Soemaot Intres Long Ol Narafala Wanwan
1 I klia se Jeova i intres bigwan long ol narafala man. Tingbaot: Hem i givim fulap samting blong lukaot long nid blong ol man we hem i bin wokem. (Jen. 1:29, 30; 2:16, 17; Mat. 5:45; skelem wetem Luk 6:35.) Impoten moa, hem i mekem rod blong yumi save fri long sin mo ded. ?Yu ting se ol samting ya oli soemaot se hem i intres long yumi wanwan?—Jon 3:16.
2 Taem Jisas i stap long wol, hem i folem stret eksampel blong Papa blong hem, nao hem i soemaot intres long ol narafala man wanwan. (Mat. 11:28-30; 1 Pita 2:21) Wan man we hem i gat bigfala sik ya leprosi, hem i talem long Jisas se: “Plis, Masta, sipos yu yu wantem, yu save mekem mi mi gud bakegen.” Nao Jisas i ansa long hem, i se: “Mi mi wantem.” Nao hem i mekem bodi blong man ya i gud bakegen. (Mat. 8:2, 3) Taem Jisas i kam kolosap long taon ya, Naen, i gat wan kampani i stap kamaot long taon we oli stap karem wan dedman, oli go blong berem hem. Hem i pikinini blong wan wido, wan pikinini nomo we hem i gat. Jisas i sore tumas long woman ya, nao hem i mekem boe ya i laef bakegen long ded. (Luk 7:11-15) Ol man oli no askem long Jisas blong hem i soemaot intres long olgeta wanwan. No gat. Jisas hem wan i wantem mekem olsem. Hem i tingbaot ol smol pikinini tu mo i spenem taem wetem olgeta. Neva hem i bisi tumas, we i no gat taem blong toktok gud long narafala mo leftemap tingting blong olgeta.—Mat. 20:31-34; Mak 10:13-16.
FAMLE MO OL FREN
3 Yumi mas traehad blong folem fasin blong Jeova mo Jisas Kraes. Taswe yumi mas lukaot sam rod blong soemaot intres long ol narafala wanwan. Naoia yumi save tingbaot sam jans we yumi gat blong mekem olsem.
4 Samting we i bigfala moa i bitim ol narafala samting: Ol brata oli mas rili intres long ol memba blong famle blong olgeta wanwan. Oli no mas fogetem ol nid blong famle blong olgeta long saed blong speret. Hemia i min se oli mas stadi oltaem wetem famle blong olgeta. Long famle stadi blong yufala, ?yufala i mekem long fasin we olgeta long famle oli save intres long hem, mo we i save givhan long olgeta long laef blong ol? Antap long samting ya, ?yufala i go oltaem wetem ol memba blong famle wanwan, long wok blong prij? ?Taem yufala i mekem olsem, hemia i wan hapi taem? ?Yufala i stap tijim ol pikinini blong yufala blong oli wantem givhan long ol narafala, mo soemaot Kristin lav long ol man raonabaot? Sipos yu yu mared be yu no gat pikinini, ?yutufala nomo i mekem famle stadi oltaem?
5 Yumi wantem givhan long olgeta man long saed blong speret. Be laef blong yumi i bisi. ?Olsem wanem long olgeta long kongregesen we oli gat sam spesel nid? ?Yu yu fogetem blong soemaot intres long olgeta wanwan. (Prov. 3:27; Gal. 6:10) Insaed long Kristin kongregesen, i gat sam boe we oli no gat papa, sam olfala, sam wido, sam sikman, samfala we tingting blong ol i foldaon, samfala we haf bodi blong olgeta i nogud, mo sam narafala we oli gat spesel nid tu. Sipos yumi stap folem eksampel blong Jeova mo Pikinini blong hem, Jisas Kraes, yumi no mas foget blong soemaot intres long olgeta brata mo sista blong yumi wanwan.—1 Korin 10:24; Fil. 2:4; Hib. 13:16.
‘OL SIPSIP’ LONG WOK BLONG PRIJ
6 ?Olsem wanem yumi save soemaot intres long olgeta wanwan we yumi mekem Baebol stadi wetem olgeta? Plante long olgeta oli luksave se oli mas no moa fren wetem ol man blong wol. Nating we yumi bisi, ?be yumi stap soemaot intres long ol studen blong yumi wanwan? Plante long olgeta oli jenisim sam samting finis long laef blong ol. ?Yu yu soemaot long olgeta we yu glad blong fren wetem olgeta? ?Mo olgeta we narafala pablisa i stadi wetem olgeta, yumi traem leftemap tingting blong olgeta tu?—Skelem wetem Mak 10:28-30.
7 ?Yu yu save mekem sam samting moa blong soemaot we yu yu rili intres long ol man wanwan we oli wantem harem gud nyus? ?Bambae yu traehad blong givhan long olgeta blong kasem ol samting we oli nidim long saed blong speret? ?Yu wan, yu save mekem wanem blong go moa long wok blong prij? Sipos yu save mekem moa long wok ya naoia, yu no mas slou blong mekem.—Luk 9:60-62.
8 Yumi mas folem fasin blong Jeova mo Jisas blong soemaot intres long ol narafala wanwan. Yumi mas sore long man, mo yumi mas rili wantem givhan long olgeta, olsem Jisas i mekem long man ya we i gat leprosi. Yes, oltaem yumi mas lukaot ol rod blong soemaot intres long ol narafala wanwan.