Long Taem Blong Disasta

Andru blong Siera Leon i talem se: “Tingting blong mifala i foldaon olgeta. Bigfala wota i ron mo sofmad i berem evri samting blong mifala.”

Deved blong Vejin Aelan i talem se: “Taem hariken i pas, mifala i gobak long ples blong mifala, be i no moa gat wan samting i stap. Mifala i sek nogud, mo mifala i no moa save toktok. Gel blong mi i foldaon long tufala ni blong hem mo i krae.”

SIPOS yu bin pastru long wan disasta, bambae yu kasemsave filing we plante man oli gat long taem ya: oli sek nogud, oli no wantem bilivim, tingting i fasfas, oli wari, mo oli luk ol rabis drim taem oli slip. Plante oli taed tumas, tingting i foldaon, mo oli wantem ded nomo.

Sipos yu bin lusum evri samting long wan disasta, maet tingting blong yu tu i foldaon. Maet yu harem se laef i blong nating nomo. Be Baebol i soemaot se laef i no blong nating nomo, mo yu gat hop long wan gudfala fiuja.

TRUTOK BLONG BAEBOL I GIVIM HOP

Prija 7:8 (NW) i talem se: “En blong wan samting i moa gud, i bitim stat blong hem.” Afta long wan disasta, maet fastaem yu harem se i no gat hop. Be taem yu wok had blong mekem evri samting i kam gud bakegen, sloslo yu harem gud.

Baebol i tokbaot wan taem we “bambae i no moa gat man i krae, mo i no moa gat man i singaot blong man i kam givhan long hem.” (Aesea 65:19) Samting ya bambae i hapen taem Kingdom blong God i rulum fulwol mo i mekem i kam paradaes. (Ol Sam 37:11, 29) Bambae i no moa gat ol disasta we oli mekem yumi harem nogud, from we God ya we i gat olgeta paoa i promes se: “Ol samting ya we i hapen bifo, bambae ol man oli no moa save tingbaot stori blong olgeta.”—Aesea 65:17.

Traem tingbaot: God i mekem plan se bambae ‘yu kasem samting we tingting blong yu i stap long hem,’ hemia wan gudfala laef aninit long rul blong kingdom blong God. (Jeremaea 29:11) Sipos yu kasem save moa long promes ya, bambae laef blong yu i no blong nating nomo. Sali we yumi tokbaot finis, i talem se: “Sipos yu tingting long ol gudfala samting we Kingdom blong God bambae i mekem long fiuja, sloslo yu save fogetem ol trabol we yu pastru long hem finis, mo yu gat paoa blong fesem ol trabol we yu kasem evri dei.”

I gud yu kasem save moa long samting we Kingdom blong God bambae i mekem long ol man. Olsem nao, taem wan disasta i spolem yu, yu save gat strong tingting yet se laef i no blong nating nomo. Bambae yu putum tingting blong yu long wan gudfala fiuja we i no moa gat ol disasta. Go kasem taem ya, Baebol i givim ol gudfala advaes we i save givhan long yu long taem blong disasta. Traem tingbaot sam long ol advaes ya.

Advaes Blong Baebol

Tekem taem blong spel.

‘Yufala i spel smol.’—Mak 6:31.

Ol man blong stadi oli talem se taem yu kasem wan bigfala trabol mo “yu no slip gud . . . bambae yu harem nogud moa, mo tingting i save foldaon isi nomo.” Taswe, yu mas traem spel gud.

Tokbaot wetem narafala.

‘Taem man i stap wari, tingting blong hem i hevi, be gudfala tok blong fren blong hem i save leftemap tingting bakegen.’—Ol Proveb 12:25.

I gud yu toktok long wan famle o wan fren we yu trastem hem. Hem i save lesin mo talem ol toktok we i leftemap tingting blong yu, mo givhan long yu olsem yu nidim.a

Tingbaot taem we bambae yu harem gud.

“[God] i promes se bambae i gat niufala skae mo wan niufala wol we stret fasin nomo bambae i stap long tufala. Mo yumi stap wet long ol samting ya.” —2 Pita 3:13.

a Sipos wan man i gohed blong wari mo harem nogud longtaem tumas, i gud hem i go pas long hospital.