Jisas i “ronem olgeta man ya wetem ol buluk mo sipsip blong olgeta oli goaot long haos blong God. Mo i kafsaedem ol tebel blong ol man ya we oli stap jenisim mane, we i sakem ol mane blong olgeta i go olbaot. Mo i tok long ol man we oli stap salem nawemba, i se: ‘Yufala i tekem ol samting ya i go afsaed. Yufala i no mekem haos blong Papa blong mi i kam olsem ples blong maket nomo.’ ”—Jon 2:15, 16.
?Olsem Wanem Long Fasin Blong Putum Mane Insaed Long Wan Bisnes?
7. ?From wanem yumi nidim fasin luksave mo fasin blong lukaotgud taem yumi tingting blong putum mane i go long wan bisnes?
7 I nidim fasin luksave mo fasin blong lukaotgud, taem yumi tingting blong putum mane i go insaed long wan bisnes. Maet wan man i wantem karem mane blong yu we bambae hem i givimbak biaen, nao i mekem ol promes olsem: “Mi talem tru, bambae yu kasem plante moa mane.” “Yu no save lus. Bisnes ya i wan samting we yu save trastem.” Yu mas lukaotgud taem wan man i mekem ol promes olsemia. Ating hem i no tingtinggud no maet hem i stap gyaman, from we i no gat wan man we i save talem se wan bisnes i sua blong win. Yes, samfala we oli toktok swit, mo oli no folemgud ol stret fasin, oli bin trikim samfala long kongregesen. Samting ya i mekem yumi tingbaot ol “man we oli agensem God” we oli kam insaed long kongregesen long faswan handred yia, mo oli ‘yusum gladhat blong God olsem wan eskyus blong mekem ol rabis fasin.’ Oli olsem ol sap ston aninit long solwora we oli save katem no kilim i ded sam man we oli stap swim. (Jud 4, 12) Tru tumas, tingting we i pusum ol man blong trikim narafala i no sem mak long hemia, be olgeta ya tu oli stap yusum ol memba blong kongregesen blong winim wan samting.
8. ?Wanem samting i bin hapen long sam bisnes we i luk olsem se bambae oli wingud?
8 Sam Kristin tu we oli wantem mekem i gud long narafala, oli bin serem sam nyus wetem ol narafala long saed blong wan bisnes blong winim mane. Be biaen, olgeta mo ol narafala we oli bin folem olgeta, oli lusum mane we oli bin putum insaed long bisnes ya. From samting ya, plante Kristin oli lusum spesel wok we oli gat insaed long kongregesen. Taem bisnes we ol man oli putum mane long hem blong kam rij kwiktaem i foldaon, i gat wan man nomo we i win, hemia man ya we i trikim ol narafala. Mo plante taem, kwiktaem afta long wan trabol olsemia, ol man oli no moa save faenem man ya. ?Olsem wanem fasin luksave i save halpem yumi blong stap longwe long olkaen trabol olsem?
9. ?From wanem i nidim fasin luksave blong skelem ol tok we man i talem long yumi long saed blong mane we yumi save winim long wan bisnes?
9 Fasin luksave i minim se man i naf blong kasem save long samting we i no kliagud. I nidim fasin ya blong skelem ol samting we man i talem, taem hem i wantem yumi blong putum mane i go insaed long wan bisnes. Ol Kristin oli trastem ol narafala Kristin, taswe maet samfala oli gat tingting ya se ol brata mo sista blong olgeta long saed blong speret, bambae oli no joen long ol bisnes we oli save spolem mane blong ol narafala man blong bilif. Be, nating se wan bisnesman i wan Kristin, samting ya i no minim se hem i gat bigfala save long saed blong bisnes, no se bambae kampani blong hem i wingud.
10. ?From wanem sam Kristin oli askem mane blong narafala man blong bilif blong statem wan bisnes, mo wanem i save hapen long mane ya?
