Stap Glad Long Jeova Nating Se i Gat Ol Traem

GEORGE SCIPIO I TALEM STORI YA

Long Desemba 1945, mi stap ledaon long wan rum long hospital, hafbodi blong mi i ded, tufala han mo tufala leg blong mi nomo i no ded. Mi ting se sik ya bambae i stap smoltaem nomo, be ol narafala oli stap tingting se, maet mi no moa save wokbaot bakegen. !Hemia wan bigfala traem blong wan man we i gat 17 yia, mo we i gat paoa! Mi no wantem agri se fiuja blong mi bambae i nogud olsem. Mi plan blong mekem fulap samting. Wan long ol plan ya, hemia blong folem bos blong mi i go long Engglan long yia we i kam biaen.

MI KASEM sik ya polio, we i kasem fulap man long aelan blong mifala, St. Helena. Sik ya i kilim i ded 11 man, mo i mekem se hafbodi blong fulap man i ded. Taem mi stap ledaon long bed, mi gat plante taem blong tingting long sotfala laef blong mi kam kasem naoia mo fiuja blong mi tu. Olsem nao, mi stat blong luksave se mi gat gudfala risen blong stap glad nating se mi kasem trabol ya.

Wan Smol Grup i Stat

Long 1933, taem mi gat faef yia, papa blong mi, Tom, we i wan polis mo wan dikon long Baptis Jos, i tekem sam buk long tu Witnes blong Jeova. Tufala Witnes ya, tufala i wok fultaem blong talemaot gud nius mo oli visitim mifala blong smol taem.

Wan long ol buk ya, nem blong hem The Harp of God. Papa blong mi i stap yusum buk ya blong stadi Baebol wetem famle blong mifala mo wetem ol narafala man we oli intres long Baebol. Buk ya i dip we i dip, mo mi kasem save smol samting nomo insaed long hem. Be mi tingbaot we, long Baebol blong mi, mi makem evri vas we mifala i bin tokbaot. I no longtaem i pas, papa blong mi i luksave se samting we mifala i stadi long hem, hem i trutok, mo tijing ya i defren long ol samting we hem i stap tijim insaed long Baptis Jos. Hem i stat blong tokbaot ol trutok ya long ol narafala, mo hem i talemaot insaed long jos se i no gat Triniti, helfaea, mo sol we i no save ded. Ol tok ya oli mekem se i gat plante toktok i kamaot insaed long jos.

Biaen, blong stretem bisnes ya, ol man blong Jos oli holem wan miting. Oli askem se: “?Hu i sapotem ol Baptis?” Bighaf blong olgeta oli sapotem ol Baptis. Ale, oli askem nekis kwestin, se, “?Hu i sapotem Jeova?” Samwe 10 no 12 man oli sapotem Jeova. Nao, oli askem long olgeta ya we oli sapotem Jeova blong livim Baptis Jos.

Yes, smol grup ya i statem wan niufala skul long St. Helena. Papa blong mi i toktok long Hedkwota blong Wajtaoa Sosaeti long Yunaeted Stet, mo i askem wan mesin blong plei long ol tok we oli rikodem finis, blong ol man oli lesin long hem. Sosaeti i talem se mesin ya i bigwan tumas blong oli sanem i go long St. Helena. Taswe oli sanem wan we i smol lelebet, mo biaen ol brata oli odarem tu bakegen. Oli wokbaot leg mo wetem dongki, oli karem mesej ya i go long ol man raon long aelan.

Taem mesej ya i stap kasem plante moa ples, fasin agens tu i kam antap. Long skul, ol pikinini oli stap singsing se: “!Yufala evriwan i kam harem, yufala evriwan, i kam harem teprikoda blong Tommy Scipio!” Samting ya i wan bigfala traem long mi, from we mi wan skul boe we i wantem mekem ol fren blong mi oli glad long mi. ?Wanem samting i givhan long mi blong stanap strong?

