Talemaot Gud Nyus—Wetem Buk Ya Tok Blong God
1 Pol i raetem wan leta long wan fren we i stap mekem wok blong talemaot gud nyus olsem hem, mo hem i talem se: “Olgeta tok ya blong Baebol i kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim ol man long ol stret fasin.”—2 Tim. 3:16.
2 Yumi ol pablisa blong gud nyus tede, yumi agri olgeta wetem tok ya. Yumi save gud we Baebol i rili tok blong God. Yumi agri blong folem ol rul blong buk ya long olgeta fasin blong laef blong yumi. (Sam 119:105; Jon 17:17) ?Be olsem wanem yumi save halpem ol narafala man blong olgeta tu oli luksave we Baebol i rili tok blong God, mo blong oli obei long ol rul blong hem long laef blong olgeta?
Olsem Wanem Blong Mekem
3 Long manis Maj, bambae i fastaem we yumi seremaot buk ya Baebol—?Tok Blong God, No Tok Blong Ol Man? Yumi wantem halpem ol man blong oli trastem Baebol. Yumi wantem soemaot long olgeta wanem blesing oli save kasem sipos oli folem ol advaes blong Baebol we i kamaot long God. !Bambae wok ya blong yumi i nambawan!
4 ?Olsem wanem blong givimaot buk ya? Taem yumi talem halo finis long ol man, yumi save tokbaot Proveb 14:12. Yumi save talem se blong harem gud long laef blong yumi, yumi mas kasem sam gudfala advaes. Sipos yumi kasem sam rul we i no waes, bambae laef blong yumi i save bagarap. Biaen, yumi save ridim Proveb 2:6, 7. Vas ya i talem se Jeova nomo i stampa blong tru fasin waes. Taem yumi toktok wetem man ya, yumi save talem long hem se yumi mas ridim Baebol blong faenem waes blong God. Nao yumi save talem se: “Buk ya i soemaot we Baebol nomo i stampa blong ol gudfala advaes we yumi nidim blong winim ol trabol. Plis, yu save lukluk long tok ya we i stap long pej 5, long haf 2 blong hem. [Ridim haf 2, mo haf 4 tu, sipos yufala i gat naf taem] Bambae buk ya i halpem yu blong pruvum we Baebol i rili Tok blong God. Mo tu, buk ya i soemaot we ol gudfala advaes blong Baebol oli save halpem yumi blong harem gud long olgeta fasin blong laef blong yumi. Yu save kasem wan blong 130 VT nomo.”
5 Samtaem wan man i bisi, no hem i talem se hem i no intres long samting ya. Mo sam man oli talem se oli no wantem mekem wan bigfala toktok wetem yu long kwestin ya. Ale, yu yu save mekem wan smol tok olsem: “Ating yu luksave we ol man long wol oli stap kasem plante trabol.” Nao yu yu save ridim faswan haf blong japta 1. Mo yumi save letem man i ansa long kwestin we i stap long en blong haf ya. Nao yumi save talem se: “Baebol i talem se bambae i no longtaem, God hem wan i stretem olgeta trabol we ol man oli stap kasem tede. Buk ya i soemaot we Baebol i rili tok tru, from we hem i prapa Tok blong God, hem i no tok blong ol man. Mi mi glad blong givim wan buk olsem long yu. Praes blong hem i 130 VT nomo.”
Plante Man i Nidim Buk Ya
6 Nyufala buk ya Baebol—?Tok Blong God, No Tok Blong Ol Man? i save halpem ol man we i ridim hem, blong oli save we Baebol i rili Tok blong God. Sipos tingting blong olgeta i no gyaman taem oli ridim buk ya, ating oli save kam long rod ya we i save givim laef blong olwe long olgeta. Taswe yumi mas traehad blong seremaot buk ya long plante man.
7 Yumi evriwan i mas ridim buk ya fastaem, bifo we manis maj i stat. Yumi wantem holem olgeta jans blong givimaot buk ya Tok Blong God long olgeta man, blong plante man oli save ridim hem.