?Yu Yu Stap Agensem Ol Fasin We i Nogud?
“Ol fasin we i nogud yu agens long olgeta.”—HIB. 1:9.
1. ?Jisas i tijim wanem long saed blong lav?
JISAS i mekem i klia long ol disaepol blong hem se i impoten tumas blong soemaot lav taem hem i talem se: “Mi mi givim wan niufala loa long yufala se, ‘Yufala i mas lavlavem yufala.’ Olsem we mi mi lavem yufala, ale long sem fasin, yufala i mas lavlavem yufala. Nao from we yufala i stap lavlavem yufala, bambae olgeta man oli luksave se yufala i man blong mi.” (Jon 13:34, 35) Jisas i givim oda long ol man blong hem blong oli gat lav ya we i pulum olgeta blong oli lego samting we olgeta nomo oli wantem, blong oli mekem i gud long narafala. Ol man bambae oli luksave olgeta from lav ya. Mo Jisas i talem long olgeta se: “Yufala i mas lavem ol enemi blong yufala, mo yufala i mas prea from olgeta we oli stap mekem i nogud tumas long yufala.”—Mat. 5:44.
2. ?Wanem samting we ol man blong Kraes oli mas lanem blong agensem?
2 Jisas i tijim ol disaepol blong hem long fasin blong lavem ol narafala. Be hem i tijim olgeta tu long sam samting we oli mas agensem. Baebol i tokbaot Jisas i se: “Yu yu laekem ol fasin we i stret, be ol fasin we i nogud yu agens long olgeta.” (Hib. 1:9; Sam 45:7) Hemia i soemaot se yumi mas laekem ol fasin we i stret, be i no hemia nomo. Yumi mas agensem sin tu, mo ol fasin we i nogud. I gud blong tingbaot se aposol Jon i talem klia se: “Man we i mekem sin, hem i brekem loa blong God, from we tok ya sin, i min se man i brekem loa.”—1 Jon 3:4.
3. ?Blong agensem ol fasin we i nogud, wanem ol haf blong laef we bambae yumi tokbaot long stadi ya?
3 Yumi ol Kristin, yumi mas askem kwestin ya se: ‘?Mi mi stap agensem ol fasin we i nogud?’ Yumi mas soemaot se yumi agensem ol fasin we i nogud. Naoia bambae yumi tokbaot olsem wanem blong soemaot fasin ya long fo defren haf blong laef: (1) tingting blong yumi long saed blong dring bitim mak, (2) tingting blong yumi long saed blong ol wok blong rabis spirit, (3) tingting blong yumi long saed blong rabis fasin blong man wetem woman, mo (4) tingting blong yumi long saed blong olgeta we oli laekem ol fasin we i nogud.
Yu No Mas Kam Slef Blong Ol Strong Dring
4. ?From wanem Jisas i fri blong toktok, taem hem i mas givim woning long fasin blong dring bitim mak?
4 Sam samtaem Jisas i dring waen from we hem i luksave se hemia i wan presen we God i givim. (Sam 104:14, 15) Be hem i neva yusum presen ya bitim mak, hem i no dring gogo i kam drong. (Prov. 23:29-33) Taswe, Jisas i fri blong toktok taem hem i mas tok agensem ol man we oli gat fasin ya blong drong. (Ridim Luk 21:34.) Man we i drong i save mekem ol narafala bigfala sin tu. From samting ya, Pol i raetem se: “Bambae yufala i no dring waen, gogo yufala i lusum hed. Samting ya bambae i spolem yufala nomo. Yufala i mas letem Tabu Spirit i kam fulap long yufala.” (Efes. 5:18) Mo hem i talem long ol olfala woman long kongregesen se “oli no mas woman blong drong.”—Taet. 2:3.
5. ?Olgeta we oli jusum blong dring ol strong dring, oli mas tingting gud long wanem kwestin?
5 Sipos yu jusum blong dring ol strong dring, yu mas tingting gud long ol kwestin ya: ‘?Mi mi gat sem tingting olsem Jisas long saed blong fasin blong dring bitim mak? ?Mi mi fri blong toktok sipos mi mas givim advaes long ol narafala long saed ya? ?Mi mi dring blong fogetem ol wari blong mi, mo blong mekem se ol trabol blong mi oli godaon? ?Evri wik mi stap tekem hamas glas? ?Mi mi mekem wanem taem wan man i talem se mi stap dring tumas? ?Mi mi kam kros mo mi tok nogud long hem?’ Sipos yumi kam slef blong ol strong dring, ol strong dring ya oli save spolem fasin blong yumi blong skelem gud ol samting, mo blong mekem ol desisen we oli waes. Ol man blong Kraes oli mas traehad blong no lusum fasin blong olgeta blong tingting gud.—Prov. 3:21, 22.
