?Yu Yu Rimemba?

?Yu yu bin glad blong ridim ol laswan Wajtaoa? Sipos yes, bambae yu faenem se i gud blong tingbaot ol poen ya bakegen:

◻ ?From wanem yumi save trastem Jeova taem hem i jusum sam man blong lidim ol man blong hem?

Jeova i jusum sam man we oli nafgud blong mekem sam kaen wok blong lidim ol man blong hem long rod we hem i wantem olgeta blong folem long ol taem ya.​—8/15, pej 14.

◻ ?Yumi save lanem wanem long stori blong Jona?

Jona i tingbaot hem wan tumas, be i no tingbaot ol narafala. Stori blong hem i mas tijim yumi blong no tingbaot yumi nomo, mo blong no tingbaot ol samting we yumi nomo i save harem gud long hem.​—8/15, pej 19.

◻ ?From wanem yumi save talem se “nem blong Jeova i wan strong haos”? (Proveb 18⁠:10)

Fasin blong go haed long nem blong Jeova i minim se yumi trastem hem. (Ol Sam 20⁠:1; 122⁠:⁠4) Samting ya i minim se yumi sapotem hae rul blong hem, folem ol loa mo ol rul blong hem, bilif long ol promes blong hem mo wosip long hem nomo. (Aesea 50:10; Hibrus 11:6)​—9/1, pej 10.

◻ ?Olsem wanem yumi save folem eksampel blong Pol taem hem i givim witnes long fored blong ol haeman?

Taem Pol i toktok long King Agripa, hem i yusum fasin waes, hem i leftemap ol samting we hem mo Agripa oli agri long hem. Long sem fasin, yumi mas tokbaot ol nambawan samting long saed blong gud nius, mo yumi mas soemaot hop we yumi evriwan i gat. (1 Korin 9:​22)​—9/1, pej 31.

◻ ?Hu olgeta we bambae oli save kasem blesing from longfala tingting blong Jeova?

Longfala tingting blong Jeova i givim jans long plante milan man blong sef tru long “dei blong Jeova,” we bambae i kam olsem “stilman.” (2 Pita 3⁠:​9-15) Longfala tingting blong hem tu i givim jans long yumi blong ‘gohed blong wok had, blong ona long God, mo yumi fraet tu long hem.’ (Filipae 2⁠:12) —9/15, pej 20.

◻ ?Baebol ya Septuagint i bin wan gudfala Baebol?

Baebol ya i nambawan tul we i halpem ol man blong kasem save long saed blong Jeova God, Kingdom blong hem, mo Jisas Kraes we i King blong Kingdom ya. Septuagint i putum wan impoten gudfala fandesen we i pulum plante Jyu we oli toktok lanwis Grik, mo plante hiten man blong akseptem gud nius blong Kingdom.​—9/15, pej 30.

◻ ?Parabol ya long saed blong yang boe ya we i lusum rod i tijim wanem long yumi long saed blong Jeova?

Faswan samting, hem i tijim yumi se Jeova i ‘gat sore mo i kaen tumas, hem i slou blong kam kros, mo i fulap long lav mo trutok.’ (Eksodas 34⁠:⁠6) Namba tu samting, hem i “rere blong fogif” taem hem i luk long hat blong yumi se yumi rili tanem tingting blong yumi, nao hem i save soem sore. (Ol Sam 86⁠:⁠5)​—10/1, pej 12, 13.

◻ ?Wetaem bambae Jeova i stanemap pis ya we Aesea 65⁠:​21-25 i tokbaot?

Ol tabu man we oli stap yet long wol ya, wetem ol “narafala sipsip” we olgeta evriwan oli joen wanples blong wosipim Jeova long paradaes long saed blong spirit, naoia oli stap haremgud long pis we God i givim. (Jon 10⁠:16) Mo pis ya bambae i kamtru long wan trufala Paradaes long wol ya, taem ‘olgeta man long wol oli mekem ol samting we God i wantem, olsem olgeta long heven oli stap mekem.’ Bambae long taem ya, ol tok blong profet Aesea oli kamtru fulwan. (Matiu 6:​10)​—10/15, pej 24.

◻ ?From wanem ol Kristin oli mekem lafet blong tingbaot dei blong mared be oli no mekem betde?

Baebol i no tokbaot mared olsem wan nogud samting. Ol wanwan Kristin i gat raet blong mekem disisen sipos hem i wantem mekem anivesari blong mared blong hem no no gat, blong tingtingbak long glad we i kamaot long taem ya, mo long disisen we tufala we oli mared oli mekem blong wok gud olsem hasban mo waef. Be, Baebol i tokbaot betde blong sam hiten man nomo, mo sam rabis fasin oli kamaot long ol betde ya.​—10/15, pej 30, 31.

◻ ?Long pijatok blong Pol we i stap long 1 Korin 3⁠:​12, 13, “faea” i minim wanem? mo olgeta Kristin oli mas save wanem samting?

I gat wan faea we yumi evriwan i fesem long laef blong yumi. Hemia ol samting we oli traem bilif blong yumi. (Jon 15:20; Jemes 1:​2, 3) Olgeta man we oli stap lanem trutok, bambae oli mas kasem ol traem. Sipos yumi tijim man olbaot nomo, bambae trabol i kamaot from, olsem Pol i givim woning. (1 Korin 3:​15)​—11/1, pej 11.

◻ ?Olsem wanem Noa i ‘wokbaot wetem trufala God?’ (Jenesis 6⁠:⁠9)

Noa i wokbaot wetem God, taem hem i mekem wanem we God i talem long hem blong mekem. Noa i givim laef blong hem blong mekem samting we Jeova i wantem. Taswe, hem i haremgud long wan nambawan fasin fren wetem God.​—11/15, pej 10.

◻ Yumi no save stret taem we God bambae i spolem wol blong Setan. ?Samting ya i givim jans long yumi blong mekem wanem?

Samting ya i givim jans long yumi blong pruvum se yumi rili laekem God mo yumi wantem wokbaot long ol rod blong hem blong olwe. Yumi soem se yumi stap strong long God mo yumi trastem rod we hem i yusum blong stretem ol bisnes. Mo tu, from we yumi no save stret dei mo aoa, samting ya i givhan long yumi blong wekapgud long saed blong spirit. (Matiu 24:42-​44)​—11/15, pej 18.

◻ ?Fasin blong bilif long “nem blong Pikinini blong God” i minim wanem? (1 Jon 5⁠:13)

Samting ya i minim se yumi mas obei long olgeta loa blong Kraes. (Jon 15:14, 17) Lav i pulum man blong wantem mekem i gud long narafala. Hem i sakemaot ol fasin blong no laekem man blong narafala laen, man blong narafala jos, mo man we laef blong olgeta i defren long laef blong yumi.​—12/1, pej 7.

◻ ?From wanem ol man ‘oli no laekem nating’ ol Witnes blong Jeova, ‘oli agensem olgeta’? (Matiu 10⁠:22)

Semfala risen we i pulum ol man blong ronem ol faswan Kristin, i stap pulum ol man tede tu blong agensem ol Witnes blong Jeova. Faswan long ol risen ya, hemia se ol Witnes blong Jeova oli mekem bilif blong skul blong olgeta i wok long laef blong olgeta, mekem se ol man oli no laekem olgeta. Namba tu samting, hemia se ol man oli bin mekem plante giaman toktok agensem ol Witnes blong Jeova​—oli giaman mo oli twistim bilif blong ol Witnes.​—12/1, pej 14.