Memoriol—Wan Kristin Lafet
1 Long naet blong Naesan 14, long yia 33. K. T, Jisas i stanemap Memoriol, mo hem i talem long ol aposol blong hem se: “Yufala i mas stap mekem samting ya blong tingbaot mi bakegen.” (Luk 23:19) Aposol Pol i eksplen se sipos yumi mekem samting ya, ‘oltaem yumi stap soemaot ded blong Masta ya blong yumi, gogo bambae hem i kambak.’ (1 Korin 11:26) I stret nomo we yumi tingbaot ded blong Jisas bakegen, from we ded blong Jisas i mekem plante haf blong plan blong Jeova oli kamtru. Sakrafaes blong Jisas nomo hem i fandesen blong bilif blong yumi. Mo from ded blong hem, yumi save kasem gudfala laef long fyuja.
2 Taem Kristin kongregesen i stat kam kasem naoia, ol disaepol blong Jisas oli mekem Memoriol evri yia, blong tingbaot ded blong hem. Long 1899 long Yunited Stet, 2501 oli hivap long Memoriol. Naoia, 91 yia biaen, Naesan 14 i foldaon stret long Tusde, Epril 10, taem san i slip finis. Long Yunaeted Stet, kolosap 2 milyan man bambae oli hivap long lafet ya we yumi mekem evri yia.
Ol Samting We Ol Elda Oli Mas Rere
3 From we miting ya i impoten tumas mo i gat fulap man we bambae oli kam long hem, ol kongregesen oli mas rere gud. (1 Korin 14:40) Hemia i no wan bigfala seremoni we i folem kastom nomo. No gat. Taem yumi ridim Matyu 26:26-30, yumi luk we fasin blong Jisas i isi nomo taem hem i stanemap impoten lafet ya. (1 Korin 11:33-34) Be blong mekem Memoriol long stret fasin, i gat sam samting we yumi mas mekem. ?Wanem ol samting ya?
4 Faswan samting: Blong soemaot respek long Memoriol, ol elda oli mas jekemap sipos bred mo waen i stret. Oli save yusum bred we i no gat is, olsem bred blong ol man Jyu we oli kolem matsat we oli yusum flaoa blong wit mo wora nomo blong mekem. Mo tu, oli mas yusum red waen nomo, we oli no bin ademap wan narafala samting long hem taem oli mekem. Ol waen olsem Kianti, Burgandi, no Klaret, oli gud nomo. Oli save yusum red waen we wan brata i bin mekem long haos blong hem, sipos hem i no bin ademap suga no wan narafala samting long hem.
5 Ol elda oli mas jusum ol brata we oli gat gudfala fasin, mo oli naf long saed blong speret, blong karem bred mo waen. I gud sipos ol brata ya oli elda no man blong givhan. Ol brata ya oli mas save wanem we oli mas mekem, mo stret oda blong mekem ol samting ya. Ol elda oli save storeyan wetem ol brata we bambae oli welkamem ol man, blong eksplenem olsem wanem blong mekem wok ya, mo weples blong putum ol trak tu. Samting ya i impoten moa taem tu no tri kongregesen oli yusum sem haos-kingdom. Mo ol elda oli no mas fogetem blong talem gud long brata we bambae i mekem tok long Memoriol, stret taem mo stret ples we bambae kongregesen i mekem miting ya.—Blong tingtingbak long ol samting we yufala i mas mekem rere long Memoriol, ridim Wajtaoa, (Franis mo Engglis) Februwari 15, 1985, pej 19, mo Februwari 15, 1990, pej 16 kasem 18; Kingdom Wok Blong Yumi, Maj 1989, pej 1.
Yumi Wanwan i Mas Redi
6 Lafet ya we i tabu tumas, hem i save givhan bigwan long yumi evriwan long saed blong speret, sipos yumi rere gud. Yumi save mekem tingting blong yumi i rere. Yumi save ridim ol haf blong Baebol we oli makem finis long 1990 Kalenda Blong Ol Wetnes Blong Jeova, i stat long Epril 5 go kasem Epril 10. Mo tu, yumi save mekem plan blong singaot plante man, mo givhan long olgeta blong kam long impoten miting ya. Mo taem olgeta oli kam long miting, yumi save storeyan wetem olgeta, blong oli harem gud long miting ya.
7 Sipos yumi rere gud, bambae yumi soemaot se yumi tingbaot Memoriol olsem wan bigfala blesing mo jans we yumi gat blong soemaot tangkyu from sakrafaes blong Kraes. Yumi wantem se Memoriol long yia ya bambae i leftemap tingting blong olgeta we oli stap wosip long Jeova. Yumi wantem se hem i givhan long yumi blong kasem sem fasin we Jisas i bin soeamot. Sipos yumi trastem Jeova, olsem Jisas, yumi save winim wol ya, mo kasem presen we i stret nomo long yumi.—Jon 16:33; 2 Pita 1:10; Revelesen 7:9, 10, 14.