Yu No Mas Joen Long Ol Wok Blong Rabis Spirit
6, 7. (a) ?Jisas i mekem wanem long Setan mo ol rabis enjel blong hem? (b) ?From wanem ol wok blong rabis spirit i pulum tingting blong plante man long wol tede?
6 Taem Jisas i stap long wol, hem i strong blong agensem Setan mo ol rabis enjel blong hem. Setan i traem blong pulum hem blong i no moa holemstrong long Jehova, be Jisas i sakemaot tok blong hem. (Luk 4:1-13) Mo tu, i gat sam samting we oli save gat paoa long tingting mo fasin blong Jisas, mo we i no isi blong hem i luksave olgeta, be Jisas i luksave ol samting ya mo i blokem olgeta. (Mat. 16:21-23) Jisas i halpem sam man we hat blong olgeta i stret, blong oli no moa stap aninit long paoa blong ol rabis enjel.—Mak 5:2, 8, 12-15; 9:20, 25-27.
7 Afta we Jisas i kam King long 1914, hem i klinim heven taem hem i sakemaot Setan mo ol rabis enjel blong hem oli aot long heven. Frut we i kamaot se Setan i traehad moa bitim bifo, blong ‘lidim ol man long wol oli go krangke.’ (Rev. 12:9, 10) Taswe, yumi no sapraes se ol wok blong rabis spirit oli pulum tingting blong plante man long wol, mo se wok ya i stap kam antap moa. ?Yumi mas mekem wanem blong protektem yumi?
8. ?Long saed blong ol pleplei we yumi stap jusum, wanem ol kwestin we yumi wanwan yumi mas tingting gud long olgeta?
8 Baebol i talemaot klia ol trabol we man i save kasem sipos hem i joen long ol wok blong rabis spirit. (Ridim Dutronome 18:10-12.) Tede, Setan mo ol rabis enjel oli yusum ol muvi, ol buk, mo ol kompiuta gem we oli leftemap ol wok blong rabis spirit, blong spolem tingting blong ol man. Taswe, taem yumi jusum wan pleplei, yumi wanwan i mas tingting gud long ol kwestin ya: ‘?Long ol manis we oli pas, mi mi stap jusum ol muvi, ol program blong televisin, ol kompiuta gem, ol buk, mo ol komik we oli tokbaot ol wok blong rabis spirit? ?Mi mi kasem save se i impoten tumas blong sakemaot ol samting we oli leftemap wok blong rabis spirit, no mi mi ting se ol samting ya oli oraet nomo? ?Mi mi stap tingbaot se Jehova bambae i tingting olsem wanem long pleplei ya we mi jusum? ?Sipos mi letem ol rabis wok ya blong Setan i gat paoa long laef blong mi, lav we mi gat long Jehova mo long ol stret rul blong hem, bambae i pulum mi blong mi tekem wan aksen kwiktaem blong stretem samting ya, mo blong mi no moa letem ol rabis wok ya oli kambak long laef blong mi?’—Wok 19:19, 20.
Yu Mas Lesin Long Woning Blong Jisas Long Saed Blong Rabis Fasin Blong Man Wetem Woman
9. ?Man we i stat blong laekem ol fasin we i nogud, hem i mekem wanem?
9 Jisas i folem gud rul blong Jehova long saed blong klin fasin blong man wetem woman. Hem i talem se: “?Ating yufala i no ridim tok blong Baebol? Baebol i talem se, ‘God we i mekem olgeta samting, fastaem, hem i mekem tu man nomo, wan we i man, wetem wan we i woman. Nao hem i talem se, “From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.”’ Mo Jisas i gohed i talem se, ‘Nao from samting ya, tufala i no moa tu, tufala i olsem wan bodi nomo. Mo from we God i joenem tufala olsem, man i no mas brekem mared blong tufala.’” (Mat. 19:4-6) Jisas i save se samting we yumi luk wetem ae blong yumi, i save mekem i gud long hat blong yumi, no i save spolem hat blong yumi. Long Bigfala Toktok blong hem antap long Hil, hem i talem se: “Yufala i harem finis we ol tija oli talem bifo se, ‘Yufala we i mared, bambae yufala i no mas go slip wetem narafala woman.’ Be mi mi talem long yufala, se man we i luk wan woman, nao i wantem hem tumas, i olsem we hem i slip wetem woman ya finis.” (Mat. 5:27, 28) Olgeta we oli no wantem lesin long woning blong Jisas, oli stat blong laekem ol fasin we i nogud.