Famle blong mifala i bigwan, i gat sikis pikinini. Oltaem mifala i stadi Baebol tugeta. Evri moning, bifo we mifala i dring ti, mifala i ridim Baebol. I Sua se ol samting ya oli givhan long famle blong mifala blong stanap strong long trutok, long ol yia we i pas. Mi stat blong laekem Baebol taem mi smol nomo, mo long ol yia we oli pas, mi gohed blong ridim Baebol evri dei. (Ol Sam 1:​1-3) Taem mi gat 14 yia, mi mi aot long skul. Long taem ya, mi stanap strong long trutok mo long hat blong mi, mi mi fraetgud long Jeova. Samting ya i givhan long mi blong stap glad long Jeova, nating se i gat ol traem ya.

Sam Moa Traem mo Glad We Mi Kasem

Taem mi mi sik, mi stap ledaon long bed, mi stap tingting long ol faswan yia long laef blong mi, mo fiuja blong mi. From Baebol stadi blong mi, mi save se sik ya i no wan traem no wan panis blong God. (Jemes 1:​12, 13) Nating se i olsem, sik ya polio i wan traem we i mekem mi harem nogud tumas, mo bambae hem i gohed blong stap long mi long ful laef blong mi.

Taem mi kam gud lelebet, mi mas lan blong wokbaot long leg bakegen. Tufala han blong mi tu i no moa wok gud. Evri dei, mi foldaon plante taem. Be, fasin blong mekem dip prea mo fasin traehad i mekem se, long 1947, mi save wokbaot wetem woking stik.

Long taem ya, mi stat fren wetem wan yangfala woman, nem blong hem Doris. Hem i gat sem bilif olsem mi. Mitufala i yang tumas blong tingbaot mared, be mi gat strong tingting blong traehad moa blong wokbaot gud. Mo tu, mi livim wok blong mi, from we pei we mi kasem, i no naf blong sapotem wan waef. Mi stanemap wan bisnes blong jekemap tut, mo mi holem bisnes ya long tu yia we i kam biaen. Mitufala i mared long 1950. Long taem ya, mi kasem naf mane finis blong pem wan smol trak. Naoia, mi save tekem ol brata oli go long ol miting mo long wok blong prij.

Tiokratik Wok Long Aelan Blong Mifala

Long 1951, Sosaeti i sanem faswan man i visitim mifala. Hemia Jacobus van Staden, wan yangfala man blong Saot Afrika. Mi mo waef blong mi, mifala i jes muf i go insaed long wan haos we i bigfala lelebet, taswe mitufala i save givim rum long brata ya long wan ful yia. From we mi gat prapa bisnes blong mi, mifala i spenem plante taem blong prij tugeta, mo mi kasem nambawan trening long hem.

Jacobus, we mifala i stap singaot hem se Koos, i mekem plan blong gat miting blong kongregesen oltaem, mo mifala evriwan i rili glad blong joen long ol miting ya. Mifala i gat problem long saed blong transpot from we mifala i gat tu trak nomo blong tekem olgeta we oli intres, oli go long ol miting. I gat plante hol long rod mo fulap hil. Long taem ya, smol rod nomo oli gud. Taswe i had lelebet blong tekem evriwan i go long miting. Samfala oli stat blong wokbaot eli long moning. Mi tekem tri blong olgeta ya long smol trak blong mi, mo mi putum olgeta long haf rod. Oli kamaot long trak mo oli gohed blong wokbaot i go. Mi mi gobak bakegen, mi tekem tri narawan, mi putumaot olgeta ya tu long haf rod mo mi gobak. Ale long rod ya evriwan i joen long miting. Afta long miting, taem mifala i wantem gobak long haos, mifala i mekem sem samting olsem taem mifala i kam.

