Mekem Singsing Long Jeova
1 Yu openem singbuk blong yu (long Franis no long Engglis) long las pej blong hem. ?Yu yu luk wanem? Plante man Livae oli stap singsing long tabu haos blong Jeova. Olgeta oli singsing strong mo oli openemgud maot blong olgeta. Long haos blong Jeova, singsing i tekem wan impoten ples long tru wosip. Long taem blong Deved, moa long 10 % blong olgeta we oli jusum olgeta blong oli wok long haos blong God, olgeta oli kasem wok blong mekem singsing long Jeova. Mo long namba ya, 288 long olgeta oli man blong singsing we oli trengud, “oli savegud long fasin blong singsing.” Yes rili, olgeta oli tinghae long ol singsing we oli mekem long Jeova.—1 Kron. 23:3, 5; 25:7.
2 Long Kristin taem, Jisas mo ol aposol blong hem oli mekem wan singsing long en blong Lodsapa. (Mak 14:26) Aposol Pol i talem long yumi plante taem bakegen se yumi mas mekem singsing long God blong presem hem. Long Kolosi 3:16, hem i talem se: “Yufala i mas letem tok ya blong Kraes, we i fulap gud long ol gudgudfala samting, hem i kam, i stap oltaem long tingting blong yufala. Yufala i mas stap tijim yufala, mo yufala i mas yusum ol waes tok blong soemaot rod long yufala. I gud yufala i stap sing long God long Ol Sam, mo ol him, mo ol sing blong presem God, we long tingting blong yufala, yufala i stap talem tangkyu long hem.”—Ridim tu Efesas 5:19, 20.
3 Fasin blong mekem ol singsing blong Kingdom i wan wei blong presem Jeova. ?Taswe, i stret nomo we yumi singsing long ful hat blong yumi, a? Sipos yumi mekem olsem, yumi presem Jeova. Jeova i stap lesin long ol prea blong yumi, mo long sem fasin, hem i lesin tu long ol singsing we yumi mekem i go long hem. Sipos yumi openemgud maot blong yumi mo yumi singsing bigfala, bambae yumi mekem ol narafala oli glad, be antap bakegen, yumi tu yumi save win bigwan from.
4 Traem tingbaot ol gudfala toktok we i stap long ol singsing blong yumi. Ol tok ya oli halpem yumi ‘blong yumi stap tijim yumi mo yumi yusum ol waes tok blong soemaot rod long yumi.’ !Plante nambawan advaes oli stap long ol singsing blong yumi! Sipos yumi tinghae long ol advaes ya, oli save givhan long yumi blong mekem frut blong tabu speret i wok long laef blong yumi, ale yumi strong inaf blong blokem ol nogud fasin blong wol. Fasin blong ‘sing long ol sing blong presem God, we long tingting blong yumi, yumi stap talem tangkyu long hem’ i save leftemap tingting blong yumi, ale yumi no fraet mo yumi wok strong long wok blong Jeova.
5 Taem hem i statem ol miting wetem faswan singsing, brata we i jeaman bambae i talemaot namba blong singsing, mo tu, hem i save ridim nem blong singsing. Maet samtaem, hem i save tokbaot stampa vas mo givim sam smol tok blong soemaot olsem wanem vas ya i laenap gud wetem ol tok we bambae i kamaot long miting.
6 Ol Kingdom Melodies mo ol kaset we oli gat singsing long piano, oli nambawan rod blong givhan long famle blong yumi blong savegud long ol singsing blong Kingdom. Wan isi wei blong kasem save long myusek blong ol singsing ya, se yumi lesin long ol kaset ya taem yumi stap mekem narafala wok.
7 Baebol i talem plante taem long yumi se yumi mas sing long Papa blong yumi long heven blong presem hem. Jeova i laekem tumas ol man, taswe yumi mas sing long hem long fulhat blong yumi. Long fasin olsem, bambae yumi givim wetnes long ol nyuwan we oli kam long miting, mo bambae oli glad tumas blong stap wetem yumi. Olsem Deved bifo, yumi tu yumi mas singsing mo yumi mekem naes myusek blong presem Jeova.—Sam 108:1-3.