10. ?Yu save tokbaot wan stori we i soemaot se man i save kam fri long ol doti pija?
10 Setan i yusum ol doti pija, blong pulum man blong slip olbaot. Fasin blong laef long wol ya i fulap long ol doti pija olsem. Olgeta we oli stap wajem ol doti pija ya, oli faenem se i had tumas blong oli fogetem ol rabis pija ya . Mo tu oli save kam slef blong ol doti pija ya. Yumi save tingbaot samting we i hapen long wan Kristin brata. Hem i talem se: “Mi mi stap wajem ol doti pija long fasin haed. Long tingting blong mi, mi wokem wan kaen laef we i defren olgeta long laef blong mi taem mi stap mekem wok blong Jehova. Mi mi save se samting we mi mekem i rong, be mi tingting se God i agri yet long wok we mi mekem blong hem.” ?Wanem samting i jenisim tingting blong brata ya? Hem i talem se: “Nating se hemia wan samting we i had moa long mi blong mekem, be mi go tokbaot problem blong mi long ol elda.” Sloslo brata ya i lego rabis fasin ya. Hem i talem se: “Afta we mi sakemaot nogud fasin ya long laef blong mi, mi harem se tingting blong mi i klin.” Olgeta we oli no laekem ol fasin we i nogud, oli mas lanem blong agensem ol doti pija.
11, 12. ?Taem yumi jusum wan miusik, yumi save soemaot olsem wanem se yumi agensem ol fasin we i nogud?
11 Ol miusik mo ol toktok blong ol singsing tu oli save gat bigfala paoa long tingting mo long hat blong yumi. Miusik i wan presen we i kam long God, mo longtaem finis i kam, ol man blong tru God oli yusum miusik long wosip blong olgeta. (Eks. 15:20, 21; Efes. 5:19) Be, rabis wol ya blong Setan i wokem ol miusik we oli leftemap rabis fasin blong man wetem woman. (1 Jon 5:19) ?Yu yu save mekem wanem blong luksave sipos miusik we yu stap lesin long hem i stap spolem yu, no nogat?
12 Maet fastaem, yu save tingbaot ol kwestin ya: ‘?Ol singsing we mi stap lesin long olgeta, oli leftemap fasin blong kilim narafala i ded? ?Fasin blong slip wetem man no woman blong narafala? ?Fasin blong slip tugeta bifo mared? ?Mo fasin blong tok nogud blong spolem nem blong narafala? ?Sipos mi mas ridim toktok blong sam long ol singsing ya long wan man, bambae man ya i kasem save se mi mi agensem ol fasin we i nogud? ?No, ol toktok ya oli soemaot se hat blong mi i doti?’ Sipos yumi agensem ol fasin we i nogud, be i no stret we long semtaem, yumi singsing blong leftemap ol nogud fasin ya. Jisas i talem se: “Ol tok ya we man i talemaot long maot blong hem, hem i kamaot long tingting [“hat,” NW] blong hem fastaem. Mo samting ya nao i save mekem man i doti long fes blong God, from we long tingting [hat] blong man nao, ol rabis tingting olsem, oli save kamaot. Ol tingting olsem oli save mekem man i kilim man i ded, mo man i mekem i nogud wetem woman, mo i save mekem ol narafala fasin nogud olsem. Mo i save mekem man i stil, mo i giaman, mo i tok nogud blong spolem nem blong narafala man.”—Mat. 15:18, 19; yu skelem wetem Jemes 3:10, 11.
Yu Mas Gat Tingting Blong Jisas Long Saed Blong Ol Man We Oli Laekem Fasin We i Nogud
13. ?Wanem tingting blong Jisas long ol man we oli stronghed from we oli mekem sin oltaem?