Koos i tijim mifala tu blong yusum ol fastok blong prij we oli karem gudfala frut. Mifala i gat plante gudfala ekspiryens mo sam narafala we oli no gud tumas. Be glad we mifala i kasem long wok blong prij i winim ol hadtaem we ol man oli mekem long mifala blong agensem wok ya. Wan moning, mi mi prij wetem Koos. Taem mitufala i kam klosap long wan doa, mifala i harem wan voes insaed long haos. Wan man i stap ridim Baebol wetem bigfala voes. Mitufala i save harem klia ol tok blong Aesea japta 2 we mifala i save gud. Taem hem i stat blong ridim vas 4, mitufala i noknok long doa. Wan olfala man we i gat kaen fasin, i kamaot mo i singaot mitufala blong kam insaed long haos. Mo mitufala i yusum Aesea 2:4 blong eksplenem gud nius blong kingdom blong God long hem. Mitufala i statem Baebol stadi wetem hem, nating se i had blong kasem ples we hem i stap long hem. Mitufala i mas wokbaot long wan hil go kasem daon, krosem wan reva we man i mas wokbaot antap long ston blong go narasaed, klaem wan narafala hil, mo biaen mitufala i godaon long haos blong hem. Nating se i olsem, fasin traehad blong mitufala i karem gudfala frut. Olfala man ya we i gat tingting daon, i akseptem trutok mo biaen i tekem baptaes. Blong go long ol miting, hem i wokbaot wetem tu stik, go kasem wan ples we bambae mi save tekem hem long trak. Olfala ya i wan Witnes we i stap tru long God go kasem we hem i ded.

Jif blong ol Polis i agensem wok blong mifala mo plante taem, hem i givim woning se bambae oli sakemaot Koos long kantri ya. Wan taem evri manis, hem i singaot Koos mo i askem kwestin long hem. Oltaem, Koos i ansa stret long hem wetem Baebol. Samting ya i mekem se polis man ya i kros moa. Long olgeta taem ya, hem i givim woning long Koos se hem i mas stop blong prij, be oltaem Koos i stap prij long hem. Biaen, Koos i aot long St. Helena. Be man ya i stap gohed yet blong agensem wok blong prij. Nao, wan dei, jif ya blong ol polis, wan bigfala man, mo wan strong man tu, hem i sik mo hem i kam bunbun tumas. Ol dokta oli no save faenem sik blong hem. From samting ya, hem i mas livim aelan ya.

Baptaes mo Wok i Gohed Blong Gru

Afta long tri manis we Koos i stap long St. Helena, hem i ting se i stret blong mekem wan sevis blong baptaes. I had blong faenem wan ples blong baptaes. Ale, mifala i mekem disisen blong digim wan bigfala hol, putum simen long hem mo fulumap wetem wota. Be, long naet bifo long baptaes, hem i ren, mo long nekis moning, mifala i glad blong luk se hol ya i fulapgud wetem wota.

Long Sande moning, Koos i givim tok blong baptaes. Taem hem i askem long olgeta we oli wantem tekem baptaes blong oli stanap, 26 long mifala i stanap blong ansa long ol kwestin blong baptaes. Hem i wan bigfala blesing long mifala blong kam ol faswan Witnes we i tekem baptaes long St. Helena. Long dei ya, mi glad moa bitim ol narafala dei long laef blong mi, from we oltaem, mi stap wari se maet Amageden bambae i kam bifo we mi tekem baptaes.

Tu kongregesen i stat, wan long Levelwood, narawan long Jamestown. Evri wik, tri no fo long mifala i wokbaot 13 kilometa i go long wan kongregesen, blong lidim Tiokratik Skul mo Miting Blong Kingdom Wok long Sarede naet. Afta long wok blong prij long Sande moning, mifala i gobak long kongregesen blong mifala. Long aftenun mo long naet, mifala i mekem sem miting olsem, mo Wajtaoa Stadi. Yes, wiken blong mifala i fulapgud wetem ol tiokratik wok, we i givim glad long mifala. Mi wantem tumas blong joen fultaem long wok blong prij, be mi gat wan famle blong lukaot. Ale long 1952, mi statem bakegen blong wok fultaem wetem gavman, olsem dokta blong tut.

Long 1955, ol man we oli wok long nem blong Sosaeti, hemia ol seket elda, oli stat blong visitim mifala evri yia. Taem oli visitim mifala, oli stap long haos blong mi smoltaem. Oli givhan bigwan long famle blong mi. Samwe long taem ya, i gat tri film blong Sosaeti we mi gat jans blong soemaot long ol man raon long aelan.

