STORI BLONG FRAN PEJ | ?FROM WANEM YUMI NO MAS GIAMAN MO STIL?

?Giaman Mo Stil i Save Mekem Wanem Long Yu?

“Sipos yu giaman smol, yu save winim plante trabol.”—Samanta blong Saot Afrika.

?Yu tu yu gat tingting ya? Yumi evriwan i kasem trabol samtaem we i pulum yumi blong giaman, olsem Samanta. Samting we yumi mekem long taem ya i soemaot wanem fasin we yumi ting se i impoten. Maet yu ting se i oraet nomo blong giaman, i bitim we yu sem long fored blong ol man. Be taem ol narafala oli faenemaot se yu giaman, bambae oli gat nogud tingting long yu. Yu traem tingbaot samting we i save hapen.

OLI NO MOA TRASTEM YU

Blong fren gud wetem narafala, yu mas trastem hem mo hem i mas trastem yu. Be i tekem taem blong yutufala i trastem yutufala. Sipos yutufala i spenem taem tugeta, mo yutufala i tok tru oltaem, mo wan i tingbaot narawan, sloslo bambae yutufala i trastem yutufala. Be sipos yu giaman long hem, bambae hem i no moa trastem yu. Long taem olsem, i had blong mekem se hem i trastem yu bakegen.

?Samtaem, wan gudfala fren i giaman long yu? ?Yu harem olsem wanem? Ating yu harem nogud, maet yu harem se hem i salem yu stret. Plante man oli harem olsem. I tru nomo se taem wan man i giaman, hem i spolem gudfala fasin we hem i gat wetem ol fren blong hem.

TAEM YU JOEN WETEM MAN WE I GIAMAN, I ISI NOMO BLONG YU GIAMAN

Robert Innes, we i wan tija long Yunivesiti blong California, i talem se: “Taem yu joen wetem man we i giaman, i isi nomo blong yu tu yu giaman.” Taswe, giaman i olsem wan sik we i save pas i go long ol man. Taem yu joen plante wetem ol man blong giaman, i isi nomo blong yu kam wan man blong giaman.

?Yu save mekem wanem blong stap longwe long ol fasin blong giaman mo stil? Baebol i save givhan long yu. Plis ridim ol vas long nekis pej.

Ol Defren Fasin Blong Giaman Mo Stil

Giaman Toktok

?HEM I OLSEM WANEM? Yu talem tok we i no tru long man we i gat raet blong save samting we i tru. Maet yu givim rong tingting long hem, maet yu no talem sam impoten samting, no yu ademap sikspen.

SAMTING WE BAEBOL I TALEM: “Yu no mas giaman, mo yu no mas yusum ol toktok we i save lidim man i gorong. Oltaem, yu mas talem ol trutok nomo.” (Ol Proveb 4:24) “Yufala i mas finis long ol giaman toktok . . . Yufala i mas tok tru nomo long yufala.”—Efesas 4:25.

Spolem Nem Blong Narafala

?HEM I OLSEM WANEM? Yu talem tok we i nogud blong spolem nem blong narafala.

SAMTING WE BAEBOL I TALEM: “Rabis man i save go olbaot blong statem trabol nomo, mo man we i stap go talem ol tok olbaot we i spolem nem blong narafala man, hem i save mekem ol man we oli fren gud oli seraot.” (Ol Proveb 16:28) “Sipos i no moa gat faeawud, bambae faea i ded, mo . . . sipos i no moa gat man i stap talem ol tok olbaot blong spolem narafala man, rao tu bambae i finis.”—Ol Proveb 26:20.

Ravem Man

?HEM I OLSEM WANEM? Yu talem tok we i no tru blong trikim man mo stilim hem.

SAMTING WE BAEBOL I TALEM: “Sipos wan man blong wok blong yu i wan puaman, we i stap trabol, bambae yu no mas ravem hem.” (Dutronome 24:14, 15) “Yufala i no mas mekem trik blong stilim man long wan fasin we hem i no save, mo yufala i no mas ravem man olsem.”—Levitikas 19:13.

Stil

?HEM I OLSEM WANEM? Yu tekem samting blong narafala we yu no askem fastaem.

SAMTING WE BAEBOL I TALEM: “Man we i man blong stil, hem i mas lego fasin ya. Hem i mas wok had long stret fasin, blong i save gat plante samting blong givhan long hem, nao bambae i save givhan long ol puaman tu.” (Efesas 4:28) “Man we i stap stil, mo man we i wantem plante samting tumas, . . . mo man we i stap mekem ol bisnes blong stilim mane, bambae oli no save go insaed . . . long niufala wol.” —1 Korin 6:9, 10.