10 Samfala Kristin oli askem ol narafala man blong bilif blong givim mane long olgeta blong mekem bisnes, from we ol bang oli no wantem givim mane long olgeta blong mekem wan bisnes we i luk olsem se bambae i no wingud. Plante man oli foldaon long trap ya we oli bilif se, sipos oli putum mane i go long wan bisnes, bambae oli save winim bigfala mane kwiktaem, we oli no nidim blong wok plante no maet oli no nidim blong wok nating. !Samfala oli putum mane blong olgeta long wan bisnes jes from we oli wantem traem wan nyufala samting, be biaen oli lusum olgeta mane we oli bin putumgud i stap blong ful laef blong olgeta! Wan Kristin i putum bigfala mane long wan bisnes, mo hem i tingting se long tu wik nomo, bambae hem i kasem 25 pesen moa antap bakegen. Hem i lusum olgeta mane blong hem taem kampani we hem i putum mane long hem, i talemaot se hem i gat tumas kaon mo i no moa gat mane. Long wan narafala bisnes blong pem mo salem graon mo haos, wan man i karem bigfala mane long sam narafala insaed long kongregesen. Mane we hem i promes se bambae oli winim i bitim mak. Ale, bisnes ya i lusum olgeta mane blong hem mo mane we i bin karem long ol narafala tu.
Taem Ol Bisnes Oli Foldaon
11. ?Wanem advaes we Pol i givim long saed blong fasin blong wantem plante samting tumas mo fasin blong laekem mane tumas?
11 Taem wan bisnes i foldaon, samting ya i bin mekem plante Kristin oli harem nogud mo samfala oli bin kam slak long saed blong speret tu, from we oli bin joen long bisnes ya we i no waes. From we oli no letem fasin luksave i sevem olgeta, oli harem nogud tumas mo oli stap kros tu. Fasin blong wantem plante samting tumas i wan trap we i bin kasem plante man. Pol i raetem se: “From we yufala i tabu, . . . fasin blong man we i wantem evri samting, bambae yufala i no tokbaot.” (Efesas 5:3) Mo hem i givim woning ya se: “Ol man ya we oli wantem kam rijman, be oltaem ol samting blong traem yumi oli stap mekem olgeta oli folfoldaon. Ol samting we oli wantem, we oli krangke, mo we oli stap spolem olgeta, oli olsem trap blong kasem olgeta. Nao fasin ya blong wantem evri samting, hem i save pulum olgeta oli kamdaon olgeta, we laef blong olgeta i kam nogud olgeta. Fasin blong laekem mane tumas, hem i stampa blong olgeta fasin nogud. Mo i gat sam man we oli strong blong folem fasin ya, we oli gowe finis long fasin blong bilif. Nao oli stap mekem ol samting we olgeta tu oli harem nogud tumas from.”—1 Timote 6:9, 10.
12. ?Sipos ol Kristin oli mekem bisnes wetem wan narafala Kristin, wanem impoten samting we oli no mas fogetem?
12 Sipos wan Kristin i tekem fasin ya we hem i laekem mane tumas, bambae hem i mekem plante trabol long hem wan long saed blong speret. Ol Farisi oli laekem mane tumas, mo plante man long ol las dei ya we yumi stap long hem, oli gat fasin ya tu. (Luk 16:14; 2 Timote 3:1, 2) Defren olgeta, wan Kristin i no mas folem ‘fasin ya we hem i laekem mane tumas.’ (Hibrus 13:5) Yes, wan Kristin i save mekem bisnes wetem wan narafala Kristin, no oli save statem wan bisnes tugeta. Be, sipos oli mekem olsemia, oli no mas joenem ol storeyan mo ol wok long saed blong bisnes ya wetem ol wok blong kongregesen. Mo rimemba: Nating se yumi ol brata long saed blong speret, oltaem yumi mas raetemdaon long pepa olgeta kontrak we yumi mekem tugeta, long saed blong bisnes. Wan haf blong Wekap! blong Febuwari 8, 1983 (Engglis), pej 13 kasem 15, i save givhan long saed ya. Nem blong hem “!Raetemdaon Long Pepa!”
