Baebol—Buk Blong God Blong Lidim Ol Man
1 Kam kasem naoia, ol man oli bin prentem bitim 4 bilyan Baebol long 2,100 lanwis, mekem se 90 pesen blong olgeta man long wol oli save kasem Tok blong God. Nating se i olsem, ol man oli stap hanggri yet “blong harem tok blong Jeova.” (Emos 8:11) Plante man we oli gat wan Baebol oli no ridim, no maet oli no kasem save long ol tok insaed long hem. ?Olsem wanem yumi save pusum olgeta blong ridim Baebol, antap moa, ol tijing blong Jisas?
2 Long Desemba, yumi seremaot buk ya Man We i Hae Moa Long Olgeta Man. Bambae yumi soemaot bigfala tangkyu from presen ya we Jeova i givim, sipos yumi glad blong givhan long ol man blong oli kasem bilif long Baebol olsem buk blong God blong lidim ol man. Taem yumi stap prij long olgeta haos wanwan no tekem jans blong prij, i gud blong ridimaot ol vas stret long Baebol.
3 Yu save statem wan storeyan wetem traket ya “?From Wanem Yu Save Trastem Baebol?” Maet yu talem se:
◼ “Nating se 90 pesen blong ol man long wol oli save ridim ol tijing blong Jisas long Baebol, smol nomo oli save long olgeta. ?Yu ting se wanem nao i stap blokem olgeta?” Ale, ridim haf wan mo tu blong traket, wetem 2 Timote 3:16. Askem man blong haos blong karem Man We i Hae Moa buk blong stret praes blong hem. Sipos hem i no wantem, askem hem blong ridim traket. Soem laswan smol stampa tok long hem, “Talemaot Fyuja.”
4 Taem yu gobak long ol man we yu bin livim traket ya wetem olgeta “?From Wanem Yu Save Trastem Baebol?” maet yu traem samting ya:
◼ Talem bakegen nem blong yu, mo ridim tufala laswan haf blong traket. Askem long man blong haos sipos hem i bin tingbaot se yumi save gat jans blong kasem laef blong olwe long wol ya. Afta we hem i ansa, yu save talem se: “Ol Wetnes blong Jeova oli sua se olgeta profet tok blong Baebol bambae oli kamtru fulwan, wetem olgeta tu we oli talemaot wan nambawan fyuja blong ol man we oli mekem samting we God i wantem.” Soem pija long pej 13 blong buklet ya Samting We God i Wantem, nao gobak long stadi 5, mo talem se yu glad blong tokbaot ansa blong ol kwestin we oli stap ya. Long rod ya, yu save statem wan Baebol stadi.
5 Sipos no, maet yu yusum hemia long faswan taem we yu mitim man:
◼ “Mifala i stap askem long ol man sipos oli agri se Jisas Kraes i hae moa long olgeta man we oli bin laef long wol ya. [Wet long ansa.] I tru se, plante man oli bin gat paoa long laef blong ol man long wol, mo samfala oli bin mekem sam gudfala samting blong givhan long laef blong ol man. Be makemgud wanem samting i mekem Jisas i defren long olgeta ya. [Ridim Jon 17:3.] I no gat wan narafala man we hem i naf blong givim laef we i no save finis long ol man.” Nao askem man blong haos blong karem buk blong stret praes blong hem. Talem long hem se yu glad blong kambak bakegen, blong soem long hem from wanem yumi save trastem promes ya blong laef we i no save finis.
6 Taem yu gobak long wan man we yu bin livim “Man We i Hae Moa” buk wetem hem, yu save talem se:
◼ “Evri samting we Jisas i bin talem, i tru nomo. ?Yu yu agri long samting ya? [Wet long ansa.] Tede, yumi luksave se ol samting we hem i bin talemaot long saed blong taem blong yumi, oli stap kamtru. Taem Jisas i stap long wol ya, hem i tokbaot ol samting we oli mas kamaot jes bifo we wol ya i finis. Mo tu, hem i talem long ol disaepol blong hem se, oli save haremgud tumas from we ol samting ya oli soem se Kingdom blong God i kolosap.” Nao yu save storeyan smoltaem long japta 111 blong Man We i Hae Moa buk, long saed blong ol samting we oli olsem saen blong soemaot taem we Jisas i kambak mo i stap. Biaen, yu save soem laswan japta, we i tokbaot ol blesing we bambae oli kamaot aninit long rul blong Kingdom. Sipos man blong haos i intres, askem hem sipos i wantem wan stadi long Save buk no long Samting We God i Wantem buklet.
7 Sipos i gat toktok i kamaot long wok no long skul from we yu no joen long ol kastom blong Krismas, maet yu tekem jans ya blong soemaot buk:
◼ “Mi no stap joen long lafet blong Krismas, from we lafet ya i no givim ona long Jisas olsem man ya we i save sevem yumi, wan nomo we i naf blong finisim ol faet mo trabol bitwin long ol laen blong man. [Talem no ridim ol tok blong Ol Wok 4:12.] Jisas i no moa stap olsem wan bebi, be naoia hem i wan king we i stap rul. Buk ya Man We i Hae Moa Long Olgeta Man, i tokbaot ol tijing mo merikel blong Jisas, mo i soem olsem wanem bambae hem i finisim ol trabol we i mekem ol man oli safa.” Nao soem pija long japta 133, mo ridim namba tu haf long nekis pej.
8 Taem yu gobak, yu save talem ol isi tok ya nomo se:
◼ “Mi mi wantem soem long yu sam blesing we yumi save kasem long fyuja aninit long rul blong Kraes.” Eksplenem plan blong yumi blong stadi Baebol wetem ol man, we oli no pem. Talem se yu glad blong soem long hem naoia nomo, olsem wanem yumi mekem stadi ya.
9 Prea long Jeova blong askem hem blong blesem ol traehad blong yu blong pulum ol man blong ridim Tok blong Hem Baebol, buk ya we i holem ol tijing mo store blong ol merikel blong Jisas, oli stapgud kam kasem taem blong yumi.