Ansa Long Wan Kwestin
● ?Olsem wanem yumi mas tingbaot sam kaset we oli no kamaot long Sosaete?
Sosaete i yusum plante rod blong givim plante kakae long yumi long saed blong speret. Hem i wokem sam kaset tu, olsem ol kaset blong Baebol, ol kaset blong sam buk blong sosaete olsem My Book of Bible Stories, Listen to The Great Teacher, mo Wajtaoa tu i kamaot long kaset long engglis. (Bambae hem i kamaot long franis tu.) Mo tu, i gat ol Kingdom Melodies, mo sam drama. Be yumi mas lukaot gud taem i gat sam kaset we oli goraon long ol brata, mo fasin blong olgeta i kolosap sem mak long fasin blong kaset blong Sosaete, be oli no kamaot long Sosaete. From we yumi olsem brata mo sista, mo yumi trastem ol narafala brata, samtaem sam brata oli save lesin long sam kaset olsem, be oli no save se ol kaset ya oli kamaot olsem wanem.
Long sam ples, sam Wetnes i wokem sam kaset blong tijim Baebol long ol pikinini, nao oli mekem pablisiti mo oli salemaot olgeta, mo ol kaset ya oli goraon long ol kongregesen. Ating sam brata i save ting se i oraet nomo, from we gudfala tingting nomo i pulum olgeta blong mekem olsem. Be hemia wan fasin blong yusum ol fasin blong yumi blong fren gud tugeta, blong mekem bisnes from.
Samtaem i gat sam kaset we i goraon long ol brata, mo oli givim sam tok we i no rili stret, no oli talem sam nyus blong pulum tingting blong ol brata nomo. Sipos i olsem, i waes blong folem wan advaes blong Pol we i stap long 2 Timote 3:14. Pol i jes talem long Timote se hem i mas lukaot long ol man blong gyaman, nao hem i talem se yumi mas save gud wanem man i stap tijim yumi. Yumi no mas lesin long sam tok we oli no “holem tok ya we oli raetem finis” long Baebol mo long ol buk we “slef we i stret mo waes” i givim long yumi.—1 Kor. 4:6; Mat. 24:45-47.
Maet samfala oli putum sam tok we oli mekem long ol miting long kaset, no sam tok we oli mekem long ol asembli. Be oli mekem blong olgeta nomo i lesin, no blong halpem sam brata no sista we oli no gat rod blong kam long ol miting no ol asembli. Be wan brata i no mas mekem plante kopi blong wan kaset blong seremaot olgeta long plante brata, no blong salemaot olgeta. Yumi mas yusum gud olgeta samting we Jeova i givim long yumi long rod blong ogenaesesen blong hem, from we ol samting ya oli rili save leftemap tingting blong yumi mo mekem yumi strong long saed blong speret.—Ridim kmE 6/77 p.4; 9/87, p.4; no kmF 9/77, p. 8; 6/80, p. 4; 9/87, p. 4.