13. ?Olsem wanem tok blong Proveb 22:7 i stret long ol plan blong statem wan bisnes?
13 Proveb 22:7 i talem se: “Man we i karem mane long narafala, i man blong wok blong hemia we i givim mane long hem.” Plante taem, i no waes we yumi mekem yumi no wan brata blong yumi i kam wan man blong wok olsem. Taem wan man i askem yumi blong givim mane long hem blong statem wan bisnes, i gud blong tingbaot sipos hem i naf blong pembak mane ya no no gat. ?Ol man oli save hem olsem wan man we yumi save dipen long hem mo trastem hem? Yes, yumi mas luksave se, taem yumi givim mane olsemia, maet bambae yumi lusum mane ya, from we plante taem ol nyufala bisnes oli foldaon. Wan bisnes kontrak we yumi saenem, samting ya nomo i no save mekem se bisnes ya bambae i wingud. Mo tru ya, i no waes sipos man i putum moa mane long wan bisnes bitim mane we hem i rere blong lusum.
14. ?From wanem yumi nidim blong soem fasin luksave sipos yumi givim mane long wan Kristin brata ale, bisnes blong hem i foldaon?
14 Yumi mas soem fasin luksave sipos yumi bin givim mane long wan Kristin blong mekem wan bisnes, nao mane ya i lus nating se man ya i mekem bisnes long fasin we i stret nomo. Sipos i no fol blong brata ya we i karem mane blong yumi se bisnes ya i brokdaon, ?yumi save talem se hem i bin trikim yumi? No gat, from we yumi agri blong givim mane long hem, mo maet yumi bin kasem smol haf tu insaed long bisnes ya, mo tu, hem i no bin mekem wan kruked fasin. From we i no gat kruked fasin, yumi no gat wan risen blong tekem aksin folem loa agensem man ya we i bin karem mane blong yumi. ?Wanem gudfala samting i save kamaot sipos yumi putum wan Kristin brata we i no trikim yumi, mo we hem i mas talemaot folem loa se hem i lusum olgeta mane blong hem, i go long kot, jes from we wan bisnes we hem i bin ting se bambae i rongud, i foldaon?—1 Korin 6:1.
15. ?Wanem sam samting we yumi mas tingbaot sipos yumi talemaot folem loa se yumi gat tumas kaon mo i no moa gat mane blong pem?
15 Blong traem haremgud lelebet taem wan bisnes i foldaon, samfala oli talemaot folem loa se oli gat tumas kaon mo oli no moa gat mane. Ol Kristin oli gat fasin blong pem ol kaon blong olgeta, taswe, nating se loa i talem se oli fri long ol kaon blong olgeta, samfala oli harem se oli mas traehad blong givim smosmol blong pem ol kaon ya, sipos ol masta we oli mas pem ol kaon ya long olgeta, oli agri long samting ya. Be ?olsem wanem sipos man we i karem mane blong wan brata, i lusum mane ya, mo biaen, hem i stap laef long fasin we i olsem rijman nomo? no ?Olsem wanem sipos brata we i karem mane blong wan narafala brata, i kasem naf mane blong pembak samting we hem i bin karem, be hem i no pembak mane ya long brata blong hem? Sipos i olsem, maet hem i no naf blong mekem spesel wok insaed long kongregesen.—1 Timote 3:3, 8; lukluk Wajtaoa, Septemba 15, 1994, pej 30 mo 31.
?Olsem Wanem Sipos Kruked Fasin i Kamaot?
16. ?Yumi save mekem wanem sipos i luk olsem se narafala i mekem kruked fasin long yumi?