Nambawan Asembli Ya, Wil Blong God

Long 1958, blong go long Intenasnal Asembli ya, Wil Blong God long Niu Yok, mi mi risaen bakegen long wok blong gavman. Long laef blong mi, mi no save fogetem asembli ya​—hem i givim moa risen long mi blong stap glad long Jeova. From we i no gat transpot we i go oltaem long aelan blong mifala, mifala i aot long aelan ya, blong faef manis haf. Asembli ya i tekem eit dei, mo program i stat long naen klok long moning gogo kasem naen klok long naet. Be mi neva kam taed, mo mi wet se niufala dei i kam. Mi gat jans blong tokbaot ol wok we mifala i mekem long St. Helena blong tu menet. Mi fraet tumas blong toktok long fored blong bigfala grup blong man, long Yankee Stadium mo long Polo Grounds.

Asembli ya i mekem se mi wantem moa blong kam wan paenia. Pablik Tok ya, “Kingdom Blong God i Rul​—?En Blong Wol i Klosap?,” i rili leftemap tingting blong mifala. Afta long asembli ya, mifala i visitim hedkwota mo faktri blong Sosaeti long Bruklin. Mi toktok wetem Brata Knorr, we i presiden blong Wajtaoa Sosaeti long taem ya, mo mi tokbaot wok we i stap gohed long St. Helena. Hem i talem se hem i wantem tumas blong visitim aelan ya wan dei. Taem mifala i gobak, mifala i karem ol tok blong asembli ya we mifala i rikodem mo ol sinema we man i no muf. Mifala i wantem serem samting ya wetem famle mo ol fren blong mifala.

Mi Kasem Mak Blong Fultaem Wok

Taem mi kasem St. Helena, oli askem long mi blong wok bakegen, from we i no gat narafala dokta blong tut long aelan ya. Be, mi eksplenem long olgeta se mi gat tingting blong joen long fultaem wok blong prij. Afta we mifala i tokbaot bisnes ya, oli agri se mi save wok tri dei nomo long wan wik, be pei blong mi i hae moa bitim taem ya we mi stap wok sikis dei. Tok blong Jisas i tru se: “Fastaem yufala i mas lukaot gud blong obei long God we i king blong yufala, mo blong folem ol stret fasin blong hem. Nao biaen hem i save givim olgeta samting ya tu long yufala.” (Matiu 6:​33) From we tufala leg blong mi oli no strong, i no isi nating long mi blong wokbaot long ol hil long aelan ya. Nating se i olsem, mi bin paenia blong 14 yia mo mi givhan long plante man long aelan ya blong oli lanem trutok. Yes, samting ya i givim fulap glad long mi.

Long 1961, gavman i wantem sanem mi long aelan blong Fiji, blong kasem wan trening blong tu yia, blong kam wan dokta blong tut we i gat ful diploma. Oli talem long mi se famle blong mi i save go wetem mi. Hemia wan samting we i traem mi bigwan. Be afta we mi skelem gud bisnes ya, mi talem no long olgeta. Mi no wantem livim ol brata blong wan longfala taem olsem, mo tu blong lego jans we mi gat blong wok wetem olgeta. Dokta we i mekem plan blong mi kasem trening ya, hem i harem nogud moa bitim ol narafala. Hem i talem se: “Sipos yu ting se en i klosap tumas, yu yu save yusum mane we bambae yu winim go kasem taem ya.” Be mi stanap strong long tingting blong mi.

Long yia we i kam biaen, Sosaeti i askem mi blong go long Saot Afrika blong joen long Kingdom Ministri Skul, wan skul we i tekem wan manis blong trenem ol elda long kongregesen. Mifala i kasem ol nambawan tijing we oli givhan long mifala blong kam moa gud long fasin blong lukaot long ol wok long kongregesen. Afta long skul ya, mi kasem moa trening taem mi wok wetem wan elda blong visitim ol kongregesen. Ale, bitim ten yia, mi wok olsem man blong givhan long seket elda long tufala kongregesen ya blong St. Helena. Biaen, sam narafala brata oli kam i naf blong givhan long mi, mekem se mifala i jenis long wok ya, wan afta narawan.