13 Jisas i talem se hem i kam blong singaot ol sinman, no ol man nogud, blong oli tanem tingting blong olgeta. (Luk 5:30-32) ?Be wanem tingting blong hem long ol man we oli stronghed from we oli mekem sin oltaem? Jisas i givim strong woning long yumi, blong ol man olsem oli no spolem yumi. (Mat. 23:15, 23-26) Mo tu, hem i talem klia se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed. Long Lasdei [taem God i mekem jajmen blong hem i kamtru], bambae plante man oli save singaot long mi se, ‘Masta, Masta. Long nem blong yu, mifala i talemaot ol tok we God i givim long mifala. Mo long nem blong yu, mifala i ronemaot plante devel. Mo long nem blong yu, mifala i mekem plante merikel. ?Olsem wanem long mifala?’” Be Jisas bambae i sakemaot ol man ya we oli stap mekem ol fasin we i nogud mo we oli no tanem tingting blong olgeta, i se: “Yufala i gowe long mi.” (Mat. 7:21-23) ?From wanem hem i jajem ol man ya olsem? From we ol man ya oli no ona long God mo oli spolem ol narafala long ol nogud fasin blong olgeta.
14. ?From wanem kongregesen i mas putumaot ol man we oli no tanem tingting blong olgeta from sin blong olgeta?
14 Tok blong God i talem se kongregesen i mas putumaot ol man we oli no tanem tingting blong olgeta from sin blong olgeta. (Ridim 1 Korin 5:9-13.) I gat tri risen from wanem kongregesen i mas mekem olsem: (1) blong mekem se nem blong Jehova i stap tabu, (2) blong mekem se rabis fasin blong man we i mekem sin, i no spolem kongregesen, mo (3) blong givhan long man ya we i mekem sin, blong hem i tanem tingting blong hem from sin blong hem.
15. ?Sipos yumi holemstrong long Jehova, wanem ol impoten kwestin we yumi mas tingting gud long olgeta?
15 ?Olsem wanem? ?Yumi gat tingting blong Jisas long saed blong ol man we oli gohed nomo blong mekem ol fasin we i nogud? Yumi mas tingting gud long ol kwestin ya: ‘?Bambae mi mi jusum blong joen oltaem wetem wan man we kongregesen i putumaot hem, no we hem nomo i talem se hem i no moa wantem joen long Kristin kongregesen? ?Olsem wanem sipos man ya i stret famle blong mi be hem i no moa stap wetem mifala long haos?’ Hemia i save kam wan bigfala samting we i traem fasin blong yumi blong laekem ol fasin we i stret, mo fasin blong yumi blong holemstrong long God.
16, 17. ?Wanem samting we i mekem wan Kristin mama i harem nogud tumas? ?Wanem i givhan long hem blong folem rul long saed blong ol man we kongregesen i putumaot olgeta from we oli no tanem tingting blong olgeta?
16 I gud yumi tingbaot stori blong wan sista. Sista ya i gat wan boe blong hem we i bigman finis, mo we i lavem Jehova. Be biaen, boe ya i jusum blong mekem ol fasin we i nogud, mo hem i no tanem tingting blong hem from rabis fasin blong hem. Ale, kongregesen i putumaot hem. Sista blong yumi i lavem Jehova, be hem i lavem boe blong hem tu, mo hem i faenem i had tumas blong obei long loa blong Baebol we i talem se hem i no mas joen wetem boe blong hem.
17 ?Sipos yu gat janis, bambae yu yu givim wanem advaes long sista ya? Wan elda i gat janis blong givhan long sista ya, blong i luksave se Jehova i kasem save we hem i harem nogud tumas olsem. Brata ya i askem long sista ya blong i tingbaot olsem wanem Jehova i harem nogud bigwan, taem sam spirit pikinini blong hem oli mekem stronghed nao oli lego hem. Blong mekem sista ya i tingting, elda ya i talem se Jehova i save se taem kongregesen i putumaot wan brata no wan sista, olgeta we oli laekem brata no sista ya, bambae oli harem nogud tumas. Be nating se i olsem, Jehova i talemaot se kongregesen i mas putumaot ol man we oli no tanem tingting blong olgeta from sin blong olgeta. Sista ya i putum ol toktok ya long hat blong hem, mo hem i holemstrong long Jehova, hem i folem rul we Jehova i putumap long saed blong olgeta we kongregesen i putumaot olgeta.a Fasin blong holemstrong olsem i mekem Jehova i glad tumas.—Prov. 27:11.