16 Fasin luksave i halpem yumi blong luk se i no evri bisnes we man i putum mane insaed long hem we bambae i wingud. Be, ?olsem wanem sipos i gat kruked fasin i kamaot? Kruked fasin hem i “fasin blong gyaman, trikim, no tanem ol trutok, blong mekem narafala man i lego wan sas samting blong hem, no lego wan samting we loa i talem se hem i gat raet long hem.” Jisas Kraes i givim advaes long saed blong fasin blong folem, taem wan man i ting se wan brata blong hem long saed blong bilif i bin mekem kruked fasin long hem. Long Matyu 18:15-17, Jisas i talem se: “Sipos brata blong yu i mekem i no stret long yu, yu mas go luk hem, nao taem yutufala nomo i stap, yu mas talemaot long hem, samting nogud ya we hem i mekem. Sipos hem i save lesin long yu, tok blong yu bambae i mekem hem i kam brata blong yu bakegen. Be sipos hem i no wantem lesin long yu, yu mas tekem wan tu man i wetem yu, blong oli wetnes blong yu. Nao bambae i olsem we Baebol i talem, i se ‘Evri poen oli mas gat tok blong tu tri wetnes, blong mekem oli stanap.’ Be sipos hem i no save lesin long yu yet, yu mas talemaot trabol ya long [kongregesen]. Mo sipos hem i no save lesin long [kongregesen], yu mas mekem long hem olsem we hem i wan hiten man, no wan man blong tekem mane blong takis.” Pijatok we Jisas i givim biaen, i soemaot se taem hem i talem tok ya hem i stap tingbaot ol sin we oli joen wetem mane, olsem kruked fasin.—Matyu 18:23-35.
17, 18. Sipos wan man we i talem se hem i Kristin i mekem kruked fasin long yumi, ?olsem wanem fasin luksave bambae i sevem yumi?
17 Be, sipos i no gat wan samting blong pruvum se narafala i bin mekem kruked fasin, i no gat wan risen we i stanap long Baebol blong folem advaes blong Matyu 18:15-17. Oraet, ?be olsem wanem sipos wan man we i talem se hem i Kristin i rili bin mekem kruked fasin long yumi? Fasin luksave bambae i sevem yumi, from we bambae i blokem yumi blong mekem wan samting we i save spolem gudnem blong kongregesen. Pol i givim advaes long ol Kristin brata se, i moagud we oli letem narafala i mekem nogud no i mekem kruked fasin long olgeta, i bitim we oli putum wan brata long kot.—1 Korin 6:7.
18 Ol trufala brata mo sista blong yumi oli no man we oli ‘fulap long kruked fasin mo gyaman nomo,’ olsem klevaman ya long taem bifo, nem blong hem BaJisas. (Ol Wok 13:6-12) Taswe, i gud yumi yusum fasin luksave taem mane i lus long wan bisnes we yumi joen long hem wetem wan narafala man blong bilif. Sipos yumi stap tingbaot blong putum hem long kot, yumi mas tingtinggud se, samting ya bambae i mekem wanem long yumi wan, long brata ya no ol brata ya we yumi putum olgeta long kot, long kongregesen, mo long ol man afsaed long kongregesen. Sipos yumi traem fosem narafala blong pembak mane we hem i lusum, samting ya i save tekem fulap taem, paoa, mo maet mane blong yumi bakegen. Ating fasin ya bambae i mekem wan samting nomo, bambae i mekem ol loea mo ol narafala man olsem oli rij. Sore tumas, sam Kristin man oli bin lego ol tiokratik wok blong olgeta from we oli bisi tumas long ol samting olsemia. Setan i glad tumas sipos hem i luk se yumi lego stret rod from samting ya. Be yumi wantem mekem hat blong Jeova i glad. (Proveb 27:11) Sipos yumi folem defren rod we yumi lego nomo mane ya we yumi lusum, samting ya i save sevem yumi long plante trabol we bambae yumi harem nogud from, mo i save mekem se ol elda tu oli no lusum plante taem. Bambae i mekem se yumi holem pis insaed long kongregesen mo yumi save gohed blong putum Kingdom i stap long fasples.
