Yumi Givimaot Ol Gudfala Samting Blong Speret Long Ol Man
1 Sem mak long Moses, ol Wetnes blong Jeova oli save se ol sas samting blong wol ya oli samting nating nomo long fored blong ol gudfala samting long saed blong speret (Hibrus 11:26). Man i save pem haos, trak, mo fulap samting bakegen wetem mane, be hem i no save pemaot laef, pis blong God, gladhat blong God mo ol blesing we Jeova God nomo i stap givim.
2 Blong kam rijman long saed blong speret, man i mas save gud Baebol mo hem i mas save ol plan blong God. (Kolosi 2:3) Ol gudfala samting long saed blong speret oli naf blong mekem man i harem gud naoia mo oli givhan long man blong trastem ol promes blong God long saed blong fyuja. Yes, fasin blong kasem ol sas samting long saed blong speret i rili wan bigfala jans we yumi gat.
?Olsem Wanem Blong Mekem Ol Narawan Oli Kam Rij Long Saed Blong Speret?
3 Yumi save mekem plante moa man oli kam rij long saed blong speret sipos yumi soemaot Wajtaoa long olgeta, from we magasin ya i tokbaot “ol sas samting blong God we oli haed,” hemia waes blong God. (Proveb 2:4) Long manis Mei, bambae yumi mekem sabskripsen blong Wajtaoa long ol man we yumi faenem long wok blong prij. Sipos yumi stap tingbaot yet olsem wanem Wajtaoa i bin helpem yumi, bambae yumi tekem evri jans blong seremaot magasin ya. (Proveb 3:27) Raetem gud nem blong ol man we oli tekem magasin no ol buklet, mo mekem plan blong go luk olgeta bakegen blong karem ol nyu magasin. Wok ya i save mekem se yufala i gat wan rod blong karem ol magasin.
4 Long Sam 112, Baebol i tokbaot wan gudfala man we i ona long Hae God. Man ya i givimaot ol sas samting we hem i gat long waes fasin. ?Taswe, sem mak long man ya, yumi mas mekem wanem blong kam olsem hem? (Sam 112:1, 3, 9) Yumi mas wok blong lukaot ol “sipsip,” mo givim ol kakae blong speret long olgeta we oli nidim (Matyu 5:3). Taswe, yumi mas tekem evri jans we yumi gat blong talemaot gud nyus.
5 Long sam kantri, wok blong prij long aftenun i karem fulap frut from we plante moa man oli stap long haos blong olgeta. ?Yu yu prij finis 1 no 2 haoa bifo we yu go long buk stadi, no long wan narafala naet long wik? ?From wanem yu yu no mekem plan blong talemaot gud nyus olsem? Sipos yu yu mekem olsem bambae yu yu luksave se yu yu no hadwok blong nating nomo.
6 ?Yu ting se i gat wan prapa taem blong talemaot gud nyus long ples blong wok blong yu? Wan sista i wantem kasem mak olsem, ale hem i putum sam magasin long klia ples insaed long ofis blong hem blong mekem se olgeta we oli wok wetem hem oli luk ol magasin. Bifo 11 klok, hem i seremaot olgeta magasin ya finis. Plante long olgeta man ya oli rili intres long trutok mo biaen, sista ya i mekem 18 sabskripsen.
7 Ogenaesesen blong Jeova mo Baebol-Stadi we yumi wanwan i mekem oli sas moa bitim mane, gol mo ol samting blong bodi we man i save hivimap. Olgeta we oli lukaot ol sas samting long saed blong speret oli save kasem plante blesing from: Oli save kasem wan longfala laef we i gudwan moa, pis mo kwaet taem. Yes, oli save kasem laef we i no save finis tu. (Proveb 3:13-18) Taem yumi go talemaot long ol narawan ol samting we yumi save long saed blong speret, yumi rili soemaot se yumi gat tankyu long ol samting we yumi lanem, mo long sem fasin Jeova i blesem yumi blong olwe.—Proveb 19:17.