18, 19. (a) ?Taem yumi no moa joen nating wetem wan man we i stap mekem ol fasin we i no stret, yumi soemaot se yumi agensem wanem? (b) ?Wanem frut i kamaot taem yumi holemstrong long God mo long rul blong hem?
18 Sipos yu tu yu stap gotru long wan hadtaem olsem, plis yu mas tingbaot se Jehova i kasem save long samting ya. Taem yu no moa joen nating wetem man we kongregesen i putumaot hem, no we hem nomo i talem se hem i wantem aot long kongregesen, yu stap soemaot se yu agensem ol tingting mo ol fasin we oli lidim man ya blong i kam olsem. Be yu stap soemaot tu se yu lavem hem, mo yu wantem mekem samting we yu save se i gud long hem. From we yu holemstrong long Jehova, i gat bigfala janis se man ya bambae i tanem tingting blong hem mo i kambak long Jehova.
19 Wan Kristin sista we fastaem kongregesen i putumaot hem mo biaen i tekembak hem, i raetem se: “Mi mi glad se Jehova i lavem ol man blong hem tumas, nao hem i wantem se ogenaesesen blong hem i stap klin. Maet ol man afsaed long kongregesen oli luk se fasin ya i strong tumas, be hemia wan samting we Jehova i mas mekem mo samting ya i soemaot se hem i lavem ol man tru.” ?Olsem wanem? ?Yu yu ting se Kristin sista ya i save gat tingting olsem sipos ol memba blong kongregesen, wetem ol famle blong hem tu, oli joen oltaem wetem hem long taem ya we kongregesen i putumaot hem? Taem yumi sapotem rul blong Baebol long saed blong olgeta we kongregesen i putumaot olgeta, yumi soemaot se yumi laekem ol fasin we i stret mo yumi luksave se Jehova i gat raet blong talem wanem ol fasin we i stret we yumi mas folem.
Yu Mas “Agens Long Ol Rabis Fasin”
20, 21. ?From wanem i impoten we yumi lanem blong agensem ol fasin we i nogud?
20 Aposol Pita i givim woning se: “Yufala i mas lukaot gud. Yufala i mas rere.” ?From wanem? “From we enemi ya blong yufala Setan, hem i stap raon long yufala oltaem. Hem i olsem wan laeon we i stap singaot bigwan, i stap lukaot man blong i kakae.” (1 Pita 5:8) ?Olsem wanem ? ?Yu nao yu man ya we Setan i stap lukaot blong i kakae? Hemia i dipen nomo long fasin blong yu blong agensem ol fasin we i nogud.
21 I no isi blong lanem blong agensem ol samting we oli nogud. Yumi bon wetem sin, mo yumi laef long wan wol we i pulum yumi blong mekem samting we tingting blong yumi nomo i wantem. (1 Jon 2:15-17) Be taem yumi folem fasin blong Jisas Kraes, mo yumi lanem blong lavem Jehova God wetem fulhat blong yumi, yumi save gat fasin ya blong agensem ol fasin we i nogud. Yumi mas gat strong tingting blong “agens long ol rabis fasin.” Mo yumi mas trastem fulwan se Jehova “i stap lukaot gud long . . . olgeta [ol man blong hem], mo taem we olgeta oli stap long paoa blong ol man nogud, hem i stap tekemaot olgeta.”—Sam 97:10.
[Futnot]
a Yu lukluk Wajtaoa blong Jenuware 15, 2007, long pej 17-20 (Franis mo Inglis).
?Bambae Yu Yu Ansa Olsem Wanem?
• ?Wanem samting bambae i givhan long yumi blong jekem gud tingting blong yumi long saed blong ol strong dring?
• ?Wanem sam samting we yumi mas mekem blong yumi no joen long ol wok blong rabis spirit?
• ?From wanem i wan denja blong wajem ol doti pija?
• ?Yumi soemaot olsem wanem se yumi agensem ol fasin we i nogud, taem kongregesen i putumaot wan we yumi laekem hem tumas?
[Tok blong pija long pej 29]
?Sipos yu jusum blong dring ol strong dring, wanem sam samting we yu mas tingbaot?
[Tok blong pija long pej 30]
Yu mas lukaot gud long ol pleplei we Setan i stap yusum blong spolem yu
[Tok blong pija long pej 31]
?Man we i stap wajem ol doti pija, hem i stat blong laekem wanem?