Long taem ya, mifala i aot long Jamestown, mifala i go long Levelwood, from we long ples ya, i nidim moa man blong talemaot gud nius. Mo mifala i stap long taon ya blong 10 yia. Long taem ya, mi wok had mo mi no gat i naf taem blong spel​—mi mekem wok blong paenia, mi wok tri dei blong gavman, mo mi lukaot long smol stoa blong salem kakae. Antap long hemia, mi stap bisi long ol wok blong kongregesen, mo mi wetem waef blong mi, mitufala i mas lukaot long famle blong mitufala we i gat fo pikinini. Blong mekem se i gat i naf taem blong spel, mi lego wok ya we mi mekem tri dei long wan wik, mo mi salem stoa blong mi. Ale, mi tekem ful famle blong mi, mifala i go long Cape Town, long Saot Afrika, blong spel tri manis. Biaen mifala i muf i go long Asenson Aelan, mo mifala i stap wan yia long ples aelan ya. Long taem ya, mifala i naf blong givhan long plante man blong oli kasem stret save blong trutok long Baebol.

Taem mifala i kasem St. Helena bakegen, mifala i gobak long Jamestown. Mifala i fiksimap wan haos we i joen long Haos Kingdom. Blong kasem ol samting long saed long bodi, mi mo boe blong mi, Jon, mitufala i bildim wan smol haos blong salem aeskrim, we haos ya, trak i save karem i go olbaot. Ale, mifala i salem aeskrim long ol faef yia we oli kam biaen. Smoltaem afta we mi statem bisnes ya, mi mekem aksiden wetem trak we i stap karem smol haos blong aeskrim. Smol haos ya i foldaon mo i kilim tufala leg blong mi. Samting ya i mekem se leg blong mi i ded, stat long tufala ni blong mi i go daon, mo i tekem tri manis blong mi kamgud bakegen.

Ol Rij Blesing We Mi Kasem mo We Bambae Mi Kasem Long Fiuja

Long ol yia we i pas, mifala i gat plante blesing​—plante moa risen blong stap glad. Wan long ol blesing ya, hemia trep we mifala i mekem i go long Saot Afrika blong joen long asembli long 1985 mo blong visitim niufala Betel, we long taem ya, oli stap bildimap yet. Wan narafala blesing hemia se mi mo boe blong mi, Jon, mitufala i bildim wan naesfala Haos Asembli klosap long Jamestown. Mifala i glad tu we tri pikinini boe blong mitufala oli elda, mo wan smol bubu blong mitufala i stap wok long Betel, long Saot Afrika. Mo mifala i rili glad, mifala i haremgud tumas blong givhan long plante man blong kasem stret save blong Baebol.

Eria we mifala i stap prij long hem, i no bigfala tumas, i gat samwe 5,000 man nomo. Nating se i olsem, fasin ya blong wok long sem teritori bakegen mo bakegen i karem nambawan frut. Smol man nomo oli no wantem lesin long mifala. Plante man oli save se ol man St. Helena oli frengud, mo ol man oli talem halo long yu nomata weples yu go long hem​—wokbaot long rod no yu stap draev long trak blong yu. Ekspiryens we mi kasem, hemia se moa we yu intres long ol man, moa we i isi blong prij long olgeta. Naoia, mifala i gat 150 pablisa, nating se plante long mifala oli aot, oli go long narafala ples.

From we ol pikinini blong mitufala oli kam bigman finis mo oli aot long haos blong mitufala, mi mo waef blong mi, mitufala i stap mitufala nomo bakegen, afta 47 yia we mitufala i mared. Lav we waef blong mi i gat long mi mo fasin blong hem blong sapotem mi, i givhan long mi blong gohed long wok blong Jeova long ol yia we oli pas, nating se i gat ol traem. Bodi blong mitufala i stap lusum paoa, be evri dei, mitufala i stap kasem niufala paoa long saed blong spirit. (2 Korin 4:​16) Mi mo famle blong mi mo ol fren, mifala i stap wet long nambawan fiuja, long taem we bambae bodi blong mi i kam gud bakegen bitim taem ya we mi gat 17 yia. Hop blong mi i blong haremgud long wan laef we i stret gud olgeta, mo samting we i moa impoten, hemia blong mekem wok blong Jeova God mo Jisas Kraes, King we hem i putumap, oltaem gogo i no save finis.​—Nehemaea 8:​10.

[Tok Blong Pija Long Pej 26]

George Scipio mo tri pikinini blong hem, we oli elda

[Tok Blong Pija Long Pej 29]

George Scipio wetem waef blong hem, Doris