Man Blong Hae Save i Talem Se Wan Hanraet Blong Baebol i Bin Raetem Long Faswan Handred Yia

Carsten Peter Thiede, wan man blong Jemani we i gat hae save long ol papiras, i talem se i gat strong pruf we oli soem se ol trifala smol pis blong papiras blong Gospel blong Matiu (nem blong olgeta se Magdalen Papiras), oli bin raetem long faswan handred yia.

Oli skelem ol smol pis ya (we i gat sam haf blong japta 26 blong Matiu long olgeta), wetem wan olfala leta we oli faenem long Ijip, we i tokbaot bisnes. Biaen, Thiede i makem se leta ya blong Ijip i sem mak nomo long “Magdalen Papiras. I luk olsem se fasin blong raetem ol leta mo mak blong ol tok oli sem mak.” Thiede mo Matthew D’Ancona, tufala oli raetem long buk blong olgeta, Eyewitness to Jesus​—Amazing New Manuscript Evidence About the Origin of the Gospels, se ol samting we oli sem mak long tufala papiras oli soemaot se oli bin raetem tufala long sem taem. ?Wetaem? Papiras we i tokbaot bisnes i bin raetem “ ‘long yia 12 blong Masta Nero, long Ipef 30’​—long kalenda blong yumi, hemia Julae 24, 66 [K.T.].”

Tija Philip W. Comfort i raetem long niuspepa ya Tyndale Bulletin, i talem se: “Sipos taem ya i stret, samting ya i impoten tumas, from we hemia wan pruf se hanraet ya blong Gospel blong Matiu i bin raetem long faswan handred yia.” Mo tu, nius ya i mekem se naoia, Magdalen Papiras i smol pis hanraet blong Gospel we i olfala moa, i bitim ol narafala we oli stap yet.

[Tok Blong Pija Long Pej 29]

Magdalen Papiras, longfala blong hem i stret olsemia

[Credit Line]

By permission of the President and Fellows of Magdalen College, Oxford