Fasin Luksave Mo Ol Disisen
19. ?Olsem wanem fasin luksave long saed blong speret mo prea i save givhan long yumi taem yumi mas mekem sam bigfala disisen?
19 Plante taem ol disisen long saed blong mane mo bisnes oli mekem man i wari tumas. Be fasin luksave long saed blong speret i save halpem yumi blong skelemgud ol samting, mo mekem ol disisen we oli waes. Mo tu, sipos yumi prea mo trastem Jeova, bambae samting ya i karem “pis we God i save putum” i kam long yumi. (Filipae 4:6, 7) Pis ya hem i wan fasin we tingting blong man i stap kwaet mo i gat pis, from we hem i frengud wetem Jeova. Yes, pis ya i save halpem yumi blong holem stret tingting taem yumi mas mekem sam disisen we oli strong.
20. ?Yumi mas gat strong tingting blong mekem wanem long saed blong ol bisnes blong winim mane mo kongregesen?
20 Yumi mas gat strong tingting blong no letem ol rao long saed blong bisnes, oli spolem pis blong yumi mo pis blong kongregesen. Yumi mas tingbaot se, Kristin kongregesen i stap blong halpem yumi long saed blong speret, i no stap olsem wan stampa ples blong mekem bisnes blong winim mane. Ol bisnes long saed blong mane oli neva mas joen long ol wok blong kongregesen. Yumi mas yusum fasin luksave mo lukaotgud, taem yumi wantem statem wan bisnes. Mo yumi mas gat stret tingting long saed ya, we yumi putum wok blong Kingdom i stap long fasples oltaem. Sipos wan bisnes we yumi joen long hem wetem sam narafala man blong bilif, i foldaon, yumi mas traehad blong mekem samting we i gud long evriwan we oli joen long bisnes ya.
21. ?Olsem wanem yumi save soem fasin luksave mo folem Filipae 1:9-11?
21 Bitim we yumi wari tumas long saed blong bisnes blong winim mane mo ol narafala samting we oli no impoten tumas, i gud yumi evriwan i mekem hat blong yumi i laekem fasin luksave, prea long God blong i lidim yumi, mo putum ol wok blong Kingdom long fasples. Folem prea blong Pol, i gud yumi ‘stap laeklaekem yumi moa, wetem fasin waes mo fasin blong luksave fulwan, nao bambae yumi save jusumaot wanem samting we oli impoten moa, mo bambae yumi no mekem ol narafala oli foldaon,’ mo yumi no foldaon tu. Naoia we Kraes i sidaon finis long jea blong King long heven, i gud yumi soemaot fasin luksave long saed blong speret long olgeta samting we yumi mekem long laef blong yumi. Mo i gud ‘yumi gat ol stret fasin ya we Jisas Kraes i save mekem oli kamtru long laef blong yumi, blong presem God,’ Haefala Masta Jeova.—Filipae 1:9-11.
?Bambae Yu Yu Ansa Olsem Wanem?
◻ ?Wanem ya fasin luksave?
◻ ?From wanem ol Kristin oli rili nidim blong gat fasin luksave taem oli joen long wan bisnes wetem wan narafala Kristin?
◻ ?Olsem wanem fasin luksave bambae i halpem yumi, sipos yumi harem se wan narafala man blong bilif i bin mekem kruked fasin long yumi?
◻ ?Fasin luksave bambae i givhan long yumi long wanem rod, taem yumi mas mekem ol disisen?
[Tok blong pija long pej 18]
Fasin luksave bambae i halpem yumi blong folem advaes blong Jisas blong lukaot Kingdom fastaem
[Tok blong pija long pej 20]
Raetemdaon olgeta kontrak blong bisnes long pepa